1 Mpindiewu tupinganyina miandiku yetu bitangila Amalikia ne bakanyema nenda mu tshipela; bualu, monayi, uvua muangata bakaya nenda ne wakabanda ku bulaba bua Nefi munkatshi mua Bena Lamana, ne wakasonsola Bena Lamana ku tshiji kudi bantu ba Nefi, mu mushindu wa ne mfumu wa Bena Lamana wakatuma dimanyisha mu bulaba buenda bonsu, munkatshi mua bantu benda bonsu, ne badisangisha pamua kabidi bua kuya kuluisha Bena Nefi.

2 Ne biakalua ne pakalua dimanyisha kuya munkatshi muabu bakumvua bôwa bukola; eyowa, bakatshina bua kubungamija mfumu, ne bakatshina kabidi bua kuya kuluisha Bena Nefi bua kabalu kujimija mioyo yabu. Ne biakalua ne, ne bobu, ne tshitupa tshinena tshiabu, bakabenga kutumikila mikenji ya mfumu.

3 Ne mpindiewu biakalua ne mfumu wakafîka tshiji bua dibenga ditumikila diabu; bua nanku wakapesha Amalikia mukenji bua tshitupa etshi tshia musumba wenda wa basalayi tshivua ne ditumikila ku mikenji yenda, ne wakamupesha mukenji ne aya ne abenzeja ku bukola bua kuambulabu biluilu.

4 Mpindiewu monayi, edi divua dijinga dia Amalikia; bualu uvua muikala muntu mutalama bua kuenza bubi bua nanku wakalongolola dilongolola mu mutshima wenda bua kumbusha mfumu wa Bena Lamana mu nkuasa wa bukalenga.

5 Ne mpindiewu wakapeta bulombodi bua bitupa bia Bena Lamana aba bavua bananga mfumu; ne wakakeba kunangibua kudi bantu bavua kabayi ne ditumikila; bua nanku wakaya ku muaba uvuabu babikila ne Onida, bualu aku ki kuvua Bena Lamana banyemena; bualu bakajandula musumba wa basalayi ulua; ne, bualu bakatshinka ne uvua ulua kubabutula, bakanyemena ku Onida, ku muaba wa biluilu.

6 Ne bavua basungula muntu umua bua kuikala mfumu ne mulombodi ku mutu kuabu, bualu bavua ne dipangadika dikola mu meji abu bua kabakabatshikibua bua kuluisha Bena Nefi to.

7 Ne biakalua ne bavua badisangisha pa musongu wa mukuna uvuabu babikila ne Antipa, bua kudilongolola bua mvita.

8 Mpindiewu kadivua dijinga dia Amalikia bua kubela mvita bilondeshila ku mikenji ya mfumu to; kadi monayi, divua dijinga dienda divua dia kusuibua kudi misumba ya basalayi ya Bena Lamana, bua aditeka ku mutu kuabu ne atonkola mfumu ne angata bukalenga.

9 Ne monayi, biakalua ne wakashisha musumba wenda wa basalayi ntenta yabu mu tshibanda tshivua pabuipi ne mukuna wa Antipa.

10 Ne biakalua ne pakila butuku wakatuma bantu mu musokoku ku mukuna wa Antipa, ujinga ne mulombodi wa bantu bavua pa mukuna, muena dîna dia Lehonti, apueka kuinshi ku mbangilu wa mukuna, bualu uvua ujinga bua kuakula nenda.

11 Ne biakalua ne pakapeta Lehonti mukenji kawakakima kupueka kuinshi kua mukuna to. Ne biakalua ne Amalikia wakatuma mukenji kabidi bua musangu muibidi, ujinga bua apueka. Ne biakalua ne Lehonti wakabenga; ne wakatuma kabidi mukenji bua musangu muisatu.

12 Ne biakalua ne pakamona Amalikia ne kavua mua kutulula Lehonti ku mukuna to, wakabanda ku mukuna, pabuipi ne ku tshitudilu tshia Lehonti; ne wakatuma kabidi mukenji wenda kudi Lehonti bua musangu muinayi, ujinga ne apueka, ne ne uvua bua kulua ne balami benda.

13 Ne biakalua ne pakapueka Lehonti ne balami benda kudi Amalikia, ne Amalikia wakajinga ne yeya alua ne musumba wenda wa basalayi mundankulu, ne anyungulula bantu aba mu bitudilu biabu, bavua mfumu mumupeshela bulombodi, ne uvua ubafila mu bianza bia Lehonti, bu yeya mua kumuteka yeya (Amalikia) mulombodi muibidi ku mutu kua musumba wa basalayi mujima.

14 Ne biakalua ne Lehonti wakapueka ne bantu benda ne bakanyungulula bantu ba Amalikia, bua ne kumpala kua kubikabu patshiatshia bavua banyungulula kudi misumba ya basalayi ya Lehonti.

15 Ne biakalua ne pakamonabu ne bavua babanyungulula, bakasengelela Amalikia bua alekela ne badisangisha ne bana babu, bua kababutuki to. Mpindiewu etshi tshivua tshintu mena tshivua Amalikia ujinga.

16 Ne biakalua ne wakafila bantu benda, bishilangana ne mikenji ya mfumu. Mpindiewu etshi tshivua tshintu tshivua Amalikia ujinga, bua akumbaja majinga enda a kumbusha mfumu mu nkuasa wa bukalenga.

17 Mpindiewu tshivua tshibidilu munkatshi mua Bena Lamana ne, bu bobu bashipa mulombodi wabu munena badi basungula mulombodi muibidi bua kuikalaye mulombodi wabu munena.

18 Ne biakalua ne Amalikia wakenzeja ne umua wa basadidi benda elela Lehonti mulungu ku kakesa ku kakesa, ne wakafua.

19 Mpindiewu, pakafua Lehonti, Bena Lamana bakasungula Amalikia bua kuikalaye mulombodi wabu ne komanda wabu munena.

20 Ne biakalua ne Amalikia wakaya ne misumba yenda ya basalayi (bualu uvua mupeta majinga enda) ku bulaba bua Nefi, ku tshimenga tshia Nefi, tshivua tshikala tshimenga tshikulu.

21 Ne mfumu wakapatuka ne balami benda bua kusambakena nenda, bualu wakatshinka ne Amalikia uvua mukumbaja mikenji yenda, ne Amalikia uvua musangisha musumba munena wa basalayi bua kuyabu kuluisha Bena Nefi.

22 Kadi monayi, pavua mfumu upatuka bua kusambakena nenda Amalikia wakenzeja ne basadidi benda baya kusambakena ne mfumu. Ne bakaya ne bakinama kumpala kua mfumu, bu kumukukuila bua bunena buenda.

23 Ne biakalua ne mfumu wakela tshianza bua kubajula, bu muvua tshibidilu kudi Bena Lamana, bu tshilejilu tshia ditalala, tshibidilu tshivuabu bangatshila kudi Bena Nefi.

24 Ne biakalua ne pakajulaye wa kumpala panshi, monayi wakatua mfumu kela ku mutshima; ne wakapona panshi.

25 Mpindiewu basadidi ba mfumu bakanyema; ne basadidi ba Amalikia bakela lubila, bamba ne:

26 Monayi, basadidi ba mfumu bamutu kela mu mutshima, ne waponyi ne banyemi; monayi, luayi ne numona.

27 Ne biakalua ne Amalikia wakela mukenji ne misumba yenda ya basalayi iya ne imona tshivua tshifikila mfumu; ne pakafikabu pa muaba awu, ne bakasangana mfumu mulala mu mashi enda, Amalikia wakenza bu uvua mifîka tshiji, ne wakamba ne: Yonsu uvua munanga mfumu, aya ne alondakaja basadidi benda bua bashipibua.

28 Ne biakalua ne bonsu bavua bananga mfumu, pakumvuabu mêyi â, bakalua ne bakalondakaja basadidi ba mfumu.

29 Mpindiewu pakamona basadidi ba mfumu musumba wa basalayi ubalondakaja, bakumvua bôwa, ne bakanyema mu tshipela, ne bakalua ku bulaba bua Zalahemela ne bakadisangisha ku bantu ba Amona.

30 Ne musumba wa basalayi wakabalondakaja wakapingana, bualu bakabalondakaja tshianana; ne nanku Amalikia, ku dibila dienda, wakapeta mitshima ya bantu.

31 Ne biakalua ne pakatshiabu wakabuela mu tshimenga tshia Nefi ne misumba yenda ya basalayi, ne wakangata tshimenga.

32 Ne mpindiewu biakalua ne mukaji wa mfumu, pakumvuaye ne bavua bashipa mfumu—bualu Amalikia uvua mutuma bantu kudi mukaji wa mfumu, bua kumumanyisha ne basadidi ba mfumu bavua bamushipa, ne uvua mubalondakaja ne musumba wenda wa basalayi, kadi bivua tshianana, ne bakanyema—

33 Bua nanku, pakapeta mukaji wa mfumu mukenji ewu wakatuma muntu kudi Amalikia, ujinga ne epelesha bantu ba mu tshimenga; ne wakajinga kabidi ne alua kudiye; ne wakajinga kabidi ne alua ne bajadiki bua kujadika bitangila lufu lua mfumu.

34 Ne biakalua ne Amalikia wakangata musadidi wa momumua wakashipa mfumu, ne bonsu bonsu bavua nenda, ne wakaya kudi mukaji wa mfumu, kua muaba uvuaye musomba; ne bakamujadikila bonsu ne umua wa ku basadidi ba mfumu nkayenda wakamushipa; ne bakamba kabidi ne: Bavua banyema; ne etshi katshiena tshijadika dipîla diabu anyi? Ne nanku bakasankisha mukaji wa mfumu bitangila lufu lua mfumu.

35 Ne biakalua ne Amalikia wakakeba kusuibua kudi mukaji wa mfumu, ne wakamuangata bua ikala mukaji wenda; ne nanku ku dibila dienda, ne ku diambuluisha dia basadidi benda bena budimu, wakapeta bukalenga; eyowa, wakitabujibua mfumu mu bulaba bonsu ne udi mfumu, munkatshi mua bantu ba Bena Lamana, bavua bikala nsangilu tshia Bena Lamana, ne Bena Lemuele, ne Bena Yishemaela, ne batapuluki bonsu ba ku Bena Nefi, katshia ku bumfumu bua Nefi tô ne ku tshikondu etshi.

36 Mpindiewu batapuluki aba, bualu bavua ne dilongesha dia momumua ne dimanya dia momumua ne Bena Nefi, eyowa, bualu bavua balongeshibua mu dimanya dia momumua ne dia Mukalenga, nansha nanku, bidi bikemesha bua kulonda ne, mutantshi kawuyi mula to kunyima kua matapuluka abu bakalua bapapa bikola ne kabayi bitaba tshilema tshiabu to, ne bapala, bena bubi ne bena tshikisu kupita Bena Lamana—bangata ngikadilu ya Bena Lamana; badifila ku bufuba, ne ku mishindu yonsu ya majinga a mubidi; eyowa, bapua Mukalenga Nzambi wabu moyo kashidi.