1 Ne biakalua ne mu tshidimu tshia momumua etshi, monayi, Nefi wakafila nkuasa wa tshilumbuluilu kudi muntu muena dîna ne Sezolama.

2 Bualu bu muvua mêyi abu ne makalenga abu mashikikibua kudi dîyi dia bantu, ne bavua basungula bua kuenza bubi bavua bapita bavua basungula bua kuenza buimpa bungi, bua nanku bavua bikala baboba bua dibutuka, bualu mêyi abu avua manyanguka.

3 Eyowa, ne ebi kabivua bionsu to; bavua bikala bantu ba nshingu mîminyina, mu mushindu wa ne kabavua mua kubakokesha kudi mikenji anyi kudi bululama to, amu pikalabi bua dibutuka diabu.

4 Ne biakalua ne Nefi uvua mutshioka bua malu mabi abu; ne wakalekela nkuasa wa tshilumbuluilu, ne wakangata mudimu wa kuyisha dîyi dia Nzambi mu tshishadi tshionsu tshia matuku enda, ne muanabu Lehi penda, mu tshishadi tshionsu tshia matuku enda;

5 Bualu bakavuluka mêyi avua tatuabu Helamana mubambila. Ne â ki mêyi akambaye:

6 Monayi, bana banyi ba baluma, ndi njinga ne nuvuluka bua kulama mikenji ya Nzambi; ne ndi musua ne numanyisha bantu mêyi â. Monayi, ndi munupesha mêna a baledi betu ba kumpala bakapatuka ku bulaba bua Yelushalema; ne mvua muenza nanku bua ne panudi nuvuluka mêna enu nubavuluka; ne panudi nubavuluka nuvuluka midimu yabu; ne panudi nuvuluka midimu yabu numanya muvuabi bamba ne, ne bifunda kabidi ne, ne ivua mimpa.

7 Bua nanku, bana banyi ba baluma, ndi musua ne nuenza bidi bimpa, bua biambibua buenu, ne bifundibua kabidi, mena bu muvuabi biambibua ne bifundibua buabu.

8 Ne mpindiewu bana banyi ba baluma, monayi ndi ne kakesa kakuabu kandi njinga kunudi, dijinga didi dikala ne, kanuenji bintu ebi bua nuenu kudileja to, kadi ne nuenza bintu ebi bua nuenu kudibutshila bintu bia mushinga mu diûlu, eyowa, tshidi tshikala tshia tshiendelela, ne tshidi katshiyi tshifubidila to; eyowa, bua nupeta dipa dia mushinga mukola dia moyo wa tshiendelela adi, ditudi ne bualu bua kutshinka ne Nzambi uvua mudipesha batatuetu.

9 Ô vulukayi, vulukayi, bana banyi ba baluma, mêyi avua Mfumu Benyamina muambila bantu benda; eyowa, vulukayi ne kakuena mushindu mukuabu anyi njila mukuabu nansha umua udi muntu mua kupandishibua to, amu ku mashi a bupikudi dia Yezu Kilisto, walua; eyowa, vulukayi ne udi ulua bua kusungila ba pa buloba.

10 Ne vulukayi kabidi mêyi akamba Amuleke kudi Zêzeloma, mu tshimenga tshia Amoniha; bualu wakamuambila ne bushuwa Mukalenga nealua bua kusungila bantu benda, kadi ne kakulua bua kubasungila mu mibi yabu to, kadi bua kubasungila ku mibi yabu.

11 Ne Tatu udi mumupesha bukola bua kubasungila ku mibi yabu bua bualu bua dikudimuna dia mutshima; bua nanku uvua mutuma banjelu benda bua kumanyisha lumu lua mabangu a dikudimuna dia mutshima, didi dituala ku bukola bua Musungidi, bua lupandu lua anyima yabu.

12 Ne mpindiewu, bana banyi ba baluma, vulukayi, vulukayi ne mpa dibua dia Musungidi wetu, udi muikala Kilisto, Muana wa Nzambi, ki panudi ne tshia kuibaka tshishimikidi tshienu; bua ne pâtuma diabulu mpepela yenda mikola, eyowa, miketa yenda munda mua mvunda, eyowa, pânutûta mvula wenda wa mabua ne mvula wenda wa tshipepela mukola, kabiakuikala ne bukola pamutu penu to bua kunupulumuna panshi tô ne ku lupongu lua dikenga ne diakabi kadiyi ndekelu, bualu dibua dinudi bibaka pa mutu padi, didi dikala tshishimikidi tshia bushuwa, tshishimikidi tshidi bantu bobu bibakapu kabena mua kupona to.

13 Ne biakalua ne eyi ki mêyi akalongesha Helamana bana benda ba baluma; eyowa, wakabalongesha bintu bia bungi bidi kabiyi bifunda to, ne kabidi bintu bia bungi bidi bikala bifunda.

14 Ne bakavuluka mêyi enda; ne bua nanku bakaya, ne bakalama mikenji ya Nzambi, bua kulongesha dîyi dia Nzambi munkatshi mua bantu ba Nefi, kubangila ku tshimenga tshia Buvula;

15 Ne apu tô ne ku tshimenga tshia Gidi; ne ku tshimenga tshia Gidi tô ne ku tshimenga tshia Muleke;

16 Ne mena ku tshimenga tshimua tô ne ku tshikuabu, tô ne muakayabu munkatshi mua bantu ba Nefi bonsu bavua bikala mu buloba bua ku sude; ne aku tô ne ku bulaba bua Zalahemela, munkatshi mua Bena Lamana.

17 Ne biakalua ne bakayisha ne bukola bua bungi, mua ne bakapuwisha ba bungi ba ku batapuluki bavua bafumina ku Bena Nefi abu, mua ne bakalua ne bakatonda mibi yabu ne bakatambuisha bualu bakakudimuna mutshima, ne bakapingana katataka kudi Bena Nefi bua kukeba bua kulongolola bubi buvuabu benzela Bena Lamana.

18 Ne biakalua ne Nefi ne Lehi bakayisha Bena Lamana ne bukola ne bukôkeshi bua bungi kupita, bualu bavua ne bukola ne bukôkeshi bikala bibapesha bua kuakulabu, ne tshivuabu ne bua kuamba tshivua kabidi tshibapesha—

19 Bua nanku bakakula ku dikema dikola dia Bena Lamana, ku dibitabujija, mua ne kuvua binunu muanda mukulu bia ku Bena Lamana bavua mu bulaba bua Zalahemela ne ku mpenga yabu yonsu, bakatambuishibua ku dikudimuna dia mitshima, ne bakitabujijibua bitangila bubi bua ngikadilu ya batatuabu.

20 Ne biakalua ne Nefi ne Lehi bakatungunukila apu bua kuya ku bulaba bua Nefi.

21 Ne biakalua ne bakakuatshibua kudi musumba wa basalayi wa Bena Lamana ne kuedibua mu buloko; eyowa, mena buloko bumua abu buvua Amona ne bana babu bedibua kudi basadidi ba Limihi.

22 Ne kunyima kua kubelabu mu buloko matuku a bungi kabayi ne biakudia to, monayi, bakabuela mu buloko bua kubangata bua babashipa.

23 Ne biakalua ne Nefi ne Lehi bavua banyunguludibua ku mpenga yonsu bikala bu kudi kapia, mena mu mushindu wa kabakakima bua kubatua bianza to bua bôwa ne kabalu kôshika. Nansha nanku, Nefi ne Lehi kabakôshika to; ne bavua bikala bu ne bavua bikala bimana munkatshi mua kapia ne kabavua bôshika to.

24 Ne pakamonabu ne dikunji dia kapia divua dibanyungulula ku mpenga yonsu, ne kadivua dibôsha to, mitshima yabu yakapeta dikima.

25 Bualu bakamona ne Bena Lamana kabakakima bua kubatua bianza to; anyi kabakakima kulua pabuipi nabu to, kadi bakimana bu ne bavua baluishibua tumama bua dikatshila diabu.

26 Ne biakalua ne Nefi ne Lehi bakimana ne bakabanga kubambila, bamba ne: Kanutshinyi to, bualu monayi, Nzambi ki udi munuleja tshintu tshia kukema etshi, mudi mulejibua ne kanuena mua kutulenga ne bianza bienu bua kutushipa to.

27 Ne monayi, pakambabu mêyi â, buloba buakanyungana menamena, ne bimanu bia buloko biakanyungana bu bivua pabuipi pa kukuluka pa buloba; kadi monayi, kabiakakuluka to. Ne monayi, bavua mu buloko bavua Bena Lamana ne Bena Nefi bavua patapuluki.

28 Ne biakalua ne ditutu dia mîdima yakababuikila, ne bôwa bunena budi butshingisha bikola buakalua kudibu.

29 Ne biakalua ne kuakalua dîyi bu divua kûlu kua ditutu dia mîdima, diamba ne: Kudimunayi mutshima, kudimunayi mutshima, ne kanukebi kabidi bua kushipa basadidi banyi bamvua mutuma bua kunumanyisha mukenji muimpa to.

30 Ne biakalua ne pakumvuabu dîyi edi, ne pakamonabu ne kadivua dîyi dia dikubakuba to, anyi dîyi dia mutoyi munena wa diyoyi, kadi monayi, divua dîyi diteketa dia lutulu lujima, bu divua dinungana, ne divua ditubula tô ne mu anyima mena—

31 Ne nansha muvua dîyi dikala dia kalolu, monayi buloba buakanyungana menamena, ne bimanu bia buloko kazakala kabidi, bu bivua pabuipi pa kukuluka pa buloba; ne monayi ditutu dia mîdima, divua dibabuikila, kadiakatangalaka to—

32 Ne monayi dîyi diakalua kabidi, diamba ne: Kudimunayi mutshima, kudimunayi mutshima, bualu bukalenga bua mu diûlu bukadi pabuipi; ne kanukebi kabidi bua kushipa basadidi banyi to. Ne biakalua ne buloba buakanyungana kabidi, ne bimanu biakazakala.

33 Ne dîyi diakalua kabidi musangu muisatu, ne diakabambila mêyi a dikema idi muntu kayi bua kuamba to; ne bimanu biakazakala kabidi, ne buloba buakanyungana bu buvua pabuipi ne kuabuluka pankatshi-nkatshi.

34 Ne biakalua ne Bena Lamana kabavua mua kunyema to bua ditutu dia mîdima divua dibabuikila; eyowa, ne kabavua kabidi mua kunyungana to bua bôwa buvua bubakuata.

35 Mpindiewu kuvua muntu umua munkatshi muabu uvua Muena Nefi ku diledibua, uvua musangu mukuabu muikala muena ku ekelezia wa Nzambi kadi uvua mutapuluki kudibu.

36 Ne biakalua ne wakakudimuka, ne monayi, wakamona mpala ya Nefi ne Lehi munda mua ditutu dia mîdima; ne monayi, bavua bakenka menamena, mena bu mpala ya banjelu. Ne wakamona ne bavua babandisha mesu abu mu diûlu; ne bavua benza bu bavua bakula ne anyi bela mbila kudi muntu uvuabu bamona.

37 Ne biakalua ne muntu ewu wakabila kudi musumba wa bantu, bua bakudimuka ne batangila. Ne monayi, bavua bapeshibua bukola ne bakakudimuka ne bakatangila; ne bakamona mpala ya Nefi ne Lehi.

38 Ne bakambila muntu ne: Mona, bintu bionsu ebi bidi bileja tshinyi, ne bantu aba badi bayukila ne nganyi?

39 Mpindiewu dîna dia muntu ewu divua Aminadaba. Ne Aminadaba wakabambila ne: Badi bayukila ne banjelu ba Nzambi.

40 Ne biakalua ne Bena Lamana bakamuambila ne: Netuenza tshinyi, bua ditutu dia mîdima edi diumbuka kutubuikila?

41 Ne Aminadaba wakabambila ne: Kudimunayi mutshima, ne nubila kudi dîyi, mena tô ne panuapeta ditabuija mu Kilisto, uvua mulongesha Alama, ne Amuleke, ne Zêzeloma; ne panuenza nanku, ditutu dia mîdima nediumbuka kunubuikila.

42 Ne biakalua ne bakabanga bonsu kubila kudi dîyi dia uvua munyungusha buloba; eyowa, bakabila mena tô ne pakumbuka ditutu dia mîdima.

43 Ne biakalua ne pakakupabu mesu abu ku mpenga yabu yonsu, ne bakamona ne ditutu dia mîdima divua diumbuka ku babuikila, monayi, bakamona ne bavua banyunguludibua, eyowa muntu yonsu, ku dikunji dia kapia.

44 Ne Nefi ne Lehi bavua munkatshi muabu; eyowa, bavua banyunguludibua; eyowa, bavua bu munkatshi mua ndimi ya kapia, kadi kakavua kabôsha to, anyi kakavua kakuata bimanu bia buloko to; ne bavua buwula ne disanka didi kadiyi bua kuamba to ne luwula ne butumbi.

45 Ne monayi, Nyuma wa Tshijila wa Nzambi wakalua panshi mufuma mu diûlu, ne wakabuela mu mitshima yabu, ne bavua buwula bu ne kapia, ne bavua mua kuamba mêyi a dikema.

46 Ne biakalua ne dîyi diakalua kudibu, eyowa, dîyi dimpa, bu divua dinungana, diamba ne:

47 Ditalala, ditalala dikala kunudi, bua ditabuija dienu kudi Munanga Mutamba Wanyi, uvua katshia ku tshishimikidi tshia buloba.

48 Ne mpindiewu, pakumvuabu nanku bakabandisha mesu abu bu bua kumona kuvua dîyi diluila; ne monayi, bakamona diûlu diunzuluka; ne banjelu bakalua panshi bapatukila mu diûlu ne bakabasadila.

49 Ne kuvua bantu pabuipi ne nkama isatu bavua bamona ne bumvua bintu ebi; ne bakabambila ne baya ne kabakemi to, anyi kabedi mpata to.

50 Ne biakalua ne bakaya, ne bakalongesha bantu, bamanyisha bintu bionsu bivuabu bumvua ne bamona ku mpenga yonsu ya mu bitupa bionsu bia bulaba, mua ne tshitupa tshinena tshia Bena Lamana tshivua tshitabujijibua buabu, bua bunena bua majadikibua avuabu bapeta.

51 Ne bonsu bavua bitabujijibua bakalekela biluilu biabu bia mvita panshi, ne lukinu luabu ne ngikadilu ya batatuabu kabidi.

52 Ne biakalua ne bakapesha Bena Nefi malaba adibu bangata.