1 Ne mpindiewu biakalua ne pakapeta Moloni mukanda ewu mutshima wenda wakapeta dikima, ne uvua muwula ne disanka dinena menamena bua bualu bua lulamatu lua Paholana, ne kavua muikala penda mupangidi wa budishikaminyi ne bualu bua ditunga dienda to.

2 Kadi wakadila kabidi menamena bua malu mabi a bavua bipata Paholana ku nkuasa wa tshilumbuluilu abu, eyowa, mu tshikosu, bua bavua batombokela ditunga diabu ne Nzambi wabu kabidi abu.

3 Ne biakalua ne Moloni wakangata bungi bukesa bua bantu, bilondeshila ku dijinga dia Paholana, ne wakapesha Lehi ne Teyankuma bulombodi bua tshishadi tshia musumba wenda wa basalayi, ne wakâsa luendu luenda mutangila ku bulaba bua Gideona.

4 Ne wakela dibendela dia budishikaminyi mûlu mu muaba onsu wakabuelaye, ne wakapeta tshisumbu tshia basalayi tshionsu tshivuaye mua kupeta mu luendu luenda lonsu mutangila ku bulaba bua Gideona.

5 Ne biakalua ne binunu bia bantu dibendela dienda ne biakambula miela yabu ya mvita bua kusungidila budishikaminyi buabu, bua kabayi mu bupika to.

6 Ne nanku, pakasangisha Moloni bantu bonsu bavuaye mua kukunguija pamua mu luendu luenda lonsu, wakafika ku bulaba bua Gideona; ne pakasangishaye bisumbu bienda bia basalayi ne bia Paholana bakalua ne makanda menamena, mena kupita bantu ba Pakusa, uvua muikala mfumu wa batapuluki bavua bipata bantu-badishikaminyi mu bulaba bua Zalahemela ne bavua bangata bulaba.

7 Ne biakalua ne Moloni ne Paholana bakapueka ne misumba yabu ya basalayi ku bulaba bua Zalahemela, ne bakaya kuluisha tshimenga, ne bakasambakena ne bantu ba Pakusa, mua ne bakabela mvita.

8 Ne monayi, Pakusa wakashipibua ne bantu benda bakakuatshibua bena buloko, ne Paholana wakapingajibua mu nkuasa wenda wa tshilumbuluilu.

9 Ne bantu ba Pakusa bakapeta dilumbulula diabu, bilondeshila ku mikenji, ne kabidi bantu-ba-mfumu abu bavua bangatshibua ne bedibua mu buloko; ne bakashipibua bilondeshila ku mikenji; eyowa, bantu ba Pakusa abu ne bantu-ba-mfumu abu, bonsu bavua babenga kuambula biluilu biabu bua kusungidila ditunga diabu, kadi bavua badiluisha, bakashipibua.

10 Ne nanku biakakengedibua ne batumikila mikenji eyi ne bushuwa menamena bua kuepula ditunga diabu ku njiwu; eyowa, ne ewu yonsu uvuabu basangana uvila budishikaminyi buabu bavua bamushipa lukasa bilondeshila ku mikenji.

11 Ne ki muakajika tshidimu tshia makumi asatu tshia dikôkesha dia balumbuluishi pa mutu pa bantu ba Nefi nanku; Moloni ne Paholana bamana kupingajulula ditalala mu bulaba bua Zalahemela, munkatshi mua bantu babu nkayabu, bamana kushipa bonsu bavua kabayi badifila ku bualu bua budishikaminyi to.

12 Ne biakalua ne ku ntuadijilu kua tshidimu tshia makumi asatu ne tshimua tshia dikôkesha dia balumbuluishi pa mutu pa bantu ba Nefi, Moloni wakenzeja katataka bua ne biakudia bitumibua, ne musumba wa basalayi binunu bisambombo utumibua kabidi kudi Helamana, bua kumuambuluisha bua kulama tshitupa atshi tshia bulaba.

13 Ne wakenzeja kabidi batumina misumba ya basalayi ya Lehi ne Teyankuma musumba wa basalayi binunu bisambombo, ne bungi bukumbana bua biakudia. Ne biakalua ne bakenza nanku bua kukolesha bulaba ku dibaluisha dia Bena Lamana.

14 Ne biakalua ne Moloni ne Paholana, bakashiya tshisumbu tshinena tshia bantu ku bulaba bua Zalahemela, bakâsa luendu luabu ne tshisumbu tshinena tshia bantu batangila ku bulaba bua Nefiha, bualu bavua bapangadika bua kutonkola Bena Lamana mu tshimenga atshi.

15 Ne biakalua ne bu muvuabu baya batangila ku bulaba ebu, bakakuata tshisumbu tshinena tshia Bena Lamana, ne bakashipa ba bungi babu, ne bakanyenga biakudia biabu ne biluilu biabu bia mvita.

16 Ne biakalua ne kunyima kua babakuata, bakabenzeja bua kubuela mu tshipungidi ne kabakuambula kabidi biluilu biabu bia mvita bua kuluisha Bena Nefi kabidi to.

17 Ne pakabuelabu mu tshipungidi etshi bakabatuma bua kusomba ne bantu ba Amona, ne bavua bungi pabuipi ne binunu binayi bivuabu kabayi bashipa to.

18 Ne biakalua ne pakabatumabu, Bena Nefi bakatungunuka ne luendu luabu batangila ku bulaba bua Nefiha. Ne biakalua ne pakafikabu ku tshimenga tshia Nefiha, bakâsa ntenta yabu mu mpata ya Nefiha, yidi pabuipi ne tshimenga tshia Nefiha.

19 Mpindiewu Moloni uvua ujinga Bena Lamana bapatuka bua kubaluisha mvita mu mpata; kadi Bena Lamana, bualu bavua bamanya dikima diabu dikola, ne bualu bavua bamona bunena bua bungi buabu, bua nanku kabakakima nanku bua kupatuka bua kubaluisha to; bua nanku kabakalua kubaluisha mvita dituku adi to.

20 Ne pakila butuku, Moloni wakaya mu mîdima ya butuku, ne wakabanda pa mutu pa tshimanu bua kutentekela mu tshitupa kayi tshia tshimenga muvua Bena Lamana batudila ne musumba wabu wa basalayi.

21 Ne biakalua ne bavua esete, pabuipi ne ku tshibuelelu; ne bavua bonsu balala tulu. Ne mpindiewu Moloni wakapingana kudi musumba wenda wa basalayi, ne wakenzeja ne balongolola lukasa mionji mikola ne bibandilu, bua kutulula mu tshitupa tshia munda mua tshimanu kumbukila pa mutu pa tshimanu.

22 Ne biakalua ne Moloni wakenzeja bantu benda ne benda kumpala ne babanda pa mutu pa tshimanu, ne batulukila munda mua tshitupa tshia tshimenga atshi, eyowa, mena ku wesete, kuvua Bena Lamana kabayi batudila ne misumba yabu ya basalayi to.

23 Ne biakalua ne bakatuluka bonsu mu tshimenga mundankulu, ku njila wa mionji yabu mikola ne dia bibandilu biabu; pakatshia butuku bavua bonsu munda mua bimanu bia tshimenga.

24 Ne mpindiewu, pakabika Bena Lamana ne pakamonabu misumba ya basalayi ya Moloni ivua munda mua bimanu, bakumvua bôwa menamena, mu mushindu wa ne bakanyemena ku tshibuelelu.

25 Ne mpindiewu pakamona Moloni ne bavua banyema kumpala kuenda, wakenzeja ne bantu benda benda kumpala bua kubaluisha, ne bakashipa ba bungi, ne bakanyungulula bakuabu ba bungi, ne bakabakuata bena lukanu; ne tshishadi tshiabu tshiakanyema ku bulaba bua Moloni, buvua ku mikalu ya pabuipi ne ku muelelu wa mbuwa.

26 Ka muvua Moloni ne Paholana bangata tshimenga tshia Nefiha kakuyi dijimija dia muntu nansha umua nanku to; ne kuvua ba bungi ba ku Bena Lamana bavuabu bashipa.

27 Mpindiewu biakalua ne ba bungi ba ku Bena Lamana bavua bena lukanu bakajinga bua kudisangisha kudi bantu ba Amona ne kulua bantu badikadila.

28 Ne biakalua ne bonsu bavua bajinga nanku, bakabanyishila ne benza bilondeshila ku dijinga diabu.

29 Bua nanku, bena lukanu bonsu ba ku Bena Lamana bakadisanga kudi bantu ba Amona ne bakabanga kukuata mudimu menamena, badima buloba, basashisha mishindu yonsu ya nteta ne bamuna bisumbu bia bimuna bikesa ne binena bia mushindu onsu; ne nanku Bena Nefi bakapoleshibua ku bujitu bunena; eyowa, mu mushindu wa ne bakapoleshibua ku bena lukanu bonsu ba ku Bena Lamana.

30 Mpindiewu biakalua ne Moloni, kunyima kua kuangata tshimenga tshia Nefiha, kunyima kua kukuata ba bungi bena lukanu, tshiakakepesha misumba ya basalayi ya Bena Lamana menamena, ne kunyima kua muangatulula Bena Nefi ba bungi bavuabu bakuata bena lukanu, tshiakakolesha musumba wa basalayi wa Moloni menamena; bua nanku Moloni wakashiya bulaba bua Nefiha ne wakaya ku bulaba bua Lehi.

31 Ne biakalua ne pakamona Bena Lamana ne Moloni uvua ulua kubaluisha, bakumvua kabidi bôwa bikola ne bakanyema kumpala kua musumba wa basalayi wa Moloni.

32 Ne biakalua ne Moloni ne musumba wenda wa basalayi bakabalondakaja ku tshimenga ne ku tshimenga, tô ne pakasambakenabu ne Lehi ne Teyankuma; ne Bena Lamana bakanyema Lehi ne Teyankuma, bakapueka mena ku mikalu ya pabuipi ne ku muelelu wa mbuwa, tô ne muakaluabu ku bulaba bua Moloni.

33 Ne misumba ya basalayi ya Bena Lamana ivua misangishibua yonsu pamua, mua ne ivua yonsu mu tshisumbu tshimua mu bulaba bua Moloni. Mpindiewu Amolona, mfumu wa Bena Lamana, uvua penda nabi.

34 Ne biakalua ne Moloni ne Lehi ne Teyankuma bakatudila ne misumba yabu ya basalayi ku mpenga yonsu, mu mikalu ya bulaba bua Moloni, mua ne Bena Lamana bavua banyungulukibua ku mikalu ya pabuipi ne tshipela tshia ku sude, ne ku mikalu ya pabuipi ne tshipela tshia ku esete.

35 Ne ki muakatudilabu bua butuku nanku. Bualu monayi, Bena Nefi ne Bena Lamana pabu bavua batshioka bua bula ne bukola bua luendu; bua nanku kabakangata dipangadika dia bulongolodi nansha bumua mundankulu to, amu pa kumbusha Teyankuma; bualu wakafîkila Amolona tshiji menamena, mu mushindu wa ne uvua umona ne Amolona, ne Amalikia muanabu wa baluma, bavua bikala tshiena bualu tshia mvita minena ne ivua kayiyi ijika eyi to pankatshi pabu ne Bena Lamana, tshivua tshikala tshiena bualu tshia mvita ya bungi ne dimatshisha dia mashi nanku, eyowa, ne tshiyola tshia bungi nanku.

36 Ne biakalua ne Teyankuma mu tshiji tshienda wakaya mu tshitudilu tshia Bena Lamana, ne wakatulukila mu tshimenga ku bimanu. Ne wakaya ne muonji, ku muaba ne ku muaba, mua ne wakapeta mfumu; ne wakamuasa difuma, diakamutubula pabuipi ne mutshima. Kadi monayi, mfumu wakabisha basadidi benda kumpala kua kufuaye, mua ne bakalondakaja Teyankuma, ne bakamushipa.

37 Mpindiewu biakalua ne pakamanya Lehi ne Moloni ne Teyankuma uvua mufua bakanyingalala menamena; bualu monayi, uvua muntu uvua muluangana ne bukitu bua ditunga dienda, eyowa, mulunda mulelela wa budishikaminyi; ne uvua mukenga ntatu mipita bungi menamena. Kadi monayi, wakafua ne wakaya ku njila wa buloba bonsu.

38 Mpindiewu biakalua ne Moloni wakaya pakatshiabu, ne wakabunda Bena Lamana, mua ne wakabashipa ne dishibeya dikola; ne bakabipata mu bulaba; ne bakanyema, mena ne kabakapingana mu diba adi bua kuluisha Bena Nefi to.

39 Ne ki muakajika tshidimu tshia makumi asatu ne tshimua tshia dikôkesha dia balumbuluishi pa mutu pa bantu ba Nefi nanku; ne bavua nanku bapeta mvita, ne dimatshisha dia mashi dia bungi, ne tshiyola, ne lutatu, bua mutantshi wa bidimu bia bungi.

40 Ne kuvua dishipa dia bantu, ne makokangana, ne matapuluka, ne mishindu yonsu ya malu a bubi munkatshi mua bantu ba Nefi; nansha nanku, bua bualu bua bakana, eyowa, bua bualu bua masambila a bakana, bakepeleshibua.

41 Kadi monayi, bua bula bupita menamena bua mvita ya pankatshi pa Bena Nefi ne Bena Lamana ba bungi bakalua bapapa, bua bula bupita menamena bua mvita; ne ba bungi bakateketa bua ntatu yabu, mu mushindu wa ne bakadipuekesha kumpala kua Nzambi, mena mu ndondu wa didipuekesha.

42 Ne biakalua ne kunyima kua Moloni mukolesha bitupa bia bulaba bivua bipita kulekeledibua kumpala kua Bena Lamana abi, tô ne pakaluabi bikola bikumbana, wakapingana ku tshimenga tshia Zalahemela; ne Helamana penda wakapingana ku muaba wa bupianyi buenda; ne ditalala dishikikibua kabidi munkatshi mua bantu ba Nefi.

43 Ne Moloni wakafila bulombodi bua misumba yenda ya basalayi mu bianza bia muanenda wa baluma, uvua dîna ne Moloniha; ne wakadipingaja ku nzubu wenda nkayenda, bua apitshisha tshishadi tshia matuku enda mu ditalala.

44 Ne Paholana wakapingana ku nkuasa wa tshilumbuluilu; ne Helamana wakangata kabidi mudimu wa kuyisha bantu dîyi dia Nzambi; bualu bua mvita ya bungi ne makokangana, bivua bilua bikengedibua ne bateka kabidi bulongolodi mu ekelezia.

45 Bua nanku, Helamana ne bana babu ba baluma bakaya, ne bakamanyisha dîyi dia Nzambi ne bukola bua bungi bua kuitabujija bantu ba bungi bitangila bubi buabu, tshiakabenzeja bua kukudimuna mutshima bua kulekela mibi yabu ne kutambuishibua bua Mukalenga Nzambi wabu.

46 Ne biakalua ne bakashikika ekelezia wa Nzambi, mu bulaba bonsu.

47 Eyowa, ne bakateka mikandu bitangila mikenji. Ne bakasungula balumbuluishi babu, ne balumbuluishi babu banena.

48 Ne bantu ba Nefi bakabanga kulubuluka kabidi mu bulaba, ne bakabanga kuvulangana ne kukola menamena kabidi mu bulaba. Ne bakabanga kulua babanji menamena.

49 Kadi nansha bua mabanji abu, anyi makanda abu, anyi bua dilubuluka diabu, kabakadibandisha mu diditambisha dia mesu abu to; anyi kabavua ne kabavua ne lujoku bua kuvuluka Mukalenga Nzambi wabu to; kadi bakadipuekesha menamena kumpala kuenda.

50 Eyowa, bakavuluka bunena bua malu avua Mukalenga mubenzela, ne uvua mubapatuisha mu lufu, ne mu mionji, ne mu maloko, ne mu mishindu yonsu ya ntatu, ne uvua mubapatuisha mu bianza bia bena lukuna babu.

51 Ne bakasambila Mukalenga Nzambi wabu ne munanunanu, mua ne Mukalenga wakababenesha, bilondeshila ku dîyi dienda, bua ne bakakolakana ne bakalubuluka mu bulaba.

52 Ne biakalua ne bintu bionsu ebi bivua bienzeka. Ne Helamana wakafua, mu tshidimu tshia makumi asatu ne tshitanu tshia dikôkesha dia balumbuluishi pa mutu pa bantu ba Nefi.