1 Ne mpindiewu, biakalua ne mu tshidimu tshia makumi abidi ne tshisambombo tshia dikôkesha dia balumbuluishi pa mutu pa bantu ba Nefi, monayi, pakabika Bena Lamana mu dinda dia kumpala dia ngondu wa kumpala, monayi, bakasangana Amalikia mufua mu ntenta wenda nkayenda; ne bakamona kabidi ne Teyankuma uvua mudilongolola bua kubela mvita dituku adi.

2 Ne mpindiewu, pakamona Bena Lamana nanku bakumvua bôwa bikola; ne bakalekela dijinga diabu dia kuya ku bulaba buvua ku node, ne bakapingana ne musumba wabu wa basalayi onsu ku tshimenga tshia Muleke, ne bakadikuba munda mua miaba yabu mikolesha.

3 Ne biakalua ne muanabu ne Amalikia wa baluma wakasungudibua mfumu ku mutu kua bantu; ne dîna dienda divua Amolona; nanku mfumu Amolona, muanabu ne mfumu Amalikia wa baluma, uvua musungudibua bua kukôkesha pa muaba wenda.

4 Ne biakalua ne wakela mukenji ne bantu benda bakuba bimenga abi, bivuabu banyenga ku dimatshisha dia mashi; bualu kabavua banyenga tshimenga nansha tshimua to amu pa kumbusha pakajimijabu mashi a bungi.

5 Ne mpindiewu, Teyankuma wakamona Bena Lamana bavua bapangadika bua kukuba bimenga bivuabu banyenga abi, ne bitupa bia bulaba bivuabu bangata; ne kabidi pakamonaye bunena bua bungi buabu, Teyankuma wakela meji ne kabivua bikengedibua ne idikija bua kubabundila mu bisokomenu biabu to.

6 Kadi wakalama bantu benda mu miaba yabu, bu ne bavua badilongolola ku mvita; eyowa, ne bulelela uvua udilongolola bua kudisungila kudibu, ku diela dia bimanu ku mpenga yonsu ya bimenga biabu, ne ku dilongolola dia miaba ya tshinyemenu.

7 Ne biakalua ne wakatungunuka nanku udilongolola bua mvita tô ne pakatuma Moloni bungi bunena bua bantu bua kupesha musumba wenda wa basalayi makanda.

8 Ne Moloni wakamutumina kabidi dîyi bua alama bena lukanu bonsu bavua bapona mu bianza bienda; bualu bu muvua Bena Lamana bakuata bena lukanu ba bungi; ne uvua ne bua kulama bena lukanu ba Bena Lamana bu mudi tshia busungidi bua bavua Bena Lamana bakuata.

9 Ne wakamutumina kabidi dîyi ne akolesha bulaba bua Buvula, ne alama kajila kabumbakana kavua kalombola ku bulaba bua ku node, bua Bena Lamana kabalu kuangata muaba awu ne kabalu kupeta bukola bua kubabambakajila ku luseka lonsu.

10 Ne Moloni wakamutumina kabidi dîyi, ujinga ne ikala ne lulamatu mu dikuba tshitupa tshia bulaba atshi ne bua akeba njila yonsu wa kunyasula Bena Lamana mu tshitupa atshi, diba dionsu divuabi ku bukola buenda, bua pamuapa anyenga kabidi bimenga bivua Bena Lamana banyenga mu bianza biabu, ku bulongolodi buenda anyi ku mushindu mukuabu; ne bua akolesha kabidi bimenga bivua kabiyi bipona mu bianza bia Bena Lamana, ku mpenga yonsu ne abipesha makanda.

11 Ne wakamuambila kabidi ne, Ndi musua kulua kûdi, kadi mona, Bena Lamana badi batubunda ku mikalu ya bulaba bua pabuipi ne mbuwa wa ku wesete; ne mona, ndi nya kubaluisha, bua nanku ntshiena mua kulua kûdi to.

12 Mpindiewu, mfumu (Amolona) uvua mumbuka ku bulaba bua Zalahemela, ne uvua mumanyisha mukaji wa mfumu bitangila lufu lua muanabu wa baluma, ne uvua musangisha bungi bunena bua bantu, ne uvua muya kuluisha Bena Nefi ku mikalu ya pabuipi ne mbuwa wa wesete.

13 Ne uvua ukeba bua kubambakaja Bena Nefi, ne bua kukoka tshitupa tshia bisumbu bia basalayi biabu ku tshitupa tshia bulaba atshi, pavuaye mupesha mukenji kudi bavuaye mushiya bua kusomba mu bimenga bivuaye muangata, ne babambakaja kabidi Bena Nefi ku mikalu ya pabuipi ne mbuwa wa esete, ne bangata malaba abu misangu yonsu ivuabi ku bukôkeshi buabu, bilondeshila ku bukola bua misumba yabu ya basalayi.

14 Ne Bena Nefi bavua nanku mu mushindu wa njiwu awu ku nshikidilu kua tshidimu tshia makumi abidi ne tshisambombo tshia dikôkesha dia balumbuluishi pa mutu pa bantu ba Nefi.

15 Kadi monayi, biakalua ne mu tshidimu tshia makumi abidi ne tshia muanda muteketa tshia dikôkesha dia balumbuluishi, ne Teyankuma, ku mukenji wa Moloni—uvua mushikika misumba ya basalayi bua kukuba mikalu ya ku sude ne ya ku wesete ya bulaba, ne uvua mubanga kuya mutangila ku bulaba bua Buvula, bua ambuluisha Teyankuma ne bantu benda bua bangatulula bimenga bivuabu bajimija—

16 Ne biakalua ne Teyankuma uvua mupeta mukenji bua kubunda tshimenga tshia Muleke, ne kutshiangatulula, bu biobi bua kukumbana.

17 Ne biakalua ne Teyankuma wakadilongolola bua kubunda tshimenga tshia Muleke, ne wakaya kubunda Bena Lamana ne musumba wenda wa basalayi; kadi wakamona ne kabivua bikumbana ne uvua mua kubatamba bukola pavuabu mu miaba yabu mikolesha to; bua nanku wakalekela majinga enda ne wakapingana ku tshimenga tshia Buvula, bua kuindila dilua dia Moloni, bua kupetaye makanda bua musumba wenda wa basalayi.

18 Ne biakalua ne Moloni wakafika ne musumba wenda wa basalayi ku bulaba bua Buvula, ku nshikidilu kua tshidimu tshia makumi abidi ne tshia muanda muteketa tshia dikôkesha dia balumbuluishi pa mutu pa bantu ba Nefi.

19 Ne ku ntuadijilu wa tshidimu tshia makumi abidi ne tshia muanda mukulu, Moloni ne Teyankuma ne tupita tunena tua bungi tuakenza tshipangu tshia mvita—bua kumanya tshivuabu ne bua kuenza bua kuenzeja Bena Lamana bua kulua kubaluisha; anyi bua bapeta mushindu wa kubabomba bua bapatuka ku miaba yabu mikolesha, bua ne bamona mua kubatamba bukola ne kuangata kabidi tshimenga tshia Muleke.

20 Ne biakalua ne bakatuma bantu kudi musumba wa basalayi wa Bena Lamana, uvua ukuba tshimenga tshia Muleke, kudi mulombodi wabu, muena dîna dia Yakoba, ne apatuka ne misumba yenda ya basalayi bua kusambakena nabu mu mpata ya pankatshi pa bimenga bibidi. Kadi monayi, Yakoba, uvua muikala Muena Zolama, wakabenga kupatuka ne musumba wenda wa basalayi bua kusambakena nabu mu mpata.

21 Ne biakalua ne Moloni, bualu kavua ne ditekemena nansha dimua dia kusambakena nabu mu mulongu umua, bua nanku, wakashikika dilongolola bua kulobeshaye Bena Lamana bua kubapatuisha mu miaba yabu mikolesha.

22 Bua nanku wakenzeja ne Teyankuma angata bungi bukesa bua bantu ne apueka pabuipi ne ku muelelu wa mbuwa; ne Moloni ne musumba wenda wa basalayi bakaya mu tshipela, butuku, ku wesete kua tshimenga tshia Muleke; ne nanku pakatshiabu, pakamona balami ba Bena Lamana Teyankuma, bakanyema ne bakabuambila Yakoba, mulombodi wabu.

23 Ne biakalua ne misumba ya basalayi ya Bena Lamana yakaya kuluisha Teyankuma, itshinka bua kutamba Teyankuma bukola bua bualu bua bukesa bua bungi buenda. Ne pakamona Teyankuma misumba ya basalayi ya Bena Lamana ilua kumuluisha, wakabanga kupingana kuinshi pabuipi ne ku muelelu wa mbuwa, ku node.

24 Ne biakalua ne pakamona Bena Lamana wakabanga kunyema, bakapeta dikima ne bakabalondakaja ne bukola. Ne pavua Teyankuma upambuisha Bena Lamana bavua bamulondakaja tshianana nanku, monayi, Moloni wakapesha tshitupa tshia musumba wenda wa basalayi tshivua nenda mukenji bua tshiya ku tshimenga, ne tshitshiangata.

25 Ne bakenza nanku, ne bakashipa bonsu bavuabu bashiya bua kukuba tshimenga abu, eyowa, bonsu bavua babenga kufila biluilu biabu bia mvita.

26 Ne nanku Moloni wakangata tshimenga tshia Muleke ne tshitupa tshia musumba wenda wa basalayi, pavuaye uya ne tshishadi tshiawu bua kusambakena ne Bena Lamana pâpinganabu ku dilondakaja dia Teyankuma.

27 Ne biakalua ne Bena Lamana bakalondakaja Teyankuma tô ne pakaluabu pabuipi ne tshimenga tshia Buvula, ne pashisha bakasambakena ne Lehi ne musumba mukesa wa basalayi, uvuabu bashiya bua kukuba tshimenga tshia Buvula.

28 Ne mpindiewu monayi, pakamona tupita tunena tua Bena Lamana Lehi ulua kubabunda ne musumba wenda wa basalayi, bakanyema ne disalu dikola, bua kabalu pamuapa kuangata tshimenga tshia Muleke kumpala kua Lehi kubakuata; bualu bavua batshioka bua luendu luabu, ne bantu ba Lehi bavua ne bukola.

29 Mpindiewu Bena Lamana kabavua bamanya ne Moloni uvua panyima pabu ne musumba wenda wa basalayi to; ne bonsu bavuabu batshina bavua amu Lehi ne bantu benda.

30 Mpindiewu Lehi kavua ujinga bua kubakuata kumpala kua bobu kusambakena ne Moloni ne musumba wenda wa basalayi to.

31 Ne biakalua ne kumpala kua Bena Lamana kupinganabu panyima kula bakabanyungulula kudi Bena Nefi, kudi bantu ba Moloni ku diboku dimua ne kudi bantu ba Lehi ku dikuabu, bavua bonsu bikala ne bukola ne buwula ntenta ne makanda; kadi Bena Lamana bavua batshioka bua luendu luabu lula.

32 Ne Moloni wakapesha bantu benda mukenji bua badiela kudibu tô ne pavuabu bafila biluilu biabu bia mvita.

33 Ne biakalua ne Yakoba, uvua muikala mulombodi wabu, bualu uvua kabidi Muena Zolama, ne uvua ne nyuma uvua kayi bua kutshimunyibua to, wakalombola Bena Lamana bua kuluangana ne tshiji tshikola kudi Moloni.

34 Bualu Moloni uvua muikala mu njila wabu uvuabu bikala bapitshila, bua nanku Yakoba wakapangadika bua kubashipa ne kumpanda njila wenda munkatshi mua tshimenga tshia Muleke. Kadi monayi, Moloni ne bantu benda bavua ne bukola bupita bungi; bua nanku kabakapingana panyima kumpala kua Bena Lamana to.

35 Ne biakalua ne bakaluangana ku maboku onsu abidi ne tshiji tshikola; ne ba bungi bakashipabu ku nseka yonsu ibidi; eyowa, ne Moloni wakatapika mputa ne bakashipa Yakoba.

36 Ne Lehi wakenza mbamba panyima pa Bena Lamana ne tshikola ne bantu benda ba makanda, ki bua tshinyi Bena Lamana bavua panyima bakafila biluilu biabu bia mvita; ne bashadila babu, bualu bavua babuelakana bikola mu meji, kabakamanya kua kuya anyi kua kukuma to.

37 Mpindiewu pakamona Moloni dibuelakana diabu dia meji, wakabambila ne: Nuenu batuala biluilu bienu bia mvita ne babifila, monayi netulekela dimatshisha dia mashi enu.

38 Ne biakalua ne pakumvua Bena Lamana mêyi â, tupita tuabu tunena, tonsu tuvuabu kabayi bashipa to, tuakalua ne tuakimansha biluilu biatu bia mvita panshi ku makasa a Moloni, ne tuakapesha kabidi bantu batu mukenji ne benza bia momumua.

39 Kadi monayi, kuvua ba bungi bavua babenga; ne bakakuata ne bakasuika aba bavua bakabenga kufila miela yabu ya mvita, ne bakabanyenga biluilu biabu bia mvita, ne bakabenzeja ku bukola bua kuya ne bana babu ku bulaba bua Buvula.

40 Ne mpindiewu bungi bua bena lukanu bavuabu bakuata buvua bupita bungi bua bavuabu bashipa, eyowa, bupita bua bavuabu bashipa ku nseka yonsu ibidi.