1 Ne mpindiewu biakalua ne kunyima kua bantu ba Amona bashikikibua mu bulaba bua Yeleshona, ne ekelezia umua kabidi muasa mu bulaba bua Yeleshona, ne Bena Nefi banyungulula bulaba bua Yeleshona ne misumba yabu ya basalayi, eyowa, ku mikalu yonsu ya bulaba bua Zalahemela; monayi misumba ya basalayi ya Bena Lamana yakalonda bana babu mu tshipela.

2 Ne nanku kuvua mvita mikola; eyowa, mena itu kayiyi mianji kupeteka munkatshi mua bantu bonsu mu bulaba to katshia ku tshikondu tshiakumbuka Lehi ku Yelushalema; eyowa, ne makumi a binunu a Bena Lamana akashipibua ne akatangalajibua kula.

3 Eyowa, ne kuvua kabidi dishibeya dia dikema munkatshi mua bantu ba Nefi; nansha nanku, Bena Lamana bakanyemeshibua ne bakatangalajibua, ne bantu ba Nefi bakapingana kabidi ku bulaba buabu.

4 Ne etshi tshivua tshikondu tshiakumvuikaku madilu manena ne muadi munkatshi mua bulaba bonsu, munkatshi mua bantu bonsu ba Nefi—

5 Eyowa, lubila lua bakaji bakamba badila ba bayabu, ne kabidi ya batatu badila bana babu ba baluma, ne muana wa muntu wa bakaji udila bua muanabu wa baluma, eyowa, muana wa baluma wa muntu udila bua tatuenda; ne nanku lubila lua madilu wakumvuika munkatshi muabu bonsu, badila bua malela abu avuabu bashipa.

6 Ne mpindiewu bushuwa edi divua dituku dia kanyinganyinga kakola; eyowa, diba dia kuikala ne dishindama, ne diba dia dijila divula ne disambila.

7 Ne tshidimu tshia dikumi ne tshitanu tshia dikôkesha dia balumbuluishi pa mutu pa bantu ba Nefi tshiakajika nanku;

8 Ne ewu udi mulubu wa Amona ne bana babu, ngendu yabu mu bulaba bua Nefi, makenga abu mu bulaba, tunyinganyinga tuabu, ne ntatu yabu, ne disanka diabu didi kadiyi kuamba to, ne diakidila ne dilama ku njiwu dia bana babu mu bulaba bua Yeleshona. Ne mpindiewu Mukalenga, Musungidi wa bantu bonsu, abenesha anyima yabu bua kashidi.

9 Ne ewu udi mulubu wa mvita ne makokangana munkatshi mua Bena Nefi, ne kabidi mvita pankatshi pa Bena Nefi ne Bena Lamana; ne tshidimu tshia dikumi ne tshitanu tshia dikôkesha dia balumbuluishi tshijika.

10 Ne katshia ku tshidimu tshia kumpala tô ne ku tshidimu tshia dikumi ne tshitanu kuakavuishibua lufu lua binunu bia bungi bia mioyo ya bantu; eyowa, kuakavuija bualu budi butshingisha bua dimatshisha dia mashi.

11 Ne mibidi ya binunu bia bungi idi mijika mu buloba, patshidi mibidi ya binunu bia bungi ibola mu mishiki pa mpala wa buloba; eyowa, ne binunu bia bungi bidi bidila dijimija dia malela abu, bualu badi ne kipatshila ka kutshinyila, bilondeshila ku malaya a Mukalenga, ne badi bapîshibua ku ngikadilu wa diakabi kadiyi ndekelu.

12 Padi binunu bia bungi bia bikuabu bidila bulelela dijimija dia malela abu, nansha nanku, badi basanka ne batua tshianga bua ditekemena, ne badi mena bamanya, bilondeshila ku malaya a Mukalenga, ne nebajudishibua bua kusomba ku tshianza tshia baluma tshia Nzambi, mu ngikadilu wa disanka didi kadiyi ndekelu.

13 Ne nanku tudi tumona bu mudidi dinena dishilangana dia muntu bua bualu bua mibi ne disambuka dia mikenji, ne bukola bua diabulu, budi buluila ku malongolola a budimu adiye mulongolola bua kuteya mitshima ya bantu.

14 Ne nanku tudi tumona dibikila dinena didi difuma kudi Nzambi bua bantu bakuata mudimu ne dinanukila mu madimi a mvinyo a Mukalenga; ne nanku, tudi tumona tshiena bualu tshinena tshia kanyinganyinga, ne kabidi tshia disanka—kanyinganyinga bua lufu ne dinyanguka munkatshi mua bantu, ne disanka bua bukenka bua Kilisto budi bufila moyo.