Mukanda wa Molomo

1 Ne mpindiewu mema, Molomo, ndi ngenza miandiku ya malu amvua mumona ne mumvua, ne ndi nyinyika ne Mukanda wa Molomo.

2 Ne pabuipi ne tshikondu tshiakasokoka Amalona miandiku bua Mukalenga, wakalua kundi, (mvua pabuipi ne bidimu dikumi, ne mvua mubanga kulonga kakesa mu mushindu wa ndongeshelu wa bantu banyi) ne Amalona wakangambila ne: Ndi mutuila mesu ne udi muana wa bushindama, ne udi ne ntema ya bungi;

3 Bua nanku, pawakumbaja bidimu pabuipi ne makumi abidi ne binayi ndi musua ne uvuluka malu awamonyi bitangila bantu aba; ne pawakumbaja bidimu abi uya ku bulaba bua Antuma, ku kakuna kâbikidibua ne Shima; ne ndi mutekaku mikanunu ya tshijila bua Mukalenga bitangila bantu aba.

4 Ne monayi, newangata bitata bia Nefi bueba nkayeba, ne tshishadi tshiabi neushiya mu muaba udibi; ne neukanuna pa bitata bia Nefi malu awamonyi bitangila bantu aba.

5 Ne mema, Molomo, mmundi kankanunuina ka Nefi, (ne dîna dia tatuanyi divua Molomo) ngakavuluka bintu bionsu bivua Amalona mungelela mukenji.

6 Ne biakalua ne mema, pamvua ne bidimu dikumi ne tshimua, tatuanyi wakaya nanyi ku bulaba bua ku sude, mena ku bulaba bua Zalahemela.

7 Mpala mujima wa bulaba wakalua mubuikidibua ne nzubu, ne bantu bavua bangi pabuipi bu yoyi, bu muvua lusenga lua mu mbuwa.

8 Ne biakalua ne tshidimu etshi mvita yakabanga kuikala pankatshi pa Bena Nefi, bavua bikala ne Bena Nefi ne Bena Yakoba ne Bena Yosefe ne Bena Zolama; ne mvita eyi ivua pankatshi pa Bena Nefi, ne Bena Lamana ne Bena Lemuele ne Bena Yishemaela.

9 Mpindiewu Bena Lamana ne Bena Lemuele ne Bena Yishemaela bavua babikidibua ne mBena Lamana, ne bisumbu bibidi ebi bivua Bena Nefi ne Bena Lamana.

10 Ne biakalua ne mvita yakabanga kuikala munkatshi muabu mu mikalu ya Zalahemela, pabuipi ne mâyi a Sidona.

11 Ne biakalua ne Bena Nefi bakasangisha bungi bunena bua baluma pamua, mena kupita bungi bua binunu makumi asatu. Ne biakalua ne bakaluangana mvita ya bungi mu tshidimu tshimuetshimua etshi, tshiakatamba Bena Nefi Bena Lamana ne tshiakashipabu bangi babu.

12 Ne biakalua ne Bena Lamana bakalekela dijinga diabu, ne ditalala diakabuela mu bulaba; ne ditalala diakashala bua mutantshi wa pabuipi ne bidimu binayi, bualu kakuvua dimatshisha dia mashi to.

13 Kadi bubi buakatampakana pa mpala wa bulaba bujima, mua ne Mukalenga wakangata bayidi bananga benda, ne mudimu wa bishima ne wa diôndopa wakajika bua malu mabi a bantu.

14 Ne kakuvua mapa adi afuma kudi Mukalenga to, ne Nyuma wa Tshijila kakalua kudi muntu to, bua bubi ne dipanga ditabuija diabu.

15 Ne mema, muikala ne bidimu dikumi ne bitanu ne muikala bu ne meji makesa mashindama, bua nanku mvua mukumbudibua kudi Mukalenga, ne ngakalabula ne ngakamanya buimpa bua Yezu.

16 Ne ngakadienzeja bua kuyisha bantu, kadi mukana muanyi muvua mukangibua, ne mvua mukandikibua ne ntshibayishi to; bualu monayi bavua batombokela Nzambi wabu bu muvua mitshima yabu misua; ne Mukalenga wakumbusha bayidi bananga mu bulaba, bua malu mabi abu.

17 Kadi ngakashala munkatshi muabu, kadi mvua mukandikibua bua kubayisha, bua bupapa bua mitshima yabu; ne bua bupapa bua mitshima yabu, bulaba buvua butshipibua bua bualu buabu.

18 Ne bivi ba Gadiantona aba, bavua munkatshi mua Bena Lamana, bavua buwula mu bulaba, mua ne benamu bakabanga kusokoka biuma biabu mu buloba; ne biakalua ne bufinu, bualu Mukalenga uvua mutshipa bulaba, bua kabamonyi mua kubikuata to, anyi kubilama kabidi.

19 Ne biakalua ne kuvua mipongu, ne dipaka dia manga, ne majimbu; ne bukola bua muena bubi buvua pa mpala onsu wa bulaba, mena tô ne kudikumbana dia miaku ya Abinadi, ne ya Samuele Muena Lamana kabidi.