1 Mukanda wa tatu wanyi Molomo, mumfundila mema, Moloni; ne uvua mumfundila katataka kunyima kua dibikidibua dianyi ku disadila. Ne ewu ki mushindu wakamfundilayi, wamba ne:

2 Muananyi wa baluma munanga, Moloni, ndi nsanka menamena bua ne Mukalenga weba Yezu Kilisto mmukuvuluka, ne mmukubikila ku disadila dienda, ne ku mudimu wenda wa tshijila.

3 Ndi nkuvuluka diba dionsu mu masambila anyi, nsambila ne munanunanu Nzambi Tatu mu dîna dia Muanenda wa Tshijila, Yezu, bua yeya, kupitshila ku buimpa ne ngâsa bienda bidi kabiyi ndekelu to, neakulama ku dinanukila dia ditabuija mu dîna dienda tô ne ku ndekelu.

4 Ne mpindiewu, muananyi wa baluma, ndi nkuambila bitangila tshidi tshimpesha mpaji menamena; bualu bidi bimpesha mpaji ne kujuka matandu munkatshi muenu.

5 Bualu, pangikala mumanya bulelela, kuvua matandu munkatshi muenu bitangila ditambuisha dia bana benu bateketa.

6 Ne mpindiewu, muananyi wa baluma, ndi njinga ne nukuata mudimu ne dinanukila, bua ne ditupakana dinena edi diumbushibua munkatshi muenu; bualu, bua dijinga edi, ndi mufunda mukanda ewu.

7 Bualu katataka kunyima kua mema mumanya bintu ebi bidi ngakebeja Mukalenga bitangila bualu ebu. Ne dîyi dia Mukalenga diakalua kundi ku bukola bua Nyuma wa Tshijila, diamba ne:

8 Telejayi mêyi a Kilisto, Musungidi wenu, Mukalenga wenu ne Nzambi wenu. Monayi, ntshivua mulua pa buloba bua kubikila bantu bakana to kadi benji ba mibi bua kukudimuna mutshima; bantu badi ne bukola kabena dijinga ne môndopi to, kadi amu badi babêdi; pananku, bana bateketa badi ne bukola, bualu kabena bakumbana bua kuenza mibi to; bua nanku mutshipu wa Adama udi mumbushibua kudibu buanyi, bua ne kawena ne bukola pa mutu pabu to buanyi; ne mukenji wa ditengula wajiki kundi.

9 Ne ku mushindu ewu wankamanyisha Nyuma wa Tshijila dîyi dia Nzambi; bua nanku, muananyi wa baluma munanga, ndi mumanya ne bidi kapeja kakola kumpala kua Nzambi, bua kutambuisha bana bateketa.

10 Monayi ndi nnuambila ne etshi nenulongesha—dikudimuna dia mutshima ne ditambuisha kudi badi mua kuandamuna bua bienzedi biabu ne bikala mua kuenza mibi; eyowa, longeshayi baledi ne badi ne tshia kukudimuna mutshima ne kutambuishibua, ne kudipuekesha bu bana babu bateketa, ne nebapandishibua bonsu ne bana babu bateketa.

11 Ne bana babu bateketa kabena ne dijinga dia dikudimuna dia mutshima, anyi dia ditambuishibua to. Monayi, ditambuishibua didi bua dikudimuna dia mutshima bua dikumbajibua kua mikenji bua dilekedibua dia mibi.

12 Kadi bana bateketa badi ne moyo mu Kilisto, mena kumbukila ku tshishimikidi tshia buloba; pikalabi kabiyi nanku to, Nzambi udi Nzambi udi utapulula bantu, ne Nzambi udi kabidi ushintuluka, ne udi kansungansunga; bualu bu mudibu bunena bungi bua bana bateketa badi bafua kabayi batambuishibua to!

13 Pananku, pikala bana bateketa kabayi mua kupandishibua kakuyi ditambuishibua to, badi ne tshia kuya ku ngena kayi ndekelu.

14 Monayi ndi nkuambila ne, ewu udi utshinka ne bana bateketa badi ne dijinga dia ditambuishibua udi mu kanyonga ka bululu ne mu mionji ya malu mabi; bualu kena nansha ne ditabuija, ditekemena, anyi bunangi to; bua nanku, yeya mufua patshidiye ne meji â, udi ne bua kupueka mu ngena.

15 Bualu bubi bua kutshinka ne Nzambi udi upandisha muana umua bua ditambuishibua, ne mukuabu udi ne tshia kufua bualu kena mutambuishibua to budi butshingisha bikola.

16 Diakabi dikala kudi banyangakaja njila ya Mukalenga ku mushindu ewu, bualu nebafua amu pa kumbusha bobu bakudimuna mutshima. Monayi, ndi ngakula ne dikima, ne bukôkeshi bua kudi Nzambi; ne ntshiena ntshina tshidi muntu mua kuenza to; bualu dinanga dijima didi dipata bôwa bonsu.

17 Ne ndi muwula ne bunangi, budi dinanga dia kashidi; bua nanku, bana bonsu badi bikala momumua kundi; bua nanku, ndi nanga bana bateketa ne dinanga dijima; ne bobu badi bikala momumua bonsu ne nebapenda lupandu.

18 Bualu ndi mumanya ne Nzambi kena Nzambi usunguluja bantu to, anyi tshifukibua tshidi tshishintuluka to; kadi yeya kena ushintuluka to tshiendelela ne tshiendelela.

19 Bana bateketa kabena mua kukudimuna mutshima to; bua nanku, bidi bubi budi butshingisha bikola bua kuvila lusa lukezuka lua Nzambi kudibu, bualu badi ne moyo munda muenda bua lusa luenda.

20 Ne ewu udi wamba ne bana bateketa badi ne dijinga dia ditambuishibua udi uvila lusa lua Kilisto, ne udi upetula bupikudi buenda ne bukola bua disungila dienda.

21 Diakabi kudi bantu ba nanku awu, bualu badi mu njiwu ya lufu, ya ngena, ne mpaji kayiyi ndekelu. Ndi ngamba nanku awu ne dikima; Nzambi udi mumpesha mukenji bua kuamba nanku awu. Telejayi mêyi â ne teyayi ntema, anyi neanupîsha ku nkuasa wa tshilumbuluilu wa Kilisto.

22 Bualu mona bana bateketa bonsu badi ne moyo mu Kilisto, ne kabidi bonsu badi kabayi bamanya mikenji to. Bualu bukola bua disungila budi butumikila bonsu badi kabayi ne mikenji to; bua nanku, udi kayi mupîla to, anyi udi kayi ne dipîshibua to, kena mua kukudimuna mutshima to; ne bua bantu bua wa nanku awu ditambuishibua kadiena ne dikuatshisha to—

23 Kadi tshidi tuseku kumpala kua Nzambi, divila lusa lua Kilisto, ne bukola bua Nyuma wenda wa Tshijila, ne dieyemena ku midimu idi mikala mivua.

24 Mona, muananyi wa baluma, tshintu etshi katshivua bua kuenzeka to; bualu dikudimuna dia mutshima didi dikala bua badi bikala ne dipîshibua ne mutshipu wa ku mikenji idi mikala mishipibua.

25 Ne tshimuma tshia kumpala tshia dikudimuna dia mutshima tshidi ditambuishibua; ne ditambuishibua didi diluila ku ditabuija bua dikumbajibua dia mikenji; ne dikumbajibua dia mikenji didi dituala dilekedibua dia mibi;

26 Ne dilekedibua dia mibi didi dituala ditudija, ne bupuekela bua mutshima; ne bua bualu bua ditudija ne bupuekela bua mutshima dikumbudibua dia Nyuma wa Tshijila didi dilua, Musambi muina udi uwuja ne ditekemena ne dinanga dijima, dinanga didi dikankamana ne dinanukila mu disambila, tô ne pâlua ndekelu, pâsomba bansantu bonsu ne Nzambi.

27 Mona, muananyi wa baluma, nenkufundila kabidi pangikala ntshiyi muya kuluangana ne Bena Lamana katataka to. Mona, diditambisha dia tshisamba etshi, anyi tshia bantu ba Bena Nefi, diatuadi dibutuka diabu pa kumbusha bobu bakudimuna mutshima.

28 Sambila buabu, muananyi wa baluma, bua dikudimuna dia mutshima dibaluila. Bualu mona, ndi ntshina ne Nyuma ukadi mulekela kuenda nabu; ne mu tshitupa tshia bulaba etshi badi bikala bakeba kabidi bua kushipa bukola bonsu ne bukôkeshi budi bufumina kudi Nzambi; ne badi bikala bavila Nyuma wa Tshijila.

29 Ne kunyima kua kubenga dimanya dinena nanku awu, muananyi wa baluma, badi ne tshia kufua katataka, bua dikumbajibua dia mambi makudibua kudi bambi, kabidi ne mêyi a Mupandishi wetu yeya muina.

30 Shala bilenga, muananyi wa baluma, tô ne pangakufundila, anyi pangasambakena neba kabidi. Amena.