1 Mpindiewu pakashiyangana Amona ne bana babu ku mikalu ya bulaba bua Bena Lamana, monayi Alona wakâsa luendu mutangila ku bulaba buvua Bena Lamana babikila ne Yelushalema, babubikila mu dîna dia bulaba bua diledibua dia batatuabu; ne buvua kula, bukuatangana ne mikalu ya Molomo.

2 Mpindiewu Bena Lamana ne Bena Amaleki ne bantu ba Amulona bavua bibaka tshimenga tshinena, tshivua tshibikidibua ne Yelushalema.

3 Mpindiewu Bena Lamana buabu nkayabu bavua bapapa menamena, kadi Bena Amaleki ne Bena Amulona batshivua bapapa kupita; bua nanku bakapapishisha Bena Lamana mitshima yabu, bua ne bakolakana mu bubi ne mu malu mapita bubi abu.

4 Ne biakalua ne Alona wakalua ku tshimenga tshia Yelushalema, ne diambedi wakabanga kuyisha kudi Bena Amaleki. Ne wakabanga kubayisha mu nsunagoga yabu, bualu bavua bibaka nsunagoga yabu bilondeshila mulongu wa Bena Neholo; bualu Bena Amaleki ne Bena Amulona ba bungi bavua bikala bilondeshila mulongu wa Bena Neholo.

5 Bua nanku, bu muvua Alona ubuela munda mua umua wa nsunagoga yabu bua kuyisha bantu, ne pavuaye wakula kudibu, monayi, Muena Amaleki umua wakajuka ne wakabanga kukokangana nenda, wamba ne: Atshi ntshinyi tshiwudi ujadika? Uvua mumona muanjelu anyi? Bua tshinyi banjelu kabena batumuenekela to? Mona bantu aba pabu bakana bu mudi bantu beba anyi?

6 Udi wamba kabidi ne, netufua, pa kumbusha tuetu bakudimuna mutshima. Munyi muwudi mumanya meji ne dijinga dia mitshima yetu? Munyi muwudi mumanya ne tudi ne tshia kukudimuna mutshima? Munyi muwudi mumanya ne katuena bantu bakana to? Mona, tuvua bibaka bitendelelu, ne tudi tudisangisha pamua bua kutendelela Nzambi. Tudi tuitabuija ne Nzambi neapandisha bantu bonsu.

7 Mpindiewu Alona wakamuambila ne: Udi witabuija Muana wa Nzambi nealua bua kusungila bukua bantu ku mibi yabu anyi?

8 Ne muntu ewu wakamuambila ne: Katuena tuitabuija ne udi mumanya tshintu nansha tshimua tshia buena atshi to. Katuena tuitabuija ngikadilu misenji eyi to. Katuena tuitabuija ne udi mumanya bintu bitshilualua to, anyi katuena tuitabuija ne batatueba ne kabidi batatuetu bavua bamanya bitangila bintu bivuabu bakula, bitangila bitshilualua to.

9 Mpindiewu Alona wakabanga kubunzuluila mifundu ya Nzambi bitangila dilua dia Kilisto, ne kabidi bitangila dibika dia bafua, ne ne kakuvua mua kuikala disungila bua bukua bantu to pa kumbusha ku lufu ne kukengeshibua kua Kilisto, ne bupikudi bua ku mashi enda.

10 Ne biakalua ne pakabangaye kubumvuija bintu ebi bakamufîkila tshiji, ne bakabanga kumuseka; ne bakabenga kuteleja mêyi avuaye wamba.

11 Bua nanku, pakamonaye ne bakabenga kuteleja mêyi enda, wakumbuka mu nsunagoga yabu, ne wakalua ku musoku uvuabu babikila ne Ani-Anti, ne aku wakasangana Muloki ubayisha dîyi; ne kabidi Ama ne bana babu. Ne bakakokangana ne ba bungi bua dîyi.

12 Ne biakalua ne bakamona ne bantu bavua kupapisha mitshima yabu, bua nanku bakumbuka ne bakalua ku bulaba bua Midoni. Ne bakayisha dîyi kudi ba bungi, ne bakesa bakitabuija mêyi akalongeshabu.

13 Nansha nanku, bakakuata Alona ne bungi kampanda bua bana babu ne bakabela mu buloko, ne bashadila babu bakanyema bulaba bua Midoni batangila ku bitupa bia ku mpenga yonsu.

14 Ne bakelabu mu buloko abu bakamona makenga a bungi, ne bakapatuishibua kudi tshianza tshia Lamoni ne Amona, ne bakadishibua ne bakavuadishibua bilamba.

15 Ne bakaya kabidi bua kumanyisha dîyi, ne bakapatuishibua nanku bua musangu wa kumpala mu buloko; ne ki muvuabu bakenga nanku.

16 Ne bakaya konsu kuakabalombola Nyuma wa Mukalenga, bayisha dîyi dia Nzambi mu nsunagoga yonsu ya Bena Amaleki, anyi mu disangisha dionsu dia Bena Lamana muvuabu banyisha ne babuela.

17 Ne biakalua ne Mukalenga wakabanga kubabenesha, mua ne bakaluisha ba bungi ku dimanya dia bulelela; eyowa, bakitabujija ba bungi bitangila mibi yabu, ne bitangila ngikadilu ya batatuabu ne kayivua miakana to.

18 Ne biakalua ne Lamoni ne Amona bakafuma ku bulaba bua Midoni batangila ku bulaba bua Yishemaela, buvua buikala bulaba bua bupianyi buabu.

19 Ne mfumu Lamoni kakuleleka ne Amona amusadila, anyi ikala musadidi wenda to.

20 Kadi wakibakishisha nsunagoga ya bungi mu bulaba bua Yishemaela; ne wakasangishisha bantu benda pamua, anyi bantu bavua ku bukalenga buenda.

21 Ne bakasanka buabu, ne wakabalongesha malu a bungi. Ne wakabamanyisha kabidi ne bavua bantu bavua ku bukôkeshi buenda, ne bavua bantu badikadila, ne bavua badikadila ku makengeshibua a kudi mfumu, tatuenda; bualu tatuenda uvua mumuanyishila ne akôkesha pa mutu pa bantu bavua mu bulaba bua Yishemaela, ne mu bulaba bonsu bua ku mpenga yonsu.

22 Ne wakabamanyisha kabidi ne bavua ne budisuila bua kutendelela Mukalenga Nzambi wabu bilondeshila ku majinga abu, muaba onsu uvuabu, bu biobi bikala mu bulaba buvua ku bukôkeshi bua mfumu Lamoni.

23 Ne Amona wakayisha bantu ba mfumu Lamoni; ne biakalua ne wakabalongesha bintu bionsu bitangila bintu bia buakana. Ne wakabakankamija dituku dionsu, ne dinanukila dionsu; ne bakateya ntema ku dîyi dienda, ne bavua ne lukunukunu mu dilama dia mikenji ya Nzambi.