1 Mpindiewu tshivua mu mikenji ya Mosiya ne muntu yonsu uvua mulumbuluishi wa mikenji, anyi bobu bavua basungudibua bua kuikala balumbuluishi, bavua ne bua kupeta mafutu bilondeshila diba divuabu benza mudimu bua kulumbuluisha bavuabu balua nabu kumpala kuabu bua kulumbuluishibua.

2 Mpindiewu bu muntu muikala ne dibanza dia mukuabu, ne mubenga kufuta dibanza didiye nadi, bavua bamufunda kudi mulumbuluishi; ne mulumbuluishi uvua wenzela bukôkeshi, ne uvua utuma bampulushi bua balua ne muntu awu kumpala kuenda; ne uvua umulumbuluisha bilondeshila ku mikenji ne majadikibua avua matuala bua kumutuisha, ne nanku muntu ewu bavua bamuenzeja bua kufuta dibanza divuaye nadi, anyi bamunyenga bivuaye nabi, anyi ipatshibua munkatshi mua bantu bu mudi muivi ne munyengi wa bintu.

3 Ne mulumbuluishi uvua upeta mafutu enda bilondeshila diba dienda—senina umua wa ngolo bua dituku, anyi senuma umua wa mpalata, udi mukumbanangana ne senina umua wa ngolo; ne ebi bivua bilondeshila ku mikenji ivua mifila.

4 Mpindiewu â avua mêna a bitshiela bia ngolo, ne mpalata yabu, bilondeshila mushinga wayi. Ne mêna avua Bena Nefi bafila, bualu kabavua babala ku mushindu wa Bena Yuda bavua mu Yelushalema to; anyi kabavua bapima ku mushindu wa Bena Yuda to; kadi bavua bandamuna mbadilu wabu ne mpiminu wabu, bilondeshila ku meji ne malu avua afikila bantu, ku tshikondu tshionsu, ne ku dikôkesha dia balumbuluishi, bavua Mukalenga Mosiya mushikika.

5 Mpindiewu kubala kuabu kudi nanku—senina wa ngolo umua, seyona wa ngolo umua, shuma wa ngolo umua, ne limina wa ngolo umua.

6 Senuma wa mpalata umua, amenolo wa mpalata umua, ezeloma wa mpalata umua, ne onti wa mpalata umua.

7 Senuma wa mpalata umua uvua mukumbanangana ne senina wa ngolo umua, anyi ne tshipimu tshia orge tshimua, ne kabidi tshipimu tshia nteta ya ngikadilu yonsu.

8 Mpindiewu mushinga wa seyona wa ngolo umua uvua misangu ibidi mushinga wa senina umua.

9 Ne shuma wa ngolo umua uvua misangu ibidi mushinga wa seyona umua.

10 Ne limina wa ngolo umua uvua mushinga wabu bonsu.

11 Ne amenolo wa mpalata umua uvua bungi bua senuma ibidi.

12 Ne ezeloma wa mpalata umua uvua bungi bua senuma inayi.

13 Ne onti umua uvua bungi buabu bonsu.

14 Mpindiewu etshi ki mushinga wa makumi makesa a kubala kuabu—

15 Shibulona umua uvua tshimua tshia bibidi tshia senuma; bua nanku, shibulona uvua tshimua tshia bibidi tshia tshipimu tshia orge.

16 Ne shibuluma umua uvua tshimua tshia bibidi tshia shibulona.

17 Ne lea umua uvua tshimua tshia bibidi tshia shibuluma.

18 Mpindiewu etshi ki makumi abu, bilondeshila ku dibala diabu.

19 Mpindiewu antiono wa ngolo umua uvua mukumbanangana ne shibulona isatu.

20 Mpindiewu, tshivua amu bua kipatshila ka kupeta makasa, bualu bavua bapeta difutu diabu bilondeshila diba divuabu benza mudimu, bua nanku, bavua basonsola bantu ku buntomboji, ne ku mishindu yonsu ya masalu ne bubi, bua bapeta mudimu wa bungi, bua bapeta makuta bilondeshila bilumbu bivuabu balua nabi kumpala kuabu; bua nanku bavua basonsola bantu bua kubenga Alama ne Amuleke.

21 Ne Zêzeloma ewu wakabanga kabidi kuebeja Amuleke wamba: Neungandamuna nkonku mikesa ingakuebeja anyi? Mpindiewu Zêzeloma uvua muntu mupiluka mu budimu bua diabulu, bua anyangakaja etshi tshivua tshimpa; bua nanku, wakebeja Amuleke: Newandamuna nkonku ingakuela anyi?

22 Ne Amuleke wakamuambila ne: Eyowa, bu biobi bilondeshila Nyuma wa Mukalenga, udi munda muanyi; bualu ntshiakuamba tshintu nansha tshimua tshidi tshishilangana ne Nyuma wa Mukalenga to. Ne Zêzeloma wakamuambila ne: Mona, onti ya mpalata isambombo nyoyeyi, ne nenkupesha nayi yonsu bu wewa muvila ne kakuena Mfumu Munena udi ku mutu to.

23 Mpindiewu Amuleke wakamba ne: Ô muana wa mu ngena, bua tshinyi udi untêta? Kuena mumanya ne muakana katu ukuluka ku matêtshibua a mushindu ewu to anyi?

24 Udi witabuija ne kakuena Nzambi to anyi? Ndi nkuambila, To, udi mumanya ne Nzambi udiku, kadi udi munanga biuma kumupita.

25 Ne mpindiewu udi unshima kumpala kua Nzambi. Udi ungambila—Mona onti isambombo eyi, idi ne mushinga wa bungi, nenkupeshayi—pawudi ne meji mu mutshima weba akumpalayi; ne tshivua amu dijinga dieba ne mvila Nzambi mulelela ne wa moyo, bua upeta tshiakunshipela. Ne mpindiewu, neupeta difutu dieba bua bubi bunena ebu.

26 Ne Zêzeloma wakamuambila: Udi wamba ne kudi Nzambi mulelela ne wa moyo anyi?

27 Ne Amuleke wakamuambila: Eyowa, kudi Nzambi mulelela ne wa moyo.

28 Mpindiewu Zêzeloma wakamba: Kudi ba Nzambi bakuabu anyi?

29 Ne wakamuandamuna, To.

30 Mpindiewu Zêzeloma wakamuambila kabidi: Udi mumanya bintu ebi munyi?

31 Ne wakamuambila: Muanjelu wakambimanyisha.

32 Ne Zêzeloma wakamba kabidi: Nganyi walua? Muana wa Nzambi anyi?

33 Ne wakamuambila, Eyowa.

34 Ne Zêzeloma wakamba kabidi: Neapandisha bantu benda mu mibi yabu anyi? Ne Amuleke wakandamuna ne kumuambila ne: Ndi nkuambila ne kakuenza to, bualu kabiena mua kuenzeka bua ne avila dîyi dienda to.

35 Mpindiewu Zêzeloma wakambila bantu: Tangilayi ne nuvuluka bintu ebi; bualu wambi ne kudi amu Nzambi umua; kadi wambi ne Muana wa Nzambi nealua, kadi kakupandisha bantu benda to—bu udi ne bukôkeshi bua kuelela Nzambi mukenji.

36 Mpindiewu Amuleke wakamuambila kabidi: Mona udi ushima, bualu udi wamba ne ngambi bu ndi ne bukôkeshi bua kuelela Nzambi mukenji bualu ngambi ne kakupandisha bantu benda mu mibi yabu to.

37 Ne ndi nnuambila kabidi ne kena mua kubapandisha mu mibi yabu to; bualu ntshiena mua kuvila dîyi dienda to, ne uvua muamba ne tshintu tshikoya katshiena mua kupiana bukalenga bua mu diûlu to; bua nanku, munyi munudi mua kupandishibua panuikala kanuyi bapiana bukalenga bua mu diûlu? Bua nanku, kanuena mua kupandishibua mu mibi yenu to.

38 Mpindiewu Zêzeloma wakamuambila kabidi: Muana wa Nzambi udi mena Tatu wa Tshiendelela anyi?

39 Ne Amuleke wakamuambila: Eyowa, udi mena Tatu wa Tshiendelela wa diûlu ne buloba, ne bintu bionsu bidi mômu; udi mbangilu ne nshikidilu, wa kumpala ne wa ndekelu;

40 Ne nealua pa buloba bua kusungila bantu benda; ne neangata pa mutu penda disambuka mikenji dia badi bitabuija mu dîna dienda; ne aba bobu bapeta moyo wa tshiendelela, ne lupandu kaluena lulua kudi mukuabu to.

41 Bua nanku bena bubi bupita badi bashala bu ne kakuvua disungila dienzeka to, pa kumbusha disuludibua dia mionji ya lufu; bualu mona, dituku dilualua diajuka bonsu ku bafua ne dimanabu kumpala kua Nzambi, ne dialumbuluishibuabu bilondeshila ku midimu yabu.

42 Mpindiewu, kudi lufu ludi lubikidibua ne lufu lua mubidi; ne lufu lua Kilisto nelusulula mionji ya lufu lua mubidi elu, bua ne bonsu bajudishibua ku lufu lua mubidi elu.

43 Nyuma ne mubidi nebisangishibua kabidi mu tshimfuanyi tshiabu tshijima; bubidi bua bidimba ne manungu nebipingajibua mu mubidi wabi muakana, mpindiewu mena bu mutudi mu tshikondu etshi; ne netutuadibua bua kuimana kumpala kua Nzambi, bamanya mena bu mutudi bamanya mpindiewu, ne bikala ne divuluka ditua dia dipîla dietu dionsu.

44 Mpindiewu, dipingaja edi nedilua kudi bonsu, bubidi buabu bakola ne bana, bubidi buabu bapika ne badikadila, bubidi buabu baluma ne bakaji, bubidi buabu bena bubi bupita ne bakana; ne mena nekuakuikala nansha kupita lusuki lua ku mitu yabu tshiajimina to; kadi tshintu tshionsu netshipingajibua ku mushindu watshi mujima, bu muditshi mpindiewu, anyi mu mubidi, ne nebatuadibua ne nebalumbuluishibua kumpala kua tshilumbuluidi tshia Kilisto Muana, ne Nzambi Tatu, ne Nyuma wa Tshijila, badi Nzambi bikala Nzambi wa Tshiendelela umua, bua kulumbuluishibua bilondeshila ku midimu yabu, ne idi mikala mimpa anyi ne idi mikala mibi.

45 Mpindiewu, monayi, mumvua munuambila bitangila lufu lua mubidi wa tshifuaka, ne kabidi bitangila dibika dia mubidi wa tshifuaka. Ndi nnuambila ne mubidi ewu wa tshifuaka udi ujudishibua muikala mubidi udi kawuyi ufua, buena kuamba ne ku lufu, mena kumbukila ku lufu lua diambedi ne ku moyo, bua ne kabena mua kufua kabidi to; nyuma yabu ikuatangana ne mibidi yabu, kayiyi itapulukangana kabidi nansha; nanku bionsu bilua bia mu nyuma ne kabiyi bifua, bua ne kabayi mua kuikala kabidi ne kubola nansha.

46 Mpindiewu, pavua Amuleke mujikija mêyi â bantu bakabanga kabidi kukema, ne Zêzeloma kabidi wakabanga kuzakala. Ne mêyi a Amuleke akajika nanku, anyi ebi ki bionsu bindi mufunda.