1 Ne mpindiewu biakalua ne mu ngondu wa dikumi ne umua wa tshidimu tshia dikumi ne tshitema, mu dituku dia dikumi dia ngondu, bakamona misumba ya basalayi ya Bena Lamana isemena mitangila ku bulaba bua Amoniha.

2 Ne monayi, tshimenga tshivua tshibakulula, ne Moloni uvua muteka musumba wa basalayi pabuipi ne mikalu ya tshimenga, ne bavua bashikika buloba ku mpenga yonsu bua kubakuba ku miketa ne mabua bia Bena Lamana; bualu monayi, bavua baluangana ne mabua ne ne miketa.

3 Monayi, ngakamba ne tshimenga tshia Amoniha tshivua tshibakuludibua. Ndi nnuambila ne, eyowa, tshivua tshîbakulula mu tshitupa tshimua; ne bualu Bena Lamana bavua batshibutula umua musangu bua bualu bua malu mabi a bantu, bavua batshinka ne bivua kulua kabidi biteketa buabu.

4 Kadi monayi, bu muvuadi dinena diteketa diabu dia maboku; bualu monayi, Bena Nefi bavua bashikika dibula dia buloba ku mpenga yabu yonsu, divua dikala dila bua Bena Lamana kabayi mua kukupa mabua abu ne miketa yabu kudibu, bua bibasa, anyi kabayi mua kubaluila amu pa kumbusha ku muaba wabu wa tshibuelelu.

5 Mpindiewu diba adi tupita tunena tua Bena Lamana tuakakema menamena, bua lungenyi lua Bena Nefi mu dilongolola dia miaba yabu ya bukubi.

6 Mpindiewu balombodi ba Bena Lamana bavua batshinka ne, bua bunena bua bungi buabu, eyowa, bavua batshinka ne bikala ne mushindu wa kubabunda bu muvuabu benza tô ne mpindiewu; eyowa, bavua kabidi badilongolola ne ngambu, ne ne bibuikilu bia pa tshiadi; ne bavua kabidi badilongolola ne bilamba bia biseba, eyowa, bilamba bia mupimbu menamena bua kujika butaka buabu.

7 Ne bualu bavua badilongolola nanku, bakatshinka ne nebatamba bana babu bukola ne nebababatshika ku tshikokedi tshia bupika biteketa, anyi bavua bua kubashipa ne kubashipeya bilondeshila ku dijinga diabu.

8 Kadi monayi, bakakema menamena, bualu bavua badilongolola buabu, mu mushindu uvua kawuyi muanji kumanyika munkatshi mua bana ba Lehi to. Mpindiewu bavua balongolola bua bua Bena Lamana, bua kuluangana ku mushindu wa mikenji ya Moloni.

9 Ne biakalua ne Bena Lamana, anyi Bena Amalikia, bakakema menamena bua mushindu wabu wa didilongolola bua mvita.

10 Mpindiewu, bu mfumu Amalikia mupatuka mu bulaba bua Nefi, ku mutu kua musumba wenda wa basalayi, pamuapa uvua bua kuenzeja Bena Lamana bua kubunda Bena Nefi mu tshimenga tshia Amoniha; bualu monayi, kabivua bimutatshisha bua dijimija dia mashi a bantu benda to.

11 Kadi monayi, Amalikia kakapueka yeya muina bua kuluangana to. Ne monayi, tupita tuenda tunena katuakakima bua kubunda Bena Nefi ku tshimenga tshia Amoniha to, bualu Moloni uvua mukudimuna bulombodi bua malu munkatshi mua Bena Nefi, mu mushindu wa ne Bena Lamana bakateketa maboku mu miaba yabu ya kunyemena ne kabavua mua kulua kubabunda to.

12 Bua nanku bakapingana mu tshipela, ne bakambula tshitudilu tshiabu ne bakaya batangila ku bulaba bua Noa, batshinka ne aku kuvua muaba muibidi muimpa bua kuluisha Bena Nefi.

13 Bualu kabavua bamanya ne Moloni uvua mukolesha, anyi uvua muibaka bisokomenu bia bukubi, bua tshimenga tshionsu ku mpenga ya bulaba yonsu; bua nanku, bakenda kumpala batangila ku bulaba bua Noa ne dipangadika dikamakana; eyowa, tupita tuabu tunena tuakasemena ne tuakela mutshipu ne nebabutula bantu ba mu tshimenga atshi.

14 Kadi monayi, bakakema ne, tshimenga tshia Noa, tshivua tshikala tô ne mpindiewu muaba muteketa, tshivua tshilua mpindiewu ne makanda, ku njila wa Moloni, eyowa, mena kupita makanda a tshimenga tshia Amoniha.

15 Ne mpindiewu, monayi, bivua bikala bimpa mu lungenyi lua Moloni; bualu uvua utshinka ne tshimenga tshia Amoniha tshivua bua kubumvuija bôwa; ne bu muvua tshimenga tshia Noa tshikala tô ne mpindiewu tshitupa tshipita kuteketa tshia mu bulaba, bua nanku bavua bua kuya koku bua kuluangana; ne bivua nanku bilondeshila ku majinga enda.

16 Ne monayi, Moloni uvua musungula Lehi bua kuikala kapita kanena ku mutu kua bantu ba mu tshimenga atshi; ne nyeye Lehi umua awu wakaluangana ne Bena Lamana mu tshibanda ku esete kua musulu wa Sidona.

17 Ne mpindiewu monayi biakalua ne, pakamona Bena Lamana ne Lehi uvua ulombola tshimenga bakateketa maboku kabidi, bualu bavua batshina Lehi menamena; nansha nanku tupita tuabu tunena tuakaditshipa ne mutshipu bua kubunda tshimenga; bua nanku, bakalua ne misumba yabu ya basalayi.

18 Mpindiewu monayi, Bena Lamana kabavua mua kubuela mu bisokomenu bia bukubi ku njila mukuabu to amu pa kumbusha ku tshibuelelu, bua bula bua dibula divuabu bela ne bua ndondu wa tshina tshia munkoloji tshivua tshiumbula ku mpenga yonsu, amu pa kumbusha ku tshibuelelu.

19 Ne nanku Bena Nefi bavua badilongolola bua kushipa bonsu bidikija kubanda bua kubuela mu muaba wa tshisokomenu ku njila mukuabu, ku dibashila mabua ne miketa kulu.

20 Bavua badilongolola nanku, eyowa, tshisumbu tshia bantu babu makanda mapita, ne miela yabu ya mvita ne bieledi biabu, bua kukuluisha panshi bonsu bidikija kubuela mu muaba wabu wa bukubi ku muaba wa tshibuelelu; ne bavua badilongolola nanku bua kudisungidila kudi Bena Lamana.

21 Ne biakalua ne tupita tua Bena Lamana tuakalua ne misumba yabu ya basalayi kumpala kua muaba wa tshibuelelu, ne bakabanga kukokangana ne Bena Nefi, bua kubuela mu muaba wabu wa bukubi; kadi monayi, bakabapingaja kunyima ku tshikondu ne tshikondu, mua ne bakabashipa ne dishibeya dia bungi.

22 Mpindiewu pakamonabu ne kabavua mua bukola pa mutu pa Bena Nefi ku mushiku wa mbelu to, bakabanga kumbula mabula abu a buloba bua kupetabu njila bua misumba yabu ya basalayi, bua bikala ne mushindu wa momumua bua kuluangana; kadi monayi, ku midikija â bakashibua kudi mabua ne miketa yakabakomba; ne pamutu pa kuwuja bina biabu bia minkoloji ku dishimbula dia mabula a buloba, mu mushindu mukuabu ne bafua babu ne bantu babu bavua batapika.

23 Nanku Bena Nefi bavua ne bukola bonsu pa mutu pa bena lukuna babu; ne nanku Bena Lamana bakidikija kubutula Bena Nefi tô ne pakashipibua tupita tunena tonsu tuabu; eyowa, ne bakashipa Bena Lamana bapita tshinunu tshimua; pavuaku, ku luseka lukuabu, kakuyi muntu nansha umua wa ku Bena Nefi uvuabu bashipa to.

24 Kuvua pabuipi ne bantu makumi atanu bavua batapika mputa, bavua bikala badilekelela ku miketa ya Bena Lamana ku mushiku wa mbelu, kadi bavua badibuikila ne ngambu yabu, ne bibuikilu biabu bia pa tshiadi, ne bifulu biabu bia mvita, mua ne mputa yabu ivua ku mikoku, ne ya bungi yayi ivua minena.

25 Ne biakalua ne, pakamona Bena Lamana ne bavua bashipa tupita tuabu tunena tonsu bakanyema mu tshipela. Ne biakalua ne bakapingana ku bulaba bua Nefi; bua kumanyisha mfumu wabu, Amalikia, uvua muikala Muena Nefi ku diledibua, bua dijimija diabu dinena.

26 Ne biakalua ne wakafîkila bantu benda tshiji menamena, bualu kavua mupeta dijinga dienda bitangila Bena Nefi to; kavua mubabatshika ku tshikokedi tshia bupika to.

27 Eyowa, wakafîka tshiji menamena, ne wakatshipa Nzambi, ne Moloni kabidi, uditshipa ne mutshipu ne neanua mashi enda; ne nanku bualu Moloni uvua ulama mikenji ya Nzambi ku didilongolola bua bukubi bua bantu benda.

28 Ne biakalua ne, ku luseka lukuabu, bantu ba Nefi bakasakidila Mukalenga Nzambi wabu, bua bualu bukola buenda budi kabuyi kufuanyikija to bua dibapatuisha mu bianza bia bena lukuna babu.

29 Ne tshidimu tshia dikumi ne tshitema tshia dikôkesha dia balumbuluishi ku mutu kua bantu ba Nefi tshiakajika nanku.

30 Eyowa, ne kuvua ditalala dia munanunanu munkatshi muabu, ne dilubuluka dinena menamena mu ekelezia bua ntema yabu ne dinanukila diabu bivuabu bafila ku dîyi dia Nzambi, divua Helamana, ne Shibulona, ne Koliantona, ne Amona ne bana babu babamanyisha, eyowa, ne bonsu bavua bajididibua ku mulongu wa tshijila wa Nzambi, ne bavua batambuishibua bua dikudimuna dia mutshima, ne batumibua bua kuyisha munkatshi mua bantu.