1 Monayi bana betu bananga, bu mudi Mukalenga muanyisha bua ne ndua kunudi, bua nanku ndi ngidikija kuakula kunudi mu muakulu wanyi; eyowa, ku mukana muanyi, bu muditshi musangu wa kumpala undi ngakula kunudi ne mêyi a mukana muanyi, bualu mvua mudifila yonsu ku nkuasa wa tshilumbuluilu, ne ntshivua mua kulua kunudi to bualu mvua ne mudimu wa bungi.

2 Ne mena ntshivua mua kulua mpindiewu diba edi, bikala nkuasa wa tshilumbuluilu kavua mupeshibua kudi muntu mukuabu bua akôkesha pa muaba wanyi to; ne Mukalenga mu lusa lua bungi uvua muanyisha ne ndua kunudi.

3 Ne monayi, ndi mulua muikala ne ditekemena dinena ne dijinga dikola bua nsangana ne nudi badipuekesha kumpala kua Nzambi, ne nudi batungunuka mu dilomba dia ngâsa wenda, bua nsangana ne kanuena ne kadiu kumpala kuenda to, bua nsangana ne kanuena ne lutatu lubi luvua nalu bana betu ba mu Zalahemela bikala nadi to.

4 Kadi dibeneshibua dikala dîna dia Nzambi, bualu uvua mumpesha bua kumanya, eyowa, uvua mumpesha disanka dipita bunena dia kumanya ne badi bashikikibua kabidi mu njila wa buakana buenda.

5 Ne ndi ntekemena, bilondeshila ku Nyuma wa Nzambi udi munda muanyi, ne nempeta kabidi disanka buenu; nansha nanku ntshiena njinga ne disanka dianyi buenu diluila bua bualu bua ntatu ne kanyinganyinga bia bungi bingakapeta bua bana betu ba mu Zalahemela to, bualu monayi, disanka dianyi buabu didi dilua kunyima kua kupututuka mu ntatu ne kanyinganyinga bia bungi.

6 Kadi monayi, ndi mutekemena ne kanuena mu ngikadilu wa kupanga ditabuija bikola bu muvua bana benu to; ndi ntekemena ne kanuena badibandisha mu diditambisha mu mitshima yenu to; eyowa, ndi mutekemena ne kanuena bateka mitshima yenu ku mabanji ne bintu bia tshianana bia pa buloba to; eyowa, ndi mutekemena ne kanuena nutendelela mpingu to, kadi ne nudi nutendelela Nzambi mulelela ne wa moyo, ne nudi batangila ku mpala dilekedibua dia mibi yenu, ne ditabuija dia kashidi.

7 Bualu monayi, ndi nnuambila ne kudi bintu bia bungi bitshilualua; ne monayi, kudi tshintu tshimua tshidi ne mushinga kupita bikuabu bionsu—bualu monayi, diba kadiena kula menamena to dikala Musungidi ne moyo ne dialuaye munkatshi mua bantu benda.

8 Monayi, ntshiena ngamba ne nealua munkatshi muetu diba dikalaye mu tshitanda tshienda tshia tshifuaka to; bualu monayi, Nyuma kena mungambila ne nebikala nanku to. Mpindiewu ntshiena mubumanya bitangila bualu ebu to; kadi ndi mumanya ne, Mukalenga Nzambi udi ne bukola bua kuenza bintu bionsu bilondeshila ku dîyi dienda.

9 Kadi monayi, Nyuma uvua mungambila nanku: Bila kudi bantu aba, wamba ne: Kudimunayi mitshima, ne longololayi njila wa Mukalenga, ne endayi mu njila yenda, idi milulama; bualu monayi, bukalenga bua mu diûlu bukadi pabuipi, ne Muana wa Nzambi udi ulua pa mpala wa buloba.

10 Ne monayi, nealedibua kudi Maliya, mu Yelushalema udi muikala bulaba bua bankambua betu, yeya muikala kamama, lupanza lua mushinga mukola ne lusungula, wabuikidibua bu ne divuba ne wimita ku bukola bua Nyuma wa Tshijila, ne walela muana wa baluma, eyowa, Muana wa Nzambi.

11 Ne neaya, ukenga makenga a mubidi ne ntatu ne matêtshibua a mushindu onsu; ne ebi nanku bua dîyi divua diamba ne neambula makenga a mubidi ne mabêdi a bantu benda dikumbana.

12 Ne neitaba lufu, bua kusululaye mionji ya lufu, idi misuika bantu benda; ne neangata mateketa abu, bua munda muenda muwula ne lusa, bilondeshila ku musunyi, bua amanya bilondeshila ku musunyi mushindu wa kuambuluisha bantu benda bilondeshila ku mateketa abu.

13 Mpindiewu Nyuma udi mumanya bintu bionsu; nansha nanku Muana wa Nzambi udi ukenga bilondeshila ku musunyi bua ne ambula mibi ya bantu benda, bua ne akupula disambuka dia mikenji diabu bilondeshila ku bukola bua dipatuisha dienda; ne mpindiewu monayi, etshi ki bujadiki budi munda muanyi.

14 Mpindiewu ndi nnuambila ne nudi ne tshia kukudimuna mutshima ne kuledibua kabidi; bualu Nyuma udi wamba ne binuikala kanuyi baledibua kabidi to kanuena mua kupiana bukalenga bua mu diûlu to; bua nanku luayi ne tambuishibuayi bua dikudimuna dia mutshima, bua nusukudibua ku mibi yenu, bua nuikala ne ditabuija kudi Muana wa Mukoku wa Nzambi, udi umbusha mibi ya ba pa buloba, udi ne bukola bua kupandisha ne kulengeja dipanga buakana dionsu.

15 Eyowa, ndi nnuambila ne luayi ne kanutshinyi to, ne elayi mibi yonsu ku luseka, idi minukuata kakuyi lutatu to, idi minusuika panshi tô ne ku dinyanguka, eyowa, luayi ne ndayi kumpala, ne lejayi Nzambi wenu ne nudi bitaba bua kukudimuna mutshima ku mibi yenu ne kubuela nenda mu tshipungidi bua kulama mikenji yenda, ne kumujadikila nanku lelu mu dibuela mu mâyi a ditambula.

16 Ne ewu yonsu udi wenza nanku ne udi ulama mikenji ya Nzambi kubangila apu, yeya neavuluka ne ndi mmuambila ne, eyowa, ne avuluka mvua mumuambila ne neapeta moyo wa tshiendelela, bilondeshila ku bujadiki bua Nyuma wa Tshijila, udi ujadika munda muanyi.

17 Ne mpindiewu bana betu bananga, nudi nuitabuija bintu ebi anyi? Monayi, ndi nnuambila ne, eyowa, ndi mumanya ne nudi nubitabuija; ne mushindu undi mumanyina ne nudi babitabuija nku dimuenesha dia Nyuma udi munda muanyi. Ne mpindiewu bualu ditabuija dienu bitangila bintu ebi didi dikola, eyowa, bitangila bintu bindi muakula, disanka dianyi didi dinena.

18 Bualu bu mumvua munuambila kumbukila ku mbangilu mvua ne dijinga dia bungi ne kanuikadi mu ngikadilu wa lutatu bu bana benu, mena momumua ngamonyi ne majinga anyi avua makumbana.

19 Bualu ndi mmona ne nudi mu njila ya buakana; ndi mmona ne nudi mu njila udi ulombola ku bukalenga bua Nzambi; eyowa; ndi mmona ne nudi nululamija njila yenda.

20 Ndi mmona ne bivua binumanyisha, ku bujadiki bua dîyi dienda, ne kena mua kuenda mu njila idi mikonyangala to; anyi kena ukudimuka ku bivuaye muamba to; anyi kandidimbi kakena nansha ukudimuka ufuma ku dia baluma uya ku dia bakaji to, anyi ufuma ku tshidi tshimpa uya ku tshidi tshibi to; bua nanku, njila wenda udi tshijengu tshimua tshia tshiendelela.

21 Ne kena usomba mu ntempelo idi kayiyi ya tshijila to; anyi bukoya anyi tshionsu tshia bukoya katshiena mua kubuela mu bukalenga bua Nzambi to; bua nanku ndi nnuambila diba ne dilua, eyowa, ne ku dituku dia ndekelu nebikala ne, udi mukoya neashala ne bukoya buenda.

22 Ne mpindiewu bana betu bananga, nganuambidi bintu ebi bua kunutabuluja ku mudimu wenu kudi Nzambi, bua kanuikadi ne kadiu kumpala kuenda to, bua nuenda bilondeshila ku mulongu wa tshijila wa Nzambi, kuakanuakidilabu.

23 Ne mpindiewu ndi musua ne nuikala badipuekeshi, ne nuikala batumikidi ne bena kalolu; nuikala bateketa bua kunusengelela; buwula ne ditukija ne bulekelelu; bikala badikandi mu malu onsu; bikala bananukidi mu dilama mikenji ya Nzambi diba dionsu; nulomba bionsu binudi nukengela, bia mu nyuma ne bia mu mubidi; nupingajila Nzambi tuasakidila diba dionsu bua bionsu binudi nupeta.

24 Ne tangilayi ne nudi ne ditabuija, ditekemena, ne bunangi, ne pashisha nenuvulangana diba dionsu ne bienzedi bimpa.

25 Ne Mukalenga anubenesha, ne lamayi bilamba bienu kabikadi ne katoba to, bua nuya kusomba, mu bukalenga bua mu diûlu kanuyi kabidi nupatuka mu to, ne Abalahama, Isaka, ne Yakoba, ne bambi bansantu bavuaku katshia ne katshia buloba buabanga, bikala ne bivualu bienu kabiyi ne katoba to bu mudi bivualu biabu kabiyi ne katoba to.

26 Ne mpindiewu bana betu bananga, nganuambidi mêyi â bilondeshila ku Nyuma udi ujadika munda muanyi; ne anyima wanyi udi usanka menamena, bua dinanukila ne ntema bipita binuvua bafila ku dîyi dianyi.

27 Ne mpindiewu, ditalala dia Nzambi ditudila pa mutu penu, ne pa nzubu yenu ne malaba enu, ne pa bisumbu bia bimuna bikesa ne binena bienu, ne bionsu binudi nabi, bakaji benu ne bana benu, bilondeshila ditabuija dienu ne midimu yenu mimpa, kubangila diba edi tô ne bua kashidi. Ne ngambi nanku. Amena.