1 Ne mpindiewu, muananyi wa baluma, ndi ne mêyi makesa makuabu akukuambila adi mashilangana ne amvua muambila muanenu wa baluma; bualu mona, kuena mumona disuminyina dia muanenu wa baluma, lulamatu luenda, ne dinanukila dienda mu dilama dia mikenji ya Nzambi anyi? Mona, wakaleja tshilejilu tshimpa kûdi anyi?

2 Bualu kuena muteya ntema ya bungi ku mêyi anyi bu mudi muanenu wa baluma to, munkatshi mua Bena Zolama. Mpindiewu ebu mbualu bundi nabu kûdi; wakaya tô ne ku didiamba bua bukola bueba ne lungenyi lueba.

3 Ne ebi kabiena bionsu to, muananyi wa baluma. Wakenza tshivua tshikola kundi; bualu wakalekela disadila, ne wakaya ku bulaba bua Silona ku mikalu ya Bena Lamana, ulonda Izabela ndumba.

4 Eyowa, uvua mupambula mitshima ya bantu ba bungi; kadi etshi katshiena tshikubingisha to, muananyi. Uvua ne bua kudifila ku disadila uvua mukupesha.

5 Muananyi wa baluma, kuena mumanya ne malu â adi bualu bupita bubi ku mesu kua Mukalenga; eyowa, bualu bupita bubi kumpala kua mibi yonsu, pa kumbusha dimatshisha dia mashi a muntu udi kayi ne bualu anyi divila Nyuma wa Tshijila to anyi?

6 Bualu mona, bu wewa muvila Nyuma wa Tshijila pakadiye mumana kupeta kaba munda mueba, ne ne udi mumanya ne udi uvila, mona, etshi tshidi bubi budi kabuyi bubuikidibua to; eyowa, ewu yonsu udi ushipa muntu kushilangana ne muinda ne dimanya dia Nzambi, kabiena biteketa bua yeya kupeta dibuikidila to; eyowa, muananyi wa baluma, ndi nkuambila ne kabiena biteketa bua yeya kupeta dibuikidila to.

7 Ne mpindiewu, muananyi wa baluma, ndi njinga kudi Nzambi bua ne kuikadi mupîla bu bubi bunena ebu to. Ntshivua bua kusombela mibi yeba to, bua kupandisha anyima weba, bu kabiyi bua diakalenga dieba.

8 Kadi mona, kuena mua kusokoka mibi yeba kudi Nzambi to; ne pa kumbusha wewa mukudimuna mutshima nebikala bu tshijadikilu tshiakutuisha ku dituku dia ku ndekelu.

9 Mpindiewu muananyi, ndi musua ne ukudimuna mutshima ne ulekela mibi yeba, ne kulondi kabidi lukuka lua mesu eba to, kadi diela kashonyi mu bintu ebi; bualu pa kumbusha wewa muenza nanku kuena mua kupiana bukalenga bua Nzambi to nansha bishi. Ô, vuluka, ne itaba bujitu ebu, ne diela kashonyi mu bintu ebi.

10 Ne ndi nkuelela mukenji wa kuitaba bua kuebeja mubelu kudi bakulu beba ba baluma bitangila midimu yeba; bualu mona, udi mu bunsonga bueba, ne udi ne dijinga dia kudishibua kudi bana benu ba baluma. Ne teya ntema ku mubelu wabu.

11 Kulekedi ne udipambuisha kudi tshintu tshia tshianana ne tshisenji nansha tshimua to; kulekedi ne diabulu apambula mutshima weba kabidi mu dilonda dia bandumba babi abu to. Mona, Ô muananyi wa baluma, bu mudibu bunena bualu bubi buwakatuala pa Bena Zolama; bualu pakamonabu luendu lueba bakabenga kuitabuija mêyi anyi.

12 Ne mpindiewu Nyuma wa Mukalenga udi ungambila ne: Elela bana beba mukenji bua benza malu mimpa, bua kabapambuishi mitshima ya bantu ba bungi ku dinyanguka; bua nanku ndi nkuelela mukenji, muananyi wa baluma, mu ditshina dia Nzambi, bua kubenga malu mabi eba;

13 Ne ukudimuka kudi Mukalenga ne meji, bukitu, ne makanda eba onsu; bua kupambuishi kabidi mitshima bua kuenza bubi to; kadi upingana kudibu, ne witabuja mapanga eba ne bubi abu buwuvua muenza.

14 Kukebi mabanji anyi bintu bia tshianana bia pa buloba ebu to; bualu mona, kuena mua kuya nabi to.

15 Ne mpindiewu, muananyi, ndi musua kukuambila kakesa bitangila dilua dia Kilisto. Mona, ndi nkuambila ne, ne bidi bia bushuwa ne nealua kumbusha mibi ya ba pa buloba; eyowa, udi ulua kumanyisha bantu benda mukenji mulenga wa lupandu.

16 Ne mpindiewu, muananyi wa baluma, etshi tshivua disadila diwuvua mubikidila, bua kumanyisha bantu aba mukenji mulenga, bua kulongolola meji abu; anyi bua lupandu lulua kudibu, bua balongolola meji a bana babu bua kumvua dîyi diba dialuaye.

17 Ne mpindiewu nempepeja meji eba kakesa pa bualu ebu. Mona, udi ukema bua tshinyi bintu ebi bidi bimanyishibua musangu mula kumpala kua kuenzekabi. Mona, ndi nkuambila ne, anyima kawena ne mushinga kudi Nzambi diba edi bu muikalawu mu diba dia dilua dienda anyi?

18 Kabiena bikengela ne dilongolola dia disungila dimanyishibua kudi bantu aba momumua ne kudi bana babu anyi?

19 Kabiena biteketa bua Mukalenga kutumaye muanjelu wenda bua kumanyisha mukenji mulenga ewu kudi bana betu diba edi, anyi momumua ne kunyima kua diba dia dilua dienda anyi?