Shapita 6
Badi basukula Ekelezia wa mu Zalahemela ne bamuteka mu njila mulongama—Alama udi uya kuyisha ku Gideona. Pabuipi ne 83 k.d.K.
1 Ne mpindiewu biakalua ne kunyima kua Alama mujikija kuakula kudi bantu ba mu ekelezia, uvua mushikikibua mu tshimenga tshia Zalahemela, wakajidila bakuidi ne bakulu, ku dibatenteka dia bianza bienda bilondeshila ku mulongu wa Nzambi, bua kusomba ku mutu ne kutangila ekelezia.
2 Ne bonsu bavua kabayi mu ekelezia to bavua bakudimuna mutshima ku mibi yabu bakatambuishibua dikudimuna dia mutshima, ne bakabakidila mu ekelezia.
3 Ne biakalua kabidi ne bonsu bavua mu ekelezia bavua kabayi bakudimuna mutshima ku bubi buabu to ne bavua kabayi badipuekesha kumpala kua Nzambi to—ndi musua kuamba ne bakadibandisha mu diditambisha mu mitshima yabu—bobu abu bakabipata, ne mêna abu akakupudibua, bua ne mêna abu ka’akabadibua munkatshi mua a bakana to.
4 Ne nanku bakabanga kushikika bulongolodi bua ekelezia mu tshimenga tshia Zalahemela.
5 Mpindiewu ndi musua ne numvua ne dîyi dia Nzambi divuaku bua bantu bonsu tshianana, ne muntu nansha umua kavua mubengela diakalengela dia kudisangisha pamua bua kuteleja dîyi dia Nzambi to.
6 Nansha nanku bana ba Nzambi bavua bapeshibua mukenji ne badikunguija pamua misangu mivula, ne badisangisha mu dijila ne disambila dia bukitu bua diakalengela dia anyima ya bavua kabayi bamanya Nzambi to.
7 Ne mpindiewu pakateka Alama mikandu eyi, wakabashiya, eyowa, wakashiya ekelezia uvua mu tshimenga tshia Zalahemela, ne wakasabuka ku esete kua musulu wa Sidona, kuyayi mu tshibanda tshia Gideona, muvua tshimenga tshiasa, tshivua tshibikidibua ne tshimenga tshia Gideona, tshivua mu tshibanda tshivua tshibikidibua ne Gideona, tshivua tshinyikila muntu uvua Neholo mushipa ku muela wa mvita ku tshianza tshienda.
8 Ne Alama wakaya ne wakabanga kuyisha dîyi dia Nzambi mu ekelezia uvuabu bashikika mu tshibanda tshia Gideona, bilondeshila ku dibuluila dia bulelela dia dîyi divua batatuenda bakula, ne bilondeshila ku nyuma wa buambi uvua muenda, bilondeshila ku bujadiki bua Yezu Kilisto, Muana wa Nzambi, walua kusungila bantu benda ku mibi yabu, ne ku mulongu wa tshijila kuvuaye mubikidibua. Ne nanku mmudibi bifundibua. Amena.