Ti Ministering ket Panangibilang kadagiti Dadduma kas iti Ar-aramiden ti Mangisalakan

Binubos ni Jesus ti kaaduan a panawenna kadagiti tao a maibilang a naisupsupadi; nakitana ti nadiosan a kabaelanda.

Kadagiti panagkagumaantayo nga agminister kas iti Mangisalakan, mabalin a kiddawen kadatayo nga agminister iti maysa a tao a maisupadi kadatayo. Mangted daytoy iti gundaway nga agsursuro ken dumur-astayo.

Ti mainaig iti kultura, edukasion, maris ti kudil, ekonomia, edad, napalabas ken agdama nga ugali, wenno dadduma pay a pagdudumaan ket mamagbalin a nalaka tapno manghusga iti maysa a tao sakbay a maammuantayo ida. Daytoy maisakbay a pananghusga ti gapu ti panangidumduma, ken namakdaar ti Mangisalakan a maibusor iti daytoy (kitaen iti 1 Samuel 16:7; Juan 7:24).

Mabalin kadi a saantayo nga ikankano dagiti pagdudumaan ket ibilangtayo dagiti dadduma kas iti ar-aramiden ti Mangisalakan? Kasano a masursurotayo nga ayaten dagiti dadduma aniaman ti kinatao ken pagbalinanda?

Panangimatmat ken Panangayat

Isalaysay ti Biblia ti pamiliar nga estoria maipapan iti nabaknang nga agtutubo a nagsaludsod no kasano a magun-od ti biag nga agnanayon: “Ket idi minatmatan ni Jesus isuna inayatna, ket kinunana kenkuana: Maysa a banag ti agkurang kenka: inka, ilakom dagup ti adda kenka, ket itedmo kadagiti napanglaw, ket addanto kinabaknangmo idiay langit: ket umayka, bagkatem ti krus, ket surotennak” (Marcos 10:21).

Idi inadal ni Elder S. Mark Palmer iti Korum ti Pitopulo daytoy a nasantuan a kasuratan sumagmamano a tawen ti napalabasen, kellaat a kas nagbalin a napateg kenkuana ti baro a paset ti estoria.

“‘Ket idi minatmatan ni Jesus isuna inayatna.’

“Idi nangngegko dagitoy a balikas, napno ti panunotko iti narangrang a ladawan ti Apo a nagsardeng ken minatmatanna daytoy nga agtutubo a lalaki. Minatmatanna—kas iti mangkitkita iti kaunggan ken sumarut iti kararuana, a mangbigbig iti kinaimbagna ken kasta met iti kabaelanna, kasta met iti kangrunaan a kasapulanna.

“Kalpasanna dagiti simple a balikas—ket ni Jesus inayatna isuna. Nariknana ti napalaus a panagayat ken panangngaasi iti daytoy naimbag nga agtutubo a lalaki, ken gapu iti daytoy nga ayat ken kinaadda iti daytoy nga ayat, nagkiddaw ni Jesus kenkuana iti ad-adu pay. Nautobko no ania ti narikna iti daytoy nga agtutubo a lalaki a maparmek iti kasta nga ayat uray kabayatan a makidkiddaw nga agaramid iti maysa a banag a nakarigrigat kas iti panangilako iti amin a sanikuana ken panangted dagitoy kadagiti napanglaw. …

“[Sinaludsodko iti bagik] ‘Kasano a mapnoak iti ayat a kas ken ni Cristo tapno marikna dagiti [dadduma] ti ayat ti Dios babaen kaniak ket agtarigagay nga agbalbaliw?’ Kasano ti panangmatmatko [dagiti tao iti aglawlawko] a kapada ti panangmatmat iti Apo iti nabaknang nga agtutubo a lalaki, ti panangibilang iti kinapudno maipapan kadakuada ken no ania ti pagbalinanda, imbes a no ania laeng ti ar-aramidenda wenno saanda nga ar-aramiden? Kasano nga agbalinak a kas iti Mangisalakan?”¹

Panangsursuro a Mangkita kadagiti Dadduma

Mangisangbay kadagiti nabuslon a gunggona ti panangsursuro a mangibilang kadagiti dadduma kas iti ar-aramiden ti Mangisalakan. Makatulong dagitoy sumagmamano a singasing bayat ti panangaramidtayo iti daytoy a tun-oyen.

Kaam-ammom Ida
Ikagumaanan nga ammuen dagiti tao iti napudno ken personal a wagas saan laeng dagiti nabatad a pasamak iti biagda. Bigbigem a ti panangparnuay kadagiti pannakilangen ket agkasapulan iti panawen ken napudno a panagkagumaan. (Kitaen iti August 2018 Ministering Principles article “Building Meaningful Relationships” para iti tulong.)
Amirisem ti Bagim
Ikasom dagiti panaghusga a mabalin nga ar-aramidem a napanunotam wenno saanmo a napanunotan. Kitaem dagiti pagarup nga ar-aramidem maipapan kadagiti dadduma ket padasem nga awaten no apay a kasta ti marikriknam maipapan kadakuada.
Ipaidam ti Panaghusga
Bigbigem a saan a maibilang dagiti kasasaad iti pateg ti maysa a tao. Panunotem no sika ti adda iti kasasaadda ket panunotem no kasano ti kayatmo a panangkita kenka ti maysa a tao no sika ti adda iti kasta met la a kasasaad. Makatulong kadatayo ti panangisina kadagiti pili ken galad ti maysa a tao manipud iti nadiosan a pateg ken nasantuan a kabaelan a mangibilang kadakuada kas iti aramiden ti Mangisalakan.
Ikararagan nga Ayaten Ida
Masansan nga ikararagan ida babaen iti nagandaken para iti anus a mangpadur-as iti pudno a pannakigayyem. Nainkararagan a kitaem no kasano a pinagserbiam ida. Adda kadi nagdumaan iti ar-aramidem ken iti talaga a kasapulanda?

Binubos ni Jesus ti panawenna kadagiti tao manipud iti adu a nadumaduma a padas ti biag: dagiti nabaknang, dagiti agtuturay, ken dagiti gagangay a tao. Masansan nga Isu ti biktima ti saan nga umisu a panaghusga dagiti dadduma no kitaenda Isuna ken dagiti nanumo wenno awan kaes-eskan a kasasaadna. “No Isu makitatayo, awan ti kinaimnasna tapno tarigagayantayo koma. … Naumumsi Isuna, ken ditayo impatpateg” (Isaias 53:2–3).

Panagpaliiw a kas ken ni Cristo

Maysa a kabsat a babai ti nagestoria maipapan iti panangsursuro a matmatan ti kaarruba kas iti aramid ni Cristo:

“Agnaed ni Julia (nabaliwan ti naganna) iti asideg ko ket kasla awanan pulos ti gagayyemna. Kanayon a mariribukan ken makapungtot ti langana. Iti laksid ti kasta, inkeddengko nga agbalin a gayyemna. Saan laeng a gagangay a gayyem iti masansan a pannakipupapol, ngem pudno a gayyem. Makisaritaak kenkuana no agkitakami ket nangipakita iti interes iti ania man nga ar-aramidenna. In-inut, a nakaparnuayak iti nasinged a panaggayyem kenkuana, a nangisangbay iti rag-o iti pusok.

“Maysa nga aldaw, inkeddengko ti simmarungkar ken ni Julia ket dinamagko kenkuana maipapan iti pangngeddengna a saan a dumar-ay iti simbaan.

“Naammuak nga awan iti asideg a pamilia wenno kabagyanna. Ti kakaisuna a kabsatna a lalaki nga agnanaed iti adayo ti makisasao kenkuana iti maminsan laeng iti makatawen babaen iti telepono. Bayat ti idedengngegko kenkuana a nangipeksa iti sakit ti nakemna, gura ken pannakapaayna maipapan iti pamiliana ken iti Simbaan, napigsa a nangrimbaw kaniak ti saan a mapagkedkedan a rikna ti asi ken ayat para iti daytoy a kabsat a babai. Nariknak ti saem ken dagiti pannakapaayna. Naamirisko no kasano ti kinaliday ti panagbiagna. Kasla nangngegko ti naulimek a balikas iti likudak: ‘Ay-ayatek met isuna. Ayatem ken dayawem isuna.’

“Nagtugawak ket dimngegak agingga nga awanen ti maisaona. Nariknak ti ayat ken asi para kenkuana. Daytoy ti kabsat a babai a di kaano man nakaammo no ania ti rikna ti maayat. Kellaat a naawatak isuna iti naun-uneg pay. Nagyamanak kenkuana iti panangpalugodna a bumisitaak kenkuana, ket inarakupko isuna idi panawak nga addaan iti ayatko ken panagdayaw kenkuana. Dinanto pulos ammo no kasano ti panangsagidna iti riknak iti dayta a panagbisitak. Linuktan ti Nailangitan nga Ama dagiti matak ket insuronak nga addaanak iti kabaelan nga agayat nga addaan iti napadakkel nga asi. Inkeddengko a diak laeng agbalin a maysa a gayyemna no di ketdi agbalinak pay a pamilia kenkuana.”

Maysa a sagrado a banag ti maawis iti biag ti maysa a tao. Babaen iti panagkararag, panaganus, ken tulong manipud iti Espiritu, masursurotayo nga aramiden daytoy nga addaan iti ad-adda a pannirigan a kas ken ni Cristo.

© 2019 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/18. Pannakaanamongna a maipatarus: 6/18. Panakaipatarus ti Ministering Principles, June 2019. Ilokano. 15767 864