1 Ne biakalua ne mu tshidimu tshia makumi atanu ne tshinayi kuvua matapuluka a bungi mu ekelezia, ne kuvua kabidi dikokangana munkatshi mua bantu, mu mushindu wa dimatshisha dia mashi dia bungi.

2 Ne bakashipa tshitupa tshia bantomboji ne bakatshinyemesha mu bulaba, ne bakaya kudi mfumu wa Bena Lamana.

3 Ne biakalua ne bakakeba bua kusonsola Bena Lamana ku mvita bua kuluisha Bena Nefi; kadi monayi, Bena Lamana bavua ne bôwa menamena, mu mushindu wa ne bakabenga kuteleja mêyi a batapuluki abu.

4 Kadi biakalua ne mu tshidimu tshia makumi atanu ne tshisambombo tshia dikôkesha dia balumbuluishi, kuvua batapuluki bakabanda kudi Bena Lamana bafumina kudi Bena Nefi; ne bakapeta tshipeta tshimpa kudi bakuabu bua dibasonsola ku tshiji kudi Bena Nefi; ne bavua tshidimu tshionsu atshi badilongolola bua mvita.

5 Ne mu tshidimu tshia makumi atanu ne tshia muanda muteketa bakapueka bua kuluisha Bena Nefi mvita, ne bakatuadija mudimu wa lufu; eyowa, mua ne mu tshidimu tshia makumi atanu ne tshia muanda mukulu tshia dikôkesha dia balumbuluishi bakapeta tshipeta tshimpa ne bakangata bulaba bua Zalahemela; eyowa, ne malaba onsu kabidi, mena tô ne ku bulaba buvua pabuipi ne bulaba bua Buvula.

6 Ne bakanyemesha Bena Nefi ne misumba ya basalayi ya Moloniha mena tô ne ku bulaba bua Buvula;

7 Ne aku bakadikolesha bua kuluisha Bena Lamana, kumbukila ku mbuwa wa ku wesete, mena tô ne ku esete; bualu bivua luendu lua dituku dimua bua Muena Lamana, pa mushonyi uvuabu bakolesha ne pavuabu bateka misumba yabu ya basalayi bua kusungidila ditunga diabu dia ku node.

8 Ne batapuluki ba Bena Nefi abu, ne diambuluisha dia musumba wa basalayi wa Bena Lamana ba bungi, bavua bangata bitupa bionsu bia Bena Nefi bivua mu bulaba bua ku sude. Ne bionsu ebi bivua bienzeka mu bidimu bia makumi atanu ne tshia muanda mukulu ne tshia makumi atanu ne tshia tshitema bia dikôkesha dia balumbuluishi.

9 Ne biakalua ne mu tshidimu tshia makumi asambombo tshia dikôkesha dia balumbuluishi, Moloniha ne misumba yenda ya basalayi bakapeta tshipeta tshimpa ne bakangata bitupa bia bungi bia bulaba; eyowa, bakangatulula bimenga bia bungi bivua bipona mu bianza bia Bena Lamana.

10 Ne biakalua ne mu tshidimu tshia makumi asambombo ne tshimua tshia dikôkesha dia balumbuluishi bakapeta tshipeta tshimpa ne bakangatulula mena tshia bibidi tshia malaba abu onsu.

11 Mpindiewu dijimija edi dinena dia Bena Nefi, ne dishipeya dikola divua dikala munkatshi muabu, kabivua bienzeka to bu kabivua bikala bua bubi buabu ne bualu buabu bua bubi bupita bivua bikala munkatshi muabu to; eyowa, ne bivua kabidi munkatshi mua bavua bamba ne bavua bikala bena mu ekelezia wa Nzambi abu.

12 Ne bivua bua diditambisha divua mu mitshima yabu, bua mabanji abu mapita, eyowa, bivua dikengesha diabu dia bapela, bualu bavua bapala bavua ne nzala biakudia biabu, bualu bavua bapala bavua butaka bilamba biabu, ne bualu bavua batûta bana babu badipuekeshi mapi pa matama, bualu bavua baseka bintu bivua bivua bikala bia tshijila, bavila nyuma wa buambi ne wa dibuluila, bualu bavua bashipa bantu, bapawula bintu bia benda, bashima, biba, benda masandi, bualu bavua bajuka ne makokangana manena, ne bualu bavua batomboka baya ku bulaba bua Nefi, munkatshi mua Bena Lamana—

13 Ne bua bubi buabu bunena ebu, ne didiamba diabu bua makanda abu, wakalekedibua ne makanda abu nkayabu; bua nanku kabakalubuluka to, kadi bakatatshishibua ne kutûtshibua, ne kunyemeshibua ku mpala kua Bena Lamana, tô ne pakajimijabu bukôkeshi bua pabuipi ne malaba abu onsu.

14 Kadi monayi, Moloniha wakayisha bantu bintu bia bungi bua malu mabi abu, ne Nefi ne Lehi, bavua bikala bana ba baluma ba Helamana, bakayisha pabu bantu bintu bia bungi, eyowa, ne bakabambila ku Nyuma bintu bia bungi bitangila malu mabi abu, ne biabaluila pikalabu kabayi bakudimuna mutshima ku mibi yabu to.

15 Ne biakalua ne bakakudimuna mutshima, ne monsu muakakudimunabu mutshima bakabanga kulubuluka.

16 Bualu pakamona Moloniha ne bavua bakudimuna mutshima wakidikija kubalombola ku muaba ne ku muaba, ne ku tshimenga ne ku tshimenga, mena tô ne pakangatululabu tshia bibidi tshia bintu biabu ne tshia bibidi tshia malaba abu onsu.

17 Ne ki muakajika tshidimu tshia makumi asambombo ne tshimua tshia dikôkesha dia balumbuluishi nanku.

18 Ne biakalua ne mu tshidimu tshia makumi asambombo ne tshimua tshia dikôkesha dia balumbuluishi, Moloniha kavua mua kuangata kabidi miaba mikuabu kudi Bena Lamana to.

19 Bua nanku bakalekela dijinga diabu dia kuangata tshishadi tshia malaba abu, bualu Bena Lamana bavua bapita bungi bua ne biakalua bikola bua Bena Nefi kuikala ne bukôkeshi pa mutu pa Bena Lamana; bua nanku Moloniha wakenzela misumba yenda ya basalayi yonsu bua kukuba bitupa bivuaye muangata abi.

20 Ne biakalua ne, Bena Nefi bakumvua bôwa bikola bua bualu bua bunena bua bungi bua Bena Lamana, ne kabalu kubatamba bukola, ne kubadiata, ne kubashipa, ne kubabutula.

21 Eyowa, bakabanga kuvuluka mambi ya Alama, ne miaku ya Mosiya kabidi; ne bakamona ne bavua bantu ba nshingu mîminyina, ne ne bavua bamona ne mikenji ya Nzambi ivua patupu;

22 Ne bavua bakudimuna ne badiatakaja muinshi mua makasa abu mêyi a Mosiya, anyi tshivua Mukalenga mumuambila bua kupesha bantu; ne bakamona ne mêyi abu avua malua manyanguka, ne bavua balua bantu babi, mu mushindu wa bavua bikala bantu babi bu muvua Bena Lamana.

23 Ne bua malu mabi abu ekelezia uvua mubanga kushinguluka; ne bakabanga kubenga kuitabuija nyuma wa buambi ne nyuma wa dibuluila; ne bitungu bia Nzambi bivua bibimanyina kumpala kuabu.

24 Ne bakamona bavua balua bateketa, bu mudi bana babu Bena Lamana, ne Nyuma wa Mukalenga kakabakuba kabidi to; eyowa, uvua mumbuka kudibu bualu Nyuma wa Mukalenga kena usomba mu ntempelo idi kayiyi ya tshijila to—

25 Bua nanku Mukalenga wakalekela kubakuba ne bukola buenda bua tshishima ne budi kabuyi kufuanyikija to, bualu bavua bapona mu ngikadilu wa dipanga ditabuija ne bubi budi butshingisha; ne bakamona ne Bena Lamana bavua babapita bungi menamena, ne bobu balamata kudi Mukalenga Nzambi wabu badi ne bua kufua kakuyi diepuka to.

26 Bualu monayi, bakamona makanda a Bena Lamana a bungi momumua ne abu, mena muntu ne muntu. Ne bavua nanku bapona mu disambuka dia mikenji edi; eyowa, bavua nanku balua bateketa, bua disambuka diabu dia mikenji, mu mutantshi wa bidimu bikesa.