1 Ne kabidi, mema, Alama, bualu mvua mupeshibua mukenji kudi Nzambi ne ngangata Amuleke ne nya ne nyisha kabidi bantu aba, anyi bantu bavua mu tshimenga tshia Amoniha, biakalua ne pangakabanga kubayisha, bakabanga kukokangana nanyi, bamba ne:

2 Udi nganyi? Udi wela meji ne netuitabuija bujadiki bua muntu umua, nansha yeya mutuyisha ne buloba nebupita anyi?

3 Mpindiewu kabavua bumvua mêyi avuabu bamba to; bualu kabavua bamanya ne buloba nebupita to.

4 Ne bakamba kabidi ne: katuakuitabuija mêyi eba to, nansha wewa muamba ku Nyuma ne tshimenga tshinena etshi netshibutuka mu dituku dimua.

5 Mpindiewu kabavua bamanya ne Nzambi udi mua kuenza malu a dikema nanku awu to, bualu bavua bantu ba mitshima mipapa ne nshingu mîminyina.

6 Ne bakamba ne: Nzambi nganyi udi utuma mukôkeshi amu muntu umua munkatshi mua bantu aba, bua kubamanyisha bulelela bua bintu binena ne bia dikema bia nanku?

7 Ne bakasemena bua kuntuabu bianza; kadi monayi, kabakandenga to. Ne ngakimana ne dikima bua kubamanyisha, eyowa, ngakabajadikila ne dikima dikola, ngamba ne:

8 Monayi, Ô nuenu ba lukongu lua bantu lubi ne lunyanguka, bu munudi bapua moyo ngikadilu wa batatuenu; eyowa, bu munudi bapua moyo lukasa mikenji ya Nzambi.

9 Kanuena nuvuluka ne tshianza tshia Nzambi tshiakapatula tatuetu, Lehi, ku Yelushalema anyi? Kanuena nuvuluka ne wakabalombola bonsu mu tshipela anyi?

10 Ne nuapu moyo katataka misangu bungi kayi yakapatuishaye batatuetu mu bianza bia baluishi babu, ne uvua mubakuba ku dibutuka, mena ku bianza bia bana babu nkayabu?

11 Eyowa, ne bu kabivua bua bukola buenda budi kabuyi kufuanyikija, ne lusa luenda, ne bulekelelu buenda kutudi to, tuvua tukoshibua kakuyi diepuka pa mpala wa buloba mutantshi mula kumpala kua tshikondu etshi, ne pamuapa tupîshibua ku ngikadilu wa dikenga ne diakabi kadiyi ndekelu.

12 Monayi, mpindiewu ndi nnuambila udi unupesha mukenji bua kukudimuna mutshima; ne pa kumbusha nuenu bakudimuna mutshima, kanuena mua kupiana bukalenga bua Nzambi to nansha bishi. Kadi monayi, ebi ki mbionsu to—udi unupesha mukenji bua kukudimuna mutshima, anyi neanubutula bonsu pa mpala wa buloba; eyowa, neanukumbula mu tshiji tshienda, ne mu tshiji tshienda tshikola kakukudimuka to.

13 Monayi, kanuena nuvuluka mêyi avuaye muambila Lehi, wamba ne: Monsu munualama mikenji yanyi, nenulubuluka mu bulaba anyi? Ne kabidi, bidi biambibua ne: Monsu munuapanga kulama mikenji yanyi nenukoshibua ku mpala kua Mukalenga.

14 Mpindiewu ndi musua ne nuvuluka ne, monsu mudi Bena Lamana bapanga kulama mikenji ya Nzambi to, badi bakoshibua ku mpala kua Mukalenga. Mpindiewu tudi tumona ne dîyi dia Mukalenga divua dijadikibua mu bualu ebu, ne Bena Lamana badi bakoshibua kumpala kuenda, kumbukila ku mbangilu wa disambuka dia mikenji diabu mu bulaba.

15 Nansha nanku ndi nnuambila ne, mu dituku dia tshilumbuluilu nebikala biakana bua Bena Lamana kupita bualu buenu, bu nuenu bashala mu mibi yenu, eyowa, ne mena biakana bualu buabu pa buloba ebu kunupita, pa kumbusha nuenu bakudimuna mutshima.

16 Bualu kudi malaya a bungi adi mafidibua kudi Bena Lamana; bualu mbashala mu ngikadilu wabu wa dipanga bua ngikadilu ya batatuabu; bua nanku Mukalenga neikala ne lusa kudibu ne nealepesha matuku abu mu bulaba.

17 Ne mu tshinga tshikondu nebatuadibua ku ditabuija dîyi dienda, ne ku dimanya ne ngikadilu ya batatuabu kayena miakana to; ne ba bungi babu nebapandishibua, bualu Mukalenga neikala ne lusa kudi bonsu badi babikila dîna dienda.

18 Kadi monayi, ndi nnuambila ne bu nuenu mua kutungunuka ne bubi buenu matuku enu ka akulepeshibua mu bulaba to, bualu Mukalenga neanutumina Bena Lamana; ne nuenu kanuyi bakudimuna mutshima to nebalua diba dinudi kanuyi bamanya to, ne nenukumbudibua ne dibutuka dijima; ne nebikala bilondeshila ku tshiji tshikola tshia Mukalenga.

19 Bualu kakunulekela ne nuikala ne moyo mu malu mabi enu, bua kubutula bantu benda to. Ndi nnuambila ne, To; bimpa alekela ne Bena Lamana babutula bantu benda bonsu badibu babikila ne bantu ba Nefi, bu biobi mua kuikala ne bavua mua kupona mu mibi ne disambuka dia mikenji, kunyima kua bobu bamana kupeta bukenka bua bungi ne dimanya divula bikola kudi Mukalenga Nzambi wabu;

20 Eyowa, kunyima kua kuikala bantu basuibua bikola kudi Mukalenga; eyowa kunyima kua kuikala basuibua kupita tshisamba tshikuabu tshionsu, tshisa tshikuabu tshionsu, muakulu mukuabu onsu, anyi bantu bukuabu bonsu; kunyima kua Mukalenga mumana kubamanyisha bintu bionsu, bilondeshila ku majinga abu, ne ditabuija diabu, ne masambila abu, bitangila bivuaku, ne bidiku, ne bitshilualua;

21 Bamana kukumbudibua kudi Nyuma wa Nzambi; bamana kuyukila ne banjelu, ne bamana kuambidibua kudi dîyi dia Mukalenga; ne bamana kuikala ne nyuma wa buambi, ne nyuma wa dibuluila, ne mapa a bungi kabidi, dipa dia kuakula miakulu, ne dipa dia kuyisha, ne dipa dia Nyuma wa Tshijila, ne dipa dia diandamuna miaku;

22 Eyowa, ne kunyima kua kupatuishibua kudi Nzambi mu bulaba bua Yelushalema, ku tshianza tshia Mukalenga; bamana kupandishibua ku tshiyola, ne ku bubêdi, ne ku mishindu yonsu ya mabêdi a ngikadilu yonsu; ne bakolakana mu mvita, bua kababutuki to; ne bamana kupatudibua mu bupika ku misangu ne ku misangu, ne bamana kulamibua ne kukubibua tô ne mpindiewu; ne bavua balubuludibua tô ne padibu babanji mu mishindu yonsu ya bintu—

23 Ne mpindiewu monayi ndi nnuambila ne, bantu aba, bavua bapeta mabenesha a bungi ku tshianza tshia Mukalenga, bu bobu bua kusambuka mikenji bishilangana ne bukenka ne dimanya didibu nadi, ndi nnuambila ne bikalabi nanku, ne biaponabu mu disambuka dia mikenji, bidi ne mua kuikala bimpa bua Bena Lamana kupita buabu.

24 Bualu monayi, malaya a Mukalenga adi mafidibua kudi Bena Lamana, kadi kayena buenu to panudi nusambuka mikenji; bualu Mukalenga kavua mulaya patoka ne muedibua mukenji ne dikamakana ne, panuikala bamutombokela nenubutuka bonsu pa mpala wa buloba anyi?

25 Ne mpindiewu bua bualu ebu, bua kanubutuki to, Mukalenga udi mutuma muanjelu wenda bua kukumbula ba bungi ba ku bantu benda, ubamanyisha ne badi ne tshia kuya ne kubila ne bukitu kudi bantu aba, bamba ne: Kudimunayi mutshima, bualu bukalenga bua mu diûlu bukadi pabuipi;

26 Ne matuku a bungi ka akupita to Muana wa Nzambi nealua mu butumbi buenda; ne butumbi buenda nebuikala butumbi bua Umuepela Mulela wa Tatu, udi muwula ne ngâsa, bujalama, ne bulelela, udi muwula ne ditukija, lusa, ne bulekelelu, ne udi lukasa bua kumvua mbila ya bantu benda ne kuandamuna masambila abu.

27 Ne monayi, udi ulua kusungila bavua batambuishibua bua dikudimuna dia mitshima, ku ditabuija mu dîna dienda.

28 Bua nanku, longololayi njila wa Mukalenga, bualu diba didi pabuipi diapeta bantu bonsu tshipeta tshia midimu yabu, bilondeshila muvuayi; pikalaye ne ivua miakana nebapeta lupandu lua anyima yabu, bilondeshila ku bukola ne dipatuisha bia Yezu Kilisto; ne pikalaye ne ivua mibi, ne nebapeta dipîshibua dia anyima yabu, bilondeshila ku bukola ne dikuatangana dia ku bupika dia diabulu.

29 Mpindiewu monayi, edi didi dia muanjelu, udi ubila kudi bantu.

30 Ne mpindiewu, bana betu bananga, bualu nudi bana betu, ne nudi ne tshia kunangibua, ne nudi ne tshia kuenza midimu idi ileja dikudimuna dia mutshima wenu, bualu nuvua bapapishila dîyi dia Nzambi mitshima yenu, ne bualu nudi bantu bajimina ne bapona.

31 Mpindiewu biakalua ne, mema, Alama, pangakamba mêyi â, monayi, bantu bakamfîkila tshiji bualu ngakabambila ne bavua bantu ba mitshima mipapa ne nshingu mîminyina.

32 Ne kabidi bakamfîkila tshiji, ne bakakeba bua nkutuabu bianza biabu, bua kungelabu mu buloko bualu ngakabambila ne bavua bantu bapona ne bajimina.

33 Kadi biakalua ne Mukalenga kakalekela ne bangangata mu diba adi ne bangela mu buloko to.

34 Ne biakalua ne Amuleke wakasemena kumpala, ne wakabanga kubayisha kabidi. Ne mpindiewu mêyi a Amuleke ka’ena mafunda onsu to, nansha nanku tshitupa tshia mêyi enda tshidi tshifunda mu mukanda ewu.