1 Ne mpindiewu, bana betu bananga, monayi, ndi nnumanyisha ne pa kumbusha nuenu bakudimuna mutshima nzubu yenu neinushala mitupu.

2 Eyowa, pa kumbusha nuenu bakudimuna mutshima, bakaji benu nebikala ne bualu bua ku kudidila mu dituku dikalabu bamusha bana; bualu nenuidikija bua kunyema ne kakuakuikala muaba nansha umua wa kusokomena to; eyowa, ne diakabi kudi badi bikala ne mafu, bualu nebikala ne bujitu ne kabayi mua kunyema to; bua nanku, nebadiatshîbua ne nebashiyibua bafua.

3 Eyowa, diakabi kudi bantu aba badibu babikila ne Bena Nefi pa kumbusha bobu bakudimuna mutshima, pâmonabu bimanyinu ebi ne malu a dikema bionsu bialejibua kudibu; bualu monayi, bavua bikala bantu basungula kudi Mukalenga; eyowa, uvua munanga bantu ba Nefi, ne kabidi uvua mubapesha dinyoka; eyowa, mu matuku a malu abu mabi uvua mubapesha dinyoka bualu uvua mubananga.

4 Kadi monayi bana betu, udi mukina Bena Lamana bualu bienzedi biabu bivua bikala bibi diba dionsu, ne bivua nanku bua malu mabi a ngikadilu wa batatuabu. Kadi monayi, lupandu ludi lulua kudibu ku njila wa diyisha dia kudi Bena Nefi; ne bua kipatshila aka Mukalenga wakalepesha matuku abu.

5 Ne ndi musua ne numona ne tshitupa tshiabu tshinena tshidi tshienza mudimu wabu, ne badi benda ne kudilama kumpala kua Nzambi, ne badi batangila bua kulama mikenji yenda ne mikandu yenda ne mêyi enda bilondeshila ku mikenji ya Mose.

6 Eyowa, ndi nnuambila, ne tshitupa tshinena tshiabu tshidi tshienza nanku, ne badi benza muabu monsu ne dinanukila kabayi batshioka to bua bafikisha tshishadi tshia bana babu ku dimanya dia bulelela; bua nanku kudi ba bungi bavua badikumbaja ku bungi buabu dituku dionsu.

7 Ne monayi, nudi bamanya nuenu nkayenu, bualu nuvua badimuenatshi ne, bonsu babu bakafika ku dimanya dia bulelela, ne ku dimanya dia ngikadilu mibi ne ya malu a bubi bupita ya batatuabu, ne badi balombodibua ku ditabuija mifundu ya tshijila, eyowa, mambi a bambi bansantu, adi mafundibua, adi abalombola ku ditabuija dia Mukalenga, ne ku dikudimuna dia mutshima, ditabuija ne dikudimuna dia mutshima bidi bibatuadila dishintuluka dia mutshima—

8 Nanku, bonsu badi balua ku dimanya dia bulelela ebu, nudi bamanya nuenu nkayenu ne badi bakamakana ne basuminyina mu ditabuija, ne mu tshintu tshivuabu benjibua badikadila.

9 Ne nudi bamanya kabidi ne bakajîka biluilu biabu bia mvita, ne badi batshina bua kubiambula ne mu mushindu mukuabu kabalu kuenza mibi to; eyowa, nudi mua kumona mudibu batshina bua kuenza mibi—bualu monayi nebadilekela bua bena lukuna babu babadiata ne babashipa, ne kabakujula miela yabu ya mvita bua kubaluisha to, ne nanku bua ditabuija diabu mu Kilisto.

10 Ne mpindiewu, bua disuminyina diabu padibu bitabuija tshintu tshidibu bitabuija, bualu bua dikamakana diabu pakamanabu kuengejibua, monayi, Mukalenga neababenesha ne nealepesha matuku abu, nansha bua malu mabi abu—

11 Eyowa, nansha bobu bashinguluka mu dipanga dia ditabuija Mukalenga nealepesha matuku abu, tô ne pâlua tshikondu tshivua batatuetu bamba, ne kabidi muambi Zenose, ne bambi bakuabu ba bungi, bitangila dipinguluja dia bana betu, Bena Lamana, kabidi ku dimanya dia bulelela—

12 Eyowa, ndi nnuambila, ne mu bikondu bia ku ndekelu malaya a Mukalenga avua mafidibua kudi bana betu, Bena Lamana; ne nansha bua ntatu ya bungi ikalabu nayi, ne nansha pânyemeshibuabu ku muaba ne ku muaba pa mpala wa buloba, ne pîpatshibuabu, ne pâtûtshibuabu ne pâtangalajibuabu kula, ne kabayi ne muaba wa kusokomena to, Mukalenga neikala ne lusa kudibu.

13 Ne ebi bidi bilondeshila ku buambi, ne nebafikishibua kabidi ku dimanya dilelela, didi dikala dimanya dia Musungidi wabu, ne mulami wa mikoku wabu munena ne mulelela, ne nebabadibua munkatshi mua mikoku yenda.

14 Bua nanku ndi nnuambila ne, nebikala bimpa buabu kupita buenu pa kumbusha nuenu bakudimuna mutshima.

15 Bualu monayi, bu midimu ya dikema yakanulejabu mikala mibaleja, eyowa, bobu badi bashinguluka mu dipanga dia ditabuija bua ngikadilu ya batatuabu, nudi mua kudimuena ne kabavua kabidi kushinguluka mu dipanga dia ditabuija to.

16 Bua nanku, Mukalenga udi wamba ne: Ntshiakubabutula bonsu to, kadi nengenza ne mu dituku dia lungenyi luanyi nebapingana kabidi kundi, mudi Mukalenga wamba.

17 Ne mpindiewu monayi, Mukalenga udi wamba, bua bantu ba Bena Nefi, ne: Pikalabu kabayi bakudimuna mutshima, ne kabayi batangila bua kuenza disua dianyi to, nembabutula bonsu, ki mudi Mukalenga wamba nanku, bua dipanga ditabuija diabu nansha bua midimu ya dikema ya bungi imvua muenza munkatshi muabu; ne ne bushuwa bonsu bu mudi Mukalenga ne moyo bintu ebi nebienzeka, Mukalenga udi wamba.