1 Mpindiewu mema, Moloni, ndi mfunda kakesa kadi kandengelela; ne ndi mfundila bana betu, Bena Lamana; ne ndi musua nebamanya ne bidimu bipita pa nkama inayi ne makumi abidi biakapita katshia tshimanyinu tshivua tshipeshibua bua dilua dia Kilisto.

2 Ne ndi nkanga miandiku eyi, kunyima kua mema muakula miaku mikesa ku njila wa dinukankamija.

3 Monayi, ndi nukankamija ne panuabala malu â, bikalabi lungenyi lua Nzambi ne nu’abala, nuvuluka bu muvua Mukalenga ne lusa kudi bana ba bantu, kumbukila ku bufuki bua Adama mena tô ne tshikondu tshinuapeta malu â, ne nubinanela meji mu mitshima yenu.

4 Ne panuapeta malu â, ndi nukankamija ne nulomba kudi Nzambi, Tatu wa Tshiendelela, mu dîna dia Kilisto, pikala malu â adi malelela; ne binualomba ne mutshima mulelela, ne dijinga dia bushuwa, bikala ne ditabuija mu Kilisto, neanumuenesha bulelela buawu, ku bukola bua Nyuma wa Tshijila.

5 Ne ku bukola bua Nyuma wa Tshijila nudi mua kumanya bulelela bua malu onsu.

6 Ne tshintu tshionsu tshidi tshimpa tshidi tshilulama ne tshilelela; bua nanku, tshintu nansha tshimua tshidi tshimpa katshiena tshivila Kilisto to, kadi tshidi tshitabuja ne udiku.

7 Ne nudi mua kumanya ne udiku, ku bukola bua Nyuma wa Tshijila; bua nanku ndi nukankamija ne kanuvidi bukola bua Nzambi to; bualu udi wenza ne bukola, bilondeshila ku ditabuija dia bana ba bantu, momumua lelu ne makelela, ne bua kashidi.

8 Ne kabidi, ndi nukankamija, bana betu, ne kanuvidi mapa a Nzambi to, bualu adi a bungi; ne adi aluila kudi Nzambi umua. Ne kudi mishindu mishilangana idi mapa â mabanyibua; kadi yeya Nzambi wa momumua ki udi wenzeja bionsu mu bonsu; ne adi mapeshibua ku mamuenesha a Nyuma wa Nzambi kudi bantu, bua kubapesha tshipeta tshimpa.

9 Bualu monayi, kudi umua bidi bipeshibua ku Nyuma wa Nzambi, bua kulongesha dîyi dia lungenyi;

10 Ne kudi mukuabu, bua alongesha dîyi dia dimanya ku Nyuma umua ewu;

11 Ne kudi mukuabu, ditabuija dikola menamena; ne kudi mukuabu, mapa a kôndopa ku Nyuma wa momumua ewu;

12 Ne kabidi, kudi mukuabu, bua enza bishima bikola;

13 Ne kabidi, kudi mukuabu, bua amba ku Nyuma bitangila bintu bionsu;

14 Ne kabidi, kudi mukuabu, dimona dia banjelu ne nyuma milongeshi;

15 Ne kabidi, kudi mukuabu, mishindu yonsu ya miakulu;

16 Ne kabidi, kudi mukuabu, diandamuna dia miakulu ne dia mishindu mishilangana ya miakulu.

17 Ne mapa â onsu adi aluila ku Nyuma wa Kilisto; ne adi alua kudi muntu ne muntu, bilondeshila bu mudiye musua.

18 Ne ndi nukankamija, bana betu bananga, ne nuvuluka ne dipa dionsu dimpa didi diluila kudi Kilisto.

19 Ne ndi nukankamija, bana betu bananga, ne nuvuluka ne yeya udi momumua makelela mushala, lelu, ne bua kashidi, ne mapa â onsu mangambi, adi ikala a mu nyuma, ka’akujika nansha, mena diba dionsu dikala buloba buikala, amu bilondeshila ku dipanga ditabuija dia bana ba bantu.

20 Bua nanku, kudi ne tshia kuikala ne ditabuija; ne pikalaku ne tshia kuikala ditabuija kudi ne tshia kuikala kabidi ditekemena; ne pikalaku ne tshia kuikala ditekemena kudi ne tshia kuikala kabidi bunangi.

21 Ne pa kumbusha nuenu bikala ne bunangi kanuena mua kupandishibua to nansha bishi mu bukalenga bua Nzambi; kanuena mua kupandishibua mu bukalenga bua Nzambi to panudi kanuyi ne ditabuija to; anyi kanuena mua kupandishibua to panudi kanuyi ne ditekemena to.

22 Ne panuikala kanuyi ne ditekemena to nudi ne tshia kuikala bapangila; ne kupanga kua ditekemena kudi kulua bua malu mabi.

23 Ne Kilisto bulelela wakambila batatuetu ne: Panuikala ne ditabuija nudi mua kuenza bintu bionsu bidi bikengedibua kundi.

24 Ne mpindiewu ndi ngakula kudi ndekelu ya buloba yonsu—pikala dituku dilua dikala bukola ne mapa bia Nzambi bijika munkatshi muenu, nebikala bua dipanga ditabuija.

25 Ne diakabi kudi bana ba bantu pikalabi nanku; bualu kakuakuikala muntu nansha umua udi wenza malu mimpa munkatshi muenu to, nansha umua nansha. Bualu pikalaku umua munkatshi muenu udi wenza malu mimpa, neenza ku bukola ne mapa bia Nzambi.

26 Ne diakabi kudi bâshikija bintu ebi ne bâfua, bualu badi bafua ne mibi yabu, ne kabena mua kupandishibua mu bukalenga bua Nzambi to; ne ndi ngamba nanku bilondeshila ku mêyi a Kilisto; ne ntshiena nshima to.

27 Ne ndi nukankamija bua nuvuluka bintu ebi; bualu diba didi dilua lukasa dinuamanya ne ntshiena nshima to, bualu nenummona ku tshilumbuluidi tshia Nzambi; ne Mukalenga Nzambi neanuambila ne: Tshiakanumanyisha mêyi anyi, avua mafundibua kudi muntu ewu, bu mudi muntu ubila ku bafua, mena bu mudi muntu wakula ku lupuishi anyi?

28 Ndi nnumanyisha bintu ebi bua dikumbajibua dia mambi. Ne monayi, nebipatukila mukana wa Nzambi wa kashidi; ne dîyi dienda nediela kashiba ku tshikondu ne tshikondu.

29 Ne Nzambi neanuleja ne, bimvua mufunda bidi bilelela.

30 Ne ndi kabidi nukankamija bua nulua kudi Kilisto, ne nupeta dipa dimpa dionsu, ne kanulengi dipa dibi, anyi tshintu tshia bukoya to.

31 Ne bika, ne juka ku lupuishi, Ô Yelushalema; eyowa, ne vuala bilamba bieba bimpa, Ô muana wa bakaji wa mu Siona; ne kolesha tukunji tueba ne lepesha mikalu yeba bua kashidi, bua kupuekeshibu kabidi to, bua bipungidi bia Tatu wa Tshiendelela bidiye muenza neba, Ô nzubu wa Isalele, bikumbajibua.

32 Eyowa, luayi kudi Kilisto, ne ikalayi bajalama mudiye, ne dibengelayi bionsu bidi kabiyi binemeka Nzambi; ne binuadibengela bionsu bidi kabiyi binemeka Nzambi, ne nunanga Nzambi ne ngulu yenu yonsu, ne meji ne makanda enu onsu, pashisha ngâsa wenda udi mukumbana buenu, bua ne ku ngâsa wenda nuikala bajalama mu Kilisto; ne binuikala ku ngâsa wa Nzambi bakana mu Kilisto, kanuena mua kuvila bukola bua Nzambi to nansha bishi.

33 Ne kabidi, binuikala ku ngâsa wa Nzambi bajalama mu Kilisto, ne kanuyi nuvila bukola buenda to, pashisha nudi bajididibua mu Kilisto ku ngâsa wa Nzambi, ku njila wa dimatshishibua dia mashi a Kilisto, didi dikala mu tshipungidi tshia Tatu bua dilekedibua dia mibi yenu, bua ne nulua bansantu, kanuyi ne katoba to.

34 Ne mpindiewu ndi nulaya bonsu, shalayi bilenga. Ndi nya katataka kuikisha mu mpaladiso wa Nzambi, tô ne pâdisangisha kabidi nyuma wanyi ne mubidi wanyi, ne tô ne pangangatshibua mûlu muikala mutshimunyi, bua kusambakena nuenu kumpala kua tshilumbuluidi tshilenga tshia Yehowa munena, Mulumbuluishi wa Tshiendelela wa badi ne moyo ne bafua. Amena.