Shapita 42
Moyo wa tshifuaka udi tshikondu tshia kutêtshibua bua kupesha muntu mushindu wa kukudimuna mutshima ne kusadila Nzambi—Dipona dia Adama diakatuala lufu lua mubidi ne lua nyuma kudi bukua bantu bonsu—Disungila didi dienzeka ku njila wa dikudimuna dia mutshima—Nzambi nkayenda neapikula bua mibi ya ba pa buloba—Lusa ludi bua badi bakudimuna mutshima—Bonsu bakuabu badi babatshikibua bua bululama bua Nzambi—Lusa luenzeka bua bualu bua Bupikudi—Amu bakudimunyi mutshima balelela badi bapandishibua. Pabuipi ne 74 k.d.K.
1 Ne mpindiewu, muananyi wa baluma, ndi mumona ne kudi tshintu tshikesa tshikuabu tshidi tshitatshisha meji eba, tshiwudi kuyi mua kumvua to—tshidi tshitangila bululama bua Nzambi bitangila dinyoka dia Nzambi dia muenji wa mibi; bualu udi widikija kutshinka ne bidi kupanga kua bululama bua muenji wa mibi apîshibua ku ngikadilu wa dikenga.
2 Mpindiewu mona, muananyi wa baluma, nenkumvuija tshintu etshi. Bualu mona, kunyima kua Mukalenga Nzambi muipata baledi betu ba kumpala mu budimi bua Edene, bua kudimabu buloba, kuvuabu bangatshibua—eyowa, wakapatulamu muntu, ne wakateka bakeluba ku esete wa budimi bua Edene, ne muela wa mvita wa kapia uvua unyunguluka ku nseka yonsu, bua kulamabu mutshi wa moyo—
3 Mpindiewu, tudi tumona ne muntu wakalua bu Nzambi, mumanya buimpa ne bubi; ne kalu kôlola tshianza tshienda, ne kangatshi kabidi bia ku mutshi wa moyo, ne kadi ne kikadi ne moyo bua kashidi, Mukalenga Nzambi wakateka bakeluba ne muela wa mvita wa kapia, bua kadi tshimuma to—
4 Ne nanku tudi tumona, ne kudi diba dipesha muntu bua kukudimuna mutshima, eyowa, diba dia kutêtshibua, diba dia kukudimuna mutshima ne kusadila Nzambi.
5 Bualu mona, bu Adama môlola tshianza tshienda katataka, ne mudia bia ku mutshi wa moyo, uvua mua kuikala ne moyo bua kashidi, bilondeshila dîyi dia Nzambi, kayi ne diba dia kukudimuna mutshima to; eyowa, ne kabidi dîyi dia Nzambi divua mua kuikala patupu, ne dilongolola dinena dia lupandu divua mua kunyanguka.
6 Kadi mona, nkupangidikibua ne muntu afua—bua nanku, bu muvuabu bakoshibua ku mutshi wa moyo bavua bakoshibua pa mpala wa buloba—ne muntu wakjimina bua kashidi, eyowa, bakalua bantu bapona.
7 Ne mpindiewu, nudi numona ne bua bualu ebu baledi betu ba kumpala bavua bakoshibua ku mpala kua Mukalenga mu mubidi ne mu nyuma; ne nanku tudi tumona ne bakalua ne bukôkeshi bua kulonda disua diabu nkayabu.
8 Mpindiewu mona, kabivua bikengela bua ne muntu asungidibua ku lufu lua mubidi elu to, bualu abi bivua mua kunyangakaja dilongolola dinena dia disanka.
9 Bua nanku, bu mudi anyima kayi ufua nansha to, ne dipona dia Adama diakatuadila bukua bantu bonsu lufu lua nyuma ne kabidi lua mubidi, buena kuamba ne, bavua bakoshibua ku mpala kua Mukalenga, bivua bikengela ne bukua bantu busungidibua ku lufu lua nyuma.
10 Bua nanku, bu muakaluabu bantu ba mu mubidi, bena majinga a mubidi, ne bena diabulu, ku buikadi buabu, ngikadilu wa kutêtshibua ewu wakalua ngikadilu wa bobu ku dilongolola; wakalua ngikadilu wa bulongolodi.
11 Ne mpindiewu vuluka, muananyi wa baluma, bu kabiyi bua dilongolola dia disungila to, (tuetu bua bamuteka ku luseka) katataka bavuabu bafua anyima yabu ivua ne dikenga, bikala bakoshibua ku mpala kua Mukalenga.
12 Ne mpindiewu, kakuvua mushindu wa kusungila bantu ku ngikadilu wa dipona ewu to, uvua muntu mudituadila kudiye nkayenda bua dibenga ditumikila dienda;
13 Bua nanku, bilondeshila ku bululama, dilongolola dia disungila kavua mua kuenzeka to, amu ku mukenji wa dikudimuna dia mutshima dia bantu mu ngikadilu wa kutêtshibua ewu, eyowa, ngikadilu wa kudilongolola ewu; bualu pa kumbusha bua mukenji ewu, lusa kaluvua mua kupeta tshipeta to, amu bu lolu lunyangakaja mudimu wa bululama. Mpindiewu mudimu wa bululama kawuvua mua kunyangakajibua to; bu biobi nanku, Nzambi uvua mua kulekela kuikala Nzambi.
14 Ne nanku tudi tumona ne bukua bantu bonsu buvua bupona, ne bavua ku bukôkeshi bua bululama; eyowa, bululama bua Nzambi, buvua bubafila bua kashidi bua kukoshibua ku mpala kuenda.
15 Ne mpindiewu, dilongolola dia lusa kadivua mua kukumbana to, pa kumbusha bupikudi buenzeka; bua nanku Nzambi nkayenda udi upikula bua mibi ya ba pa buloba, bua kukumbaja dilongolola dia lusa, bua kutukija milombu a bululama, bua ne Nzambi ikala Nzambi mujalama, mululama, ne Nzambi wa lusa kabidi.
16 Mpindiewu, dikudimuna dia mutshima kadiena mua kulua kudi bantu to pa kumbusha kuikala dinyoka, divua padi dia tshiendelela bu mudi moyo wa anyima muikala, mubambika mutangilangana ne dilongolola dia disanka, divua dikala dia tshiendelela pawu bu moyo wa anyima.
17 Mpindiewu, munyi muvua muntu mua kukudimuna mutshima bikalaye kayi muenza mibi to? Munyi muvuaye mua kuenza mibi bu koku kakuyi mikenji to? Munyi muvuaku mua kuikala mikenji bu dinyoka kadiyiku to?
18 Mpindiewu, kuvua dinyoka dibambika, ne mikenji miakana mipeshibua, dikatuala nshiya mu meji a muntu.
19 Mpindiewu, bu kakuyi mikenji mifila to—bikala muntu mushipa mukuabu udi ufua—neatshina bua kufua bikalaye mushipa mukuabu anyi?
20 Ne kabidi, bu kakuyi mikenji mifila ikandika mibi, bantu kabavua kutshina bua kuenza mibi to.
21 Ne bu mikenji kayiyi mifila to, bu bantu benza mibi, bululama buvua bua kuenza tshinyi, anyi lusa palu, bualu kabakuikala ne bunema pa tshifukibua to?
22 Kadi kudi mikenji mifila, ne dinyoka dibambika, ne dikudimuna dia mutshima dipeshibua; dikudimuna dia mutshima didi, lusa lulombolola bunema pa diodi; biobi kabiyi nanku to, bululama budi bulombolola bunema pa tshifukibua ne buenzela mikenji, ne mikenji idi ifila dinyoka; kabiyi nanku to, midimu ya bululama ivua mua kunyangakajibua, ne Nzambi uvua mua kulekela kuikala Nzambi.
23 Kadi Nzambi kena ulekela kuikala Nzambi to, ne lusa ludi lulombolola bunema pa aba badi bakudimuna mutshima, ne lusa ludi lulua bua bualu bua bupikudi; ne bupikudi budi butuala dibika dia bafua; ne dibika dia bafua didi dipingaja bantu ku mpala kua Nzambi; ne nanku badi bapingajibua ku mpala kuenda, bua kulumbuluishibua bilondeshila ku midimu yabu, bilondeshila ku mikenji ne bululama.
24 Bualu mona, bululama budi buenzela milombu yabu yonsu, ne lusa kabidi ludi lulombolola bunema pa bonsu badi bâlu; ne nanku, kakuena muntu udi upandishibua to amu bakudimunyi mutshima balelela.
25 Tshinganyi, udi utshinka ne lusa ludi luiba bululama anyi? Ndi nkuambila ne, To; nansha kanungu kamua. Bu biobi nanku, Nzambi uvua ulekela kuikala Nzambi.
26 Ne nanku Nzambi udi wenza majinga enda a tshiendelela, avua malongolola katshia ku tshishimikidi tshia buloba. Ne nanku lupandu ne disungila dia bantu didi dilua, ne kabidi dinyanguka ne dikenga diabu.
27 Bua nanku, Ô muananyi wa baluma, ewu yonsu wikala musua udi mua kulua ne kunua mâyi a moyo tshianana; ne ewu yonsu udi ubenga kulua, yeya muina kena wenzejibua bua kulua ku bukola to; kadi ku dituku dia ndekelu nebimupingajidibua bilondeshila ku bienzedi bienda.
28 Bu yeya mujinga bua kuenza bubi, ne kavua mukudimuna mutshima mu matuku enda to, mona, nebamuenzela bubi, bilondeshila ku dipingaja dia Nzambi.
29 Ne mpindiewu, muananyi wa baluma, ndi musua ne kulekedi bintu ebi bikutatshisha kabidi nansha, ne ulekela amu mibi yeba ikutatshisha, ne ditatshisha diakupuekesha ku dikudimuna dia mutshima.
30 Ô muananyi wa baluma, ndi musua ne kuvidi kabidi bululama bua Nzambi nansha. Kukebi bua kudibingisha ku bualu nansha bukesa bua mibi yeba to, mu divila bululama bua Nzambi; kadi lekela bululama bua Nzambi, ne lusa luenda, ne bulekelelu bueba biwula mu mutshima weba; ne bikupuekesha panshi bua didipuekesha bu mudi lupuishi.
31 Ne mpindiewu, Ô muananyi wa baluma, udi mubikidibua kudi Nzambi bua kuyisha dîyi kudi bantu. Ne mpindiewu, muananyi wa baluma, ndâku, umanyisha dîyi ne bulelela ne bushindama, bua uvuija bantu ku dikudimuna dia mutshima, bua dilongolola dinena dia lusa dikala ne bunema pa mutu pabu. Ne Nzambi akupesha mena bilondeshila ku mêyi enda. Amena.