1 Monayi mema, Moloni, ndi njikija miandiku ya tatuanyi, Molomo. Monayi, ndi amu ne bintu bikesa bia kufunda, bintu bivua tatuanyi mumpesha mukenji bua kufunda.

2 Ne mpindiewu biakalua ne kunyima kua mvita minena ne ya kukema ku Kumola, monayi, Bena Lamana bakalondakaja Bena Nefi bavua banyemena ku ditunga dia ku sude, tô ne pakababutulabu bonsu.

3 Ne bakashipa kabidi tatuanyi, ne ndi mena mushala nkayanyi bua kufunda muyuki wa dibungama wa dibutuka dia bantu banyi. Kadi monayi, bakadi baya, ne ndi nkumbaja mukenji wa tatuanyi. Ne ntshiena mumanya to nebanshipa.

4 Bua nanku nemfunda ne nsokoka miandiku mu buloba; ne kabiena ne bualu to ku ngaya.

5 Monayi, tatuanyi uvua muenza miandiku eyi, ne uvua mufunda kipatshila kayi. Ne monayi, mvua mua kutshifunda kabidi bu mema ne muaba pa bitata, kadi ntshiena nawu to; ne ntshiena ne biamua to, bualu ndi nkayanyi. Bakashipa tatuanyi mu mvita, ne malela anyi onsu, ne ntshiena ne balunda anyi kuakuya to; ne ntshiena mumanya ne Mukalenga nealekela ne ngikala ne moyo mutantshi kayi to.

6 Monayi, bidimu nkama inayi bikadi bipita katshia dilua dia Mukalenga ne Mupandishi wetu.

7 Ne monayi, Bena Lamana bakalondakaja bantu banyi, Bena Nefi, ku tshimenga ne ku tshimenga ne ku muaba ne ku muaba, mena tô ne pavuabu kabayiku kabidi to; ne dipona diabu divua dinena; eyowa, dibutuka dia bantu banyi, Bena Nefi, didi dinena ne dia dikema.

8 Ne monayi, tshianza tshia Mukalenga ki tshidi tshidienza. Ne monayi kabidi, Bena Lamana badi mu mvita muntu ne mukuenda; ne dishipa dia bantu ne dimatshisha dia mashi kabiena bijika pa mpala mujima pa bulaba ebu to; ne kakuena muntu udi mumanya ndekelu wa mvita to.

9 Ne mpindiewu, monayi, ntshiena nuambila kabidi bibatangila to, bualu kakuena muntu to, amu Bena Lamana ne bivi badi ne moyo pa mpala wa bulaba.

10 Ne kakuena muntu udi mumanya Nzambi mulelela to amu bayidi ba Yezu, bavua bashala mu bulaba tô ne pakavua bubi bua bantu bunena bikola mu mushindu ne Mukalenga kakalekela ne basomba ne bantu; ne muntu kena mumanya ne badi pa mpala wa bulaba.

11 Kadi monayi, mema ne tatuanyi tuakabamona, ne bakatusadila.

12 Ne ewu yonsu wapeta miandiku eyi, ne wikala kayi uyipîsha bua bualu bua bilema bidimu to, muina awu neamanya malu matamba bunena kupita â. Monayi, ndi Moloni; ne bu kuikala mushindu, mvua kumanyisha malu onsu kunudi.

13 Monayi, ngajikiji kuakula bitangila bantu aba. Ndi muana wa baluma wa Molomo, ne tatuanyi uvua kankanunuina ka Nefi.

14 Ne mmema muina udi usokoka miandiku eyi bua Mukalenga; bitata biayi kabiena ne mushinga to, bua bualu bua mukenji wa Mukalenga. Bualu bulelela udi wamba ne muntu kakubiangata bua kupeta makasa to; kadi miandiku yabi idi ya mushinga mukola; ne ewu yonsu wayituala patoka, yeya Mukalenga neabenesha.

15 Bualu nansha umua kena mua kuikala ne bukola bua kuyituala patoka to amu bimupeshela kudi Nzambi; bualu Nzambi munsua ne bienzeka amu bua butumbi buenda, anyi bua diakalenga dia bantu ba tshipungidi ba Mukalenga ba kala ne bavua batangalajibua kala.

16 Ne mubeneshibua ikala watuala tshintu etshi patoka; bualu netshipatudibua ku mîdima kulua patoka, bilondeshila ku dîyi dia Nzambi; eyowa, netshipatudibua mu buloba, ne netshikenkela mu mîdima, ne kumanyikayi kudi bantu; ne nebienzeka ku bukola bua Nzambi.

17 Ne pikalaku bilema mu mifundu eyi, mbilema bia muntu. Kadi monayi, katuena bamanya tshilema nansha tshimua tshidi mu mifundu eyi to; nansha nanku Nzambi mmumanya malu onsu; bua nanku, udi udi upîsha, lekela adimuka bua kalu kuikala mu njiwu wa kapia ka mu ngena.

18 Ne ewu udi wamba ne: Ndejayi bitata, anyi nenutûtshibua—wamanya bua kalu kuenzeja tshidi tshikandikibua kudi Mukalenga.

19 Bualu monayi, ewu udi ulumbuluisha muenenda lukasa, nealumbuluishibua penda; bualu difutu dienda nedikala bilondeshila ku midimu yenda; bua nanku, ewu udi utûta muenenda, neatûtshibua penda, kudi Mukalenga.

20 Monayi tshidi mifundu ya Nzambi yamba: muntu kadiakutûta to, anyi kadiakulumbuluisha to; bualu Mukalenga udi wamba ne dilumbuluisha ndianyi, ne busombuedi mbuanyi kabidi, ne nemfutulula.

21 Ne muntu udi uleja tshiji ne luntûta lua bungi kudi mudimu wa Mukalenga, ne kudi bantu ba tshipungidi ba Mukalenga badi bena nzubu wa Isalele, ne neamba ne: Netunyangakaja mudimu wa Mukalenga, ne Mukalenga kakuvuluka tshipungidi tshienda tshidiye muenza ne nzubu wa Isalele to—yeya awu udi mu njiwu bua kupudibua ne kuedibua mu kapia;

22 Bualu tuipatshila tua tshiendelela tua Mukalenga netutungunuka ne kuenjibua, tô ne pâkumbajibua malaya enda onsu.

23 Kebululayi mambi a Yeshaya. Monayi, ntshiena mua ku’afunda to. Eyowa, monayi ndi nnuambila ne, bansantu bavua balua kumpala kuanyi, bavua bâsa mu bulaba ebu, nebabila, eyowa, nebabila kudi Mukalenga lufumina mena ku buloba; ne bu mudi Mukalenga ne moyo neavuluka tshipungidi tshivuaye muenza nabu.

24 Ne mmumanya masambila abu, ne avua bua bana babu. Ne mmumanya ditabuija diabu, bualu mu dîna dienda bavua mua kumbusha mikuna; ne mu dîna dienda bavua mua kunyungusha buloba; ne ku bukola bua dîyi dienda bavua mua kuenza ne maloko yikuluka panshi; eyowa, nansha tshikutu tshia kapia kakola katshiakabenza bualu to, anyi nyama ya lonji anyi nyoka ya lulengu kayakabenza bualu to, bua bukola bua dîyi dienda.

25 Ne monayi, masambila abu avua kabidi bua muntu walekela Mukalenga bua kupatula bintu ebi.

26 Ne muntu kena bua kuamba ne kabiakulua to, bualu bushuwa nebilua, bualu Mukalenga wakamba nanku; bualu nebipatukila ku buloba, ku tshianza tshia Mukalenga, ne muntu kakubikandika to; ne nebilua mu dituku diambabu ne bishima bikadi bijika; ne nebilua mena bu mudi muntu wakula ku bafua.

27 Ne nebilua mu dituku diabila mashi a bansantu kudi Mukalenga, bua bipungidi bia musokoku ne midimu ya mîdima.

28 Eyowa, nebilua mu dituku diavidibua bukola bua Nzambi, ne dialua ma’ekelezia manyanguka ne diadibandishawu mu diditambisha dia mitshima yawu; eyowa, mena ne mu dituku diadijula balombodi ba ma’ekelezia ne balongeshi mu diditambisha mu mitshima yabu, tô ne ku dialakana dia kudi bena mu ma’ekelezia abu.

29 Eyowa, nebilua mu dituku diumvua bantu bua kapia, ne bipepela, ne mabungibungi a muishi mu malaba a kubabenda;

30 Ne nebumvua kabidi bua mvita, ne manunganyi a mvita, ne manyungana a buloba mu miaba mishilangana.

31 Eyowa, nebilua mu dituku dikalaku bukoya bua mubidi ne bua mu meji bukola pa mpala wa buloba; nekuikala mashipangana, ne dinyengangana dia bintu, ne dishima, ne didingangana, ne dienda dia masandi, ne mishindu yonsu ya malu mapita bubi; pikalaku ba bungi bâmba ne, Enzayi nanku, anyi enzayi naka, ne kabiena ne bualu to, bualu Mukalenga neanukuatshisha ku dituku dia ndekelu. Kadi diakabi kudi bantu abu, bualu badi bakuatshika mu kanyonga ka bululu ne mu mionji ya malu mabi.

32 Eyowa, nebilua mu dituku dibakibua ma’ekelezia, âmba ne: Luayi kundi, ne bua makuta nenubuikidibua mibi yenu.

33 Ô nuenu bantu bena bubi ne bena tshitshu ne bena nshingu mîminyina, bua tshinyi nudi badiashila ma’ekelezia bua kupeta makasa? Bua tshinyi nuakudimunyi dîyi dia tshijila dia Nzambi, bua nuenu kuvuija dipîshibua kudi anyima yenu? Monayi, difilayi ku mabuluila a Nzambi; bualu monayi, diba nedilua dituku adi dikala bintu bionsu ebi ne tshia kukumbajibua.

34 Monayi, Mukalenga uvua mundeja bintu binena ne bia dikema bitangila bintu bidi ne tshia kulua katataka, dituku adi dialua bintu ebi munkatshi muenu.

35 Monayi, ndi nnuambila bu nudi bikala apa, ne kadi kanuenaku to. Kadi monayi, Yezu Kilisto uvua munuleja kundi, ne ndi mumanya bienzedi bienu.

36 Ne ndi mumanya ne nudi nuenda ne diditambisha mu mitshima yenu; ne bantu bonsu pa kumbusha amu bakesa tshianana badi kabayi badibandisha mu diditambisha dia mitshima yabu to, bavuala bilamba bimpa menamena, bikala ne dialakana, ne luntûta lua bungi, ne budimu, ne dikengesha dia bantu bakuabu, ne mishindu yonsu ya malu mabi; ne ma’ekelezia enu, eyowa, yonsu mena, ikadi milua ne bukoya bua diditambisha dia mitshima yenu.

37 Bualu monayi, nudi bananga makuta, ne bintu bienu, ne bilamba bimpa, ne dilengeja dia ma’ekelezia enu, kupita munudi bananga bapela ne bakengi, babêdi ne batatshishibua.

38 Ô nuenu bena bukoya, nuenu bantu ba mpala ibidi, nuenu balongeshi, badi nudipanyisha bua bintu bidi bikuata dimomena, bua tshinyi nuanyangi ekelezia wa tshijila wa Nzambi? Bua tshinyi nudi ne bundu bua kuangata dîna dia Kilisto pa mitu yenu? Bua tshinyi kanuena nuela meji ne mushinga wa disanka dia didi kadiyi dijika to udi munena kupita wa dikenga adi didi kadiyi ndekelu—mbua butumbi bua ba pa buloba anyi?

39 Bua tshinyi nudi nudilengeja ne bintu bidi kabiyi ne moyo to, ne nulekela ne badi ne nzala, ne bakengi, ne badi butaka, ne babêdi ne batatshishibua bapita pabuipi nuenu kuenu kanuyi nubamona to?

40 Eyowa, bua tshinyi nudi nuteka malu enu a bubi bupita a mu musokoku bua kupeta makasa, ne nudi nudidisha bakaji bakamba muadi kumpala kua Mukalenga, ne nudidisha bana ba nshiya muadi kabidi kumpala kua Mukalenga, ne mashi a batatuabu ne ba bayabu kabidi adi abila kudi Mukalenga afumina ku buloba, bua kuluisha disombuela pa mutu penu?

41 Monayi, muela wa mvita wa busombuedi udi mulembelela pa mutu penu; ne diba didi dilua katataka diasombuelaye mashi a bansantu pa mutu penu, bualu kakulekela mbila yabu kabidi to.