1 Ne biakalua ne Moloni kakalekela kuenza dilongolola bua mvita to, anyi kusungidila bantu benda kudi Bena Lamana to; bualu wakenzeja ne misumba yenda ya basalayi ituadija ku ntuadijilu wa tshidimu tshia makumi abidi tshia dikôkesha dia balumbuluishi, ne ituadija kushikika mishiki ya buloba ku mpenga yonsu ya bimenga bionsu, mu bulaba bonsu buvua Bena Nefi basamu.

2 Ne pa mutu pa mabula a buloba â wakatekeshapu mikamba ya buibaki, eyowa, midimu ya mikamba mimanyikija bula bua muntu, ku mpenga yonsu ya bimenga.

3 Ne wakenzeja ne pa mutu pa midimu ya mikamba ayi pibakibua musaka wa tuluwa pa mutu pa mikamba ku mpenga yonsu; ne tuvua tukola ne tula.

4 Ne wakenza ne tuleya tuimanyikibua tuvua tutangila pa mitu pa midimu ya tuluwa, ne wakenza ne miaba ya bukubi ibakibua pa tuleya atu, bua mabua ne miketa ya Bena Lamana kabibatapi to.

5 Ne tuvua tulongolola bua bikala mua kuashila mabua kûlu kuatu, bilondeshila ku dijinga diabu ne ku makanda abu, ne bua kushipa ewu yonsu widikija kusemena pabuipi ne bimanu bia tshimenga.

6 Nanku Moloni wakalongolola miaba mikolesha bua kuimanyina dilua dia bena lukuna babu, ku mpenga ya tshimenga mu bulaba bonsu.

7 Ne biakalua ne Moloni wakenzeja ne misumba yenda ya basalayi iya mu tshipela tshia ku esete; eyowa, ne yakaya ne yakipata Bena Lamana bonsu bavua mu tshipela tshia ku esete ne bakaya batangila ku malaba abu nkayabu, avua mikala ku sude kua bulaba bua Zalahemela.

8 Ne bulaba bua Nefi buvua buikala mu mu njila mululama kumbukila ku mbuwa wa ku esete tô ne ku mbuwa wa ku wesete.

9 Ne biakalua ne pavua Moloni munyemesha Bena Lamana bonsu bapatuka tshipela tshia ku esete, tshivua ku node kua malaba adibu basamu nkayabu, wakenzeja ne bantu bavua basomba mu bulaba bua Zalahemela ne mu bulaba bua ku mpenga yabu yonsu baya mu tshipela tshia ku esete, mena ku mikalu ya pabuipi ne ku muelelu wa mbuwa, ne bâsa mu bulaba.

10 Ne wakateka kabidi misumba ya basalayi ku sude, mu mikalu ya malaba abu, ne wakenzeja ne bimanyisha miaba mikolesha bua balama misumba yabu ya basalayi ne bantu babu bua kabaponyi mu bianza bia bena lukuna babu.

11 Ne nanku wakakosa miaba mikolesha yonsu ya Bena Lamana mu tshipela tshia ku esete, eyowa, ne ku wesete kabidi, bualua wakakolesha mushonyi pankatshi pa Bena Nefi ne Bena Lamana, pankatshi pa bulaba bua Zalahemela ne bulaba bua Nefi, kubangila ku mbuwa ku wesete, apuekela ku mpokolo wa musulu wa Sidona—Bena Nefi bavua bâsa mu bulaba bonsu buvua ku node, eyowa, mena bulaba bonsu buvua ku node kua bulaba bua Buvula, bilondeshila ku disua diabu.

12 Nanku Moloni, ne misumba yenda ya basalayi, ivulangana dituku dionsu bualu midimu yenda yakabatukija mitshima ne bukubi buvuaku, bakakeba bua kukosa makanda ne bukola bua Bena Lamana ku malaba adibu basamu, bua kabikadi ne bukola ku malaba adibu basamu to.

13 Ne biakalua ne Bena Nefi bakabanga tshishimikidi tshia tshimenga, ne bakabikila dîna dia tshimenga ne Moloni; ne tshivua pabuipi ne mbuwa wa ku esete; ne tshivua ku sude pabuipi ne mushonyi wa malaba a Bena Lamana.

14 Ne bakabanga kabidi tshishimikidi tshia tshimenga pankatshi pa tshimenga tshia Moloni ne tshimenga tshia Alona, tshikuatangana ne mikalu ya Alona ne ya Moloni; ne bakabikila dîna dia tshimenga, anyi bulaba, Nefiha.

15 Ne bakabanga kabidi mu tshidimu tshina atshi bua kuibaka bimenga bia bungi ku node, tshimua mu mushindu wa pa buatshi tshiakabikilabu ne Lehi, tshivua ku node pabuipi ne ku mikalu ya ku muelelu wa mbuwa.

16 Ne tshidimu tshia makumi abidi tshiakajika nanku.

17 Ne bantu ba Nefi bavua mu mushindu wa dilubuluka ku ntuadijilu wa tshidimu tshia makumi abidi ne tshimua tshia dikôkesha dia balumbuluishi pa mutu pa bantu ba Nefi.

18 Ne bakalubuluka menamena, ne bakalua babanji menamena; eyowa, ne bakavulangana ne bakakolakana mu bulaba.

19 Ne nanku tudi tumona bu mudiyi ya lusa ne buakana ngenzelu yonsu ya Nzambi, mu dikumbaja dia miaku yenda yonsu kudi bana ba bantu; eyowa, tudi mua kumona ne miaku yenda idi mijadikibua, mena diba edi, yakambilaye Lehi, wamba ne:

20 Nudi babeneshibua wewa ne bana beba; ne nebabeneshibua, monsu mualamabu mikenji yanyi nebalubuluka mu bulaba. Kadi vuluka ne, monsu muapangabu kulama mikenji yanyi nebakoshibua ku mpala kua Mukalenga.

21 Ne tudi tumona ne malaya â avua makumbajila bantu ba Nefi; bualu bivua bikala matandu abu ne makokangana abu, eyowa, dishipa dia bantu diabu, ne dipawula diabu dia bintu bia benda, ditendelela diabu dia mpingu, masandi abu, ne malu abu a bubi bupita, bivua munkatshi muabu, biakabatuadila mvita yabu ne dinyanguka diabu.

22 Ne bavua bikala ne lulamatu mu dilama mikenji ya Mukalenga, bavua bapatuishibua mu meba onsu, pakafilaye binunu bia bana babu ba bubi ku bupika, anyi bua kufua ku muela wa mvita, anyi bua kushinguluka mu dipanga dia ditabuija, ne kudisangisha ne Bena Lamana.

23 Kadi monayi kakuvua tshikondu tshia disanka dipita munkatshi mua bantu ba Nefi, katshia ku matuku a Nefi, kupita tshikondu tshia Moloni to, eyowa, mena tshikondu etshi, mu tshidimu tshia makumi abidi ne tshimua tshia dikôkesha dia balumbuluishi.

24 Ne biakalua ne tshidimu tshia makumi abidi ne tshibidi tshia dikôkesha dia balumbuluishi tshiakajika kabidi mu ditalala; eyowa, ne tshidimu tshia makumi abidi ne tshisatu kabidi.

25 Ne biakalua ne ku ntuadijilu wa tshidimu tshia makumi abidi ne tshinayi tshia dikôkesha dia balumbuluishi, kuvua bua kuikala kabidi ditalala munkatshi mua bantu ba Nefi bu kabuyi bua dikokangana dia kangata muaba munkatshi muabu bitangila bulaba bua Lehi ne bulaba bua Moliantona, buvua bukuatangana ku mikalu ya buloba bua Lehi; bonsu bubidi buvua ku mikalu ya pabuipi ne ku muelelu wa mbuwa.

26 Bualu monayi, bantu bavua bâsa mu bulaba bua Moliantona bakalombolola bunema pa tshitupa tshia bulaba bua Lehi; bua nanku kuakabanga kuikala dikokangana dikola pankatshi pabu, mua ne bantu ba Moliantona bakambula biluilu bua kuluisha bana babu, ne bavua bapangadika bua kubashipa ku muela wa mvita.

27 Kadi monayi, bantu bavua bâsa mu bulaba bua Lehi bakanyemena ku tshitudilu tshia Moloni, ne bakamulomba diambuluisha; bualu monayi kabavua benza bibi to.

28 Ne biakalua ne pakamona bantu ba Moliantona, bavua balombodibua kudi muntu muena dîna dia Moliantona, ne bantu ba Lehi bavua banyemena ku tshitudilu tshia Moloni, bakatshina menamena ne musumba wa basalayi wa Moloni kawulu kubaluila ne kubabutula to.

29 Bua nanku, Moliantona wakela mu mitshima yabu ne bavua ne bua kunyemena ku bulaba buvua ku node, buvua bubuikila kudi mishiki minena ya mâyi, ne bua kuangata bulaba buvua ku node.

30 Ne monayi, bavua bua kukumbaja dilongolola edi, (tshivua bua kuikala tshiena bualu tshia muadi) kadi monayi, bualu Moliantona, uvua muikala muntu wa tshiji tshikola, bua nanku wakafîkila umua wa ku basadidi benda ba bakaji tshiji, ne wakdiela kudiye ne wakamukuma bikola.

31 Ne biakalua ne wakanyema, ne wakaya ku tshitudilu tshia Moloni, ne wakalondela Moloni bintu bionsu bivua bitangila bualu ebu, ne kabidi bivua bitangila majinga abu a kunyema ku bulaba bua ku node.

32 Mpindiewu monayi, bantu bavua mu bulaba bua Buvula, anyi nansha bua Moloni, bakatshina bantu ba mu bulaba bua Buvula kabalu kumvuila mêyi a Moliantona ne kabalu kudisangisha ne bantu ba Moliantona, ne nanku angata bitupa bia bulaba abi, bivua bua kuikala tshishimikidi tshia bipeta bibi menamena munkatshi mua bantu ba Nefi, eyowa, bipeta bibi bivua bua kulombola ku ditonkola dia budishikaminyi buabu.

33 Bua nanku Moloni wakatuma musumba wa basalayi, ne tshitudilu tshiabu, bua kukosa bantu ba Moliantona njila, bua kuimanyikija dinyema diabu ku bulaba bua ku node.

34 Ne biakalua ne kabakabakosa njila to amu pakafikabu ku mikalu ya bulaba bua Kabutu; ne aku bakabakosa njila, pabuipi ne kajila kabumbakana kavua kalombola pabuipi ne mbuwa bua kuya ku bulaba bua ku node, eyowa, pabuipi ne mbuwa, ku wesete ne ku esete.

35 Ne biakalua ne musumba wa basalayi uvua Moloni mutuma, uvua mulombola kudi muntu muena dîna ne Teyankuma, wakasambakena ne bantu ba Moliantona; ne bantu ba Moliantona bavua ne mutu mukola (bikala bapetela meji ku bubi buenda ne mêyi enda a lubombu), ki bua tshinyi mvita yakatuadija pankatshi pabu, muakashipa Teyankuma Moliantona ne muakatshimunaye musumba wenda wa basalayi, ne wakakuata bakuabu bena lukanu, ne wakapingana ku tshitudilu tshia Moloni. Ne tshidimu tshia makumi abidi ne tshinayi tshia dikôkesha dia balumbuluishi pa mutu pa bantu ba Nefi tshiakajika nanku.

36 Ne bakapingana ne bantu ba Moliantona nanku. Ne diba dia dienza diabu dia tshipungidi bua kulama ditalala, bakapingulujibua ku bulaba bua Moliantona, ne didisanga diakenzeka pankatshi pabu ne bantu ba Lehi; ne bakapingulujibua kabidi ku malaba abu.

37 Ne biakalua ne mu tshidimu tshimua atshi muvua bantu ba Nefi bikala ne ditalala dibapingajila, Nefiha, mulumbuluishi munena muibidi, wakafua, yeya mumana kusomba mu nkuasa wa tshilumbuluilu ne bululama bujima kumpala kua Nzambi.

38 Nansha nanku, uvua mubengela Alama bua kulama miandiku ayi ne bintu bivua Alama ne batatuenda bamona bidi bipita tshijila; bua nanku Alama wakabipesha kudi muanenda wa baluma, Helamana.

39 Monayi, biakalua ne muana wa baluma wa Nefiha wakasungudibua bua kusomba mu nkuasa wa tshilumbuluilu, pa muaba wa tatuenda; eyowa, wakasungidibua mulumbuluishi munena ne ngovena wa bantu, ku diditshipa ne ku mukenji wa tshijila bua kulumbuluisha biakana, ne kulama ditalala ne budishikaminyi bua bantu, ne bua kubapesha diakalengela diabu dia tshijila bua kutendelela Mukalenga Nzambi wabu, eyowa, bua kukuatshisha ne kukuba kipatshila ka Nzambi matuku enda onsu, ne bua kutuala bena bubi bonsu ku tshilumbuluilu, bilondeshila ku bubi buabu.

40 Mpindiewu monayi, dîna dienda divua Paholana. Ne Paholana wakasomba mu nkuasa wa tatuenda, ne wakatuadija bukalenga buenda ku ndekelu kua tshidimu tshia makumi abidi ne tshinayi, dikôkesha dienda pa mutu pa bantu ba Nefi.