1 Mpindiewu Alama, bualu wakamona ne mêyi a Amuleke yakapuwisha Zêzeloma, bualu wakamona ne Amuleke wakamukuata ku mafi ne didinga dienda bua kumushipesha, ne bualu wakamona ne wakabanga kuzakala bua dimanya dia dipîla dienda, wakabulula mukana muenda ne wakabanga kumuambila, ne kushikika mêyi a Amuleke, ne kujingulula bintu kupita, anyi kumvuija mifundu ya Nzambi kupita bivua Amuleke muenza.

2 Mpindiewu mêyi avua Alama muambila Zêzeloma mumvuika kudi bantu bavua babanyungulula; bualu musumba wa bantu uvua munena, ne wakakula mushindu ewu:

3 Mpindiewu Zêzeloma, muwamonyi ne wakuatshibu ku dishima ne dikazamuka dieba, bualu kuena mushima amu bantu to kadi udi mushima Nzambi; bualu mona, mumanya meji eba onsu, ne udi mumona ne meji eba adi matuleja kudi Nzambi ku nyuma wenda;

4 Ne udi mumona ne tudi bamanya bulongolodi bueba buvua bulongolodi bua budimu, bilondeshila budimu bua diabulu, bualu kushima ne kudinga bantu aba bua wewa kubasaka bua kutuluishabu, bua ne kupendabu ne kutuipatabu—

5 Mpindiewu etshi tshivua bulongolodi bua muluishi weba, ne wenzedi bukola buenda ku njila weba. Mpindiewu ndi musua ne uvuluka ne ntshidi ngamba kûdi ndi ngamba kudi bonsu.

6 Ne mpindiewu mona ndi nnuambila bonsu ne etshi tshidi diteyi dia muluishi, budiye muteka bua kukuata bantu aba, bua anubueja mu bubatshika buenda, bua anunyungulula ne nkanu yenda, bua anusuika panshi ne nkanu bua dinyanguka dia kashidi, bilondeshila ku bukola buenda bua kukuataye bantu ku bukuatshibu.

7 Mpindiewu pakakula Alama mêyi â, Zêzeloma wakabanga kuzakala bikola kupita, bualu wakitabujijibua bipita ne bipita bitangila bukola bua Nzambi; ne wakitabujijibua ne Alama ne Amuleke bavua ne dimanya dienda, bualu wakitabujijibua ne bavua bamanya meji enda ne majinga a mutshima wenda; bualu bukola buvua bubapesha bua kumanya bintu ebi bilondeshila ku nyuma wa buambi.

8 Ne Zêzeloma wakabanga kubebeja ne dinanukila, bua amanya bikola bitangila bukalenga bua Nzambi. Ne wakambila Alama: Etshi tshivua Amuleke muamba bitangila dibika dia ku lufu dia bafua, ne bonsu ne babika ku bafua, bonsu bakana ne badi kabayi bakana, ne badi bimanyishibua kumpala kua Nzambi bua kulumbuluishibua bilondeshila ku midimu yabu, tshidi tshiumvuija tshinyi?

9 Ne mpindiewu Alama wakabanga kumumvuija bintu ebi, wamba: Nzambi udi mupesha bantu ba bungi bua kumanya malu masokoka enda; nansha nanku Nzambi udi mubapesha mukenji mukola bua bamba amu tshitupa tshia dîyi didiye upesha bana ba bantu, bilondeshila ku ntema ne dinanukila bidibu bafila kudiye.

10 Ne bua nanku, ewu udi upapisha mutshima wenda, yeya udi upeta tshipesa tshikesa tshia dîyi; ne ewu udi kayi upapisha mutshima wenda to, kudiye tshipesa tshinena tshia dîyi netshipeshibua, tô ne pamupeshaye dimanya dia malu masokoka enda tô ne pa’amanyaye mu tshiwudi tshiawu.

11 Ne aba badi bapapisha mitshima yabu, Nzambi neabapesha tshipesa tshikesa tshia dîyi tô ne paluabu kumanya tshintu nansha tshimua bitangila malu masokoka; ne pashisha diabulu udi ubangata bakuatshibu, ne udi ubalombola ku disua dienda tô ne ku dinyanguka. Mpindiewu etshi ki diumvuija dia nkanu ya ngena.

12 Ne Amuleke wakakula patoka bitangila lufu, ne dijudishibua ku moyo wa tshifuaka ewu kulua ku ngikadilu udi kayi ufua, ne batuadibua kumpala kua tshilumbuluidi tshia Nzambi, bua kulumbuluishibua bilondeshila ku midimu yetu.

13 Pashisha bu muvua mitshima yetu mipapishibua, eyowa, bu mutuvua bapapisha mitshima yetu bua kubenga dîyi dia Nzambi, mua ne kadiena disanganyibua munda muetu to, pananku ngikadilu wetu neikala wa kutshina bikola, bualu apu netupîshibua.

14 Bualu mêyi etu neatupîsha, eyowa, midimu yetu yonsu neitupîsha; nekatukupanga katoba to; ne meji etu kabidi neatupîsha; ne mu ngikadilu wa kutshina ewu katuakukima kutangila kudi Nzambi wetu; ne tudi mua kusanka bu tuetu bua kuambila mabua ne mikuna bua bitukulukila bua kutusokokayi ku mesu kuenda.

15 Kadi kabiena mua kuikala nanku to; tudi ne tshia kuya ne kuimana kumpala kuenda ku butumbi buenda, ne mu bukola buenda, ne ku bukitu, bunena, ne bukalenga buenda, ne kuitabuja ne bundu buetu bua kashidi ne bitungu bienda bionsu bidi biakana; ne udi mululama mu midimu yenda yonsu, ne udi ne lusa kudi bana ba bantu, ne ne udi ne bukola bonsu bua kupandisha muntu yonsu udi witabuija mu dîna dienda ne udi ukuama bimuma bidi biakanyina dikudimuna dia mutshima.

16 Ne mpindiewu monayi, ndi nnuambila ne pashisha lufu lumua ludi lulua, mena lufu luibidi, ludi lufu lua nyuma; pashisha kudi diba didi ewu yonsu udi ufua mu mibi yenda, bitangila lufu lua mubidi, neafua kabidi lufu lua nyuma; eyowa, neafua bitangila bintu bia buakana.

17 Pashisha kudi tshikondu tshikala mpaji bu dijiba dia kapia ne nsufulu, kena ndimi idi ibanda mûlu bua kashidi ne kashidi; ne pashisha kudi diba diabasuikabu ne nkanu bua dinyanguka dia kashidi, bilondeshila ku bukola bua Satana ne bukuatshibu kudiye, yeya udi mubabatshika bilondeshila ku disua dienda.

18 Pashisha, ndi nnuambila, nebikala bu disungila kadivua dienzeka to; bualu kabena mua kusungidibua to bilondeshila ku bululama bua Nzambi; ne kabena mua kufua to, bu mudiku kakuena kabidi dibola nansha.

19 Mpindiewu biakalua ne pakajikija Alama kuamba mêyi â, bantu bakabanga kukema bikola;

20 Kadi kuvua umua dîna Antiona, uvua mukôkeshi munena munkatshi muabu, wakalua ne wakamuambila: Etshi ntshinyi tshiwambi ne, muntu neajuka ku bafua ne ashintuludibua kumbuka ku ngikadilu wa tshifuaka kulua ku ngikadilu udi kayi ufua, ne anyima kena mua kafua nansha?

21 Mufundu udi wamba tshinyi, udi wamba ne Nzambi wakateka bakeluba ne muela wa mvita wa kapia ku esete wa budimi bua Edene, bua baledi betu ba kumpala kabalu kubuelamu ne kudia tshimuma tshia mutshi wa moyo, ne kuikala ne moyo bua kashidi? Ne nanku tudi tumona ne kakuvua mushindu wa bobu kuikala ne moyo bua kashidi to.

22 Mpindiewu Alama wakamuambila: Etshi tshidi tshintu tshimvua pabuipi ne kumvuija. Mpindiewu tudi tumona ne Adama wakapona bua kudia kua tshimuma tshikandika, bilondeshila ku dîyi dia Nzambi; ne nanku tudi tumona, ne ku dipona, bukua bantu bonsu buakalua bantu bajimina ne bapona.

23 Ne mpindiewu mona, ndi nkuambila ne bu biobi mua kuenzeka ne Adama uvua mudia tshimuma tshia mutshi wa moyo diba adi, lufu kaluvua mua kuikalaku to, ne dîyi divua kuikala tshianana, tshivua mua kuenza Nzambi muena mafi, bualu wakamba: Bualu wewa mudia neufua bulelela.

24 Ne tudi tumona ne lufu ludi lulua kudi bukua bantu, eyowa, lufu luvua Amuleke muamba, ludi lua mubidi; nansha nanku kuvua tshikondu tshipesha muntu bua yeya kukudimuna mutshima; bua nanku moyo ewu udi ulua ngikadilu wa kutêtshibua; diba dia kudilongolola bua kusambakena ne Nzambi; diba dia kudilongolola bua ngikadilu udi kayi ndekelu utuvua bakula, udi ulua kunyima kua dibika dia bafua.

25 Mpindiewu, bu kabiyi bua dilongolola dia disungila to, divua dilongolodibua kumbukila ku tshishimikidi tshia buloba, kakuvua mua kuikala dibika dia bafua to; kadi kuvua dilongolola dia disungila dilongolodibua, diavuija dibika ku lufu dia bafua, divua diamba.

26 Ne mpindiewu monayi, bu biobi mua kuenzeka ne baledi betu ba kumpala bavua mua kuya ne kudia bimuma bia mutshi wa moyo bavua bashala bakengi bua kashidi, kabayi ne ngikadilu wa kudilongolola; ne nanku dilongolola dia disungila divua dinyanguka, ne dîyi dia Nzambi divua kuikala tshianana, dikala patupu.

27 Kadi monayi, kabivua nanku to; kadi kupangidikibua ne bantu badi ne tshia kufua; ne kunyima kua lufu, badi ne tshia kulua ku tshilumbuluilu, mena tshilumbuluilu tshimua tshituvua bamba, tshidi nshikidilu.

28 Ne kunyima kua Nzambi mupangadika ne bintu ebi biluila muntu, monayi, pashisha wakamona ne bivua bikengedibua bua muntu amanya bitangila bintu bivuaye mubapangidikila;

29 Bua nanku wakatuma banjelu bua kuyukila nabu, bakamuenesha bantu bumua bua butumbi buenda.

30 Ne katshia ku diba adi tô ne kunyima bakabanga kubikila dîna dienda; bua nanku Nzambi wakayukila ne bantu, ne wakabamanyisha dilongolola dia disungila, divua dilongolodibua kumbukila ku tshibangilu tshia buloba; ne etshi wakabamanyisha bilondeshila ku ditabuija diabu ne dikudimuna dia mutshima ne midimu yabu ya tshijila.

31 Bua nanku, wakapesha bantu mikenji, bualu bavua bangabanga basambuka mikenji ya diambedi ya bintu bia pa buloba, ne balua bu ba Nzambi, bajingulula buimpa ku bubi, baditeka pa ngikadilu wa kuenza mudimu, anyi batekibua pa ngikadilu wa kuenza mudimu bilondeshila ku majinga ne masanka abu, ne bua kuenza bibi anyi bua kuenza bimpa—

32 Bua nanku Nzambi wakabapesha mikenji, kunyima kua kubamanyisha dilongolola dia disungila, ne kabenji bubi to, bu mudi dinyoka diatshi dikala lufu luibidi, luvua luikala lufu lua kashidi bua bintu bidi bitangila buakana; bualu dilongolola dia disungila kadivua kuikala ne bukola kudi muntu wa mushindu ewu to, bualu midimu ya bululama kayivua mua kunyangakajibua to, bilondeshila ku buimpa bua Nzambi butamba.

33 Kadi Nzambi wakabikila bantu, mu dîna dia Muanenda, (etshi tshikala dilongolola dia disungila divua dilongolodibua) wamba: Nuenu bakudimuna mutshima ne kanuyi nupapisha mitshima yenu to, apu nennufuila lusa, ku njila wa Muananyi Umuepela Mulela;

34 Bua nanku, ewu yonsu udi ukudimuna mutshima, ne kayi upapisha mutshima wenda to, neikala ne bunema pa lusa ku njila wa Muananyi Umuepela Mulela, bua dilekedibua dia mibi yenda; ne aba nebabuela mu dikisha dianyi.

35 Ne ewu yonsu wapapisha mutshima wenda ne wenza malu mabi, monayi, ndi nditshipa mu tshiji tshianyi ne kakubuela mu dikisha dianyi to.

36 Ne mpindiewu, bana betu, monayi ndi nnuambila, ne nuenu bapapisha mitshima yenu kanuakubuela mu dikisha dia Mukalenga to; bua nanku malu mabi enu adi amuyobola bua ne anutumina tshiji tshienda bu mudi diyobola dia diambedi, eyowa, bilondeshila ku dîyi dienda mu diyobola dia ndekelu ne kabidi dia diambedi, tô ne ku dinyanguka dia kashidi dia anyima yenu; bua nanku, bilondeshila dîyi dienda, tô ne ku lufu lua ndekelu ne kabidi lua diambedi.

37 Ne mpindiewu, bana betu, bu mutudi bamanya bintu ebi, ne bidi bilelela, tukudimunayi mutshima, ne katupapishi mitshima yetu to, bua katuyobodi Mukalenga Nzambi wetu mu didikuluila tshiji tshienda pa mutu petu bitangila mikenji yenda ya mibîdi eyi idiye mutupesha; kadi tubuelayi mu dikisha dia Nzambi, divuaye mulongola bilondeshila ku dîyi dienda.