1 Mpindiewu biakalua ne pakapeta Moloni mukanda ewu wakafîka tshiji tshipita, bualu uvua mumanya ne Amolona uvua ne dimanya dijima dia dîbila dienda; eyowa, uvua mumanya ne Amolona uvua mumanya ne katshivua kipatshila kalulama kavua kamuenzeja bua kuela bantu ba Nefi mvita to.

2 Ne wakamba ne: Monayi, ntshiakushintulula bena lukanu ne Amolona to amu pa kumbusha yeya mulekela dijinga dienda, bu mumvua muamba mu mukanda wanyi; bualu ntshiakumuanyishila ne ikala ne bukola bukuabu kupita budiye nabu to.

3 Monayi, ndi mumanya muaba udi Bena Lamana balama bantu banyi bavuabu bakuata bena lukanu; ne bualu Amolona wakabenga kunganyishila tshindi ndomba mu mukanda wanyi, monayi, nemmuenzela bilondeshila ku miaku yanyi; eyowa, nenkeba lufu munkatshi muabu tô ne pâlombabu ditalala.

4 Ne mpindiewu biakalua ne pakamba Moloni mêyi â, wakenzeja makebulula munkatshi mua bantu benda, bua pamuapa badi mua kupeta kankanunuina ka Lamana munkatshi muabu.

5 Ne biakalua ne bakapeta umua, muena dîna ne Lamana; ne uvua umua wa basadidi ba mfumu uvua Amalikia mushipa.

6 Mpindiewu Moloni wakenzeja ne Lamana ne bungi bukesa bua bantu benda baya kudi balami bavua balama Bena Nefi.

7 Mpindiewu Bena Nefi bavua balama mu tshimenga tshia Gidi; bua nanku Moloni wakasungula Lamana ne wakenzeja ne bungi bukesa bua bantu buya nenda.

8 Ne pakavua dilolo Lamana wakaya kudi balami bavua balama Bena Nefi, ne monayi, bakamumona ulua ne bakamuelela mbila; kadi wakabambila ne: Kanutshinyi to; monayi, ndi Muena Lamana. Monayi, tudi banyema kudi Bena Nefi, ne badi balala; ne monayi, tudi bangata mvinyo wabu ne tudi biya nenda.

9 Mpindiewu pakumvua Bena Lamana mêyi â bakamuakidila ne disanka; ne bakamuambila ne: Tupeshayi amua mvinyo wenu, bua tunua; tudi ne disanka ne nudi balua nanku ne mvinyo bualu tudi batshioka.

10 Kadi Lamana wakabambila ne: Tulamayi ndambu wa mvinyo wetu tô ne patuaya kuluisha Bena Nefi mvita. Kadi ngakuilu ewu wakabapesha amu dijinga dikola dia kunua amua mvinyo;

11 Bualu, bakamba ne: Tudi batshioka, bua nanku lekela tuangata ndambu wa mvinyo, ne kunyima kua mutantshi netupeta mvinyo mu dipesha dietu, atukolesha bua kuya kuluisha Bena Nefi.

12 Ne Lamana wakabambila ne: Nudi mua kuenza bilondeshila ku dijinga dienu.

13 Ne biakalua ne bakanua mvinyo eyi bikola; ne ivua mishema mukana muabu, bua nanku, bakayinua bikola kupita; ne ivua mikola, bualu ivua milambibua mu bukola buayi.

14 Ne biakalua ne bakanua ne bakasanka, ne kunyima kua mutantshi bakakuatshika bonsu.

15 Ne mpindiewu pakamona Lamana ne bantu benda ne bavua bonsu bakuatshika, ne bavua bikala mu tulu tukola, bakapingana kudi Moloni ne bakamuambila bintu bionsu bivua bienzeka.

16 Ne mpindiewu ebi bivua bilondeshila ku dijinga dia Moloni. Ne Moloni uvua mulongolola bantu benda ne biluilu bia mvita; ne wakaya ku tshimenga tshia Gidi, patshivua Bena Lamana mu tulu tukola ne bakuatshika, ne wakimanshila bena lukanu biamu bia mvita, mua ne bakapayibua bonsu ne biluilu;

17 Eyowa, mena kudi bantu bakaji babu, ne kudi bana babu bonsu bavua, bonsu bakumbana bua kuenzela tshiluilu tshia mvita, Moloni wakapaya bena lukanu bonsu ne biluilu; ne bakenza bintu bionsu ebi bikala bapuwa bikola.

18 Kadi bu bobu babisha Bena Lamana, monayi bavua bakuatshika ne Bena Nefi bavua mua kubashipa.

19 Kadi monayi, edi kadivua dijinga dia Moloni to; kavua usankila mu dishipa dia bantu anyi mu dimatshisha dia mashi to, kadi uvua usankila mu dipandisha dia bantu benda ku dinyanguka; ne bua kipatshila aka, bua kalu kupanga bululama to, wakabenga kudiela kudi Bena Lamana ne kubashipa pavuabu bakuatshika.

20 Kadi wakapeta dijinga dienda; bualu wakapaya bena lukanu ba ku Bena Nefi bavua munda mua bimanu bia tshimenga ne biluilu, ne wakabapesha bukola bua kuangata bitupa bia tshimenga bivua munda mua bimanu abi.

21 Ne pashisha wakenzeja bantu bavua nenda bua kubashila muaba kakesa, ne bua kunyungulula misumba ya basalayi ya Bena Lamana.

22 Mpindiewu monayi ebi bivua biakenzeka munda nkulu, bua ne pakabika Bena Lamana mu dinda bakamona ne bavua banyungulula kudi Bena Nefi pambelu, ne bena lukanu bavuabu bakuata bavua bambula biluilu munda.

23 Ne nanku bakamona ne Bena Nefi bavua ne bukola kudibu; ne mu malu â bakamona ne kabivua bikengedibua ne baluangana ne Bena Nefi to; bua nanku tupita tuabu tunena tuakabalomba biluilu biabu bia mvita, ne bakalua nabi ne bakabimansha ku makasa a Bena Nefi, babasengelela bua lusa.

24 Mpindiewu monayi, edi divua dijinga dia Moloni. Wakabakuata bena lukanu ba mvita, ne wakangata tshimenga, ne wakalekesha bena lukanu bonsu bavua bikala Bena Nefi; ne bakadisangisha ku musumba wa basalayi wa Moloni, ne bakatuadila musumba wenda wa basalayi makanda a bungi.

25 Ne biakalua ne wakenzeja Bena Lamana, bavuaye mukuata bu bena lukanu, ne batuadija kukuata mudimu bua kukolesha miaba mikolesha ku mpenga yonsu ya tshimenga tshia Gidi.

26 Ne biakalua ne pakakoleshaye tshimenga tshia Gidi, bilondeshila ku dijinga dienda, wakenzeja ne baya ne bena lukanu benda ku tshimenga tshia Buvula; ne wakalama kabidi tshimenga atshi ne musumba wa basalayi mukola menamena.

27 Ne biakalua ne, nansha bua malongolola masokoka onsu a Bena Lamana, bakalama ne bakakuba bena lukanu bonsu bavuabu bakuata, ne bakalama buloba bonsu ne bukola bivuabu bangatulula.

28 Ne biakalua ne Bena Nefi bakabanga kutshimuna kabidi, ne kuangatulula manema abu ne diakalengela diabu.

29 Misangu ya bungi Bena Lamana bakidikija bua kubanyungulula butuku, kadi mu midikija abu â, bakajimija bena lukanu ba bungi.

30 Ne misangu ya bungi bakidikija bua kupesha Bena Nefi mvinyo wabu, bua babashipa ne mulungu anyi ku dikuatshika.

31 Kadi monayi, Bena Nefi kabavua ne lujoku bua kuvuluka Mukalenga Nzambi wabu to mu diba edi dia lutatu luabu. Kabavua mua kubakuata ku mateyi abu to; eyowa, bakabenga kuangata mvinyo wabu, amu pa kumbusha banji kupesha kudi ndambu wa bena lukanu ba ku bena Lamana.

32 Ne bavua nanku badimuka bua ne mulungu kawedibu munkatshi muabu to; bualu bu mvinyo wabu uvua bua kulunga Muena Lamana uvua bua kulunga kabidi Muena Nefi; ne ki muakatêtabu mâluvu abu makola nanku.

33 Ne mpindiewu biakalua ne bivua bikengedibua bua Moloni adilongolola bua kubunda tshimenga tshia Moliantona; bualu monayi, Bena Lamana bavua, ku midimu yabu, bakolesha tshimenga tshia Moliantona tô ne pakaluatshi muaba mukolesha menamena.

34 Ne bavua batungunuka kulua ne bisumbu bia basalayi bipia-bipia mu tshimenga etshi, ne kabidi difila dipia-dipia dia biakudia.

35 Ne ki muakajika tshidimu tshia makumi abidi ne tshia tshitema tshia dikôkesha dia balumbuluishi pa mutu pa bantu ba Nefi nanku.