1 Muananyi, teka matshi ku mêyi anyi; bualu ndi nditshipa kûdi, ne monsu munualama mikenji ya Nzambi neulubuluka mu bulaba.

2 Ndi musua ne wenza mumvua muenza, bua kuvulukabu bupika bua batatuetu; bualu bavua mu bupika, ne muntu nansha umua kavua mua kubapatuisha to pa kumbusha kabiyi Nzambi wa Abalahama, ne Nzambi wa Isaka, ne Nzambi wa Yakoba; ne bushuwa wakabapatuisha mu ntatu yabu.

3 Ne mpindiewu, Ô muananyi Helamana, mona, udi bunsonga bueba, ne bua nanku, ndi nkusengelela ne uteleja mêyi anyi ne ulonga kundi; bualu ndi mumanya ne bonsu beyemena kudi Nzambi, Nzambi neabambuluisha mu matêta abu, ne mu ntatu yabu, ne mu mpaji yabu, ne nebabandishibua ku dituku dia ndekelu.

4 Ne ntshiena musua ne wela meji ne ndi mudimanyina malu â to—a pa bulaba to kadi a mu nyuma, meji a mu mubidi to kadi a kudi Nzambi.

5 Mpindiewu, mona, ndi nkuambila, bu mema ntshiyi muledibua kudi Nzambi to, ntshivua mmanya bintu ebi to; kadi Nzambi wakammanyisha bintu ebi ku mukana mua muanjelu wenda munsantu, kabiyi bua bukumbana nansha bumua buanyi nkayanyi to;

6 Bualu mvua ngendakana ne bana ba Mosiya, mu kukeba bua kunyangakaja ekelezia wa Nzambi; kadi mona, Nzambi wakatuma muanjelu wenda munsantu bua kutuimanyika mu njila.

7 Ne monayi, wakakula kutudi, bu mudi dîyi dia dikubakuba, ne buloba bonsu buakazakala muinshi mua makasa etu; ne tuakapona bonsu pa buloba, bualu ditshina dia Mukalenga diakalua kutudi.

8 Kadi mona, dîyi diakangambila ne: Juka. Ne ngakajuka ne ngakimana kulu, ne ngakamona muanjelu.

9 Ne wakangambila ne: Bu wewa musua nkayeba bua kufua, kukebi kabidi bua kufuisha ekelezia wa Nzambi to.

10 Ne biakalua ne ngakakuluka panshi; ne tshivua bua kunzulula mukana muanyi, anyi kuenzela bidimba bianyi bua mutantshi wa matuku asatu ne butuku busatu to.

11 Ne muanjelu wakangambila bintu bikuabu, biakumvua bana betu ba baluma, kadi ntshiakabiumvua to; bualu pangakumvua mêyi—Bu wewa musua nkayeba bua kufua, kukebi kabidi bua kufuisha ekelezia wa Nzambi to—ngakakuatshibua ne bôwa ne dikatshila bikola ne ntshilu pamuapa kushipibua, ki pangakapona panshi ne tshiakumvua kabidi nansha.

12 Kadi ngakasumpakana ne mpaji ya tshiendelela, bualu anyima wanyi uvua mupandika ku tshipimu tshitamba bunena ne musumpakana ne mibi yanyi yonsu.

13 Eyowa, ngakavuluka mibi yanyi yonsu ne malu mabi anyi onsu, angakamuena mpaji ne makenga a ngena; eyowa, ngakamona ne mvua mutombokela Nzambi, ne ntshivua mulama mikenji yenda ya tshijila to.

14 Eyowa, ne mvua mushipa bana benda ba bungi, anyi mubasaka ku dinyanguka; eyowa, ne mu tshikosu malu mabi anyi avua makola, ne meji mena a kulua kumpala kua Nzambi avua asumpakaja anyima wanyi ne ditshina didi kadiyi kuamba to.

15 Ô, ngakela meji ne, Nzambi uvua mua kungipata ne kumbutula mu nyuma ne mu mubidi, bua tshilu kabidi kuimana kumpala kua Nzambi bua kulumbuluishibua to.

16 Ne mpindiewu, mvua musumpakana mu matuku asatu, munya ne butuku, mena ne makenga a anyima mupîshibua.

17 Ne biakalua ne mvua musumpakana ne mpaji, pantshivua mupandika moyo ku mvulukilu wa mibi yanyi, mona, ngakavuluka kabidi mumvua mumvua tatuanyi wamba ku Nyuma kudi bantu bitangila dilua dia Yezu Kilisto kapanda, umua Muana wa Nzambi, bua kupikula bua mibi ya ba pa buloba.

18 Mpindiewu, bu mudi meji anyi mimanyina pa bualu ebu, ngakabila munda mua mu mutshima wanyi ne: Ô Yezu, wewa Muana wa Nzambi, mfuila lusa, mema mema udi mu kanyonga ka bululu, ne ndi munyungulula kudi nkanu ya lufu lua kashidi.

19 Ne mpindiewu, mona, pangakela meji nanku, ntshivua kabidi mua kuvuluka makenga anyi to; eyowa, divuluka dia mibi yanyi kadiakampandisha moyo kabidi to.

20 Ne ô, disanka kayi, ne bukenka bua dikema kayi bungakamona! eyowa, anyima wanyi uvua muwula ne disanka dipita dikenga dianyi!

21 Eyowa, ndi nkuambila, muananyi wa baluma, ne kakuvua mua kuikala tshintu nansha tshimua tshidi tshimpa ne tshia bululu bu muvua makenga anyi to. Eyowa, ne ndi nkuambila kabidi, muananyi wa baluma, ne luseka lukuabu, kakuena mua kuikala tshintu nansha tshimua tshidi tshimpa ne tshishemakana bu mudi disanka dianyi to.

22 Eyowa, ngakela meji kumona, mena bu muakamona tatuetu Lehi, Nzambi musomba pa nkuasa wenda wa butumbi, munyungulula kudi bisumbu bia banjelu bia bungi kabiyi kubala to, bavua bikala bu bavua bimba ne basamuna Nzambi wabu; eyowa, ne anyima wanyi wakajinga kuikala aku.

23 Kadi mona, bidimba bianyi biakapeta bukola buabio kabidi, ne ngakimana pa makasa anyi, ne ngakaleja bantu mvua muledibua kudi Nzambi.

24 Eyowa, ne katshia ku diba adi tô ne mpindiewu, ndi muenza mudimu kakuyi dilekela to, bua nduisha anyima ku dikudimuna dia mitshima; bua mbaluisha ku dilabula dia disanka dipita dingakalabula; bua ne baledibua pabu kudi Nzambi, ne buwula ne Nyuma wa Tshijila.

25 Eyowa, ne mpindiewu mona, Ô muananyi wa baluma, Mukalenga udi umpesha disanka dinena menamena bu difutu dia midimu yanyi;

26 Bualu bua dîyi divuaye mumpesha, mona, ba bungi bavua baledibua kudi Nzambi, ne bavua balabula bu mumvua mulabula, ne bavua badimuena ne mesu bu mumvua mudimuena; bua nanku badi bamanya bintu bindi muamba muakula, bu mundi mubimanya; ne dimanya dindi nadi didi difumina kudi Nzambi.

27 Ne mvua mukuatshishibua mu matêta ne mu mayoyo a mishindu yonsu, eyowa, ne mu mishindu yonsu ya ntatu; eyowa, Nzambi uvua mumpatuisha mu buloko, ne mu mionji, ne mu lufu; eyowa, ne ndi mueyemena kudiye, ne neampatuisha kabidi.

28 Ne ndi mumanya ne neanjula ku dituku dia ndekelu, bua kusomba nenda mu butumbi; eyowa, ne nemmupa lumu bua kashidi, bualu uvua mupatula batatuetu mu Ejipitu, ne uvua mudînyisha Bena Ejipitu mu Mbuwa Mukunza; ne wakabalombola ku bukola buenda mu bulaba bulaya; eyowa, ne uvua mubapatuisha ku bupika ku bukuatshibu ku tshikondu ne tshikondu.

29 Eyowa, ne uvua kabidi mupatula batatuetu mu bulaba bua Yelushalema; ne uvua kabidi mubapatuisha mu bupika ne bukuatshibu, ku bukola buenda bua kashidi, ku tshikondu ne tshikondu mena tô ne lelu ewu; ne ntu mukuata diba dionsu mu tshivulukilu bukuatshibu buabu; eyowa, ne uvua peba ne tshia kuvuluka bukuatshibu buabu, bu mundi muvuluka.

30 Kadi mona, muananyi wa baluma; ebi nki mbionsu to; bualu udi ne tshia kumanya bu mundi mumanya, bua ne monsu muwalama mikenji ya Nzambi neulubuluka mu bulaba; ne udi ne tshia kumanya kabidi ne, monsu muwapanga kulama mikenji ya Nzambi to neukoshibua ku mpala kuenda. Mpindiewu etshi tshidi bilondeshila ku dîyi dienda.