Mukanda wa Helamana

1 Ne mpindiewu mona, biakalua ne ku ntuadijilu wa tshidimu tshia makumi anayi tshia dikôkesha dia balumbuluishi pa mutu pa bantu ba Nefi, kuakabanga kuikala lutatu lukola munkatshi mua bantu ba Bena Nefi.

2 Bualu mona, Paholana uvua mufua, ne muya ku njila wa buloba bonsu; bua nanku kuakabanga kuikala dikokangana dikola bitangila nganyi udi ne bua kuangata nkuasa wa tshilumbuluilu munkatshi mua bana babu ba baluma, bavua bana ba Paholana.

3 Mpindiewu â adi mêna abu bakakokangana bua nkuasa wa tshilumbuluilu, bavua benzeja kabidi bantu bua kukokangana: Paholana, Pânki, ne Pakumeni.

4 Mpindiewu aba kabena bana ba baluma ba Paholana bonsu to (bualu uvua nabu ba bungi), kadi aba mbakakokangana bua nkuasa wa tshilumbuluilu; bua nanku, bakenzeja ditapuluka mu bitupa bisatu munkatshi mua bantu.

5 Nansha nanku, biakalua ne dîyi dia bantu diakasungula Paholana bua ikala mulumbuluishi munena ne ngovena ku mutu kua bantu ba Nefi.

6 Ne biakalua ne Pakumeni, pavuaye mumona ne kavua mua kupeta nkuasa wa tshilumbuluilu to, wakasangisha dîyi dienda ne dîyi dia bantu.

7 Kadi mona, Pânki, ne tshitupa tshia bantu tshivua tshijinga ne ikala ngovena wabu, bakafîka tshiji menamena; bua nanku, kavua kula to bua kuela bantu abu lubombu bua kujula buntomboji bua kuluisha bana babu.

8 Ne biakalua ne bu muvuaye pabuipi ne kuenza nanku, monayi, wakangatshibua ne kulumbuluishibua bilondeshila ku dîyi dia bantu, ne bakamukosela lufu; bualu uvua mujula bantu ku buntomboji ne uvua mukeba bua kunyangakaja budishikaminyi bua bantu.

9 Mpindiewu pakamona bantu bavua bajinga ne ikala ngovena wabu ne bakamukosela lufu, bua nanku bakafîka tshiji, ne monayi, bakatuma umua muntu, Kishikumena, mena ku nkuasa wa tshilumbuluilu wa Paholana, ne wakashipa Paholana pavuaye musomba pa nkuasa wa tshilumbuluilu.

10 Ne basadidi ba Paholana bakamulonda lubilu; kadi monayi, lubilu lua Kishikumena luvua lupita bikola ki bua tshinyi muntu kavua mua ku mupeta to.

11 Ne wakaya kudi bavua bamutuma, ne bakabuela bonsu mu tshipungidi, eyowa, baditshipa mu dîna dia Mufuki wabu wa kashidi, ne kabakuambila muntu to ne Kishikumena uvua mushipa Paholana.

12 Bua nanku, Kishikumena kavua mumanyika munkatshi mua bantu ba Nefi to, bualu uvua mudisokoka mu bivualu diba diakashipaye Paholana. Ne Kishikumena ne tshisumbu tshienda, bavua benza tshipungidi nenda, bakadisangisha munkatshi mua bantu, mu mushindu ne bonsu buabu kabavua mua kupetshibua to; kadi bonsu bakapetshibua bakabakosela lufu.

13 Ne mpindiewu monayi, Pakumeni wakasungudibua, bilondeshila ku dîyi dia bantu, bua kuikala mulumbuluishi munena ne ngovena wa bantu, bua akôkesha pa muaba wa muanabu wa baluma Paholana; ne bivua bilondeshila ku bunema buenda. Ne bionsu ebi bivua bienzeka mu tshidimu tshia makumi anayi tshia dikôkesha dia balumbuluishi; ne tshiakajika.

14 Ne biakalua ne mu tshidimu tshia makumi anayi ne tshimua tshia dikôkesha dia balumbuluishi, ne Bena Lamana bakasangisha pamua musumba wa basalayi kabayi kubala to, ne bakabapaya ne miela ya mvita, ne ne tuela tua mvita, ne ne mata, ne ne miketa, ne ne bifulu bia mvita, ne ne bibuikilu bia pa tshiadi, ne ne ngambu mishilangana ya mushindu onsu.

15 Ne bakapueka kabidi bua bamona mua kuluisha Bena Nefi. Ne bavua balombodibua kudi muntu uvua ne dîna dia Koliantumela; ne uvua kankanunuina ka Zalahemela; ne uvua mutapuluki ku Bena Nefi; ne uvua muntu munena ne wa bukola.

16 Bua nanku, mfumu wa Bena Lamana, uvua ne dîna dia Tubalota, uvua muana wa baluma wa Amolona, utshinka ne Koliantumela, muikala muntu wa bukola, uvua mua kukandamena Bena Nefi, ne bukola buenda ne kabidi ne lungenyi luenda lua bungi, mu mushindu wa ne pamutumaye neatshimuna Bena Nefi—

17 Bua nanku wakabasonsola ku tshiji, ne wakasangisha misumba yenda ya basalayi pamua, ne wakasungula Koliantumela bua kuikala mulombodi wayi, ne wakenzeja ne bapueka ku bulaba bua Zalahemela bua kuluisha Bena Nefi.

18 Ne biakalua ne bua bualu bua dikokangana divula ne lutatu luvula mu buendeshi bua ditunga, kabavua bateka balami bakumbana mu bulaba bua Zalahemela to; bualu bakatshinka ne Bena Lamana kabavua bua kukima kulua munkatshi-nkatshi mua malaba abu bua kubunda tshimenga tshinena tshia Zalahemela to.

19 Kadi biakalua ne Koliantumela wakenda ku mpala kua musumba wa basalayi munena, ne wakalua kudi benamu tshimenga, ne luendu luabu luvua ne lubilu lukola ki bua tshinyi Bena Nefi kabavua ne diba dia kusangisha misumba yabu ya basalayi pamua to.

20 Bua nanku Koliantumela wakashipa balami ku tshibuelelu tshia tshimenga, ne wakabuela mu tshimenga ne musumba wenda wa basalayi mujima, ne wakashipa muntu yonsu uvua ubimanyina bu muluishi, mu mushindu wa kuangata tshimenga tshijima.

21 Ne biakalua ne Pakumeni, uvua mulumbuluishi munena, wakanyema ku mpala kua Koliantumela, mena tô ne ku bimanu bia tshimenga. Ne biakalua ne Koliantumela wakamutûta ku tshimanu, mu mushindu wa wakafua. Ne matuku a Pakumeni akajika nanku.

22 Ne mpindiewu pakamona Koliantumela ne wakakumbana mua kuangata tshimenga tshia Zalahemela, ne kumona ne Bena Nefi bakanyema kumpala kuabu, ne bashibeyibua, ne bakangatshibua, ne kuedibua mu buloko, ne ne wakangata tshisokomenu tshikola kupita mu bulaba bonsu, mutshima wenda wakepeta dikima mua ne uvua pabuipi ne kuya kuluisha bulaba bonsu.

23 Ne mpindiewu mujanguluka mu bulaba bua Zalahemela to, kadi wakaya ne musumba wa basalayi munena, mena mutangila ku tshimenga tshia Buvula; bualu uvua ne dipangadika dia kuya ne kutapa njila wenda ne muela wa mvita, bua amuna mua kupeta bitupa bia bulaba bia ku node.

24 Ne, bualu uvua utshinka ne bukola buabu bunena kupita buvua munkatshi-nkatshi mua bulaba, bua nanku wakaya, kayi ubapesha diba dia bobu kudisangisha pamua to, amu mu tusumbu tukesa; ne bakabaluila mu mushindu ewu ne bakabashipa panshi.

25 Kadi monayi, luendu lua Koliantumela elu munkatshi mua bulaba luvua lutambisha Moloniha bukola bunena kudibu, nansha muvua bungi bua Bena Nefi bavua bashipibua buikala bunena.

26 Bualu monayi, Moloniha uvua utshinka ne Bena Lamana kabavua mua kukima kulua munkatshi-nkatshi mua bulaba to, kadi ne bavua mua kubunda bimenga bia pabuipi ne mikalu bu muvuabu benza tô ne mpindiewu; bua nanku Moloniha wakenzeja ne misumba mikola yabu ya basalayi ilama bitupa ebi bivua pabuipi ne mikalu.

27 Kadi monayi, Bena Lamana kabavua batshina to bilondeshila muvua disua dia Moloniha, kadi bavua balua munkatshi-nkatshi mua bulaba, ne bakangata tshimenga tshilombodi tshivua tshimenga tshia Zalahemela, ne bavua benda kupitshila mu bitupa bia bulaba bia mushinga mukola, benda bashipa bantu ne dishibeya dikola, bonsu baluma, bakaji, ne bana, benda bangata bimenga bia bungi ne bua miaba ya tshisokomenu ya bungi.

28 Kadi pavua Moloniha mujandula bualu ebu, wakatuma Lehi ne musumba wa basalayi katataka ku banyunguluka bua kubakosa makasa kumpala kua bobu kufika ku bulaba bua Buvula.

29 Ne wakenza nanku; ne kumpala kua bobu kufika ku bulaba bua Buvula, wakabakosa makasa ne wakabenza mvita, bua ne bakabanga kupingana panyima batangila ku bulaba bua Zalahemela.

30 Ne biakalua ne Moloniha wakabakosa makasa mu dipingana panyima diabu, ne wakabela mvita, mu mushindu ne biakalua mvita ya mashi menamena; eyowa, ba bungi bavua bashipibua, ne bavua basangana kabidi Koliantumela munkatshi mua bungi bua bavua bashipibua.

31 Ne mpindiewu, monayi, Bena Lamana kabavua mua kupingana panyima eku anyi eku to, anyi ku node, anyi ku sude, anyi ku esete, anyi ku wesete, bualu Bena Nefi bavua babanyungulula ku luseka lonsu.

32 Ne ki muakela Koliantumela Bena Lamana munkatshi mua Bena Nefi nanku, mu mushindu ne bavua mu bukôkeshi bua Bena Nefi, ne bakamushipa yeya muina, ne Bena Lamana bakadifila mu bianza bia Bena Nefi.

33 Ne biakalua ne Moloniha wakangata tshimenga tshia Zalahemela kabidi, ne wakapatuisha Bena Lamana bavua bakuatshibua bena lukanu mu bulaba mu ditalala.

34 Ne ki muakajika tshidimu tshia makumi anayi ne tshimua tshia dikôkesha dia balumbuluishi nanku.