1 Ne mpindiewu biakalua ne pakamba Nefi mêyi â, monayi, kuvua bantu bavua balumbuluishi, bavua kabidi bena tshisumbu tshia musokoku tshia Gadiantona, ne bakafîka tshiji, ne bakabila bua kumufunda, bambila bantu ne: Buatshinyi kanuena nukuata muntu ewu ne nulua nenda, bua ne apîshibua bilondeshila ku bubi buvuaye muenza?

2 Bua tshinyi nudi nutangila muntu ewu, ne numuteleja upenda bantu aba ne mikenji yetu?

3 Bualu monayi, Nefi uvua mubambila bitangila dinyanguka dia mikenji yabu; eyowa, uvua muamba bintu bia bungi bidi kabiyi mua kufunda to; ne kavua muamba tshintu tshivua tshishilangana ne mikenji ya Nzambi to.

4 Ne balumbuluishi abu bakamufîkila tshiji bualu uvua mubambila patoka bitangila midimu yabu ya musokoku ya mîdima; nansha nanku, kabakakima kumulenga to, bualu bavua batshina bantu, bua kabalu kubelela mbila.

5 Bua nanku bakabila kudi bantu, bamba ne: Bua tshinyi nudi nulekela ne muntu ewu atupenda? Bualu monayi udi upîsha bantu bonsu aba, mena tô ne ku dibutuka; eyowa, ne bimenga bietu binena bionsu ebi kabidi nebatubinyenga, ne katuakuikala ne muaba munda muabi to.

6 Ne mpindiewu nudi bamanya ne kabiena mua kuenzeka nanku to, bualu monayi, tudi ne bukola bua bungi, ne bimenga bietu bidi binena, bua nanku bena lukuna betu kabena mua kututshimuna to.

7 Ne biakalua ne bakasonsola bantu ku tshiji kudi Nefi nanku, ne bakajula makokangana munkatshi muabu; bualu kuvua bamua bakabila ne: Lekelayi muntu ewu, bualu udi muntu muimpa, ne bintu bidiye wamba abi nebienzeka bulelela pa kumbusha tuetu bakudimuna mutshima;

8 Eyowa, monayi, bitungu bionsu nebilua pa mutu petu bidiye mutujadikila; bualu tudi bamanya ne udi mutujadikila biakana bitangila malu mabi etu. Ne monayi adi a bungi, ne udi mumanya kabidi malu onsu âtufikila bu mudiye mumanya malu mabi etu;

9 Eyowa, ne monayi, bu yeya kayi muikala muambi to kavua mua kujadika bitangila bintu abi to.

10 Ne biakalua ne bantu bavua bakeba bua kushipa Nefi abu, bôwa buabu buakabandika, bualu kabakamulenga to; bua nanku wakabanga kabidi kuakula kudibu, bualu uvua mumona ne uvua musuibua ku mesu a bamua bantu, mua ne tshishadi tshiabu tshiakatshina.

11 Bua nanku wakenzejibua bua kubambila bikola wamba ne: Monayi, bana betu, nudi babala ne Nzambi wakapesha bukola kudi muntu umua, mena Mose, bua kutûta mâyi a Mbuwa Mukunza, ne akatapuluka eku ne eku, mua ne Bena Isalele, bavua batatuetu, bakapita pa buloba bûma, ne mâyi akapingana pa mutu pa misumba ya basalayi ya Bena Ejipitu ne akabadînyisha anyi?

12 Ne mpindiewu monayi, bu mudi Nzambi mupesha muntu ewu bukola bua mushindu ewu, kadi bua tshinyi nudi nutandangana munkatshi muenu, ne nuamba ne kena mumpesha bukola to mbundi mua kumanya nabu bitangila bitungu bialua pa mutu penu, pa kumbusha nuenu bakudimuna mutshima?

13 Kadi, monayi, kanuena amu nuvila mêyi anyi to, kadi nudi nuvila kabidi miaku yonsu ivua batatuetu bakula, ne kabidi miaku ivua muntu ewu, Mose, muakula, uvua ne bukola bunena bumupesha, eyowa, miaku ivuaye muakula bitangila dilua dia Mashiya.

14 Eyowa, kakajadika ne Muana wa Nzambi nealua to anyi? Ne bu muakabandishaye nyoka wa kalabi mu tshipela, mena nanku neabandisha walua.

15 Ne bonsu bela mesu kudi nyoka nebapeta moyo, momumua ne bonsu bela mesu kudi Muana wa Nzambi ne ditabuija, bikala ne nyuma munyingalala, badi mua kuikala ne moyo, mena ne ku moyo awu udi muikala wa tshiendelela.

16 Ne mpindiewu monayi, Mose kakajadika amu bua bintu ebi to, kadi bambi bansantu bonsu kabidi, katshia ku matuku enda mena tô ne ku matuku a Abalahama.

17 Eyowa, ne monayi, Abalahama wakamona dilua dienda, ne uvua muwula ne disanka ne wakasanka.

18 Eyowa, ne monayi ndi nnuambila ne, kabivua amu Abalahama uvua mumanya bintu ebi to, kadi kuvua ba bungi kumpala kua matuku a Abalahama bavua babikidibua bilondeshila ku mulongu wa Nzambi; eyowa, mena ku mulongu wa Muanenda; ne nanku bua ne bilejibua kudi bantu, bidimu binunu bia bungi kumpala kua dilua dienda, ne mena disungila nedilua kudibu.

19 Ne mpindiewu ndi musua ne numanya, ne katshia mena ku matuku a Abalahama kuvua bambi ba bungi bavua bajadika bintu ebi; eyowa, monayi, muambi Zenose wakajadika ne dikima; bua etshi uvua mushipibua.

20 Ne monayi, Zenoke kabidi, ne Eziasa kabidi, ne Yeshaya kabidi, ne Yelemiya, (Yelemiya muikala muambi awu wa momumua wakajadika bua dibutuka dia Yelushalema) ne mpindiewu tudi bamanya ne Yelushalema uvua mubutuka bilondeshila ku miaku ya Yelemiya. Ô kadi munyi muapanga Muana wa Nzambi kulua, bilondeshila ku buambi buenda?

21 Ne mpindiewu nenuela mpata ne Yelushalema uvua mubutuka anyi? Nenuamba ne kabakashipa bana ba baluma ba Sedekiya, bonsu pa kumbusha Muleke anyi? Eyowa, ne kanuena numona ne ndelanganyi ya Sedekiya idi netu, ne badi babipata mu bulaba bua Yelushalema anyi? Kadi monayi, ebi kabiena bionsu to—

22 Bakipata tatuetu Lehi ku Yelushalema bualu wakajadika bua bintu ebi. Nefi wakajadika bintu ebi kabidi, ne pabuipi ne batatuetu bonsu kabidi, mena tô ne diba edi; eyowa, badi bajadika bua dilua dia Kilisto, ne badi batekemena, ne badi basanka bua dituku dienda dilualua.

23 Ne monayi, udi Nzambi, ne udi nabu, ne wakadimuenesha kudibu, bua kubasungilayi; ne bakamupesha butumbi, bua bualu bulualua.

24 Ne mpindiewu, bualu nudi bamanya bintu ebi ne kanuena mua kubivila to pa kumbusha panuashima, bua nanku nudi benza mubi mu bualu ebu, bualu nudi babenga bintu bionsu ebi, nansha munudi bapeta majadikibua mapita bungi; eyowa, nudi bapeta bintu bionsu ebi mena, bintu bia mu diûlu, ne bintu bionsu bia pa buloba, bu njadikilu wa ne bidi bilelela.

25 Kadi monayi, nudi babenga bulelela, ne batombokela Nzambi wenu munsantu; ne diba edi mena, pamutu pa nuenu kudibutshila bintu bia mushinga mu diûlu buenu nkayenu, mudi tshintu katshiyi tshibipisha, ne mudi tshintu tshia bukoya katshiyi mua kulua to, nudi nudiwujila tshiji bua dituku dia tshilumbuluilu.

26 Eyowa, nansha diba edi nudi baboba, bua bualu bua mashipeyangana enu ne buendenda tshienu ne bubi, bua dibutuka dia kashidi; eyowa, ne pa kumbusha nuenu bakudimuna mutshima nedinufikila katataka.

27 Eyowa, monayi didi mpindiewu mena ku bibi bienu; eyowa, ndayi ku nkuasa wa tshilumbuluilu, ne nukebayi; ne monayi, badi bashipa mulumbuluishi wenu, ne udi mulala mu mashi enda; ne muanabu wa baluma udi ukeba kusomba mu nkuasa wa tshilumbuluilu ki udi mumushipa.

28 Ne monayi, bubidi buabu badi bena tshisumbu tshia musokoku, Gadiantona ki mufuki watshi ne muena bubi udi ukeba bua kufuisha anyima ya bantu.