1 Ne biakalua ne kunyima kua matuku abidi ne butuku bubidi bakavua pabuipi ne kuambula tshitalu tshienda ne kutshiteka mu lukita, luvuabu bibaka bua kipatshila ka kujîka bafua babu.

2 Mpindiewu bualu mukaji wa mfumu mumvua lumu lua Amona, bua nanku wakatuma muntu ne wakajinga ne alua kudiye.

3 Ne biakalua ne Amona wakenza muvuaye mumutumina mukenji, ne ne wakalua kudi mukaji wa mfumu, ne wakajinga bua kumanya tshivuaye musua ne enza.

4 Ne wakamuambila ne: Basadidi ba bayanyi bavua bammanyisha ne udi muambi wa Nzambi munsantu, ne udi ne bukola bua kuenza malu a dikema a bungi mu dîna dienda;

5 Bua nanku, bu biobi nanku, ndi musua ne ubuela ne umona bayanyi, bualu ukadi mulala pa bulalu buenda bua mutantshi wa matuku abidi ne butuku bubidi; ne banga badi bamba ne kena mufua to, kadi bakuabu badi bamba ne udi mufua ne udi ununka, ne uvua ne tshia kutekibua mu lukita; kadi buanyi mema, kundi kena ununka to.

6 Mpindiewu, etshi ki tshivua Amona ujinga, bualu uvua mumanya ne mfumu Lamoni uvua ku bukôkeshi bua bukola bua Nzambi; uvua mumanya ne Nzambi uvua muikala umbusha ku meji enda tshibuikilu tshibuitshidila tshia dipanga ditabuija, ne bukenka buvua bukenkesha meji enda, buvua bukenka bua butumbi bua Nzambi, buvua bukenka bua dikema bua buimpa buenda—eyowa, bukenka ebu buakafila disanka dia bungi mu anyima wenda, ne kunyima, divuba dia mîdima diakumbuka, ne bukenka bua moyo wa kashidi buakatema mu anyima wenda, eyowa, wakamanya ne buvua butûta mubidi wenda wa tshifukilu, ne uvua muambudibua kudi Nzambi—

7 Bua nanku, tshivua mukaji wa mfumu ujinga kudiye tshivua dijinga dienda kabidi. Ki bualu wakaya mu bua kumona mfumu bu muvua mukaji wa mfumu ujinga kudiye; ne wakamona mfumu, ne wakamanya ne kavua mufua to.

8 Ne wakambila mukaji wa mfumu ne: Kena mufua to, kadi udi muladika kudi Nzambi, ne malaba neajuka kabidi; bua nanku kumujîki to.

9 Ne Amona wakamuambila ne: Udi witabuija etshi anyi? Ne wakamuambila ne: ntshiena mupeta njadikilu to pa kumbusha dîyi dieba, ne dîyi dia basadidi betu; nansha nanku ndi ngitabuija ne nebienzeka bu muwambi.

10 Ne Amona wakamuambila ne: Udi mubeneshibua bua bualu bua ditabuija dieba dipita; ndi nkuambila, mukaji, kakutu kuanji kuikala ditabuija dinena nanku awu munkatshi mua bantu bonsu ba Nefi to.

11 Ne biakalua ne wakatangila bulalu bua bayenda, katshia ku tshikondu atshi mena tô ne ku tshikondu atshi pakatshiabu tshivua Amona muamba ne neajuka.

12 Ne biakalua ne wakajuka, bilondeshila ku mêyi a Amona; ne bu muakajukaye, wakôlola tshianza tshienda kudi mukaji, ne kuamba: Dibeneshibua dikala dîna dia Nzambi, ne udi mubeneshibua.

13 Bualu bushuwa bu muwudi ne moyo, mona, ndi mumona Musungidi wanyi; ne nealua, ne nealedibua kudi mukaji, ne neasungila bantu bonsu badi bitabuija mu dîna dienda. Mpindiewu, pakambaye mêyi â, mutshima wenda wakuwula munda muenda, ne wakadishinda panshi kabidi ne disanka; ne mukaji wa mfumu wakadishinda penda panshi, bualu uvua mutûtshika kudi Nyuma.

14 Mpindiewu, pakamona Amona Nyuma wa Mukalenga muitshikijibua bilondeshila ku masambila enda pa mutu pa Bena Lamana, bana babu, bavua bikala tshiena bualu tshia madilu a bungi munkatshi mua Bena Nefi, anyi munkatshi mua bantu ba Nzambi bonsu bua malu mabi abuna ngikadilu yabu, wakapona pa binu bienda ne wakabanga kupumuna anyima wenda mu disambila kudi Nzambi ne mu dimusakikidila bua bivuaye muenzela bana babu; ne uvua mutûtshika kabidi ne disanka; ne nanku busatu buabu bonsu bakadishinda panshi.

15 Mpindiewu, pakamona basadidi ba mfumu ne bavua bapona panshi, bakabanga pabu kubila kudi Nzambi, bualu ditshina dia Mukalenga diakalua kudibu pabu, bualu bobu ki bimanyina kumpala kua mfumu ne bakamujadikila bitangila bukola bunena bua Amona.

16 Ne biakalua ne bakabila dîna dia Mukalenga, ne bukola buabu, mena tô ne pakaponabu bonsu pa buloba, amu pa kumbusha mukaji umua wa ku bantu bakaji ba Bena Lamana, muena dîna divua ne Abishi, ne uvua mukudimuna moyo kudi Mukalenga kukavu bidimu bia bungi, bua tshimônyi tshia tatuenda—

17 Nanku, bualu uvua mukudimuna moyo kudi Mukalenga, ne kavua muanji kubumanyisha muntu to, bua nanku, pakamonaye ne basadidi ba Lamoni bonsu bavua bapona pa buloba, ne pakamonaye kabidi ne musadidi wenda mukaji, mukaji wa mfumu, ne mfumu, ne Amona bavua balala bôloloka pa buloba, wakamanya ne buvua bukola bua Nzambi; ne wakatshinka ne edi divua diba dia kumanyisha bantu tshivua tshienzeka munkatshi muabu, ne kumona kua bualu ebu kuvua bua kubitabuijijila bukola bua Nzambi, bua nanku wakanyema ku nzubu ne ku nzubu, ubumanyisha bantu.

18 Ne bakabanga kudisangisha pamua ku nzubu wa mfumu. Ne kuakalua musumba wa bantu, ne bakakema pakamonabu mfumu, ne mukaji wa mfumu, ne basadidi babu balala bôloloka panshi, ne bavua bonsu balala bôlolokapu bu ne bavua bafua; ne bakamona kabidi Amona, ne monayi, uvua Muena Nefi.

19 Ne mpindiewu bantu bakabanga kunungana munkatshi muabu nkayabu; bamua bamba ne tshivua bubi bunena buvua bubaluila, anyi buluila mfumu ne nzubu wenda, bualu wakalekela ne Muena Nefi ashala mu bulaba.

20 Kadi bakuabu bakabatandisha, bamba ne: Mfumu mmulua ne bubi ebu pa mutu pa nzubu wenda, bualu wakashipa basadidi benda bakatangalajija bisumbu bia bimuna biabu ku mâyi a Sebuse.

21 Ne bakabatandisha kabidi kudi bantu bavua bimana ku mâyi a Sebuse ne bakatangalaja bisumbu bia bimuna bia mfumu, bualu bakafîkila Amona tshiji bua bungi bua bana babu bakashipaye ku mâyi a Sebuse, pavuaye usungidila bisumbu bia bimuna bia mfumu.

22 Mpindiewu, umua wabu, muena muanabu uvua Amona mushipa ne muela wenda wa mvita, bualu wakafîkila Amona tshiji menamena, wakatula muela wenda wa mvita ne wakasemena kumpala bua ku ulekelela pa Amona, bua kumushibeya; ne pakajulaye muela wa mvita bua kumutûtaye, monayi, wakapona mufua.

23 Mpindiewu tudi tumona ne kabavua mua kushipa Amona to, bualu Mukalenga wakambila Mosiya, tatuenda ne: Nemuepelesha, ne nebimuenzekela bilondeshila ku ditabuija dieba—bua nanku, Mosiya wakamushiya kudi Mukalenga.

24 Ne biakalua ne pakamona musumba wa bantu ne muntu uvua mujula muela wa mvita bua kushipa Amona uvua mupona mufua, bôwa buakakuata bonsu, ne kabakakima kuela bianza biabu bua kumulenga anyi nansha umua wa ku bavua bapona to; ne bakabanga kukema kabidi munkatshi muabu ne tshinyi tshivua mua kuikala tshiena bualu tshia bukola bunena ebu, anyi ntshinyi tshivua bintu bionsu ebi bisua kuamba.

25 Ne biakalua ne kuvua ba bungi munkatshi muabu bakamba ne Amona uvua Nyuma Munena, ne bakuabu bakamba Nyuma Munena uvua mumutuma;

26 Kadi bakuabu bakabatandisha bonsu, bamba ne uvua tshikulukuku, tshitumibua kudi Bena Nefi bua kubamuenesha mpaji.

27 Ne kuvua bamua bakamba Amona uvua mutumibua kudi Nyuma Munena bua kubatatshisha bua malu mabi abu; ne Nyuma Munena ki uvua ulama Bena Nefi diba dionsu, uvua diba dionsu ubapatuisha mu bianza biabu; ne bakamba ne tshivua Nyuma Munena ewu uvua mushipa ba bungi menamena ba ku bana babu, Bena Lamana.

28 Ne nanku dikokangana diakabanga kuikala dikola menamena munkatshi muabu. Ne pavuabu nanku bakokangana, musadidi mukaji, uvua muenza ne musumba wa bantu badisangisha pamua, wakalua, ne wakanyingalala menamena pakamonaye dikokangana divua munkatshi mua musumba wa bantu, eyowa, tô ne ku dimatshisha dia binsonji.

29 Ne biakalua ne wakaya ne wakakuata mukaji wa mfumu ku tshianza, ne pamuapa uvua mua kumujula panshi; ne ne katataka pakalengaye tshianza tshienda wakajuka ne wakimana pa makasa enda, ne wakabila ne dîyi dikola, wamba ne: Ô Yezu mubeneshibua, udi mumpandisha ku ngena udi utshingisha bikola! Ô Nzambi mubeneshibua, ufuila bantu aba lusa!

30 Ne pakambaye nanku awu, wakakuatakaja bianza bienda, bualu uvua muwula ntenta ne disanka, ne wakamba mêyi a bungi avuabu kabayi bumvua to; ne pakenzaye nanku awu, wakakuata mfumu Lamoni ku tshianza, ne monayi wakajuka ne wakimana pa makasa enda.

31 Ne yeya, katataka, pakamonaye dikokangana divua munkatshi mua bantu benda, wakasemena ne wakabanga kubatandisha, ne kubalongesha mêyi avuaye mumvua afuma mukana mua Amona; ne bonsu bakumvua mêyi enda bakitabuija, ne bakakudimuna moyo kudi Mukalenga.

32 Kadi kuvua ba bungi munkatshi muabu bavua babenga kuteleja mêyi enda; bua nanku bakendela wabu njila.

33 Ne biakalua ne pakajuka Amona wakabalongesha penda, ne basadidi ba Lamoni bonsu pabu; ne bonsu bakamanyisha bantu bualu bua momumua—mitshima yabu ivua mishintulukibua; ne kabavua kabidi ne dijinga dia kuenza bubi to.

34 Ne monayi, ba bungi bakamanyisha bantu ne bavua bamona banjelu ne bavua bayukila nabu; ne nanku bavua babambila bintu bia Nzambi, ne bitangila buakana buenda.

35 Ne biakalua ne kuvua ba bungi bakitabuija mêyi abu; ne bonsu bakitabuija bakatambuishibua; ne bakalua bantu bakana, ne bakashikika ekelezia munkatshi muabu.

36 Ne nanku mudimu wa Mukalenga wakatuadija munkatshi mua Bena Lamana; nanku Mukalenga wakabanga kubupumuina Nyuma wenda; ne tudi tumona ne diboku dienda didi diôluela bonsu bakudimuna mutshima ne bitabuija mu dîna dienda.