1 Ne biakalua ne mu tshidimu tshia makumi anayi ne tshibidi tshia dikôkesha dia balumbuluishi, kunyima kua Moloniha mushikika kabidi ditalala pankatshi pa Bena Nefi ne Bena Lamana, monayi kakuvua muntu wa kusomba mu nkuasa wa tshilumbuluishi to; bua nanku kuakabanga kuikala dikokangana kabidi munkatshi mua bantu bitangila nganyi uvua ne bua kusomba mu nkuasa wa tshilumbuluishi.

2 Ne biakalua ne Helamana, uvua muana wa baluma wa Helamana, uvua musungudibua bua kusomba mu nkuasa wa tshilumbuluishi, kudi dîyi dia bantu.

3 Kadi monayi, Kishikumena, wakashipa Paholana, wakashala muindila bua kushipa Helamana kabidi; ne uvua ne mpanda ya kudi tshisumbu tshienda, tshivua tshibuela mu tshipungidi nenda ne muntu kamanyi bubi buenda to.

4 Bualu kuvua muntu umua wa dîna dia Gadiantona, uvua mumanya mupiluka muikala wakula bia bungi, ne kabidi bitangila didinga dienda, bua kuenza mudimu wa mu musokoku wa kushipa kua bantu ne kunyengangana bintu; bua nanku wakalua mulombodi wa tshisumbu tshia Kishikumena.

5 Bua nanku wakabela lubombu, ne Kishikumena kabidi, ne bu bobu bamuteka mu nkuasa wa tshilumbuluishi neanyishila aba bavua mu tshisumbu tshienda ne batekibua mu mianzu ya bukola ne bukôkeshi munkatshi mua bantu; bua nanku Kishikumena wakakeba bua kushipa Helamana.

6 Ne biakalua ne bu muvuaye uya mutangila ku nkuasa wa tshilumbuluilu bua kushipa Helamana, monayi umua wa basadidi ba Helamana, uvua mupatuka pambelu butuku, ne uvua, ku diangata tshimfuanyi tshikuabu, dimanya dia malongolola avua malongolodibua kudi tshisumbu etshi bua kubutula Helamana—

7 Ne biakalua ne wakasambakana ne Kishikumena, ne wakamupesha tshimanyinu; bua nanku Kishikumena wakamuambila dijinga dienda, ujinga bua ne amufila ku nkuasa wa tshilumbuluishi bua ashipa Helamana.

8 Ne pakamanya musadidi wa Helamana dijinga dionsu dia mutshima wa Kishikumena, ne muvua kipatshila kenda kikala ka kushipa muntu, ne kabidi muvuatshi kipatshila ka bonsu bavua mu tshisumbu tshienda bua kushipa bantu, ne kuiba, ne kupeta bukalenga, (ne etshi tshivua dilongolola diabu dia musokoku, ne tshipungidi tshiabu) musadidi wa Helamana wakambila Kishikumena: Tuyaku ku nkuasa wa tshilumbuluishi.

9 Mpindiewu ebi biakasankisha Kishikumena menamena, bualu wakatshinka ne neakukumbaja dijinga dienda; kadi monayi, musadidi wa Helamana, bu muvuabu baya ku nkuasa wa tshilumbuluishi, wakatua Kishikumena kela ku mutshima mena, ne wakakuluka mufua kakuyi mukemu to. Ne wakanyema ne wakambila Helamana bintu bionsu bivuaye mumona, ne mumvua, ne muenza.

10 Ne biakalua ne Helamana wakatuma bantu bua bakuata tshisumbu tshia banyengi ne bashipi ba bantu ba mu musokoku etshi, bua babashipa bilondeshila ku mikenji.

11 Kadi monayi, pavua Gadiantona mumona ne Kishikumena kavua mupingana to, wakatshina ne kashipibu; bua nanku wakenzeja ne tshisumbu tshienda tshimulonda. Ne bakapatuka lubilu mu bulaba, ku njila wa musokoku, batangila mu tshipela; ne nanku pakatuma Helamana bantu bua kubakuata kabavua mua kupetshibua muaba nansha umua to.

12 Ne nengamba malu a bungi a Gadiantona ewu kunyima. Ne ki muakajika tshidimu tshia makumi anayi ne tshibidi tshia dikôkesha dia balumbuluishi pa mutu pa bantu ba Nefi nanku.

13 Ne monayi, ku ndekelu kua mukanda ewu nenumona ne Gadiantona ewu wakadileja muikala bualu bua ditonkoka, eyowa, pabuipi ne dibutuka dijima dia bantu ba Nefi.

14 Monayi ntshiena ngamba ne ndekelu wa mukanda wa Helamana to, kadi ndi ngamba ne ndekelu wa mukanda wa Nefi, kundi muangatshila mulubu onsu undi mufunda.