1 Mpindiewu, bu muvua Amona utungunuka kulongesha bantu ba Lamoni nanku, netupingana ku mulubu wa Alona ne bana babu; bualu kunyima kua mumbuka ku bulaba bua Midoni Nyuma wakamulombola bulaba bua Nefi, mena ku nzubu kua mfumu uvua ku mutu kua bulaba bonsu pa kumbusha bulaba bua Yishemaela; ne uvua tatuenda wa Lamoni.

2 Ne wakabuela kudiye mu nzubu wa mfumu, ne bana babu, ne wakinama kumpala kua mfumu, ne wakamuambila ne: Mona, Ô mfumu, tudi bana babu ne Amona, uwuvua mupatuisha mu buloko.

3 Ne mpindiewu, Ô mfumu, biwepelesha mioyo yetu, netuikala basadidi beba. Ne mfumu wakamba kudibu: Jukayi, bualu nenupesha mioyo yenu, ne ntshiakulekela ne nuikala basadidi banyi to; kadi nendomba bikola ne nundongesha, bualu mvua musumpakana kakesa mu meji bua lusa ne mushinga wa mêyi a muanenu wa baluma Amona; ne ndi njinga bua kumanya bua tshinyi kena mulua nuenu ku Midoni to.

4 Ne Alona wakambila mfumu ne: Mona, Nyuma wa Mukalenga mmumubikila ku muaba mukuabu; udi muya ku bulaba bua Yishemaela, bua kulongesha bantu ba Lamoni.

5 Mpindiewu mfumu wakabambila ne: Etshi ntshinyi tshinuambi bitangila Nyuma wa Mukalenga? Monayi, etshi ki tshintu tshidi tshimpampakaja.

6 Ne kabidi, etshi ntshinyi tshivua Amona muamba ne: Biwakudimuna mutshima neupandibua, ne biwabenga kukudimuna mutshima, newimanshibua ku dituku dia ndekelu?

7 Ne Alona wakamuandamuna ne wakamuambila ne: Udi witabuija ne kudi Nzambi anyi? Ne mfumu wakamba ne: Ndi mumanya ne Bena Amaleki badi bamba ne kudi Nzambi, ne ndi mubanyishila ne bibaka bitendelelu, bua kudisangishabu pamua bua ku mutendelelabu. Ne mpindiewu pawikala wamba ne kudi Nzambi, mona nengitabuija.

8 Ne mpindiewu pakumvua Alona nanku awu, mutshima wenda wakabanga kusanka, ne wakamba ne: Mona, bushuwa amu bu muwudi ne moyo, Ô mfumu, kudi Nzambi.

9 Ne mfumu wakamba ne: Nzambi udi Nyuma Munena awu wakapatula batatuetu ku bulaba bua Yelushalema anyi?

10 Ne Alona wakamuambila ne: Eyowa, udi Nyuma Munena awu, ne wakafuka bintu bionsu mu diûlu ne pa buloba. Udi witabuija nanku anyi?

11 Ne wakamba ne: Eyowa, ndi ngitabuija ne Nyuma Munena wakafuka bintu bionsu, ne ndi njinga ne ungambila bitangila bintu bionsu ebi, ne nengitabuija miaku yeba.

12 Ne biakalua ne pakamona Alona ne mfumu neitabuija mêyi enda, wakabanga katshia ku bufuki bua Adama, ubadila mfumu mifundu ya Nzambi—mua kafuka Nzambi muntu ku tshimfuanyi tshienda, ne Nzambi wakamupesha mikenji, ne muntu wakapona bua kusambuka kuenda kua mikenji.

13 Ne Alona wakumvuija mifundu ya Nzambi katshia ku bufuki bua Adama, umumvuija dipona dia muntu, ne ngikadilu wenda wa mu mubidi ne kabidi dilongolola dia disungila, divua dilongolodibua kumbukila ku tshishimikidi tshia buloba, ku njila wa Kilisto, bua bonsu bitabuija mu dîna dienda.

14 Ne katshia muntu wapona kavua mua kupeta tshintu nansha tshimua yeya nkayenda to; kadi makenga ne lufu lua Kilisto bidi bipikula bua mibi yabu, ku njila wa ditabuija ne dikudimuna dia mutshima, ne nanku ne nanku; ne udi ukosa mionji ya lufu, bua lukita kalutshimunyi to, ne ne kalonda ka lufu nekadînyibua mu ditekemena dia butumbi; ne Alona wakumvuija mfumu bintu bionsu ebi.

15 Ne biakalua ne kunyima kua Alona mumumvuija bintu ebi, mfumu wakamba ne: Nengenza tshinyi bua mema kupeta moyo wa tshiendelela ewu uwudi muamba? Eyowa, ngenza tshinyi bua ne ndedibua kudi Nzambi, ne kuikala ne nyuma mubi ewu mutakula munda muanyi, ne kupeta Nyuma wenda, bua ngikala muwula ntenta ne disanka, bua ntshimanshibu ku dituku dia ndekelu to? Wakamba ne, mona, nembenga bionsu bindi nabi, eyowa, ne nendekela bukalenga buanyi, bua kupeta disanka dinena edi.

16 Kadi Alona wakamuambila ne: Wewa ujinga tshintu etshi, wewa muinama kumpala kua Nzambi, eyowa, wewa mukudimuna mutshima ku mibi yeba yonsu, ne muinama kumpala kua Nzambi, ne ubikila dîna dienda ne ditabuija, witabuija ne neupeta, pashisha neupeta ditekemena diwudi ujinga.

17 Ne biakalua ne pakamba Alona mêyi â, mfumu wakinama kumpala kua Mukalenga, binu panshi; eyowa, mena wakadiolola panshi, ne wakabila ne bukitu, wamba:

18 Ô Nzambi, Alona wangambidi ne kudi Nzambi; ne bikalaku Nzambi, ne biwikala Nzambi, suaku udimanyisha kundi, ne nendekela mibi yanyi yonsu bua kukumanya, ne bua ne mmona mua kujudibua ku bafua, ne kupandishibua ku dituku dia ndekelu. Ne mpindiewu pakamba mfumu mêyi â, wakatûtshika bu mufua.

19 Ne biakalua ne basadidi benda bakanyema ne bakambila mukaji wa mfumu bionsu bivua bifikila mfumu. Ne wakalua kudi mfumu; ne pakamonaye ne uvua mulala bu ne uvua mufua, ne kabidi Alona ne bana babu bimana bu bavua bikala tshiena bualu tshia dipona dienda, wakabafîkila tshiji, ne wakapesha basadidi benda, anyi basadidi ba mfumu, mukenji bua babakuata ne babashipa.

20 Mpindiewu basadidi bavua bamona tshiena bualu tshia dipona dia mfumu, bua nanku kabakakima kutua Alona ne bana babu bianza biabu to; ne bakasengelela mukaji wa mfumu, bamba ne: Bua tshinyi udi utupesha mukenji ne tushipa bantu aba, bualu mona, umua wabu udi mutupita bukola tuetu bonsu? Bua nanku netupona kumpala kuabu.

21 Mpindiewu pakamona mukaji wa mfumu bôwa bua basadidi wakabanga penda kutshina menamena, ne bumua bualu bubi kabulu kumufikila. Ne wakapesha basadidi benda mukenji ne baya ne babikila bantu, bua bashipa Alona ne bana babu.

22 Mpindiewu pakamona Alona dipangadika dia mukaji wa mfumu, bualu uvua kabidi mumanya dipapisha dia mutshima ya bantu, wakatshina musumba wa bantu kawulu kudisangisha pamua, ne kakulu kuikala dikokangana dinena ne disalu munkatshi muabu; bua nanku wakôlola tshianza tshienda ne wakajula mfumu panshi, ne wakamuambila ne: Juka. Ne wakimana pa makasa enda, bualu wakapetulula bukola buenda.

23 Mpindiewu ebi bivua kumpala kua mukaji wa mfumu ne ba bungi ba ku basadidi. Ne pakamonabu nanku bakakema bikola, ne bakabanga kutshina. Ne mfumu wakasemena, ne wakabanga kubalongesha. Ne wakabalongesha, mu mushindu ne nzubu wenda mujima wakakudimuna moyo kudi Mukalenga.

24 Mpindiewu kuvua musumba wa bantu uvua mudisangisha pamua bua mukenji wa mukaji wa mfumu, ne manunganyi a bungi akabanga kuikala munkatshi muabu bua Alona ne bana babu.

25 Kadi mfumu wakasemena munkatshi muabu ne wakabalongesha. Ne bakatalaja kudi Alona ne bavua nenda.

26 Ne biakalua ne pakamona mfumu ne bantu bakatalaja, wakenzeja ne Alona ne bana babu basemena munkatshi mua musumba wa bantu, ne babayisha dîyi.

27 Ne biakalua ne mfumu wakatuma dimanyisha mu bulaba bonsu, munkatshi mua bantu benda bonsu bavua mu bulaba buenda bonsu, bavua ku bitupa bionsu bia ku mpenga yonsu, buvua buya mena tô ne ku mbuwa, ku esete ne ku wesete, ne buvua mushonyi mukesa wa tshipela muabulula ne bulaba bua Zalahemela, mubangila ku mbuwa wa esete tô ne ku mbuwa wa wesete, ne ku nyunguluilu wa mikalu ya ku muelelu wa mbuwa, ne mikalu ya tshipela tshivua ku node pabuipi ne bulaba bua Zalahemela, kupitshila ku mikalu ya Manti, pabuipi ne mpokolo wa musulu wa Sidona, mubangila ku esete tô ne ku wesete—ne ki muvua Bena Lamana ne Bena Nefi bâbuluka nanku.

28 Mpindiewu tshitupa tshifuba tshia Bena Lamana tshivua tshikala mu tshipela, ne tshivua tshisomba mu ntenta; ne bavua batangalaka mu tshipela ku wesete, mu bulaba bua Nefi; eyowa, ne kabidi ku wesete kua bulaba bua Zalahemela, ku mikalu ya pabuipi ne ku muelelu wa mbuwa, ne ne ku wesete mu bulaba bua Nefi, mu muaba wa bupianyi bua diambedi bua batatuabu, nanku bivua bikala mikalu ya pabuipi ne ku muelelu wa mbuwa.

29 Ne kabidi kuvua Bena Lamana ba bungi ku esete pabuipi ne ku muelelu wa mbuwa, kuvua Bena Nefi babanyemesha. Ne nanku Bena Nefi bavua pabuipi ne kunyunguludibua kudi Bena Lamana; nansha nanku Bena Nefi bavua bangata bitupa bionsu bia ku node kua bulaba buvua mikalu ne tshipela, ku mpokolo wa musulu wa Sidona, kubangila ku esete tô ne ku wesete, ku nyunguluilu wa luseka lua tshipela; ku node, mena tô ne muakaluabu ku bulaba buvuabu babikila ne Buvula.

30 Ne buvua mikalu ne bulaba buvuabu babikila ne Kabutu, bualu buvua buikala kula ku njila wa ku node muvuabu bufika ku bulaba buvua buikala ne bantu ne bubutuka, bena mifuba ituvua batêla, bulaba buakasanganabu kudi bantu ba Zalahemela, bualu buvua muaba wa kumpala wakatulukilabu.

31 Ne bakaluila aku babanda batangila mua ku sude. Nanku bulaba bua ku buloba bua ku node buvua bubikidibua ne Kabutu, ne bulaba bua ku luseka lua ku sude buvua bubikidibua ne Buvula, ne buvua tshipela tshivua tshiwula ntenta ne mishindu yonsu ya nyama ya muitu ya mishindu yonsu, ivua tshitupa tshimua tshiayi tshiluila ku bulaba bua ku node bua kukeba biakudia.

32 Ne mpindiewu, bivua mu mutantshi wa dituku dimua ne tshitupa tshia luendu bua Muena Nefi, kulonda njila udi ufuma ku Buvula ne uya ku bulaba bua Kabutu, kumbukila ku mbuwa wa ku esete tô ne ku mbuwa wa ku wesete; ne nanku bulaba bua Nefi ne bulaba bua Zalahemela buvua pabuipi ne kunyungulujibua ne mâyi, ne kuvua tshitupa tshikesa tshia bulaba tshivua pankatshi pa bulaba bua ku node ne bulaba bua ku sude.

33 Ne biakalua ne Bena Nefi bavua basomba mu bulaba bua Buvula, mena kumbukila ku mbuwa wa ku esete tô ne ku mbuwa wa ku wesete, ne nanku, Bena Nefi lungenyi luabu, ne balami babu ne misumba yabu ya basalayi, bakalamina Bena Lamana ku sude, nanku bua kabikadi kabidi ne bulaba bua ku node to, bua kabuwuji bulaba bua ku node to.

34 Bua nanku Bena Lamana kabavua mua kuangata malaba makuabu to, pa kumbusha mu bulaba bua Nefi, ne tshipela tshia ku mpenga yonsu. Mpindiewu etshi tshivua tshintu tshia lungenyi bua Bena Nefi—bualu Bena Lamana bavua bena lukuna babu, kabakalekela dibakengesha diabu ku nseka yonsu to, ne bua bikala kabidi ne ditunga dia kunyemena ku, bilondeshila ku majinga abu.

35 Ne mpindiewu mema, kunyima kua kuamba nanku, ndi mpingana kabidi ku mulubu wa Amona ne Alona, Omenele ne Himini, ne wa bana babu.