Mga Prinsipyo sa Ministering, Hunyo 2019

Ang Ministering ang Pagtan-aw sa Iban pareho sa Pagtan-aw sang Manluluwas

Si Jesus naghinguyang sing daku nga tinion upod sadtong ginakabig nga lain; Nakita Niya ang ila diosnon nga ikasarang.

Sa aton mga pagpaninguha nga magminister pareho sa Manluluwas, mahimo nga pangabayon kita nga magminister sa tawo nga lain sangsa aton. Nagahatag ini sang oportunidad sa aton nga magtuon kag mag-uswag.

Ang kultura, edukasyon, rasa, pinansyal nga kahimtangan, edad, mga paggawi sang nagliligad ukon sa karon, ukon iban pa nga mga kinalain mahimo nga nagapahapos para sa aton nga maghusga sa iban antes pa naton sila makilala. Ining nagauna nga paghusga amo ang ugat sang diskriminasyon, kag ang Manluluwas nagpaandam kontra sini (tan-awa sa 1 Samuel 16:7; Juan 7:24)

Sarang bala kita magtulok lampas sa mga kinalain kag magtan-aw sa iban pareho sang pagtan-aw sang Manluluwas? Paano naton tun-an nga palanggaon ang iban sa kon sin-o sila kag kon sin-o sila sarang mangin?

Pagtulok kag Pagpalangga

Ang Biblia nagasugid sang bantug nga sugilanon sang manggaranon nga pamatan-on nga nagpamangkot kon paano maangkon ang kabuhi nga wala’y katapusan: “Kag si Jesus nga nagatulok sa iya naghigugma sa iya, kag nagsiling sa iya, Isa ka butang ang nakulang sa imo: lakat ka, ibaligya ang pagkabutang mo, kag ihatag sa mga imol, kag may bahandi ka sa langit: kag kari, magsunod sa akon” (Marcos 10:21).

Sang gintun-an ni Elder S. Mark Palmer sang Seventy ining balaan nga kasulatan pila katuig na ang nagligad, isa ka bag-o nga bahin sang sugilanon ang nangin hayag sa iya.

“‘Kag si Jesus nga nagatulok sa iya naghigugma sa iya.’

“Sa pagkabati ko sining mga pulong, isa ka maathag nga imahen ang nagpuno sa akon hunahuna sang aton Ginuo nga nagpundo kag nagt-ulok sining pamatan-on. Nagatulok—nga pareho sa nagahimutad sing madalum kag nagalapos sa iya kalag, nga ginakilala ang iya kaayo kag amo man ang iya ikasarang, kag ginatamod man ang iya pinakadaku nga panginahanglan.

“Dayon ang simple nga mga tinaga—si Jesus naghigugma sa iya. Nagbatyag sia sing nagapalanglapaw nga pagpalangga kag kaluoy para sa sining maayo nga pamatan-on, kag bangud sining pagpalangga kag upod ining pagpalangga, si Jesus nagpangayo sing masobra pa halin sa iya. Ginahunahuna ko kon ano ayhan ang balatyagon sining pamatan-on nga malikopan sang amo nga pagpalangga samtang ginapangabay sa paghimo sang isa ka butang nga tama kabudlay pareho sang pagbaligya sang tanan niya nga ginapanag-iyahan kag paghatag sini sa mga imol. …

“[Ginpamangkot ko ang akon kaugalingon] ‘Paano ako mapuno sang Cristohanon nga pagpalangga agud [ang iban] makabatyag sang pagpalangga sang Dios paagi sa akon kag maluyag nga magbag-o?’ Paano ko matulok [ang tagsa ka tawo sa akon palibot] sa pareho nga paagi nga ang Ginuo nagtulok sa manggaranon nga pamatan-on, nga makita sila sa kon sin-o gid sila kag sin-o sila sarang mangin, sa baylo sang kon ano lang ang ila ginahimo kag wala ginahimo? Paano ako mangin mas pareho sa Manluluwas?”¹

Pagtuon sa Pagtan-aw sa Iban

Ang pagtuon nga tan-awon ang iban pareho sang pagtan-aw sa ila sang Manluluwas nagadala sing malahalon nga mga padya. Ari ang pila ka mga panugyan nga makabulig samtang nagatinguha kita padulong sa sining katuyuan.

Kilalaha Sila
Magtinguha nga kilalahon ang mga tawo lampas sa hapaw nga mga detalye. Hangpa nga ang pagpasad sang mga kaangtanan nagakinahanglan sang panahon kag sinsero nga pagpaninguha. (Tan-awa sa Agosto 2018 nga artikulo sa mga Prinsipyo sa Ministering nga “Pagpasad sang Makahulugan nga mga Kaangtanan” para sa bulig.)
Usisaa ang Imo Kaugalingon
Hatagi sang igtalupangod ang mga paghusga nga hungod ukon indi mo hungod nga ginahimo. Pat-ini ang mga haumhaum nga imo ginahimo parte sa iban kag tinguhai nga hangpon kon ngaa amo sina ang imo balatyagon tuhoy sa ila.
Punggi ang Paghusga
Hisayra nga ang mga sirkumstansya wala nagadikta sang bili sang isa ka tawo. Ibutang ang imo kaugalingon sa ila lugar kag binagbinaga kon paano mo luyag tan-awon ka sang iban kon yara ka sa amo man nga sirkumstansya. Ang pagseparar sang mga pagpili kag paggawi sang isa ka tawo sa ila duna nga bili kag diosnon nga ikasarang makabulig sa aton nga makita sila pareho sa pagtan-aw sang Manluluwas.
Magpangamuyo nga Palanggaon Sila
Magpangamuyo sing masami para sa ila nga ginamitlang ang ila ngalan kag para sa pasensya nga magpatubo sang matuod-tuod nga pag-abyanay. Mapinangamuyuon nga timbang-timbangon ang imo pag-alagad. May kakulangan bala sa tunga sang imo ginahimo kag kon ano gid ang ila kinahanglan?

Si Jesus naghinguyang sang Iya panahon upod ang mga tawo halin sa nagkalainlain nga kahimtangan sa kabuhi; mga manggaranon, mga imol, mga nagagahum, kag ordinaryo nga mga tawo. Sa masami biktima sia sang di-husto nga paghusga sang iban sa ila pagtulok sa Iya kag sa Iya athagon nga kaimolon ukon kubos nga kahimtangan. “Kon makita naton sia, wala sing katahum nga pagahandumon naton sia. … Gintamay sia, kag wala naton sia pagpakamahala” (Isaias 53:2–3).

Cristohanon nga Panulok

Isa ka sister ang nagpaambit sang iya istorya parte sa kon paano niya natun-an nga tan-awon ang isa ka kaingod sa Cristohanon nga mga mata:

“Si Julia (ang ngalan gin-islan) nagapuyo malapit sa akon kag dawsa wala sing bisan isa ka abyan. Daw pirme lang sia aburido kag akig. Bisan pa, nagdesisyon ako nga mangin abyan niya. Indi lang nga daw isa ka pasapayan nga abyan, kundi matuod-tuod nga abyan. Ginaistorya ko sia kon makita ko sia kag nagpakita sang interes sa kon ano man ang iya ginahimo. Sing amat-amat, nangin suod ang amon pag-abyanay, nga nagdala sang kalipay sa akon tagipusuon.

“Isa ka adlaw, nagdesisyon ako nga bisitahan si Julia kag pamangkoton sia parte sa iya desisyon nga indi magsimba.

“Nahibal-an ko nga wala sia sing pamilya ukon mga paryente sa malapit. Ang nagaisahanon niya nga utod, isa ka lalaki nagapuyo sa malayo, nagapakig-angot sa iya kaisa lang kada tuig paagi sa telepono. Sang nagapamati ako sa iya nga nagapautwas sang iya paghinakit, kaakig, kag mga kapaslawan parte sa iya pamilya kag sa Simbahan, indi manegar nga kaluoy kag pagpalangga para sa sini nga sister ang nabatyagan ko sing tuman ka baskog. Nabatyagan ko ang iya kasakit kag kapaslawan. Nahangpan ko kon daw ano kasubo sang iya kabuhi. Daw pareho bala nga nakabati ako sang malinong nga hutik sa likod ko: ‘Palangga ko man sia. Palanggaa kag respetoha sia.’

“Nagpungko ako kag nagpamati hasta nga wala na sia sing may ihambal. Nakabatyag ako sang pagpalangga kag kaluoy para sa iya. Isa ini ka sister nga wala gid nakahibalo kon daw ano ang balatyagon sang ginapalangga. Sa hinali, nahangpan ko sia sing mas maayo. Nagpasalamat ako sa iya nga gintugotan niya ako nga makigsugilanon sa iya, kag ginbilin ko sia upod ang isa ka hakos kag akon pagpalangga kag respeto sa iya. Indi gid niya mahibal-an kon paano niya ako natandog sa amo nga pagbisita. Ang Langitnon nga Amay nagbukas sang akon mga mata kag nagtudlo sa akon nga may ikasarang ako sa pagpalangga upod ang dugang nga kaluoy. Determinado ako sa akon pamat-od nga indi lamang nga mangin abyan sa iya kundi mangin pamilya man sa iya.”

Sagrado nga butang ang maagda sa kabuhi sang isa ka tawo. Upod ang pangamuyo, pasensya, kag bulig halin sa Espiritu, makatuon kita sa paghimo sini nga may dugang nga Cristohanon nga panulok.

© 2019 iya sang Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, June 2019. Hiligaynon. 15767 861