1 Ô bu mema muikala muanjelu, ne bu mema mua kupeta dijinga dia mutshima wanyi, ne nya ne ngakula ne mpungi wa Nzambi, ne dîyi didi dinyungusha buloba, ne kubila kudi bantu bonsu bua bakudimuna mutshima!

2 Eyowa, mvua bua kumanyisha anyima yonsu, bu ne dîyi dia dikubakuba, dikudimuna dia mutshima ne dilongolola dia disungila, bua bakudimuna mutshima ne balua kudi Nzambi wetu, bua kakuikadi kabidi kanyinganyinga pa mpala onsu wa buloba to.

3 Kadi monayi, ndi muntu, ne ndi ngenza bubi mu dijinga dianyi; bualu mvua ne tshia kusanka ne bintu bidi Mukalenga mumpesha.

4 Ntshivua ne bua kutatshisha mu majinga anyi mukenji mukamakana wa Nzambi mululama to, bualu ndi mumanya ne udi upesha bantu bilondeshila ku dijinga diabu, bikaladi bua lufu anyi bua moyo; eyowa, ndi mumanya ne udi upesha bantu, eyowa, udi welela bantu mikenji idi kayiyi ikudimuka to, bilondeshila ku disua diabu, bikaladi bua lupandu anyi bua dinyanguka.

5 Eyowa, ne ndi mumanya ne buimpa ne bubi bidi biluila bantu bonsu; ewu udi kayi mumanya dishilangana dia buimpa ku bubi to kena ne kadiu to; kadi kudi ewu udi mumanya bimpa ne bibi, Nzambi udi umupesha bilondeshila ku majinga enda, pikalaye musungula buimpa anyi bubi, moyo anyi lufu, disanka anyi nshiya mu meji.

6 Bualu ndi mumanya bintu ebi, bua tshinyi ndi njinga kupita kuenza mudimu umvua mubikidila?

7 Bua tshinyi ndi njinga ne ngikala muanjelu, bua mmona mua kuakula ne bantu ba ku ndekelu ya buloba yonsu?

8 Bualu monayi, Mukalenga udi wanyishila bisamba bionsu, bamua bantu ba mu tshisamba tshiabu ne muakulu wabu, ne balongesha dîyi dienda, eyowa, ne lungenyi, bionsu bidiye umona bikumbana bua bobu kupeta; bua nanku tudi tumona Mukalenga udi ulongesha ne lungenyi, bilondeshila ku tshidi tshiakana ne tshilelela.

9 Ndi mumanya tshidi Mukalenga mumpesha mukenji, ne ndimpesha butumbi mômu. Ntshiena nditumbisha buanyi nkayanyi to kadi ndimpesha butumbi mu tshidi Mukalenga mumpesha mukenji; eyowa, ne etshi ki butumbi buanyi, ne pamuapa bua ngikala tshiamu tshia mudimu mu bianza bia Nzambi bua kuluisha imua anyima ku dikudimuna dia mutshima; ne edi ki disanka dianyi.

10 Ne monayi, pandi mmona bana betu ba bungi bakudimuna mutshima bulelela, ne balua kudi Mukalenga Nzambi wabu, apu anyima wanyi udi muwula ntenta ne disanka; apu ndi mvuluka tshivua Mukalenga muenza bualu buanyi, eyowa, mena ne uvua muteleja disambila dianyi; eyowa, apu ndi mvuluka diboku dienda dia lusa diakangôluelaye.

11 Eyowa, ne ndi mvuluka kabidi bukuatshibu bua batatuanyi; bualu ndi mumanya bushuwa ne Mukalenga wakabapatuisha mu bupika, ne pa nanku wakashikika ekelezia wenda; eyowa, Mukalenga Nzambi, Nzambi wa Abalahama, Nzambi wa Isaka, ne Nzambi wa Yakoba, wakabapatuisha mu bupika.

12 Eyowa, ntu mvuluka diba dionsu bukuatshibu bua batatuanyi; ne yeya Nzambi wa umua awu wakabapatuisha mu bianza bia Bena Ejipitu awu wakabapatuisha mu bupika.

13 Eyowa, ne Nzambi umua awu wakashikika ekelezia wenda munkatshi muabu; eyowa, ne Nzambi umua awu udi mumbikila ku dibikidibua dia tshijila, bua kuyisha dîyi kudi bantu aba, ne udi mumpesha tshipeta tshimpa tshinena, mu tshinyi disanka dianyi didi diwula ntenta.

14 Kadi ntshiena nsanka amu bua tshipeta tshianyi tshimpa to, kadi disanka dianyi didi diwula ntenta kupita bua tshipeta tshimpa tshia bana betu, bavua babanda ku bulaba bua Nefi.

15 Monayi, bavua bakuata mudimu menamena, ne bavua bakuama bimuma bia bungi; ne bu muikaladi dinena difutu diabu!

16 Mpindiewu, pandi ngela meji a tshipeta tshimpa tshia bana betu aba nyuma wanyi udi uya kula, mena tô ne ku ditapulukangana dienda ne mubidi, ne bu muvuabi nanku, disanka dianyi divua dipita bunena.

17 Ne mpindiewu Nzambi anyishila bana betu aba, ne basomba mu bukalenga bua Nzambi; eyowa, ne kabidi bonsu badi bikala bimuma bia midimu yabu bua kabapatuki mu kabidi to, kadi ne bamusamuna bua kashidi. Ne Nzambi anyisha ne bienzeka bilondeshila ku mêyi anyi, mena bu mungambi. Amena.