Pedped ko an Jerbal in Karejar, Juun 2019
Jerbal in karejar Ej Loļo̧k Ro Jet āinwōt an Kar Rilo̧mo̧o̧r Kōm̧m̧an
Jisōs eaar joļo̧k eļap An iien ippān ro kalimjōk er āinwōt roktak; Eaar lo jaklōj eo ekwojarjar aer.
Ilo kijejeto ko ad n̄an jerbal in karejar āinwōt Rilo̧mo̧o̧r eo, remaron̄ in kajjitōk ippād n̄an jerbal in karejar n̄an ro im roktak jān kōj. Menin eletok juon iien em̧m̧an bwe jen ekkatak im eddōkļo̧k.
Manit, jeļāļo̧kjeņ, armej, jeraam̧m̧an, iiō, m̧wiļ ko m̧okta ak kiiō, ak oktak ko jet remaron̄ kapidodoik ad ekajete juon m̧okta jen ad jeļā kōn er. Mōkaj in ekajet in ej pād ilo bōro in kalijekļo̧k, im Rilo̧mo̧o̧r eaar kakkōļ ņae menin (lale 1 Samuel 16:7; Jon 7:24).
Jemaron̄ ke erreilo̧k wōt jān oktak ko im kalimjek ro jet āinwōt an Rilo̧mo̧o̧r kōm̧m̧ane? Elmen ad jeļāļo̧k iakwe ro jet kōn wōn er im wōn eo remaron̄ in erom̧?
Lale im Iakwe
Baibōļ ej kwaļo̧k kōn ejja bwebwenato in wōt kōn likao eo em̧weie eo eaar kajjitōk elmen bwe en bōk mour indeeo: “Im Jisōs ej lale e im yokwe e, im E ba n̄an e, Juon men eo kwoj aikuj in: kwōn ilo̧k im wiakaki men ko otemjej am̧, im leļo̧k n̄an ro ri jeram̧ōl, im enaaj wōr m̧weiōm̧ i lan̄: im itok, im ļoor eō.” (Mark 10:21).
Ke Elder S. Mark Palmer jen Jiljilimjuon̄oul eo eaar ekkatak eoon in jet iiō remootļo̧k, juon m̧ōttan ekāāl ilo bwebwenato in eaar itok tok ippān.
“‘Im Jisōs ej lale e im yokwe e.’
“Ke iaar ron̄ naan kein, juon pija ealikkar eaar kaobrak ļōmņak eo aō kōn an ad Irooj bōjrak im lale likao in. Lale—āinwōt kalimjek e ilo m̧wilaļ im tōļon̄e jetōb eo an, kile em̧m̧an eo an im barāinwōt kōjatdikdik in wōn eo enaaj erom̧, barāinwōt jeļā aikuj eo an eļaptata.
“Innām naan ko relemwaan—Jisōs eaar iakwe e. Eaar en̄jake iakwe eo etōr jān jon̄an im meanwōd eo n̄an likao in em̧m̧an, im kōn iakwe in im ippān iakwe in, Jisōs eaar kajjitikiniļo̧k wōt kōn e. Iaar pijaik ta eo enkar āinwōt n̄an likao in ilo an jepooļ kōn kain iakwe in em̧ool ilo an kar kajjitōk n̄an kōm̧m̧ane juon men ekanooj in kar ļap an pen n̄an wia kake aolep men ko m̧wien im liļo̧k n̄an rijeram̧ōl. …
“[Iaar kajjitōkin eō make] ‘Ekōjkan aō maron̄ obrak kōn iakwe eo an Kraist, bwe [ro jet] ren maron̄ en̄jake iakwe eo an Anij jān n̄a im kōņaan oktak?’ Ekōjkan aō maron̄ lale [ro jet ipeļaakū] ilo ejja wāween eo Irooj ej lale likao eo eim̧weie, lo er kōn wōn lukkuun er im wōn eo remaron̄ erom̧, ijello̧kin baj wōt jān ta eo rej kōm̧m̧ane ak jab kōm̧m̧ane? Ekōjkan aō maron̄ eromļo̧k āinwōt Rilo̧mo̧or?”1
Jeļāļo̧k Kalimjek ro Jet
Jeļāļo̧k kalimjek ro jet āinwōt Rilo̧mo̧o̧r ej bōktok nōbar eļap. Erkein jet iaan kakkobaba ko me remaron̄ jipan̄ ilo ad jerbale kōttōbar in.
-
Jeļā Kajjier
Kōm̧m̧ani kijejeto ko n̄an jeļā kōn armej ro eļapļo̧k jen men ko ralikkar kadede. Kile bwe kalōk jemjerā ko ebōk iien im kijejeto. (Lale O̧kwōj 2018 Pedped in Katak ko an Jerbal in Karejar “Building Meaningful Relationships” n̄an jipan̄.) -
Etale Eok Make
Lukkuun lale ekajet eo kwoj kōm̧m̧ane ilo jejjet im jab jejjet. Lale repeltan ļōm̧ņak eo kwoj ļōm̧ņaki kōn ro jet im kajjieon̄ in meļeļe etke kwoj en̄jake kōn er ilo jekjek eo -
Jab Ekajet
Jeļa bwe jekjek ko rejjab kwaļo̧k aorōk eo an kajjojo. N̄e kwon kar pād ilo jekjek eo aer ļōmņake elmen am̧ naaj kar kōņaan bwe juon en lo eok eļan̄n̄e kwon kar pād ilo ejja jekjek in wōt. Kōjeno̧ļo̧k kālet ko an ro jet im m̧wiļ jān aorōk im kwojarjar eo aer make emaron̄ jipan̄ kōj lo er āinwōt kar Rilo̧mo̧o̧r. -
Jar n̄an Iakwe Er
Jar kōn er emakijkij kōn etaer im kōn kijenmej n̄an ejaake juon jem̧jerā eo em̧ool. Lukkuun kalimjōk jerbal in jipan̄ eo am̧ n̄an er. Ewōr ke kōta in ikōtaan ta eo kwoj kōm̧m̧ane im ta eo relukkuun aikuji?
Jisōs eaar joļo̧k An iien ippān elōn̄ kain armej ilo mour in: m̧weie, jeram̧ōļ, rikien ro, im armej ro. Ekkā an ro jet bōd in ekajet E n̄e rej lo E im jeram̧ōļ in Paoktokin ak jekjek ko ejjeļo̧k aorōkier. “N̄e jej lo E, E jab aiboojoj bwe jen kōņaan E. … Kar kōjekdo̧o̧n E, im kar jab kaorōk e” (Aiseia 53:2–3).
Loe Āinwōt Kraist
Juon sister eaar kwaļo̧k bwebwenato in kōn katak kalimjek eo riturun kōn māj ko āinwōt mejān Kraist.
“Julia (āt eo em̧ōj an oktak) ekar jokwe epaake eō im eaar ejjeļo̧k m̧ōttan. Eaar inepata im illu aolep iien. Ijeļo̧kin menin, iaar pepe bwe in juon m̧ōttan. Ejjab baj m̧ōttā bajjōk, ak juon m̧ōttā eo em̧ool. Ij kōnono ippān n̄e ij loe im kwaļo̧k itok limo ilo men ko ej kōm̧m̧ani. Jidik jidik, iaar ejaake juon jem̧jerā ippān, ebōktok m̧ōņōņō n̄an būrowō.
“Juon raan, iaar pepe in loļo̧k Julia im kajjitōk ippān kōn kāālet in jab etal n̄an jar eo an.
“Iaar jeļā bwe ejjeļo̧k an baam̧le ak nukun ro repaake. Ļaddik eo jein, eo ej jokwe ettoļo̧k, ej kōnono ippān juon kōtten ilo juon iiō ilo taļboon. Ke ij ron̄jake an kwaļo̧k an matōrtōr, illu, im rub būruween kōn baam̧le eo an im Kabun̄ in, juon en̄jake in tiriam̧o im iakwe n̄an sister in eaar lukkuun itok ioō. Iaar en̄jake an metak im kūtōtō. Iaar kile ewi jon̄an mour in ajimakeke eo an. Ekar āinwōt n̄e ij ron̄ an Jetōb Kwojarjar ba: ‘In bar iakwe e. Iakwe im kautiej e.’
“Iaar jijet im ron̄jake m̧ae iien eaar ejjeļo̧k men en eaar ba. Iaar en̄jake iakwe im tiriam̧o n̄an e. Sister in eaar juon eo eaar jab jeļā ta in iakwe. Tokālik iaar jeļā eļapļo̧k kōn e. Ij kam̧m̧oolol e kōn an kōtļo̧k bwe in loļo̧k e, im iaar atbokwoj e kōn aō iakwe im kautiej e. Eban jeļā ewi jon̄an an kar un̄ir eō kōn loļo̧k eo. Jemedwōj Ilan̄ eaar kōpello̧k māj ko meja im kar katakin eō bwe in kakkōt n̄an iakwe kōn eļap tūriam̧o. Ij pen ilo tōprak in aō ejjab wōt bwe in m̧ōttāik e ak in juon an baam̧le.”
Ej juon menekwojarjar n̄an ruaineneļo̧k ilo mour ko an ro jet. Kōn jar, kijenmen, im jipan̄ jān Jetōb, jemaron̄ jeļā n̄an kōm̧m̧an āindein n̄an loe eļapļo̧k āinwōt Kraist.
© 2019 jān Intellectual Reserve, Inc. All rights reserved…Kar jeje ilo USA. Kōmālim ilo kajin English: 6/18. Kōmālim an ukook: 6/18. Ukook eo an Ministering Principles, June 2019. Marshallese. 15767 874