1 Ne biakalua ne mu tshidimu tshia dikumi ne tshimua tshia dikôkesha dia balumbuluishi pa mutu pa bantu ba Nefi, mu dituku ditanu dia ngondu muibidi, pavuaku kumana kuikala ditalala dinena mu bulaba bua Zalahemela, pavuaku kumana kuikala kakuyi mvita anyi makokangana to bua bidimu bungi kampanda, mena tô ne ku dituku ditanu dia ngondu muibidi wa tshidimu tshia dikumi ne tshimua, kuvua lubila lua mvita luakumvuika mu bulaba bonsu.

2 Bualu monayi, misumba ya basalayi ya Bena Lamana yakabuela ku luseka lua tshipela, mu mikalu ya bulaba, mena mu tshimenga tshia Amoniha, ne yakabanga kushipa bantu ne kubutula tshimenga.

3 Ne mpindiewu biakenzeka ne, kumpala kua Bena Nefi kusangishabu musumba mukumbana wa basalayi bua kubipatabu mu bulaba, bakashipa bantu bavua mu tshimenga tshia Amoniha, ne kabidi bamua bavua pabuipi ne mikalu ya Noa, ne bakangata bakuabu bakuatshibu mu tshipela.

4 Mpindiewu biakalua ne Bena Nefi bavua bajinga kuangatulula bakaya nabu bakuatshibu mu tshipela abu.

5 Bua nanku, ewu uvua musungudibua kapita kanena wa misumba ya basalayi ya Bena Nefi, (ne dîna dienda divua Zolama ne uvua ne bana ba baluma babidi, Lehi ne Aha)—mpindiewu Zolama ne bana benda ba baluma babidi, bualu bavua bamanya ne Alama uvua muakuidi munena wa ku mutu kua ekelezia, ne ne bavua bumvua ne uvua ne nyuma wa buambi, bua nanku bakaya kudiye ne bakajinga kumanya kudiye kunyi kuvua Mukalenga musua ne baya mu tshipela mu dikeba dia bana babu, bavua Bena Lamana bakuata bakuatshibu.

6 Ne biakalua ne Alama wakebeja Mukalenga bitangila muanda ewu. Ne Alama wakapingana ne wakabambila ne: Monayi, Bena Lamana nebasabuka musulu wa Sidona mu tshipela ku sude, kûlu kula kupita mikalu ya bulaba bua Manti. Ne monayi aku nenusambakena nabu, ku esete wa musulu wa Sidona, ne aku Mukalenga neanupesha bana benu bavua Bena Lamana bakuata bakuatshibu.

7 Ne biakalua ne Zolama ne bana benda ba baluma baksabuka musulu wa Sidona, ne misumba yabu ya basalayi, ne bakenda kupita mikalu ya ku Manti tô ne mu tshipela ku sude, muvua ku luseka lua ku esete kua musulu wa Sidona.

8 Ne bakabunda misumba ya basalayi ya Bena Lamana, ne bakatangalaja Bena Lamana ne bakabanyemesha mu tshipela; ne bakangata bana babu bavua Bena Lamana bakuata bakuatshibu, ne kakuvua muntu nansha umua wa kudibu bavuabu bakuata bakuatshibu wakajimina to. Ne bana babu bakalua nabu bua kuasa mu malaba abu nkayabu.

9 Ne ki muakajika tshidimu tshia dikumi ne tshimua tshia balumbuluishi nanku, Bena Lamana bikala bipatshibua ku bulaba, ne bantu ba Amoniha bavua babutuka; eyowa, muntu onsu wa moyo wa ku Bena Amoniha uvua mushipibua, ne kabidi tshimenga tshiabu tshinena tshivua tshibutuka, tshivuabu bamba ne Nzambi kavua mua kutshibutula to, bua bunena buatshi.

10 Kadi monayi, mu dituku dimua tshivua tshishala tshitupu; ne mbua ne nyama ya muitu ne ya mu tshipela yakadia bitalu.

11 Nansha nanku, kunyima kua matuku a bungi bitalu biabu biakuwujibua mushiki pa mpala wa buloba, ne biakabuikidibua ne tshibuikilu tshia pa mutu. Ne mpindiewu mupuya wabi mukola menamena ne bantu kabakabuela kabidi bua kuasa mu bulaba bua Amoniha bua bidimu bia bungi. Ne diakabikidibua ne Kabutu ka ba Neholo; bualu bavua bashipibua bavua bena ku ditabuija dia Neholo; ne malaba abu akashala matupu.

12 Ne Bena Lamana kabakalua kabidi kuluisha Bena Nefi mvita to tô ne mu tshidimu tshia dikumi ne tshinayi tshia dikôkesha dia balumbuluishi pa mutu pa bantu ba Nefi. Ne bantu ba Nefi bakapeta ditalala ditungunuka mu bulaba bonsu.

13 Ne Alama ne Amuleke bakaya bayisha dikudimuna dia mutshima kudi bantu mu ntempelo yabu, ne mu bitendelelu biabu, ne mu nsunagoga yabu kabidi, ivua mibaka ku mushindu wa Bena Yuda.

14 Ne bakambila bonsu bavua basua kuteleja mêyi abu dîyi dia Nzambi diba dionsu, kabayi ne kansungansunga ka bantu to.

15 Ne ki muakaya Alama ne Amuleke nanku, ne kabidi bakuabu ba bungi bavua basungudibua bua mudimu, bua kuyisha dîyi mu bulaba bonsu. Ne dishikika dia ekelezia kuakalua mu miaba yonsu mu bulaba, mu bitupa bionsu bia ku mpenga yonsu, munkatshi mua bantu bonsu ba Bena Nefi.

16 Ka kakuvua dishilangana munkatshi muabu to; Mukalenga wakupumuna Nyuma wenda pa mpala onsu wa bulaba bua kulongolola meji a bana ba bantu, anyi bua kulongolola mitshima yabu bua kuitabuijabu dîyi dialongeshibua munkatshi muabu mu diba dia dilua dienda—

17 Bua kabapapishidi dîyi to, bua kabengi kuitabuija to, ne kabayi tô ne ku dibutuka to, kadi bua kuitabuijabu dîyi ne disanka, ne bu mudi ditamba dikala dilamatshishibua ku mutshi wa mvinyo mulelela, bua babuela mu ditalala dia Mukalenga Nzambi wabu.

18 Mpindiewu bakuidi bayila munkatshi mua bantu bakayisha bua bubi bua mafi onsu, ne didinga, ne malakana, ne luntûta lua bungi, ne budimu, ne bipendu, ne buivi, ne dinyenga, ne dipawula, ne dishipa, ne dienda dia masandi, ne mishindu yonsu ya majinga a mubidi, babila ne bintu bionsu ebi kabivua bua kuikalaku to—

19 Bayisha bintu bivua ne tshia kulua katataka; eyowa, bayisha dilua dia Muana wa Nzambi, makenga enda ne lufu luenda, ne dibika dia bafua kabidi.

20 Ne ba bungi ba ku bantu bakebeja bitangila muaba walua Muana wa Nzambi; ne bakabalongesha ne neabamuenekela kunyima kua dibika ku lufu dienda; ne bantu bakumvua nanku ne disanka dinena ne musangelu.

21 Ne mpindiewu kunyima kua kushikika ekelezia mu bulaba bonsu—kunyima kua ekelezia mutshimuna diabulu, ne bakayisha dîyi dia Nzambi dikala diyishibua mu bulelela buadi mu bulaba bonsu, ne Mukalenga wakupumuna mabenesha enda pa mutu pa bantu—ka muakajika tshidimu tshia dikumi ne tshinayi tshia dikôkesha dia balumbuluishi pa mutu pa bantu ba Nefi nanku.