1 Muananyi wa baluma, teya matshi ku mêyi anyi, bualu ndi nkuambila ne, mena bu mungakambila Helamana ne, monsu muwalama mikenji ya Nzambi neulubuluka mu bulaba; ne monsu muwapanga kulama mikenji ya Nzambi neukoshibua ku mpala kuenda.

2 Ne mpindiewu, muananyi wa baluma, ndi mutekemena ne nempeta disanka dinena kûdi, bua disuminyina dieba ne lulamatu lueba kudi Nzambi; bualu muwuvua mutuadija kutangidila Mukalenga Nzambi weba mu bunsonga bueba, bia momumua mena ndi mutekemena ne neutungunuka ne kulama kua mikenji yenda; bualu mubeneshibua ngudi unanukila tô ne ku ndekelu.

3 Ndi nkuambila, muananyi wa baluma, ne nkavua mupeta disanka dinena bueba, bua bualu bua lulamatu lueba ne dinanukila dieba, ne ditukija dieba ne bulekelelu bueba munkatshi mua bantu ba Zolama.

4 Bualu ndi mumanya uvua mu bupika; eyowa, ne ndi kabidi mumanya ne bakakuasa mabua bua bualu bua dîyi; ne wakambula bionsu ebi ne ditukija bualu Mukalenga uvua neba; ne mpindiewu udi mumanya ne Mukalenga wakakupatuisha.

5 Ne mpindiewu muananyi wa baluma, Shibulona, ndi musua ne uvuluka, ne diba dionsu diwitabuja kudi Nzambi mena neupatuishibua momumua nanku ku matêta eba, ne matata eba, ntatu yeba, ne neubandishibua ku dituku dia ndekelu.

6 Mpindiewu, muananyi wa baluma, ntshiena musua ne wela meji ne ndi mudimanyina bintu ebi nkayanyi to, kadi Nyuma wa Nzambi udi munda muanyi ki udi mummanyisha bintu ebi; bualu bu mema ntshiyi muledibua kudi Nzambi to, ntshivua mmanya bintu ebi to.

7 Kadi mona, Mukalenga mu lusa luenda lunena wakatuma muanjelu wenda bua nkumanyisha mvua ne tshia kulekela mudimu wa dinyanguka munkatshi mua bantu benda; eyowa, ne mvua mumona muanjelu ku mpala ne mpala, ne wakakula nanyi, ne dîyi dienda divua bu dikubakuba, ne diakanyungusha buloba bujima.

8 Ne biakalua ne ngakenza matuku asatu ne butuku busatu ne dikenga ne dipampakana dikola kupita dia anyima; ne ntshiakapeta dilekedibua dia mibi yanyi nansha, tô ne pangakabila kudi Mukalenga Yezu Kilisto bua kulomba lusa. Kadi mona, ngakabila ne ngakapeta ditalala bua anyima wanyi.

9 Ne mpindiewu, muananyi wa baluma, ndi mukuambila nanku bua ukeba lungenyi, bua ulonga kundi ne kakuena njila anyi mushindu mukuabu kudi muntu kupandishibua to, amu munda mua ne ku njila wa Kilisto. Mona, yeya udi moyo ne bukenka bua ba pa buloba. Mona, yeya udi dîyi dia bulelela ne dia buakana.

10 Ne mpindiewu, bu muwudi mubanga kulongesha dîyi mena nanku ndi musua ne utungunuka ne kulongesha; ne ndi musua ne wikala munanukidi ne mudikandi mu bintu bionsu.

11 Tangila ne kawudibandishi mu diditambisha to; eyowa, umanya bua kuikadi udileja bua lungenyi lueba to, anyi bua bukola bueba bua bungi to.

12 Ikala ne dikima, kadi diambu to; ne kabidi tangila ne kuikala ne bukôkeshi pa majinga eba onsu, bua ujibua ntenta ne dinanga; tangila ne ulekela bufuba.

13 Kusambidi bu mudi Bena Zolama benza to, bualu udi mumona ne badi basambila bua bumvuibua kudi bantu, ne bua basamunyibua bua lungenyi luabu.

14 Kuambi to ne: Ô Nzambi, ndi nkusakidila bualu tudi bimpa kupita bana betu; kadi amba ne: Ô Mukalenga, mbuikidila dipanga bukumbana dianyi, ne vuluka bana betu mu lusa—eyowa, itabuja diba dionsu dipanga dieba kumpala kua Nzambi.

15 Ne Mukalenga abenesha anyima weba, ne akuakidila ku dituku dia ndekelu mu bukalenga buenda, bua wewa kusomba mu ditalala. Mpindiewu ndâku, muananyi wa baluma, ne longesha dîyi kudi bantu aba. Ikala ne bushindama. Muananyi wa baluma, ushala bilenga.