Nongonongen Iamwir, August 2019

Ngang mi Tongeni Anisi Emon ne Siwin?

Ewer. Nge meni wisom epwe sokeno seni met ka ekieki.

Sia for ren ewe tufichin siwin. Ach sipwe fefeita ngeni ach ennetin tufich ina popunun manau ach won ei fonufan. Eu me nein ekkewe popunun ach iamwir pwe sipwe anisi ekkoch pwe repwe feitto ngeni Kraist me fori ekkewe siwin pwe repwe tongeni niwin ngeni I. Nge pokiten ar pungun finata, ach tufichin anisir nge winiti usun Kraist ese unus.

Iei fisu kinikinin kaeo mi pechekun seni ewe Chon Amanau ren ifa usun sia tongeni anisi ekkoch non ar achocho ne siwin me winiti usun I.

1. Kosap Noninen ne Etiwa Siwin

   Ewe Chon Amanau ese noninen an epwe etiwa emon ne nikitano ar fofforun nom me etiwa An kewe afanafan. A tingorei Peter me James ar repwe nikitano wiser me “winiti chon atauan mwan“ Mark 1:17. A tingorei ewe fefin a osukosuk non nisou mwan ne “feinno, me kouno ne tipis“ John 8:11. A tingorei ewe anuoun mi pisekisek an epwe nikitano an mochen mettochun fonufan me tapweno mwirin I (nengeni Mark 10:17-22). Kich mi pwan tongeni tingorei ekkoch ren ennetin popun me tong pwe repwe ekkisiwin me tapweno mwirin ewe Chon Amanau.

2. Chechemeni pwe Pwisin Finir ika Repwe Siwin

   Ewe sokkun siwin ewe Chon Amanau a tingor ese tongeni fis ika esap ennetin an emon mochen. Ewe Chon Amanau a aiti me tingor, nge I ese echimwa emon ika esap mochenin. Ewe anuoun mi pisekisek a “feinno non netipngaw“ (Matthew 19:22). Non Capernaum, chommong Noun kewe chon kuno ra fini ne “niwin sefan,“ me a eiseni ekkewe Engon me Ruemon ika ir resap pwan feinno (nengeni John 6:66-67). Ekkoch ekkewe chon kuno an John sou Papatais ra fini pwe repwe tapweno mwirin ewe Chon Amanau, pwan ekkoch rese fini usun ir (nengeni John 1:35-37;10:40-42). Sia tongeni etiwa pwan ekkoch pwe repwe winiti usun I, nge sise tongeni fini fan iter. Me ika rese mwo fini ar repwe siwin, sisap fangeta - pwan sisap mefi pwe ach achocho a sonap.

3. Iotek Fan Iten an Emon Tufichin Siwin

   Non An Iotek Fan Iter, Jisies a tingorei Kot pwe An chon kuno resap tori mettoch mi ngaw, repwe winiti usun I me ewe Sam, me repwe ur ren ewe tongen Kot (nengeni John 17:11,21-23,26). Me ren an sinei pwe Peter epwe osupwang ren pechekun ren an a fori wisan, ewe Chon Amanau a iotek fan itan (nengeni Luke 22:32). Ach iotek fan iten ekkoch a tongeni awora siwin (nengeni James 5:16).

4. Aitir ne Anongonong won An Manaman

   Me ren chok ewe Chon Amanau sia tongeni ennetin siwin me memarita ngeni ach ennetin tufich me non kich meinisin. I “ewe ann, ewe ennet o ewe manau. Ese wor emon epwe feinno ren ewe Sam ika ese punun ngang.” (John 14:6). Iwe me ren An manaman a tufich ”mettoch me apwangapwang ra tongeni pechekun” (Ether 12:27). Seni nuku non An manamanen achasefan mi tufich pwa Alma ewe anuon an epwe siwin (nengeni Alma 36:16-23). Sia tongeni aiti ekkoch pwe repwe anongonong won ewe Chon Amanau pwe ir ra pwan tongeni mefi an pechekunen ekkisiwin non manauer.

5. Fori Ngenir Usun met Ra Tongeni Winiti

   Tong me ketiwa ra tongeni minen ekkisiwini mi pochokun. Ewe fefen me non ewe nenien konik a nom fengen ren emon mwan esap punuwan. An Jises kewe chon kuno ”ra amwarar pwa a foos ngeni ei fefen” (John 4:27), nge Jises an chok ekieki usun met ra tongeni winiti. A aiti me ngeni i ewe tufichin siwin, minne a fori. (Nengeni John 4:4-42.)

   Ika sia fori ngeni emon usun met a for me nom nge esap met ra tongeni winiti sia tongeni epeti ar repwe siwin. Nge sipwe fen omusano me nemenano fofforun mwan seni me nom. Sia tongeni nuku pwe ekkoch ra tongeni siwin. Sisap ekikei an emon apwanapwang me sipwe esinna ekkewe mettoch mi och non minne rese tongeni pwisin esinna. ”Mi wor wisach pwe sipwe kuna aramas usun met ra tongeni winiti esap ren napanaper iei.”¹

6. Mut Ngenir pwe Repwe Siwin ren Pwisin Mwitirir

   Fansoun a namwot ren siwin. Kich meinisin sipwe sopweno non engino tori sia winiti unusoch (Doctrine and Covenants 67:13). Jises a engino ren pwan ekkoch me a sopweno ne aitir ina mwo rese tipeu ngeni I, ren An apwarata Wisan seni Seman me apenuweni ar kewe kapas eis. (nengeni Matthew 13:1-13; John 7:29-29). Sia tongeni mefi engino ngeni ekkoch me etiwa ir pwe repwe engino ngeni pwisin ir.

7. Kesap Fangeta ika Ra Niwin Ngeni Fofforun Nom

   Mwirin Kraist a mano Peter me pwan ekkoch ekkewe Aposel ra niwin sefan ngeni met ra pwisin sinei (nengeni John 21:3). Kraist a achema ngeni Peter pwe epwe ”amongeni [Noun] siip” (nengeni John 21:15-17), me Peter a niwin sefan ngeni an iawmwir. A mecheres ne niwin ngeni ach fofforun nom. Sia tongeni sopweno ne anisi ren etiwa mi petetei me kapasen etiwa a feitio seni ewe Ngun ne sopweno ne tapweno mwirin ewe Chon Amanau me achocho ne winiti usun I.

Mut Ngeni Ekkoch pwe Ra Tongeni Mamarita

Elter Jeffery R. Holland seni ewe Mwichen ekkewe Engon me Ruemon Aposel a afanafana ei porous usun ach sipwe mut ngeni emon an aepwe mamarita; ”Ngang uwa rong usun emon anuoun fan fitu ier aramas ra turunufas. Mi wor ekkoch an weires iwe popun a mecheres ekkoch ra turunufas i. Mwirin non manaun a feinno seni nenian. I fiti ewe mwichen sounfiu me a tufichin sopweno an kaeo non sukun me rikino seni manauan. Usun chommong me non ewe mwichen sounfiu a essina ewe amwararan ewe Mwichefen me fefiti sefan me a pwapwa.

Iwe mwirin ekkoch ier a niwin ngeni pwisin nenian seni neatun. Napengeni chon tappin ra fen feinno pwan nge esap meinisin. Iwe, nupwen a niwin a men pisekisek me sokono, ewe ekiekin nom a chiwen nom ren ekkewe aramas ren an niwin. Ngeni ekkewe aramas non nenian, a chok na emon …

”Ekkis me ekkis an ei mwan achocho usun Paul ne suseni met me nom me kamacheno An Kot niffang ngeni a ekkiseno tori ese chiwen fiis me a mano ekkis usun a poputa. … A men sonap pwe a nom me nein ekkewe rese ekieki usun met a tongeni winiti ra chok met a for me nom. Ra witi sen poun me Kraist a fen witi fan itan pwisin. Me a ano non an netipingaw, ina mwo ese pwisin tipisin. …

”Mut Ngeni Aramas repwe Aier. Mut ngeni aramas ar repwe fefeita. Nukunuk pwe aramas ra tongeni siwin me fefeita.”²

© 2019 by Intellectual Reserve, Inc. All rights reserved. A för non Amerika. Kapungunon non fosun Merika: 6/18. Kapungunon chiakun: 6/18. Chiakun Ministering Principles, August 2019. Chuukese. 15769 901

Esinesin

1. Thomas S. Monson, “See Others as They May Become,“ Liaona, Nov. 2012, 70.

2. Jeffrey R. Holland, “The Best Is Yet to Be,”Liaona, Jan. 2010, 19, 20.

Etiwan Foffor

Met ka tongeni for non ei wiik ne etiwa me anisi ekkoch non ar achocho ne winitie usun ewe Chon Amanau.