1 Ne biakalua ne bakatekela bena lukanu ba ku Bena Lamana balami, ne bakabenzeja ku bukola bua kuya kujîka bafua babu, eyowa, ne bafua ba Bena Nefi kabidi bavuabu bashipa; ne Moloni wakabatekela bantu bua kubalama pavuabu bakuata midimu yabu.

2 Ne Moloni wakaya ku tshimenga tshia Muleke ne Lehi, ne wakangata bulombodi bua tshimenga ne wakabupesha kudi Lehi. Kadi monayi, Lehi ewu uvua muntu uvua muikala ne Moloni mu tshitupa tshinena tshia mvita yenda yonsu; ne uvua muntu uvua bu Moloni, ne muntu ne muntu uvua usanka bua bupola bua mukuenda; eyowa, bavua banangangana, ne bavua kabidi banangibua kudi bantu ba Nefi bonsu.

3 Ne biakalua ne pakajikija Bena Lamana kujîka bafua babu ne bafua ba Bena Nefi kabidi, bakabalukija ku bulaba bua Buvula; ne Teyankuma, ku mikenji wa Moloni, wakabenzeja ne batuadija kumbula tshina tshia munkoloji ku mpenga yonsu ya bulaba, anyi kua tshimenga, tshia Buvula.

4 Ne wakenzeja ne bibaka tshimanu tshia mikamba ku luseka lua munda mua tshina tshia munkoloji; ne bakela buloba bua mu tshina tshia munkoloji ku tshimanu tshia mikamba; ne bakenzeja Bena Lamana mudimu nanku tô ne pakanyungululabu tshimenga tshia Buvula ne tshimanu tshikola tshia mikamba ne buloba, tshia bula bupita.

5 Ne tshimenga etshi tshiakalua muaba mukolesha kupita kashidi; ne mu tshimenga etshi bakalamamu bena lukanu ba ku Bena Lamana; eyowa, mena munda mua tshimanu tshivuabu babenzeja bua kuibaka ne bianza biabu nkayabu. Mpindiewu Moloni wakenzeja Bena Lamana ku bukola bua kukuata mudimu, bualu bivua biteketa bua kubalama pavuabu bakuata mudimu; ne wakajinga kuikala ne basalayi benda bonsu pâbundaye Bena Lamana.

6 Ne biakalua ne Moloni uvua nanku mutshimuna umua wa misumba minena ya basalayi ya Bena Lamana, ne wakangata tshimenga tshia Muleke, tshivua tshikala umua wa miaba mipita kukolesha ya Bena Lamana mu bulaba bua Nefi; ne nanku uvua kabidi muibaka muaba mukolesha bua kulama bena lukanu benda.

7 Ne biakalua ne kakidikija kabidi mvita ne Bena Lamana mu tshidimu atshi to, kadi wakapesha bantu benda mudimu wa kudilongolola bua mvita, eyowa, ne bua kuibaka kua miaba mikolesha bua kudikuba ku Bena Lamana, eyowa, ne kabidi bua kupatuisha bakaji babu ne bana babu mu tshiyola ne mu lutatu, ne bua kupesha misumba yabu ya basalayi biakudia.

8 Ne mpindiewu biakalua ne pavua misumba ya basalayi ya Bena Lamana, ku sude kua mbuwa wa ku wesete, pavua Moloni kayiku to, dimua dilongolola disokoka munkatshi mua Bena Nefi, tshiakenzeja matapuluka munkatshi muabu, tshiakapeta muaba kudi Bena Nefi, eyowa, mu mushindu wa ne bakangata bungi kampanda bua bimenga biabu mu tshitupa tshia bulaba atshi.

9 Ne nanku bua malu mabi avua munkatshi muabu, eyowa, bua bualu bua matapuluka ne malongolola masokoka avua munkatshi muabu nkayabu bakedibua mu malu a njiwu mipita.

10 Ne mpindiewu monayi, ndi ne kakesa ka kuamba bitangila bantu ba Amona, bavua, ku mbangilu, bikala Bena Lamana; kadi ku njila wa Amona ne bana babu, anyi ku bukola ne ku dîyi dia Nzambi, bavua bakudimuna moyo kudi Mukalenga; ne bakabapuekesha ku bulaba bua Zalahemela, ne, katshia ku diba adi Bena Nefi bavua babakuba.

11 Ne kabavua bua kumbula biluilu bua kuluisha bana babu bua mutshipu wabu; bualu bavua bela mutshipu ne kabakumatshisha mashi kabidi nansha; ne bilondeshila ku mutshipu wabu bavua bua kufua; eyowa, bavua bua kudilekela bua kupona mu bianza bia bana babu, bu kabivua bua lusa ne dinanga dipita divua Amona ne bana babu bikala nadi buabu.

12 Ne bua bualu ebu bakabapuekesha ku bulaba bua Zalahemela; ne Bena Nefi bavua babakuba katshia ku diba adi.

13 Kadi biakalua ne pakamonabu njiwu, ne ntatu ya bungi ne mpaji ya bungi bivua Bena Nefi bambula buabu, bakanyungushibua ne moyo wa lusa ne bakajinga kuambula biluilu bua kusungidila ditunga diabu.

14 Kadi monayi, bu muvuabu pabuipi ne kuangata biluilu biabu bia mvita, bavua batambibua bukola kudi ditabuijija dia Helamana ne dia bana babu, bualu bavua pabuipi ne mutshipu uvuabu bela.

15 Ne Helamana wakatshina ne ku dienza dia nanku kabalu kujimija anyima yabu; bua nanku bonsu bavua babuela mu tshipungidi etshi bakenzejibua bua kumona bana babu bapututuka mu ntatu yabu, mu malu abu a njiwu avua abafikila mu tshikondu etshi.

16 Kadi monayi, biakalua ne bavua ne bana ba baluma ba bungi bavua kabayi babuela mu tshipungidi to ne kabakuangata biluilu bua mvita biabu bua kudisungidila kudi bena lukuna babu to; bua nanku bakadisangisha pamua diba adi, bonsu bavua ne bukola bua kuambula biluilu, ne bakadinyika ne Bena Nefi.

17 Ne babuela mu tshipungidi tshia kuluangana bua budishikaminyi bua Bena Nefi; eyowa, bua kukuba bulaba tô ne ku difila dia mioyo yabu; eyowa, bakenza tshipungidi mena ne kabakulekela budishikaminyi buabu nansha, kadi nebaluangana mu mishindu yonsu bua kukuba Bena Nefi ne bobu bina ku bupika.

18 Mpindiewu monayi, bansongaluma bakabuela mu tshipungidi etshi ne bakangata biluilu bia mvita biabu bua kusungidila ditunga diabu abu bavua binunu bibidi.

19 Ne mpindiewu monayi, bu muvuabu tô ne mpindiewu kabayi banji kuikala dikasa dibi bua Bena Nefi to, bakalua mpindiewu mu tshikondu etshi dikuatshisha dinena kabidi; bualu bakangata biluilu biabu bia mvita, ne bakasua ne Helamana ikala mulombodi wabu.

20 Ne bavua bonsu bansongaluma, ne bavua bikala ne bukitu menamena bua dikima, ne kabidi bua makanda abu ne bua dikuata diabu dia mudimu; kadi monayi, ebi kabivua bionsu to—bavua bantu bavua bikala ne butumikidi diba dionsu ku mudimu onsu uvuabu babapesha.

21 Eyowa, bavua bantu ba bulelela ne bushindama, bualu bavua babalongesha bua kulama mikenji ya Nzambi ne bua kuenda bôloloka kumpala kuenda.

22 Ne mpindiewu biakalua ne Helamana wakaya ku mutu kua bitenda bienda bia basalayi binunu bibidi, bua kukuatshisha bantu ba ku mikalu ya bulaba bua ku sude pabuipi ne ku mbuwa wa ku wesete.

23 Ne ki muakajika tshidimu tshia makumi abidi ne tshia muanda mukulu tshia dikôkesha dia balumbuluishi pa mutu pa bantu ba Nefi nanku.