1 Mpindiewu biakalua ne Alama wakabanga kuambila bantu dîyi dia Nzambi, diambedi mu bulaba bua Zalahemela, ne kumbuka aku mu bulaba bonsu.

2 Ne â mêyi akakulaye kudi bantu mu ekelezia uvua mushikikibua mu tshimenga tshia Zalahemela, bilondeshila ku miandiku yenda nkayenda, wamba:

3 Mema, Alama, muikala mujididibua kudi tatuanyi, Alama, bua kuikala muakuidi munena ku mutu kua ekelezia wa Nzambi, yeya muikala ne bukola ne bukôkeshi bufuma kudi Nzambi bua kuenza bintu ebi, monayi, ndi nnuambila wakabanga kuteka kushikika ekelezia mu bulaba buvua mu mikalu ya Nefi; eyowa, bulaba buvua bubikidibua ne bulaba bua Molomo; eyowa, ne wakatambuisha bana babu mu mâyi a Molomo.

4 Ne monayi, ndi nnuambila, bakapatuishibua mu bianza bia bantu ba mfumu Noa, kudi lusa ne bukola bia Nzambi.

5 Ne monayi, kunyima kua abi, bakabatuala mu bupika mu tshipela ku bianza bia Bena Lamana; eyowa, ndi nnuambila, bavua mu bukuatshibu, ne Mukalenga wakabapatuisha kabidi mu bupika ku bukola bua dîyi dienda; ne tuakafikishibua ku bulaba ebu, ne apa tuakabanga kushikika ekelezia wa Nzambi mu bulaba bonsu ebu.

6 Ne mpindiewu monayi, ndi nnuambila, bana betu, nuenu badi mu ekelezia ewu, nudi balama bimpa mu divuluka dienu dikuatshibua dia batatuenu anyi? Eyowa, ne nudi balama bimpa mu divuluka dienu lusa luenda ne bulekelelu buenda kudibu anyi? Ne menamena kabidi, nudi balama bimpa mu divuluka dienu ne wakapatuisha anyima yabu mu ngena anyi?

7 Monayi, wakakudimuna mitshima yabu; eyowa, wakababisha ku tulu tukola, ne bakabika kudi Nzambi. Monayi, bavua munkatshi mua mîdima; nansha nanku, anyima yabu ivua mikenkeshibua kudi muinda wa dîyi dia kashidi; eyowa, mionji ya lufu ne nkanu ya ngena bivua bibanyungulula, ne dinyanguka dia kashidi divua dibindila.

8 Ne mpindiewu ndi nuebeja, bana betu, bakabutuka anyi? Monayi, ndi nnuambila, To, kabakabutudibua to.

9 Ne ndi nuebeja kabidi, mionji ya lufu yakakoshibua anyi, ne nkanu ya ngena ivua mibanyungulula, yakasuluka anyi? Ndi nnuambila, Eyowa, yakasuluka, ne mioyo yabu yakakola, ne bakimba dinanga dia disungila. Ne ndi nnuambila ne bakapandishibua.

10 Ne mpindiewu ndi nuebeja ne tshinganyi tshivuabu bakengedibua kuenza bua bobu kupandishibua? Eyowa, bua tshinyi bavua ne tshia kutekemena bua lupandu? Tshiena bualu tshia kusuludibua kuabu ku mionji ya lufu, eyowa, ne nkanu ya ngena tshivua tshinyi?

11 Monayi, ndi mua kunuambila—tatuanyi Alama ka kitabuija mêyi akafidibua ku mukana wa Abinadi anyi? Ne kavua muambi munsantu anyi? Kakakula mêyi a Nzambi, ne tatuanyi Alama kakayitabuija anyi?

12 Ne dishintuluka dikola diakenzeka mu mutshima wenda bilondeshila ditabuija dienda. Monayi ndi nnuambila ne bionsu ebi bidi bilelela.

13 Ne monayi, wakayisha dîyi kudi batatuetu, ne dishintuluka dikola diakenzeka mu mitshima yabu, ne bakadipuekesha ne bakeyemena Nzambi mulelela ne wa moyo. Ne monayi, bavua ne lulamatu tô ne ku nshikidilu; bua nanku bakapandishibua.

14 Ne mpindiewu monayi, ndi nuebeja, bana betu ba mu ekelezia, nudi baledibua mu nyuma kudi Nzambi anyi? Nuangatshi tshimfuanyi tshienda pa mpala yenu anyi? Numvu dishintuluka edi mu mitshima yenu anyi?

15 Nudi nuenzela ditabuija ku disungila dia wakanufuka anyi? Nudi nutekemena ne disu dia ditabuija, ne numona mubidi wa tshifuaka ewu ujudishibua mu mubidi udi kawuyi ufua, ne mubidi wa dibola ewu ujudishibua mu mubidi udi kawuyi ubola, bua kuimana kumpala kua Nzambi bua kulumbuluishibua bilondeshila ku bienzedi bivua bienjibua mu mubidi wa tshifuaka anyi?

16 Ndi nnuambila, nudi mua kudielela meji ne nudi numvua dîyi dia Mukalenga, dinuambila, mu dituku adi: Luayi kundi nuenu babenesha, bualu monayi, midimu yenu ivua mikala ya buakana pa mutu pa mpala wa buloba?

17 Anyi nudi nudielela meji ne nudi mua kushima Mukalenga mu dituku adi, ne nuamba—Mukalenga, midimu yetu ivua miakana pa mpala wa buloba—ne neanupandisha?

18 Anyi mushindu mukuabu, nudi mua kudielela meji bimanyishibua kumpala kua tubadi tua Nzambi ne anyima yenu miwula ne dipîla ne nshiya, bua divuluka dia dipîla dienu, eyowa, divuluka dijima dia bubi buenu bonsu, eyowa, divuluka ne nuvua bela mikenji ya Nzambi mpata?

19 Ndi nnuambila, nudi mua kutangila kudi Nzambi dituku adi ne mutshima mukezuka ne bianza bitoka? Ndi nnuambila, nudi mua kutangila, bikala ne tshimfuanyi tshia Nzambi tshikanunyibua pa mpala yenu anyi?

20 Ndi nnuambila, nudi mua kupandishibua panudi badifila bua kulua bakokedi ba diabulu anyi?

21 Ndi nnuambila ne, dituku adi nenumanya ne kanuena mua kupandishibua to; bualu kakuena muntu udi mua kupandishibua to pa kumbusha bilamba bienda bisukudibua ne bilua bitoka; eyowa, bilamba bienda bidi ne tshia kukezudibua tô ne patokeshibuabi ku ditoba dionsu, kudi mashi a uvua batatuetu bakula buenda, walua kusungila bantu benda ku mibi yabu.

22 Ne mpindiewu ndi nnuebeja, bana betu, munyi muadiumvua umua yonsu wa kunudi, bu yeya bua kuimana ku tshilumbuluidi tshia Nzambi, ne bilamba bienda bikala ne matoba a mashi ne bukoya bua mushindu onsu? Monayi, bintu ebi bijadika tshinyi bua kunufunda?

23 Monayi kabiakujadika ne nudi bashipianganyi, eyowa, ne kabidi nudi bapîla ku bubi bua mushindu onsu anyi?

24 Monayi, bana betu, nudi nuela meji ne muntu wa mushindu awu udi ne muaba bua kusomba mu bukalenga bua Nzambi, ne Abalahama, ne Isaka, ne ne Yakoba, kabidi ne bambi bansantu bonsu, bena bilamba bidi bitokesha ne bikala kabiyi ditoba, bikezuka ne bitoka anyi?

25 Ndi nnuambila, To; pa kumbusha nuenu nuamba ne Mufuki wetu udi muena mafi kumbukila ku mbangilu, kanuena mua kuela meji ne muntu wa mushindu awu udi mua kupeta muamba mu bukalenga bua mu diûlu; kadi nebipatshibua bualu badi bana ba bukalenga bua diabulu.

26 Ne mpindiewu monayi, ndi nnuambila, bana betu, bu nuenu bumvua dishintuluka dia mutshima, ne bu nuenu bumvua mua kuimba musambu wa dinanga dia disungila, ndi nuebeja, nudi mua kumvua nanku mpindiewu anyi?

27 Nudi benda, badilama kakuyi kadiû kumpala kua Nzambi? Bu nuenu bua kufua diba edi, nudi mua kuamba, mu munda muenu, ne nuvua badipuekesha bikumbana anyi? Ne bilamba bienu bisukudibua ne bitokeshibua ku mashi a Kilisto, walua bua kusungila bantu benda ku mibi yabu.

28 Monayi, nudi bavûla diditambisha anyi? Ndi nnuambila, bu nuenu kanuyi balekela to kanuena badilongolola bua kusambakena ne Nzambi to. Monayi, nudi ne tshia kudilongolola lukasa; bualu bukalenga bua mu diûlu budi pabuipi katataka, ne yonsu udi kayi mudilongolola kakupeta moyo wa tshiendelela to.

29 Monayi, ndi ngamba, kudi umua munkatshi muenu udi kayi muvûla dialakana anyi? Ndi nnuambila ne muntu wa mushindu awu kena mudilongolola to; ne ndi musua ne adilongolola lukasa, bualu diba didi pabuipi katataka, ne kena mumanya pâfika diba; bualu wa nanku kena usanganyibua mupanga dipîla to.

30 Ne kabidi ndi nnuambila, kudi umua munkatshi muenu udi useka muanabu wa baluma, anyi udi umufuisha ne makengeshibua anyi?

31 Diakabi kudi muntu awu, bualu kena mudilongolola to, ne diba didi pabuipi bua yeya kukudimuna mutshima anyi kena mua kupandishibua to!

32 Eyowa, diakabi mena kudi bonsu badi benji ba malu mabi; kudimunayi mutshima, kudimunayi mutshima, bualu Mukalenga Nzambi uvua muamba nanku!

33 Monayi, udi utuma dîyi ubikila bantu bonsu, bualu maboku a lusa adi mabôluela, ne udi wamba: Kudimunayi mutshima, ne nenuitaba.

34 Eyowa, udi wamba: Luayi kundi ne nudia tshimuma tshia mutshi wa moyo; eyowa, nenudia ne nenunua diampa ne mâyi bia moyo tshianana;

35 Eyowa, luayi kundi ne enzayi midimu ya buakana, ne kanuakupudibua ne kuedibua mu kapia to—

36 Bualu monayi, diba didi pabuipi bua ewu yonsu udi kayi ukuama bimuma bimpa to, anyi ewu yonsu udi kayi wenza midimu ya buakana to, yeya udi ne tshia kudilakana ne kudila muadi.

37 Ô nuenu benji ba malu mabi; nuenu badi buwulakana ne diditambisha bua bintu bia tshianana bia pa buloba, nuenu badi bamba ne nudi bamanya njila ya buakana kadi nudi bapambuka, bu mikoku idi kayiyi ne mulami wa mikoku, nansha muvua mulami wa mikoku munubikila ne utshidi unubikila, kadi nudi nubenga nuteleja dîyi dienda!

38 Monayi, ndi nnuambila, ne mulami wa mikoko muimpa udi unubikila; eyowa, ne udi unubikila mu dîna dienda nkayenda, didi dîna dia Kilisto; ne binuabenga kuteleja dîyi dia mulami wa mikoko muimpa, dîyi dinudi nubikidibua, monayi, kanuena mikoko ya mulami wa mikoko muimpa to.

39 Ne mpindiewu bu munudi kanuyi mikoko ya mulami wa mikoko muimpa to, nudi ba ku tshisumbu tshia mikoko kayi? Monayi, ndi nnuambila, ne diabulu udi mulami wa mikoko wenu, ne nudi ba ku tshisumbu tshia mikoko tshienda; ne mpindiewu, nganyi udi mua kuvila etshi? Monayi, ndi nnuambila, ewu yonsu udi uvila etshi udi muena mafi ne muana wa diabulu.

40 Bualu ndi nnuambila ne etshi tshionsu tshidi tshimpa tshidi tshifuma kudi Nzambi, ne tshionsu tshidi tshibi tshidi tshifuma kudi diabulu.

41 Bua nanku, padi muntu wenza midimu mimpa udi uteleja dîyi dia mulami wa mikoku muimpa, ne udi umulonda; kadi ewu yonsu udi wenza midimu mibi, yeya udi ulua muana wa diabulu, bualu udi uteleja dîyi dienda, ne udi umulonda.

42 Ne ewu yonsu udi wenza nanku neapeta difutu dienda; bua nanku, neapeta lufu bua difutu dienda, muikala mufua mu midimu yonsu mimpa bilondeshila bintu bia buakana.

43 Ne mpindiewu, bana betu, ndi musua ne nunteleja, bualu ndi ngakula ne bukola bua anyima wanyi; bualu monayi, ndi nnuambila patoka ne kanuena mua kupambuka to, anyi ndi muakula bilondeshila ku mikenji ya Nzambi.

44 Bualu ndi mubikidibua bua kuakula mu mushindu ewu, bilondeshila ku mulongu wa tshijila wa Nzambi, udi mu Kilisto Yezu; eyowa, ndi mupeshibua mukenji wa kuimana ne kujadika kudi bantu aba malu avua mamba kudi batatuetu bitangila malu adi alua.

45 Ne ebi kabiena bionsu to. Nudi nuela meji ne ndi mumanya bintu ebi bionsu nkayanyi anyi? Monayi, ndi nnujadikila ne, ndi mumanya ne bintu ebi bimvua munuambila bidi bilelela. Ne munyi munudi nuela meji ne ndi mumanya bulelela buabi?

46 Monayi, ndi nnuambila ne bivua bimanyisha kudi Nyuma wa Tshijila wa Nzambi. Monayi, mvua mujila ne musambila matuku a bungi bua kumanya nkayanyi bintu ebi. Ne mpindiewu ndi mudimanyina ne bidi bilelela; bualu Mukalenga Nzambi uvua mubindeja ku Nyuma wa Tshijila; ne etshi tshidi nyuma wa dibuluila udi munda muanyi.

47 Ne menamena kabidi, ndi nnuambila ne mbimbuluibua nanku, ne mêyi avua batatuetu bakula avua malelela, mena bilondeshila nyuma wa buambi uvua munda muanyi, udi ulua kabidi bu dimueneka dia Nyuma wa Nzambi.

48 Ndi nnuambila, ne ndi mumanya nkayanyi ne tshionsu tshinganuambila, bitangila bintu bidi bilua, ntshilelela; ne ndi nnuambila, ne ndi mumanya ne Yezu Kilisto nealua, eyowa, Muana, Umuepela Mulela wa Tatu, muwula ne ngâsa, ne lusa, ne bulelela. Ne monayi, yeya ki udi ulua bua kumbusha mibi ya ba pa buloba, eyowa, mibi ya muntu yonsu udi witabuija mu dîna dienda ne disuminyina.

49 Ne mpindiewu ndi nnuambila ne etshi tshidi dilongolola dindi mubikidibua, eyowa, wa kuyisha kudi bana betu bananga, eyowa, ne kudi muntu yonsu udi usomba mu bulaba; eyowa, bua kuyisha kudi bonsu, bakola ne bana, bapika ne badikadila; eyowa, ndi nnuambila ne kudi babandila ku bidimu, ne kabidi badi ne bidimu bia munkatshi-nkatshi, ne bena lukongu lua bantu luvua lulua; eyowa, bua kubila kudibu bua bakudimuna mutshima ne baledibua kabidi.

50 Eyowa, Nyuma udi wamba nanku: Kudimunayi mutshima, nuenu bonsu ndekelu ya buloba, bualu bukalenga bua mu diûlu bukadi pabuipi; eyowa, Muana wa Nzambi udi ulua ne butumbi buenda, ne bukitu buenda, ne bunena buenda, ne bukola buenda, ne bukalenga buenda. Eyowa, bana betu bananga, ndi nnuambila, ne Nyuma wakakangambila: Monayi butumbi bua Mukalenga wa buloba bonsu; ne kabidi Mukalenga wa diûlu nealua katataka menamena ukenka munkatshi mua bana ba bantu.

51 Ne Nyuma wakangambila kabidi, eyowa, wakabila kundi ne dîyi dia bukitu, wamba: Ndâku ne wambila bantu aba—Kudimunayi mutshima, bualu pa kumbusha nuenu bakudimuna mutshima kanuena mua kupiana bukalenga bua mu diûlu to nansha bishi.

52 Ne kabidi ndi nnuambila, Nyuma udi wamba ne: Monayi, tshisuyi kadi kateka ku muji wa mutshi; bua nanku mutshi onsu udi kawuyi ukuama bimuma bimpa neupudibua ne wedibua mu kapia, eyowa, kapia kadi kakayi mua kujika to, nansha kapia kadi kakayi kajima to. Monayi, ne vulukayi, Wa Tshijila wakamba nanku.

53 Ne mpindiewu bana betu bananga, ndi nnuambila, nudi mua kukolela ku mêyi â; eyowa, nudi mua kuteka bintu ebi ku luseka, ne kudiata Wa Tshijila mu makasa enu; eyowa, nudi mua kuikala buwulakana mu diditambisha dia mitshima yenu; eyowa, nenutungunuka mu divuala dia bilamba bia mushinga mukola ne kuteka kua mitshima yenu ku bintu bia tshianana bia pa buloba, pa mabanji enu anyi?

54 Eyowa, nenutungunuka mu diela dia meji ne nudi balengela kupita bakuabu anyi? Eyowa, nenutungunuka mu dikengesha dia bana benu, badi badipuekesha ne benda mu mulongu wa tshijila wa Nzambi, budi njila wakabuelelabu mu ekelezia, bikala bajididibua kudi Nyuma wa Tshijila, ne badi benza midimu idi ileja dikudimuna dia mutshima—

55 Eyowa, ne nenutungunuka mu diela dia bapela nyima yenu, ne bakengi, ne kubapala bintu bienu anyi?

56 Ne bua kujikija, nuenu bonsu badi batungunuka mu bubi buenu, ndi nnuambila ne badi aba bupudibua ne bedibua mu kapia pa kumbusha bakudimuna mutshima lukasa.

57 Ne mpindiewu ndi nnuambila, nuenu bonsu badi ne dijinga dia kulonda dîyi dia mulami wa mikoku muimpa, umbukayi kudi muntu mubi, ne tapulukanganayi nenda, ne kanulengi bintu bia bukoya to; ne monayi, mêna abu neakupudibua, bualu mêna a bantu babi ka akuikala munkatshi mua mêna a bakana to, bua dîyi dia Nzambi dikumbajibua, divua diamba ne: Mêna a bantu babi ka akusangishibua ne mêna a bantu banyi to;

58 Bualu mêna a bakana neafundibua mu mukanda wa moyo, ne nembapesha bupianyi ku diboku dianyi dia baluma. Ne mpindiewu, bana betu, nudi nuamba tshinyi bua etshi? Ndi nnuambila, bu nuenu ne mpata buatshi, kakuena bualu to, bualu dîyi dia Nzambi didi ne tshia kukumbajibua.

59 Bualu mulami wa mikoko kayi udi munkatshi muenu udi muikala ne mikoko ya bungi udi kayi uyitangila, bua ne mibuabua kayibuedimu ne ikusula tshisumbu tshia mikoko yenda to? Ne monayi, bu mubuabua mubuela mu tshisumbu tshia mikoko yenda kakutshipata anyi? Eyowa, ne bua kumana, bu yeya mua, neawushipa.

60 Ne mpindiewu ndi nnuambila ne mulami wa mikoko muimpa udi unubikila; ne binuateleja dîyi dienda neanubueja mu tshikumbi tshienda, ne nudi mikoko yenda; ne mmunupesha mukenji ne kanulekedi mubuabua wa lonji ubuela munkatshi muenu to, bua kanulu kubutuka.

61 Ne mpindiewu mema, Alama, ndi nupesha mukenji mu muakulu wa ewu udi mumpesha mukenji, bua ne nutangila bua kuenza mêyi amvua munuambila.

62 Ndi nupesha mukenji wa kubuela mu ekelezia; ne ndi mbikila bonsu badi kabayi mu ekelezia to, ngamba ne: Luayi ne nutambuishibua bua kukudimuna mitshima, bua nudia kabidi tshimuma tshia mutshi wa moyo.