Mukanda wa Alama
Muana wa Baluma wa Alama
Mulubu wa Alama, uvua muana wa baluma wa Alama, mulumbuluishi munena wa kumpala wa bantu ba Nefi, ne kabidi muakuidi munena ku mutu kua Ekelezia. Mulubu wa dikôkesha dia balumbuluishi, ne wa mvita ne makokangana munkatshi mua bantu. Ne kabidi mulubu wa mvita munkatshi mua Bena Nefi ne Bena Lamana, bilondeshila ku miandiku ya Alama, mulumbuluishi munena wa kumpala.
Shapita 1
Neholo udi ulongesha mayisha a mafi, udi ushikika ekelezia, udi ubueja buakuidi bua mafi, ne udi ushipa Gideona—Badi bamushipa bua mibi yenda—Buakuidi bua mafi ne dikengeshangana bidi bitangalaka munkatshi mua bantu—Bakuidi badi badikuatshisha nkayabu, bantu badi bambuluisha bapela, ne Ekelezia udi ulubuluka. Pabuipi ne 91–88 k.d.K.
1 Mpindiewu biakalua ne mu tshidimu tshia kumpala tshia dikôkesha dia balumbuluishi pa mutu pa bantu ba Nefi, kubangila diba adi, mfumu Mosiya wakaya ku njila wa buloba bonsu, mumana kuluangana mvita mimpa, muvuaye muenda môloloka kumpala kua Nzambi, kayi mushiya muntu nansha umua bua kukôkesha pa muaba wenda to; nansha nanku, uvua mushikika mikenji, ne ivua mitabujibua kudi bantu; bua nanku bavua ne tshia kusomba bilondeshila ku mikenji ivuaye muteka.
2 Ne biakalua ne mu tshidimu tshia kumpala tshia dikôkesha dia Alama mu nkuasa wa tshilumbuluilu, kuvua muntu wakaluabu nenda kumpala kuenda bua kulumbuluishibua, muntu uvua wa mubidi munena, ne uvua mumanyika bua makanda enda a bungi.
3 Ne uvua muya munkatshi mua bantu, ubayisha tshivuaye ubikila ne dîyi dia Nzambi, mu kuluisha ekelezia; wambila bantu ne muakuidi yonsu ne mulongeshi yonsu uvua ne tshia kutumba; ne kabavua mua kutumika mudimu ne bianza biabu to, kadi ne bantu bavua ne tshia kubakuatshisha.
4 Ne wakajadikila kabidi bantu ne bukua bantu bonsu nebupandishibua ku dituku dia ndekelu, ne kabatshinyi anyi kabazakadi to, kadi bambulula mitu yabu ne basanka; bualu Mukalenga uvua mufuka bantu bonsu, ne uvua kabidi musungila bantu bonsu; ne, ku ndekelu, bantu bonsu nebapeta moyo wa tshiendelela.
5 Ne biakalua ne wakalongesha bintu ebi bikola ne ba bungi bakitabuija mêyi enda, ba bungi mena ne bakabanga kumukuatshisha ne kumupesha makuta.
6 Ne wakabanga kudibandisha ne diditambisha mu mutshima wenda, ne kuvuala bilamba bia mushinga mukola, eyowa, ne wakabanga mena kushikika ekelezia ku mushindu wa diyisha dienda.
7 Ne biakalua pavuaye uya bua kuyisha bavua bitabuija dîyi dienda, wakasambakena ne muntu uvua mu ekelezia wa Nzambi, eyowa, mena umua wa balongeshi babu; ne wakabanga kukokangana nenda bikola, bua amuna mua kupambuisha bantu ba mu ekelezia; kadi muntu awu wakamukolela, umudimuisha ne mêyi a Nzambi.
8 Mpindiewu dîna dia muntu awu divua Gideona; ne nyeye uvua muikala tshiamu tshia mudimu mu bianza bia Nzambi bua kupatuisha bantu ba Limihi mu bupika.
9 Mpindiewu, bualu Gideona wakamukolela ne mêyi a Nzambi, wakafîkila Gideona tshiji, ne wakapatula muela wenda wa mvita ne wakabanga kumutûta. Mpindiewu Gideona ukavua mutûtshika ne bidimu bia bungi, bua nanku kavua mua kukandamena mitûtu yenda to, bua nanku wakamushipa ne muela wa mvita.
10 Ne muntu wakamushipa bakakuatshibua kudi bantu ba mu ekelezia, ne bakalua nenda kumpala kua Alama, bua kulumbuluishibuaye bilondeshila mibi ivuaye muenza.
11 Ne biakalua ne wakimana kumpala kua Alama ne wakadiakuila ne dikima dia bungi.
12 Kadi Alama wakamuambila ne: Mona, ewu mmusangu wa kumpala udi buakuidi bua mafi bubuela munkatshi mua bantu aba. Ne mona, kuena mupîla amu bua buakuidi bua mafi to, kadi udi mukeba bua kububueja ku bukola ne muela wa mvita; ne bu buakuidi bua mafi bua kubuejibua ku bukola munkatshi mua bantu aba neatuala dibutuka diabu dijima.
13 Ne udi mumatshisha mashi a muntu muakana, eyowa, muntu uvua muenza malu mimpa a bungi munkatshi mua bantu aba; ne bu tuetu bua kukuepelesha, mashi enda nealua kudisombuela kutudi.
14 Bua nanku wakabakosela kufua, bilondeshila ku mikenji ivua Mosiya, mfumu wetu wa ndekelu, mutupesha; ne bivua bikala bitabujibua kudi bantu; bua nanku bantu aba badi ne tshia kulonda mikenji.
15 Ne biakalua ne bakamuangata; ne dîna dienda divua Neholo; ne bakaya nenda ku musongu wa kakuna ka Manti, ne aku wakenzejibua, anyi nansha wakitabuja, pankatshi pa diûlu ne buloba, ne bivuaye mulongesha kudi bantu bivua bishilangana ne dîyi dia Nzambi; ne aku wakakenga lufu lua bundu.
16 Nansha nanku, kabiakajikija ditangalaka dia buakuidi bua mafi mu bulaba to; bualu kuvua ba bungi bavua bananga bintu bia tshianana bia pa buloba, ne bavua baya bayisha malongesha a mafi; ne bavua benza nanku bua bualu bua mabanji ne lumu.
17 Nansha nanku, kabakakima kushima to, bua bôwa bua mikenji, bualu bavua banyoka bena mafi; bua nanku bavua benza bu kuyisha bilondeshila ku ditabuija diabu; kadi mpindiewu mikenji kayivua ne bukôkeshi kudi muntu nansha umua bitangila ditabuija dienda to.
18 Ne kabakakima kuiba to, bua bôwa bua mikenji, bualu bantu ba buena aba bavua babanyoka; anyi kabavua bakima kunyenga bintu bia benda to, anyi kushipa bantu to, bualu ewu uvua ushipangana uvua upeta dinyoka dia lufu.
19 Kadi biakalua ne ewu yonsu uvua kayi mu ekelezia wa Nzambi to wakabanga kukengesha bavua mu ekelezia wa Nzambi, ne bavua bangata dîna dia Kilisto.
20 Eyowa, bakabakengesha, ne bakabatatshisha ne mêyi a mushindu onsu, ne bivua nanku bualu bua didipuekesha diabu; bualu kabavua to, ne bualu bavua bambilangana bamua ne bakuabu dîyi dia Nzambi, kabiyi bua makuta ne kakuyi mushinga wa kufuta to.
21 Mpindiewu kuvua mikenji mikola munkatshi mua bantu ba mu ekelezia, ne muntu nansha umua wa mu ekelezia kavua bua kujuka ne kukengesha bavua kabayi mu ekelezia to, ne kakuvua bua kuikala dikengeshangana munkatshi muabu nkayabu to.
22 Nansha nanku, kuvua ba bungi munkatshi muabu bakabanga kuikala baditambishi, ne bakabanga kukokangana bikola ne baluishi babu, mena tô ne ku ditûtangana, eyowa, bavua batûtangana ne mankomu abu.
23 Mpindiewu ebi bivua bienzeka mu tshidimu tshibidi tshia dikôkesha dia Alama, ne bivua tshiena bualu tshia lutatu lunena bua ekelezia; eyowa, bivua tshiena bualu tshia ditêta dikola bua ekelezia.
24 Bualu mitshima ya ba bungi ivua mipapa, ne mêna abu akakupudibua, bua kababavuluki kabidi munkatshi mua bantu ba Nzambi nansha. Ne kabidi ba bungi bakadiumbukila munkatshi muabu.
25 Mpindiewu etshi tshivua ditêta dinena bua bavua bakankamana mu ditabuija; nansha nanku, bavua basuminyina ne kabayi banyungana mu dilama dia mikenji ya Nzambi to, ne bakitaba ne ditukija dikengeshibua divua difuisha nadi pa mutu pabu.
26 Ne pavua bakuidi balekela didikuatshila dia mudimu wabu bua kuambila bantu dîyi dia Nzambi, bantu pabu bavua balekela didikuatshila dia midimu yabu bua kuteleja dîyi dia Nzambi. Ne pavua muakuidi mumana kubambila dîyi dia Nzambi bavua bapingana bonsu ne dinanukila ku didikuatshila dia midimu yabu; ne muakuidi kavua udiangata ne mushinga kupita bamuteleji benda to, bualu muyishi kavua muimpa kupita muteleji to, anyi mulongeshi kavua muimpa nansha kakesa kupita mulongi to; ne bavua nanku bonsu momumua, ne bavua bonsu batumika mudimu, muntu yonsu bilondeshila ku bukola buenda.
27 Ne bavua babanyina bapela, ne bakengi, ne babêdi, ne batatshishibua bimua bia bintu biabu, muntu yonsu bilondeshila ku bivuaye nabi; ne kabavua bavuala bilamba bia mushinga mukola to, kadi bavua ne mankenda ne bavua balengela.
28 Ne nanku bakashikika mianda ya ekelezia nanku; ne ki muakabangabu kupeta ditalala ditungunuka nanku, nansha muvuaku makengeshibua abu onsu.
29 Ne mpindiewu, bua bualu bua disuminyina dia ekelezia, bakabanga kuikala babanji menamena, bikala ne buvula bua bintu bionsu bivuabu bakengela—buvula bua bisumbu bia bimuna bikesa ne binena, ne nyama ya manyi ya mushindu onsu, ne kabidi buvula bua nteta, ne bua ngolo, ne bua mpalata, ne bua bintu bia mushinga mukola, ne buvula bua bilulu bia busu ne lin muluka bimpa, ne mishindu yonsu ya bilulu bimpa bia tshibidilu.
30 Ne nanku, pavua malu abu enda bimpa, kabavua bapala muntu nansha umua uvua butaka, anyi uvua ne nzala, anyi uvua ne nyota, anyi uvua mubêdi, anyi uvua kayi mudishibua; ne kabavua bateka mitshima yabu ku mabanji to; bua nanku bavua bapesha bantu bonsu ne mutshima umua, bubidi buabu bakola ne bana, bubidi buabu bapika ne badikadila, bubidi buabu baluma ne bakaji nansha bikala mu ekelezia anyi kabayi mu ekelezia to, kabayi ne disungulula dia bantu bitangila bavua bakengela bintu to.
31 Ne ki muakalubulukabu nanku ne muakaluabu babanji bikola kupita bavua kabayi mu ekelezia wabu to.
32 Bualu bavua kabayi bikala mu ekelezia to bavua badifila ku mipongu, ne ku ditendelela dia mpingu anyi ku bufuba, ne ku biakulakula, ne mu malakana ne luntûta, bavuala bilamba bia mushinga mukola; badibandisha mu diditambisha ku mesu abu nkayabu; bakengeshangana, bashimangana, bîbangana, banyengangana bintu bia benda, benda masandi, ne bashipa bantu, ne benza bubi bua mushindu onsu; nansha nanku, mikenji ivua milondeshibua pa bonsu bavua basambuka mikenji, monsu muvuabi mua kuenjibua.
33 Ne biakalua ne mu kulondeshisha mikenji pa bobu nanku, muntu yonsu unyokibua bilondeshila ku tshivuaye muenza, bakatukija bikola, ne kabakakima kuenza bubi nansha bumua to bua kabilu kumanyika; bua nanku, kuvua ditalala dia bungi munkatshi mua bantu ba Nefi tô ne mu tshidimu tshitanu tshia dikôkesha dia balumbuluishi.