1 Ne mpindiewu biakalua ne mu tshidimu tshia makumi anayi ne tshisatu tshia dikôkesha dia balumbuluishi, kakuvua dikokangana nansha dimua to munkatshi mua bantu ba Nefi amu pa kumbusha diditambisha dikesa divua mu ekelezia, diakenzeja amua matapuluka munkatshi mua bantu, malu akajikijabu ku ndekelu kua tshidimu tshia makumi anayi ne tshisatu.

2 Ne kakuvua dikokangana nansha dimua to munkatshi mua bantu mu tshidimu tshia makumi anayi ne tshinayi; anyi kakuvua dikokangana dia bungi to mu tshidimu tshia makumi anayi ne tshitanu.

3 Ne biakalua ne mu tshidimu tshia makumi anayi ne tshisambombo, eyowa, kuvua dikokangana dia bungi ne matapuluka a bungi; muvuaku bantu ba bungi menamena bakumbuka ku bulaba bua Zalahemela, ne bakaya ku bulaba bua ku node bua kupiana bulaba.

4 Ne bakenza luendu mutantshi mula menamena, mua ne bakalua ku mishiki minena ya mâyi ne misulu ya bungi.

5 Eyowa, ne bakatangalaka mena mu bitupa bionsu bia bulaba, mu bitupa bionsu bivuabu kabayi bashiya patupu ne kabiyi ne mitshi to, bua bungi bua bantu bavua bapiana bulaba kumpala.

6 Ne mpindiewu tshitupa nansha tshimua tshia bulaba tshivua tshikala tshitupu to, amu pa kumbusha bua mitshi; kadi bua bunena bua dibutuka dia bantu bavua bapiana bulaba kumpala bavua babubikila ne kabutu.

7 Ne bualu kuvua amu mitshi ndambu pa mpala wa bulaba, nansha nanku bantu bakayamu bakalua bamanyi bapiluka bua kuenza mudimu nsimenta; bua nanku bakiba nzubu ya nsimenta, muakasombabu.

8 Ne biakalua ne bakavulangana ne bakatangalaka, ne bakaya kumbukila ku bulaba bua ku sude tô ne ku bulaba bua ku node, ne bakatangalaka mu mushindu onsu ne bakabanga kubuikila mpala wa buloba bujima, kumbukila ku mbuwa wa ku sude tô ne ku mbuwa wa ku node, kumbukila ku mbuwa wa ku wesete tô ne ku mbuwa wa esete.

9 Ne bantu bavua mu buloba bua ku node basomba mu ntenta ne mu nzubu ya nsimenta, ne bavua balekela ne mutshi onsu uvua umena pa mpala wa bulaba usasa bua mu matuku alualua bikala ne mitshi bua kuibaka nzubu yabu, eyowa, bimenga biabu, ne ntempelo yabu, ne nsunagoga yabu, ne bitendelelu biabu, ne mishindu yonsu ya bibakilu biabu.

10 Ne biakalua ne bu muvua mitshi kayiyi ipeteka menamena mu bulaba bua ku node to, bakatuma ya bungi ku njila wa buatu.

11 Ne nanku bakapesha bantu ba mu bulaba bua ku node njila ne bibaka bimenga bia bungi, ne mutshi ne ne nsimenta.

12 Ne biakalua ne kuvua ba bungi ba ku bantu ba Amona, bavua bikala Bena Lamana ba ku diledibua, bakaya pabu ku bulaba ebu.

13 Ne mpindiewu kudi miandiku ya bungi ivua milamibua bitangila bienzedi bia bantu aba, kudi ba bungi ba ku bantu aba, idi ne malu a bungi ne idi minena, bibatangila.

14 Kadi monayi, tshitupa tshia lukama tshimua tshia bienzedi bia bantu aba, eyowa, mulubu wa Bena Lamana ne wa Bena Nefi, ne mvita yabu, ne makokangana abu, ne matapuluka abu, ne diyisha diabu, ne mambi abu, ne diambula diabu dia bintu ku buatu ne dienza diabu dia mâtu, ne dibaka diabu dia ntempelo ya bungi, ne dia nsunagoga ya bungi, ne bitendelelu biabu, ne buakana buabu, ne bubi buabu, ne dishipa diabu dia bantu, ne dinyengangana diabu dia bintu bia benda, ne dipawula diabu dia bintu bia benda, ne mishindu yonsu ya malu mapita bubi ne masandi, kabiena mua kukumbana mu mukanda ewu to.

15 Kadi monayi, kudi mikanda ya bungi ne miandiku ya bungi ya mushindu onsu, ne ivua milamibua nangananga kudi Bena Nefi.

16 Ne ivua mifidibua kudi lukongu lua bantu lumua kudi lukuabu kudi Bena Nefi, mena tô ne pakaponabu mu disambuka dia mikenji ne kushibeyibua, kupawudibua, ne kuipatakajibua, ne kunyemeshibua, ne kushipibua, ne kutangalajibua pa mutu pa mpala wa buloba, ne kusangishibua ne Bena Lamana tô ne pavuabu kabayi babikidibua kabidi ne Bena Nefi to, balua bena bubi bupita, ne kabayi nshidimukilu, ne bena tshikisu, eyowa, mena balua Bena Lamana.

17 Ne mpindiewu ndi mpingana ku mulubu wanyi; nanku, bindi muamba bivua bienzeka kunyima kua kuenzeka kua makokangana manena, ne masalu, ne mvita, ne matapuluka, munkatshi mua bantu ba Nefi.

18 Tshidimu tshia makumi anayi ne tshisambombo tshia dikôkesha dia balumbuluishi tshiakajika;

19 Ne biakalua ne kutshivua amu dikokangana dinena mu bulaba, eyowa, mena mu tshidimu tshia makumi anayi ne tshia muanda muteketa, ne tshia makumi anayi ne tshia muanda mukulu kabidi.

20 Nansha nanku Helamana wakasomba mu nkuasa wa tshilumbuluilu ne bululama ne bujalama; eyowa, wakatangila bua kulama mikandu, ne mêyi, ne mikenji ya Nzambi; ne wakenza diba dionsu tshivua tshikala tshiakana ku mesu a Nzambi; ne wakenda mu njila ya tatuenda, mua ne wakalubuluka mu bulaba.

21 Ne biakalua ne wakapeta bana ba baluma babidi. Wakapesha mukulu dîna dia Nefi, ne kudi muakunyi dîna dia Lehi. Ne bakabanga kukola mu Mukalenga.

22 Ne biakalua ne mvita ne makokangana biakabanga kujika mu tshipimu tshikesa munkatshi mua bantu ba Bena Nefi, ku nshikidilu kua tshidimu tshia makumi anayi ne tshia muanda mukulu tshia dikôkesha dia balumbuluishi pa mutu pa bantu ba Nefi.

23 Ne biakalua ne mu tshidimu tshia makumi anayi ne tshia tshitema tshia dikôkesha dia balumbuluishi, kuvua ditalala dilunguluka dishikikibua mu bulaba, bonsu amu pa kumbusha bipungidi bia mu musokoku bivua Gadiantona munyenganganyi wa bintu muteka mu bitupa bia bulaba bivua bikala ne bantu ba bungi, bivua diba adi kabiyi bimanyika kudi bantu bavua ku mutu kua bukalenga to; bua nanku kabavua babibutula mu bulaba to.

24 Ne biakalua ne mu tshidimu tshina etshi kuvua dilubuluka dinena menamena mu ekelezia, mu mushindu wa kuvua bantu binunu biakadisangisha ku ekelezia ne biakatambuishibua bua dikudimuna dia mutshima.

25 Ne dilubuluka dia ekelezia divua dipita bunena, ne mabenesha mapita bungi avua mapumuina bantu, bua mena ne bakuidi banena ne balongeshi bavua bobu bina bakema kupita.

26 Ne biakalua ne mudimu wa Mukalenga wakalubuluka to ne ku ditambuisha ne disangisha dia bantu ba bungi ku ekelezia wa Nzambi, eyowa, mena binunu makumi ne makumi.

27 Tudi tumona nanku ne Mukalenga udi ne lusa kudi bonsu badi, mu bulelela bua mitshima yabu, babikila dîna dienda dia tshijila.

28 Eyowa, tudi tumona ne tshibuelelu tshia mu diûlu tshidi tshiunzulula bua bonsu, mena kudi bitabuija mu dîna dia Yezu Kilisto abu, udi muikala Muana wa Nzambi.

29 Eyowa, tudi tumona ne ewu yonsu wasua udi mua kukuata dîyi dia Nzambi, didi ne moyo ne dia bukola, diabulula budimu ne mateyi ne mayela bionsu bia diabulu pankatshi-nkatshi, ne dilombola muntu wa Kilisto mu njila mufinakana ne mubumbakana dishiya dia lupongu lua kashidi lua dikenga ludi lulongolodibua bua kujibikila bena bubi bupita alu—

30 Ne kufikisha anyima yabu, eyowa, anyima yabu idi kayiyi ifua, ku tshianza tshia baluma tshia Nzambi mu bukalenga bua mu diûlu, bua kusomba panshi ne Abalahama, ne Isaka, ne ne Yakoba, ne ne batatuetu bansantu bonsu, bua kakuyi kupatukamu kabidi.

31 Ne mu tshidimu etshi kuvua disanka dia munanunanu mu bulaba bua Zalahemela, ne ku mpenga yonsu ya mu bitupa bionsu bia bulaba, mena mu bulaba bonsu buvua Bena Nefi basa.

32 Ne biakalua ne kuvua ditalala ne disanka dinena menamena mu tshishadi tshia tshidimu tshia makumi anayi ne tshia tshitema; eyowa, ne kuvua kabidi ditalala dia munanunanu ne disanka dinena mu tshidimu tshia makumi atanu tshia dikôkesha dia balumbuluishi.

33 Ne mu tshidimu tshia makumi atanu ne tshimua tshia dikôkesha dia balumbuluishi kuvua kabidi ditalala, amu pa kumbusha diditambisha diakabanga kubuela mu ekelezia—kabiyi munda mua ekelezia wa Nzambi to, kadi munda mua mitshima ya bantu bavua bamba ne bavua bena mu ekelezia wa Nzambi—

34 Ne bakadibandisha mu diditambisha, mena tô ne bua kukengesha ba bungi ba ku bana babu. Mpindiewu etshi tshivua bubi bunena, tshiakenzeja ne tshitupa tshia bantu tshivua tshipita kudipuekesha tshipeta dikengeshibua dikola, ne tshipututuka mu ntatu ya bungi.

35 Nansha nanku bakajila ne kusambila misangu mivula, ne bakatamba kukolakana mu didipuekesha diabu, ne batamba kukamakana mu ditabuija dia Kilisto, tô ne diwuja dia anyima yabu ne disanka ne disambibua, eyowa, mena ne ku dikezula ne dijidila dia mitshima yabu, dijidila dia dîna didi dienzeka bua bualu bua difila diabu dia mitshima yabu kudi Nzambi.

36 Ne biakalua ne tshidimu tshia makumi atanu ne tshibidi tshiakajika patshi mu ditalala, amu pa kumbusha diditambisha dinena menamena divua dibuela mu mitshima ya bantu; ne divua bua mabanji abu a bungi menamena ne dilubuluka diabu mu bulaba; ne diakakola kudibu ku dituku ne ku dituku.

37 Ne biakalua ne mu tshidimu tshia makumi atanu ne tshisatu tshia dikôkesha dia balumbuluishi, Helamana wakafua, ne muana wa kumpala wenda, Nefi, wakabanga kukôkesha pa muaba wenda. Ne biakalua ne wakasomba mu nkuasa wa tshilumbuluilu ne bululama ne bujalama; eyowa, wakalama mikenji ya Nzambi, ne wakenda mu njila ya tatuenda.