1 Ne mpindiewu biakalua ne bana ba baluma ba Alama bakaya munkatshi mua bantu, bua kubamanyisha dîyi. Ne Alama, yeya muina, kavua mua kuikisha to, ne wakaya kabidi penda.

2 Mpindiewu katuakuamba kabidi bia bungi bitangila diyisha diabu to, pa kumbusha ne bakayisha dîyi, ne bulelela, bilondeshila ku nyuma wa buambi ne wa dibuluila; ne bakayisha bilondeshila ku mulongu wa tshijila wa Nzambi kuvuabu babikidibua.

3 Ne mpindiewu ndi mpingana ku mulubu wa mvita pankatshi pa Bena Nefi ne Bena Lamana, mu tshidimu tshia dikumi ne muanda mukulu tshia dikôkesha dia balumbuluishi.

4 Bualu monayi, biakalua ne Bena Zolama bakalua Bena Lamana; bua nanku, ku ntuadijilu wa tshidimu tshia dikumi ne muanda mukulu bantu ba Bena Nefi bakamona ne Bena Lamana bavua balua kubaluisha; bua nanku bakadilongolola bua mvita; eyowa, bakasangisha misumba yabu ya basalayi pamua mu bulaba bua Yeleshona.

5 Ne biakalua ne Bena Lamana bakalua ne binunu biabu; ne bakalua mu bulaba bua Antionuma, budi buikala bulaba bua Bena Zolama; ne muntu wa dîna dia Zelahemena uvua mulombodi wabu.

6 Ne mpindiewu, bu muvua Bena Amaleki bikala ngikadilu mupita bubi ne wa dishipa dia bantu kupita muvua Bena Lamana bikala, munkatshi muabu ne kudibu nkayabu, Zelahemena wakateka tupita tunena ku mutu kua Bena Lamana, ne bavua bonsu Bena Amaleki ne Bena Zolama.

7 Mpindiewu wakenza nanku bua akuba lukinu luabu kudi Bena Nefi, bua ababueja mu bubatshika bua kukumbaja majinga enda.

8 Bualu monayi, majinga enda avua a kusonsola Bena Lamana ku tshiji kudi Bena Nefi; wakenza nanku bua apeta bukôkeshi bua bungi ku bukola pa mutu pabu, ne bua apeta kabidi bukôkeshi pa mutu pa Bena Nefi ku dibaluisha mu bupika.

9 Ne mpindiewu dijinga dia Bena Nefi dia kulama malaba abu, ne nzubu yabu, ne bakaji babu, ne bana babu, bua babakuba ku bianza bia bena lukuna babu; ne kabidi bua bakuba manema abu ne diakalengela diabu, eyowa, ne kabidi budishikaminyi buabu, bua batendelela Nzambi wabu bilondeshila ku majinga abu.

10 Bualu bavua bamanya ne biaponabu mu bianza bia Bena Lamana, ne ewu yonsu watendelela Nzambi mu nyuma ne mu bulelela, Nzambi mulelela ne udi ne moyo, Bena Lamana bavua bamushipa.

11 Eyowa, ne bavua kabidi bamanya lukinu lupita lua Bena Lamana kudi bana babu, bavua bikala bantu ba Anti-Nefi-Lehi, bavua babikidibua ne bantu Amona—ne bakabenga kuambula biluilu, eyowa, bavua babuela mu tshipungidi ne bakabenga kutshishipa—bua nanku, biaponabu mu bianza bia Bena Lamana, nebashipibua.

12 Ne Bena Nefi kabakalekela ne bashipibua to; bua nanku bakabapesha malaba a bupianyi buabu.

13 Ne bantu ba Amona bakapesha Bena Nefi tshipesa tshinena tshia bintu biabu bua kukuatshisha misumba yabu ya basalayi; ne bakenzeja Bena Nefi nkayabu nanku bua kukandamenabu Bena Lamana, bavua badisangisha ne Lamana ne Lemuele, ne bana ba baluma ba Yishemaela, ne bonsu bavua batapuluka ku Bena Nefi, bavua bikala Bena Amaleki ne Bena Zolama, ne tunkanunuina tua bakuidi ba Noa.

14 Mpindiewu tunkanunuina atu tuvua tua bungi pabuipi ne muvua Bena Nefi; ne nanku Bena Nefi bavua ne tshia kukokangana ne bana babu, mena tô ne ku dimatshisha dia mashi.

15 Ne biakalua ne bu muvua misumba ya basalayi ya Bena Lamana midisangisha pamua mu bulaba bua Antionuma, monayi, misumba ya basalayi ya Bena Nefi ivua midilongolola bua kusambakena nabu mu bulaba bua Yeleshona.

16 Mpindiewu, mulombodi wa Bena Nefi, anyi muntu uvua musungudibua bua kuikala kapita kanena ka Bena Nefi—mpindiewu kapita kanena kakangata bulombodi bua misumba yonsu ya basalayi ya Bena Nefi—ne dîna dienda divua Moloni;

17 Ne Moloni wakangata bulombodi bonsu, ne buludiki bua mvita yabu. Ne uvuamu ne bidimu makumi abidi ne bitanu pakasungudibuaye kapita kanena ka misumba ya basalayi ya Bena Nefi.

18 Ne biakalua ne wakasambakena ne misumba ya basalayi ya Bena Lamana mu mikalu ya Yeleshona, ne bantu benda bavua bayibua ne miela ya mvita, ne ne tuela tua mvita, ne ne mishindu yonsu ya biluilu bia mvita.

19 Ne pakamona misumba ya basalayi ya Bena Lamana ne bantu ba Nefi bavua balongolola, anyi ne Moloni uvua mulongolola bantu benda ne bibuikilu bia pa tshiadi, ne ne ngabu ya pa maboku, eyowa, ne ngabu bua kusungidila mitu yabu, ne bavua kabidi bavuala bilamba bia mupimbu—

20 Mpindiewu musumba wa basalayi wa Zelahemena kawuvua mudilongolola ne tshintu nansha tshimua tshia nanku to; bavua amu ne miela yabu ya mvita, ne tuela tuabu tua mvita, mata abu ne miketa yabu, mabua abu ne bieledi biabu; ne bavua butaka, amu pa kumbusha tshiseba tshivua tshijingila ku bimonu biabu; eyowa, bonsu bavua butaka, amu pa kumbusha Bena Zolama ne Bena Amaleki;

21 Kadi kabavua bapayibua ne bibuikilu bia pa tshiadi, anyi ngabu to—bua nanku, bakatshina misumba ya basalayi ya Bena Nefi menamena bua bualu bua biluilu biabu bia mvita, nansha muvua bungi buabu buikala bunena kupita bua Bena Nefi.

22 Monayi, mpindiewu biakalua ne kabakakima kulua kuluisha Bena Nefi mu mikalu ya Yeleshona to; bua nanku bakumbuka ku bulaba bua Antionuma, bakaya mu tshipela, ne bakanyunguluka ne kuasa luendu luabu mu tshipela, kula pabuipi ne mpokolo wa musulu wa Sidona, bua babuela mu bulaba bua Manti ne bangata bulaba; bualu kabakatshinka ne misumba ya basalayi ya Moloni ivua bua kumanya kuvuabu baya to.

23 Kadi biakalua ne katataka pakayabu mu tshipela Moloni wakatuma batentekedi mu tshipela bua kutentekela tshitudilu tshiabu; ne Moloni, kabidi, bualu uvua mumanya mambi a Alama, wakatuma bamua bantu kudiye, ujinga ne ebeja kudi Mukalenga kunyi kuvua misumba ya basalayi ya bena Nefi ne bua kuya bua kudisungidila kudi Bena Lamana.

24 Ne biakalua ne dîyi dia Mukalenga diakalua kudi Alama, ne Alama wakamanyisha batumibua ba Moloni ne, misumba ya basalayi ya Bena Lamana yakanyunguluka ne kuyila mu tshipela, bua balua ku bulaba bua Manti, bua batuadija kubunda tshitupa tshiteketa bikola tshia bantu. Ne batumibua abu bakaya ne bakafikisha mukenji kudi Moloni.

25 Mpindiewu Moloni, bualu uvua mushiya tshitupa tshia musumba wenda wa basalayi ku bulaba bua Yeleshona, bua mu mushindu mukuabu tshitupa tshia Bena Lamana katshilu kubuela mu bulaba ne bangata tshimenga, wakangata tshitupa tshia musumba wenda wa basalayi tshivua tshishala ne wakaya ku bulaba bua Manti.

26 Ne wakenza ne bantu bonsu mu tshitupa tshia bulaba atshi badisangisha pamua bua kuluangana ne Bena Lamana, bua kusungidila malaba abu ne ditunga diabu, manema abu ne budikadidi buabu; bua nanku bavua badilongolola bua diba dia dilua dia Bena Lamana.

27 Ne biakalua ne Moloni wakasokokesha musumba wenda wa basalayi mu tshibanda tshivua pabuipi ne ku muelelu wa musulu wa Sidona, tshivua mu tshipela ku wesete wa musulu wa Sidona.

28 Ne Moloni wakateka batentekedi ku mpenga yonsu, bua amanya pâlua tshitudilu tshia Bena Lamana.

29 Ne mpindiewu, bu muakamanya Moloni dijinga dia Bena Lamana, ne divua dijinga dia kubutula bana babu, anyi dia kubabatshika ne kubabueja mu bupika bua bashikika bukalenga buabu nkayabu pa bulaba bonsu;

30 Ne bualu uvua kabidi ne tshivua amu dijinga dimua dia Bena Nefi dia kukuba malaba abu, ne budishikaminyi buabu, ne ekelezia wabu, bua nanku kakela meji ne katshivua bubi to ne abasungidila ku bulongolodi; bua nanku, ku diambuluisha dia batentekedi benda wakajandula njila uvua Bena Lamana ne bua kuangata.

31 Bua nanku, wakâbanya musumba wenda wa basalayi ne wakaya ne tshitupa tshimua mu tshibanda, ne wakabasokoka ku esete, ne ku sude kua kakuna ka Lipala;

32 Ne bavua bashala wakabasokoka mu tshibanda tshia ku wesete, ku wesete kua musulu wa Sidona, ne nanku kupueka tô ne ku mikalu ya bulaba bua Manti.

33 Ne nanku bualu uvua muteka musumba wenda wa basalayi bilondeshila ku dijinga dienda, uvua mudilongolola bua kusambakena nabu.

34 Ne biakalua ne Bena Lamana bakabanda ku node kua kakuna, kuvua tshitupa tshia musumba wa basalayi ya Moloni basokoma.

35 Ne pakapita Bena Lamana kakuna ka Lipala, ne pakaluabu mu tshibanda, ne pakabangabu kusabuka musulu wa Sidona, musumba wa basalayi uvua musokoma ku sude kua kakuna, uvua muntu muena dîna ne Lehi ulombola, ne wakalombola musumba wenda wa basalayi ne bakanyungulula Bena Lamana ku esete ne kunyima kuabu.

36 Ne biakalua ne Bena Lamana, pakamonabu Bena Nefi bababundila kunyima kuabu, bakakudimuka ne bakabanga kukokangana ne musumba wa basalayi wa Lehi.

37 Ne mudimu wa lufu wakatuadija ku nseka yonsu ibidi, kadi uvua ukuatshisha bôwa bikola ku luseka Bena Lamana, bualu butaka buabu buvua buikala bulekelela patoka ku mitûtu mikola ya Bena Nefi ne miela yabu ya mvita ne tuela tuabu tua mvita, bivua biluisha lufu pabuipi ne ku mukumu onsu.

38 Pinapu ku luseka lukuabu, ku musangu ne ku musangu kuvua muntu upona munkatshi mua Bena Nefi, ku miela yabu ya mvita ne ku dijimija dia mashi, bualu bavua babuikila bitupa bia moyo menamena bia mubidi, anyi bitupa bia moyo menamena bia mubidi bivua bibuikila ku mikumu ya Bena Lamana, ne bibuikilu biabu bia pa tshiadi, ne ngabu yabu ya pa maboku, ne bifulu biabu bia mvita; ne Bena Nefi bakatungunuka nanku ne mudimu wa lufu munkatshi mua Bena Lamana.

39 Ne biakalua ne Bena Lamana bakumvua bôwa, bua lufu lunena munkatshi muabu, mena tô ne pakabangabu kunyema batangila ku musulu wa Sidona.

40 Ne bakabalondakaja kudi Lehi ne bantu benda ; ne Lehi wakabasaka ku mâyi a Sidona, ne bakasabuka mâyi a Sidona. Ne Lehi wakalama misumba yenda ya basalayi ku muelelu wa musulu wa Sidona, bua ne kabasabuki to.

41 Ne biakalua ne Moloni ne musumba wenda wa basalayi bakasambakena ne Bena Lamana mu tshibanda, dishiya dia musulu wa Sidona, ne bakabanga kudiela kudibu ne kubashipa.

42 Ne Bena Lamana bakanyema kabidi kumpala kuabu, batangila ku bulaba bua Manti; ne bakasambakena kabidi ne misumba ya basalayi ya Moloni.

43 Mpindiewu musangu ewu Bena Lamana bakaluangana menamena; eyowa, Bena Lamana kabavua banji kumanyika bua kuluangana ne makanda a bungi menamena ne dikima nanku to, tô, mena nansha kumbukila ku mbangilu to.

44 Ne bakapetela meji kudi Bena Zolama ne Bena Amaleki, bavua bikala tupita tunena ne balombodi banena babu, ne kudi Zelahemena, uvua muikala kapita kabu kanena, anyi mulombodi munena ne komanda munena wabu; eyowa, bakaluangana bu mudi mpupuji, ne bakashipa Bena Nefi ba bungi ne bianza biabu, eyowa, bakapanda bifulu biabu bia mvita bia bungi mu bipesa bibidi, ne bakatubula bibuikilu biabu bia pa tshiadi bia bungi, ne bakakosa maboku abu a bungi; ne Bena Lamana bakatûta nanku ne tshiji tshiabu tshikola.

45 Nansha nanku, Bena Nefi bavua bapetela meji ku bualu buimpa, bualu kabavua baluangana bua buakalenga bua muntu umua anyi bukôkeshi to, kadi bavua baluangana bua nzubu yabu ne budikadidi buabu, bua bakaji babu ne bana babu, ne biabu bionsu, eyowa, bua ngenzedi yabu ya kutendelela ne ekelezia wabu.

46 Ne bavua benza tshivuabu bamona ne tshivua tshikala mudimu uvuabu nawu kudi Nzambi wabu; bualu Mukalenga wakabambila, ne kabidi batatuabu, ne: Bu munudi kanuyi bapîla bua tshilema tshia kumpala, anyi tshibidi to, kanuakudilekela ne nushipibua ku bianza bia bena lukuna benu to.

47 Ne kabidi, Mukalenga uvua muamba ne: Nenusungidila mêku enu mena ne ku dimatshisha dia mashi. Nanku bua bualu ebu Bena Nefi bavua bakokangana ne Bena Lamana bua kudisungidila, ne mêku abu ne malaba abu, ditunga diabu, ne manema abu, ne ntendelelu wabu.

48 Ne biakalua ne pakamona bantu ba Moloni lonji ne tshiji tshia Bena Lamana, bavua pabuipi ne kupingana panyima ne kubanyema. Ne Moloni, bualu uvua mumona dijinga diabu, wakatuma bantu ne kupesha mitshima yabu ku meji ne meji â; eyowa, meji a malaba abu, budishikaminyi buabu, eyowa, budishikaminyi buabu ku bupika.

49 Ne biakalua ne bakakudimuka kudi Bena Lamana, ne bakabila ne dîyi dimua kudi Mukalenga Nzambi wabu, bua budishikaminyi buabu ne bua budishikaminyi buabu ku bupika.

50 Ne bakabanga kukandamena Bena Lamana ne bukola; ne mu diba dina adi muvuabu babila kudi Mukalenga bua budishikaminyi buabu, Bena Lamana bakabanga kunyema kumpala kuabu; ne bakanyema mena ku mâyi a Sidona.

51 Mpindiewu, Bena Lamana bavua bapita bungi, eyowa, bavua bikala bungi bua Bena Nefi misangu ibidi; nansha nanku, bavua bapangadika mua ne bakadisangisha pamua mu tshisumbu tshimua mu tshibanda, ku muelelu wa musulu wa Sidona.

52 Bua nanku misumba ya basalayi ya Moloni yakabanyungulula, eyowa, mena ku nseka yonsu ibidi ya musulu, bualu monayi, bantu ba Lehi bavua ku esete.

53 Bua nanku pakamona Zelahemena bantu ba Lehi ku esete kua musulu wa Sidona, ne misumba ya basalayi ya Moloni ku wesete kua musulu wa Sidona, ne bavua babanyungulula kudi Bena Nefi, luzakalu luakabakuata.

54 Mpindiewu Moloni, pakamonaye luzakalu luabu, wakapesha bantu benda mukenji bua balekela dimatshisha dia mashi.