1 Ne mpindiewu, eyi ki mêyi a Amona kudi bana babu, adi amba nanku: Bana betu ba baluma ne bana betu, monayi, ndi nnuambila ne, bu mudibu bunena bualu butudi ne bua kusankila; bualu patuakatuadijila ku bulaba bua Zalahemela tuvua mua kutshinka ne Nzambi uvua mua kutupesha mabenesha manena nanku anyi?

2 Ne mpindiewu, ndi ngebeja ne, mabenesha manena kayi adiyi mutupesha? Nudi mua kujingulula anyi?

3 Monayi, ndi ngandamuna pa mutu penu; bualu bana betu, Bena Lamana, bavua mu mîdima, eyowa, mena mikola mipita, kadi monayi, bu mudibu ba bungi ba ku bobu badi baluishibua ku dimona dia bukenka bua dikema bua Nzambi! Ne etshi tshidi dibenesha divua ditupesha, ne tuvua balua biamu bia mudimu mu bianza bia Nzambi bua kukumbaja mudimu munena ewu.

4 Monayi, binunu biabu bidi bisanka, ne bivua bibuejibua mu tshisumbu tshia mikoko tshia Nzambi.

5 Monayi, budimi buvua buboba, ne nudi babeneshibua, bualu nuakela muela, ne nuakanowa ne bukola buenu, eyowa, nuakakuata mudimu dituku dijima; ne monayi bungi bua minyaku yenu! Ne neisangishibua mu bisaka, bua kayinyanguki to.

6 Eyowa, kayakutûtshibua panshi kudi mvula mukola ku dituku dia ndekelu to; eyowa, kabidi kayakutangalajibua kudi mvunda to; kadi palua mvula mukola, neisangishibua pamua pa muaba wabi, bua mvula mukola kamonyi mua kufika kudiyi to; eyowa, kabidi kayakusakibua kudi mpepela mikola konsu kudi muena lukuna musua kuya nayi to.

7 Kadi monayi, idi mu bianza bia Mukalenga wa dinowa, ne idi yenda; ne neayijula ku dituku dia ndekelu.

8 Dibeneshibua dikala dîna dia Nzambi wetu; tuimbayi dimusamuna dienda, eyowa, tuelayi dîna dienda dia tshijila tuasakidila, bualu udi ne buakana bua kashidi.

9 Bualu bu tuetu katuyi bashiya bulaba bua Zalahemela to, bana betu bananga bikola, badi batunanga bikola kupita aba batshivua bua kuikala basumpakana ne lukinu kutudi, eyowa, ne bavua bua kuikala kabidi kabayi bamanya Nzambi to.

10 Ne biakalua ne pakamba Amona mêyi â, muanabu wa baluma Alona wakamutandisha, wamba ne: Amona, ndi ntshina ne disanka dieba didi dikusaka ku didiamba.

11 Kadi Amona wakamuambila ne: Ntshiena nditambisha bua bukola buanyi mema to; anyi bua lungenyi luanyi mema to; kadi mona, disanka dianyi ndiwula ntenta, eyowa, mutshima wanyi udi upandika ne disanka, ne nensakila mu Nzambi wanyi.

12 Eyowa, ndi mumanya ne ndi tshianana; bitangila bukola buanyi ndi muteketateketa; bua nanku ntshiakuditambisha nkayanyi to, kadi ne nditambisha mu Nzambi wanyi, bualu, ne bukola buenda, ndi mua kuenza bintu bionsu; eyowa, mona, tudi benza bishima bia bungi binena mu bulaba ebu, bituasamuna dîna dienda bua kashidi.

13 Mona, bu mudibi bia bungi binunu bia bana betu bivuaye musulula ku makenga a ngena; ne badi baluishibua ku dimba dia dinanga dia disungila, ne bidi nanku bua bukola bua dîyi dienda didi munda muetu, bua nanku katuena ne tshia kusankila anyi?

14 Eyowa, tudi ne tshia kumusamuna bua kashidi, bualu udi Nzambi Mutamba Bunena, ne udi musulula bana betu ku nkanu ya mu ngena.

15 Eyowa, bavua banyunguluka ne mîdima ne dinyanguka bia kashidi; kadi mona, udi mulua nabu mu bukenka buenda bua kashidi, eyowa, mu lupandu lua kashidi; ne badi babanyungulula ne lusa luenda ludi kaluyi kufuanyikija to bua dinanga dienda; eyowa, ne tuvua bikala biamua bia mudimu mu bianza bienda bua kuenza mudimu ewu munena ne wa dikema.

16 Bua nanku, tutumbayi, eyowa, netutumbila mu Mukalenga; eyowa, netusanka, bualu disanka dietu ndiwula ntenta; eyowa, netupesha Nzambi wetu lumu bua kashidi. Mona, nganyi udi mua kutumba kupita mu Mukalenga? Eyowa, nganyi udi mua kuamba kupita bua bukola buenda bunena, ne bua lusa luenda, ne bua bulekelelu buenda kudi bana ba bantu? Mona, ndi nkuambila ne, ntshiena mua kuamba tshitupa tshikesa tshia mundi ngumvua to.

17 Nganyi uvua mua kutshinka ne Nzambi wetu uvua bua kuikala ne lusa nanku, mu kutulopola lukasa ku ngikadilu wetu udi utshingisha, wa mibi, ne wa bukoya?

18 Mona, tuakaya mena ne tshiji, ne dikanyina dikola kunyangakaja ekelezia wenda.

19 Ô biobi nanku, bua tshinyi kena mutufundila dinyanguka didi ditshingisha to, eyowa, bua tshinyi kakakulula muela wa mvita wa bululama buenda kutudi to, ne kutulekela mu dipanga dia ditekemena dia tshiendelela?

20 Ô, anyima wanyi, bidi bu ne uvua pabuipi ne kunyema meji â. Mona, kakenzela bululama buenda pa mutu petu to, kadi mu lusa luenda lunena bikola udi mutusambuisha lupongu lua kashidi lua lufu ne dikenga alu, mena bua lupandu lua anyima yetu.

21 Ne mpindiewu monayi, bana betu, muntu kayi wa panu udi mumanya bintu ebi? Ndi nnuambila ne, kakuena nansha umua udi mumanya bintu ebi to, amu pa kumbusha udi mukudimuna mutshima wenda.

22 Eyowa, udi ukudimuna mutshima ne wenzela ditabuija, ne udi utuala midimu mimpa, ne usambila ne munanunanu kayi ulekela to—kudi wa nanku mbipeshibua bua kumanya malu masokoka a Nzambi; eyowa, kudi wa nanku nebipeshibua bua kubuluila bintu bivua kabiyi bianji kubuluibua nansha; eyowa, kudi wa nanku nebipeshibua bua kutuala binunu bia anyima ku dikudimuna dia mutshima, mena bu muvuabi bipeshibua kutudi bua kutuala bana betu aba ku dikudimuna dia mutshima.

23 Mpindiewu nudi nuvuluka, bana betu, ne tuakambila bana betu mu bulaba bua Zalahemela ne, tudi tubanda ku bulaba bua Nefi, bua kuyisha bana betu, Bena Lamana, ne bakatuseka ne mpata anyi?

24 Bualu bakatuambila ne: Nudi nutshinka ne nudi mua kuluisha Bena Lamana ku dimanya dia bulelela anyi? Nudi nutshinka ne nudi mua kuitabujija Bena Lamana bua dipanga dia buakana dia ngikadilu ya batatuabu, bu mudibu bikala bantu ba nshingu mîminyina; bobu bena mitshima idi isankila mu dimatshisha dia mashi; bobu bena matuku akapitshishabu mu malu mabi mapita; bobu bena njila ivua mikala njila ya mushipi wa mikenji kumbukila ku mbangilu anyi? Mpindiewu bana betu, nudi nuvuluka ne ewu uvua ngakuilu wabu.

25 Ne menamena kabidi bakamba ne: Tuambulayi biluilu bua kubaluisha, bua tubabutula ne malu mabi abu mu bulaba, bua kabalu kututamba bukola ne kutubutula.

26 Kadi monayi, bana betu bananga, katuakalua mu tshipela ne dijinga dia kubutula bana betu to, kadi ne dijinga ne pamuapa tudi mua kupandisha bungi bukesa bua ku anyima yabu.

27 Mpindiewu patuakateketa mitshima, ne patukavu pabuipi ne kupingana, monayi, Mukalenga wakatusamba, ne wakamba ne: Ndayi munkatshi mua bana benu, Bena Lamana, ne ambulayi ntatu yenu ne ditukija, ne nennupesha tshipeta tshimpa.

28 Ne mpindiewu monayi, tuakalua, ne tuakaya munkatshi muabu; ne tuvua ne ditukijamu makenga etu, ne tuakakenga kupanga kua bintu konsu; eyowa, tuakenda ku nzubu ne ku nzubu, beyemena ku lusa lua ba pa buloba—kabiyi amu ku lusa lua ba pa buloba to kadi ku lusa lua Nzambi.

29 Ne tuakabuela mu nzubu yabu ne tuakabalongesha, ne tuakabalongesha mu misêsu yabu; eyowa, ne tuakabalongesha pa tukuna tuabu; ne tuakabuela kabidi mu ntempelo yabu ne mu nsunagoga yabu ne tuakabalongesha; ne tuvua bipatshibua, ne bakatuseka, ne bakatutuila mata, ne bakatutûta mapi pa matama; ne bakatuasa mabua, bakatukuata ne kutusuika mionji mikola, ne kutuela mu buloko; ne tuakapatuishibua kabidi ku bukola ne ku lungenyi lua Nzambi.

30 Ne tuakakenga mishindu yonsu ya ntatu, ne bionsu ebi, ne pamuapa tuvua mua kuikala mushindu wa kupandisha anyima mikuabu; ne tuakatshinka ne disanka dietu divua bua kuikala diwula ntenta bu pamuapa tuetu mua kuikala njila wa kupandisha bamua.

31 Mpindiewu monayi, tudi mua kutangila kumpala ne kumona bimuma bia midimu yetu; ne bidi bikesa anyi? Ndi nnuambila ne, To, bidi bia bungi; eyowa, ne tudi tumona bulelela buabi, bua dinanga diabu kudi bana babu ne kabidi kutudi.

32 Bualu monayi, bavua bitaba mua kulambula mioyo yabu mena pa mutu pa kuangata moyo wa muena lukuna wabu; ne bakajîka biluilu biabu bia mvita muinshi mula mu buloba, bua dinanga diabu kudi bana babu.

33 Ne mpindiewu monayi ndi nnuambila ne, kutu kuikala dinanga dinena nanku mu bulaba bonsu anyi? Monayi, ndi nnuambila ne, To, kakutu to, nansha munkatshi mua Bena Nefi.

34 Bualu monayi, bavua ne bua kuambuila bana babu biluilu; kabavua badilekela ne bashipibua to. Kadi monayi bu mudibu ba bungi aba bakafila mioyo yabu; ne tudi bamanya ne mbaya kudi Nzambi wabu, bua bualu bua dinanga diabu ne bua lukinu luabu lutangila mibi.

35 Mpindiewu katuena ne tshia kusankila anyi? Eyowa, ndi nnuambila ne, kakutu kuanji kuikala bantu bavua bikala ne tshia kusankila bu tuetu to, katshia buloba buabanga; eyowa, ne disanka dianyi didi dipita, mena tô ne kudiamba bua Nzambi wanyi; bualu udi ne bukola bonsu, lungenyi lonsu, ne ngumvuilu onsu; udi umvua bintu bionsu, ne udi Muntu wa lusa, mena bua lupandu, bua badi bakudimuna mutshima ne badi bitabuija mu dîna dienda.

36 Mpindiewu bu etshi tshikala kudiamba, nendiamba mena; bualu etshi tshidi moyo wanyi ne bukenka buanyi, disanka dianyi ne lupandu luanyi, ne disungila dianyi ku diakabi dia kashidi. Eyowa, dîna dia Nzambi wanyi didi dibeneshibua, uvua muvuluka bantu aba, badi bikala ditamba dia mutshi wa Isalele, divua ditapuluka ku mubidi wadi mu bulaba budi kabuyi bumanyika to; eyowa, ndi ngamba, dibeneshibua dikala dîna dia Nzambi wanyi, uvua mutuvuluka, tuetu batambakanyi mu bulaba budi kabuyi bumanyika to.

37 Mpindiewu bana betu, tudi tumona ne Nzambi udi uvuluka bantu bonsu, mu bulaba bonsu mudibu; eyowa, udi mumanya bungi bua bantu benda, ne munda muenda mua lusa mudi pa mutu pa buloba ponsu. Mpindiewu edi didi disanka dianyi, ne diela dianyi dia tuasakidila dia bungi; eyowa, ne nengela Nzambi wanyi tuasakidila bua kashidi. Amena.