1 Ne monayi, mpindiewu biakalua ne Bena Lamana abu bakafîka tshiji tshipita bualu bavua bashipa bana babu; bua nanku bakadishipa bua kudisombuela kudi Bena Nefi; ne kabakidikija kabidi bua kushipa bantu ba Anti-Nefi-Lehi diba adi to.

2 Kadi bakangata misumba yabu ya basalayi ne bakaya ku mikalu ya bulaba bua Zalahemela, ne bakabunda bantu bavua mu bulaba bua Amoniha ne bakababutula.

3 Ne kunyima kua abi, bakaluangana mvita ya bungi ne Bena Nefi, muakabanyemeshabu ne kubashipa.

4 Ne munkatshi mua Bena Lamana bakashipabu muvua pabuipi ne ndelanganyi yonsu ya Amulona ne wa bana babu, bavua bikala bakuidi ba Noa, ne Bena Nefi bakashipa ku bianza biabu;

5 Ne bavua bashala, kunyima kua kunyemabu mu tshipela tshia ku esete, ne kunyima kua kunyengabu Bena Lamana bukalenga ne bukôkeshi, bakafuisha Bena Lamana ba bungi ku kapia bua ditabuija diabu—

6 Bualu ba bungi babu, kunyima kua kupeta dijimija dia bantu ba bungi ne kumona ntatu ya bungi nanku, bakabanga kuikala basonsola ku divuluka dia mêyi akabayisha Alona ne bana babu mu bulaba buabu; bua nanku bakabanga kubenga kuitabuija ngikadilu ya batatuabu, ne kuitabuija Mukalenga, ne uvua mupesha Bena Nefi bukola bua bungi; ne nanku kuvua ba bungi babu bavua bakudimuna moyo mu tshipela.

7 Ne biakalua ne bakôkeshi abu bavua bikala tshishadi tshia ku bana ba Amulona, bakabashipesha, eyowa, bonsu bavua bitabuija malu â.

8 Mpindiewu dishipibua bua ditaba edi diakasonsola ba bungi ba ku bana babu ku tshiji; ne kuakabanga kuikala dikokangana mu tshipela; ne Bena Lamana bakabanga kuipatakaja ndelanganyi ya Amulona ne bana babu ne bakabanga kubashipa; ne bakabanga kunyema mu tshipela tshia ku esete.

9 Ne monayi Bena Lamana badi babipatakaja dituku edi. Nanku mêyi a Abinadi akavuijibua, akambaye bitangila ndelanganyi ya bakuidi bavua benza ne akenga lufu ku kapia.

10 Bualu wakabambila ne: Tshinuangenza netshikala tshifuanyikiji tshia bintu bilualua.

11 Ne mpindiewu Abinadi uvua wa kumpala wa kukenga lufu ku kapia bua ditabuija dienda dia Nzambi; mpindiewu ki tshivuaye musua kuamba etshi, ne ba bungi nebakenga lufu ku kapia, bilondeshila muakakengaye.

12 Ne wakambila bakuidi ba Noa ne ndelanganyi yabu neyenza ne ba bungi bashipishibua, mu mushindu umua uvuaye mushipishibua, ne nebatangalajibua kula ne nebashipibua, mena bu mudi mukoku udi kayi ne mulami wa mikoku to udi nyama ya muitu inyemesha ne ishipa; ne mpindiewu monayi, mêyi â akajadikibua, bualu Bena Lamana bakabanyemesha, ne bakabipatakaja, ne bakabatûta.

13 Ne biakalua ne pakamona Bena Lamana ne kabavua mua kutamba Bena Nefi bukola to, bakapingana kabidi bulaba buabu; ne ba bungi babu bakaya kusomba mu bulaba bua Yishemaela ne mu bulaba bua Nefi, ne bakadisangisha kudi bantu ba Nzambi, bavua bikala bantu ba Anti-Nefi-Lehi.

14 Ne bakajîka pabu biamu biluilu bia mvita, bilondeshila bu muakenza bana babu, ne bakabanga kuikala bantu bakana; ne bakenda mu njila ya Mukalenga, ne bakatangila bua kulama mikenji yenda ne mikandu yenda.

15 Eyowa, ne bakalama mikenji ya Mose; bualu bivua bikengedibua ne balama mikenji ya Mose bua mpindiewu, bualu kayivua mianji kukumbana to. Kadi nansha muvuaku mikenji ya Mose, bavua batangila ku dilua dia Kilisto, bikala bumvua ne mikenji ya Mose ivua mikala tshifuanyikiji tshia dilua dienda, ne bikala bitabuija ne bavua ne bua kulama midimu eyi ya pa mbelu tô ne tshikondu tshiabuluibuaye kudibu.

16 Mpindiewu kabakatshinka ne lupandu luvua luluila ku mikenji ya Mose to; kadi mikenji ya Mose yakakuatshisha bua kukolesha ditabuija diabu mu Kilisto; ne nanku bakashala ne ditekemena ku ditabuija, bua lupandu lua tshiendelela, ne bavua beyemena kudi nyuma wa buambi, wakakula bua bintu bitshilualua ebi.

17 Ne mpindiewu monayi, Amona, ne Alona, ne Omenele, ne Himini, ne bana babu bakasanka menamena, bua tshipeta tshimpa tshiakapetabu munkatshi mua Bena Lamana, pakamonabu ne Mukalenga wakabapesha bilondeshila ku masambila abu, ne wakabajadikila kabidi dîyi dienda mu tshitupa tshionsu.