Ukpebnkpo Unwam, Ofiong August ke isua 2019

Nte Ami Mmekeme Ndinwam Owo-kiet Okpuho?

Ihn. Edi ubiong fo ekeme ndikeme ndikpuhore akan nte afo ekerede.

Ekebot nnyin ye ukeme man idi-kpuho. Ndikori nkesim edisana ndaha nnyin edi ntak emi nnyin inyenede uwem ikpokidem. Kiet kotu akpatre uduak nnyin ke unwam edi ndinwam mbon efen nditiene Christ nyung nam ukpuhore emi edinwamde mmo ndifiak nka iso Esie. Edi oto ke ntak mbumek mmo, ubiong nnyin ke ndinwam mmo ekabare etie nte Enye edi ekpri.

Se emi edi mkposong ukpebnkpo itiaba otode Andinyanga kabanga nte nnyin ikpenwamde mbon efen ke ukeme mmo man ekpuhore enyung ekabare etie nte Enye.

Ku kop Ndik Ndikot Owo ete Okpuho

Andinyanga ikokopke ndik ke ndikot mbon efen ete eworo-ekpong nkani edu uwem enyung enyime ukpebnkpo Esie. Enye okot Peter ye James ete ekpong ubok-utom mmo enyung “ekabare edi mme oko-owo”(Mark 1:17). Enye odoho nnwan emi ekemumde ke efibe ete “yong okuo; kunam aba idioknkpo” (John 8:11,). Enye okot ekpri owo inyene oro ete okpong ndibuot-idem ke inyene ererimbot esie onim onyung etiene Enye (se Mark 10:17–22). Nnyin nko imekeme ndinyene uko ye ima owo ke nte nnyin ikotde mbon efen ete enam ukpuhore enyung etiene Andinyanga.
Ti ete Kedi Mbumek Mmo ke Ndikpuho

Inaha nte ekpa-kpak kabnga oruk ukpuhore emi Andinyanga oyomde. Andinyanga okono ukpenkpo onyung okot, edi Enye ikakpak-ke-kpak. Akparawa enyene-inyene oro “ama onyong ye mfuho” (Matthew 19:22). Ke Capernaum, ediwak mbet Esie ema emek “ndifiak nyong,” ndien Enye obup mbet Esie Duopeba ete mme odong mmo nko ndidiangare nyong (se John 6:66–67). Ubak mme mbet eke John the Baptist ema emek nditiene Andinyanga, ubak eken ikonyimike (se John 1:35–37; 10:40–42). Nnyin imekeme ndikot mbon efen ete ekabare etie nte Enye, edi nnyin ikemeke ndinam ubiere edikpuhonno mmo. Ndien edieke mmo mimekke ndikpuhore kanga, inaha nte nnyin itre do—mme ke ndikere ete ke nnyin imekpu.
Ebong-akam ebenge Ukeme eno Mbon efen man Ekpuho

Kini Akam Mkpe-ubok Esie, Jesus ebenge Abasi ete ekpeme mbet Esie osio ke idiok, ekabare etie nte Enye ye Ete, enyung eyoho ye ima Abasi (se John 17:11, 21–23, 26). Ndien ndifiok ke Peter eyeyom nsongonda ke ukeme esieman okori ke ioot esie, Andinyanga ebenge mbuotidem ono enye (se Luke 22:32). Akam nnyin kabanga mbon efen ekem ndinam edikpuhore nkpo kiet (se James 5:16).
Ekpeb Mmo ndinyene Mbuotidem ke Odudu Esie

Otoke Andinyanga kpot ke nnyin idinehede ikpuho inyung ikori ikesim edisana ndaha emi kpukpru nnyin inyenede. Enye edi “usung ye akpaniko ye uwem: owo baba kiet itieneke Ete, Ibohoke ebe ke [Enye]” (John 14:6). Odudu Esie ekeme ndinam “ndimem nkpo akabare osongo-nda” (Ether 12:27). Okoto mbuotidem ke odudu erisio-isop Esie akanam Ekpri Alma ekeme ndikpuho (se Alma 36:16–23). Nnyin imekeme ndikpeb mbon efen ete ebuot-idem ke Andinyanga man mmo nko ekeme ndinyene edisana odudu Esie ke uwem mmo.
Eda Mmo nte Mmo Ekemede Ndikabare-ndi

Ima ye edinyime ekeme ndi-di mme usung odud ke ndikpuhore. Nnwan oro ke obube-mmong okodung ye erenowo emi mikedighe ebe esie. Mme mbet Jesus “ekodu ke mkpaidem ke nte enemede-nneme ye nnwan oro” (John 4:27), edi Jesus ekese abanga se enye ekemede ndikabare ndi. Enye ekpeb enye nkpo onyung ono enye ufang ndikpuho, emi enye akanamde. (Se John 4:4–42.)

Kini nnyin idade mbon efen nte mmo ekedide ikan nte mmo edikabare idi, nnyin iyekeme ndida mmo mfiak ndi. Ke ndaha efen, nnyin imekeme ndifen-nno nyung mfre nkani ndudue. Nnyin imekeme ndinim ete ke mbon efen ekeme ndikpuho. Nnyin isehe mmem-idem mmo edi ise nti edu emi mmo mikemeke ndikut ke esit idem mmo. ”Nnyin imenyene ubiong nditre ndikut mme owo nte mmo edide ediikut nte se mmo ekemede ndikabare ndi.”¹
Eyak Mmo Enam-nkpo ke Ndaha Ukeme Mmo

Edikpuho-nkpo esida ini. Ana ofuri nnyin “ika-iso ke ime tutu [nnyin] ifon-ima” (Doctrine and Covenants 67:13). Jesus ama enyene ime ye mbon efen man ekpeb mbon emi ekesuade Enye, eting iko ntiense abanga utom emi Ete Esie okonode Enye onyung oboro mbume mmo (se Matthew 12:1–13; John 7:28–29). Nnyin imekeme ndinyene ime ye mbon efen inyung inwam mmo ndinyene ime ye idem mmo.
Ekutre Ndinwam Edieke Mmo Efiakde eduk Nkani Usung

Ke Christ ama akakpa, Peter ye ubak mme Mbet ema efiak ekenam mme nkani ido emi mmo ekesinamde (se John 21:3). Christ eti Petre ete ke enye enyene “ndibok mme erong [Esie]” (se John 21:15–17), ekem Peter afiak aka utom ukworo-iko Abasi. Ekeme ndinehede mmem ndifiak nduk nkani usung. Nniyn imekeme ndika-iso nno unwam ke esisit osongo ye nti ikoot man mmo eka-iso etiene Andinyanga enyung edomo ndikabare ntie nte Enye.

Eyak Mbon-efen Ekori

Elder Jeffrey R. Holland eke Eboho mme Apostle Duopeba ono mbukkabanga ndiyak mbon efen ekori ete: “Ini kiet ema eting eno mi ebanga akparawa kiet emi ke ediwak isua ekesiwakde ndidi nkpo nsahi ke ke kpukpru mbubru ke ufoknwed esie. Enye ama enyene mmemidem, ndien ama emem ono mme ufan esie ndidi-sahi enye. Edikem nte ini akade enye ama okpong ebiet oro. Ke akpatre enye ama okoduk ekong onyung enyene nti nworo-nda ifiok-ukpeb do ke ndika ufoknwed nyung nkan mme nkani mmemidem esie. Ke akande oro, ke nte mme ediwak owo esinamde ke utom-ekong do, enye edikut nti ye ndiye nkpo eke Ufok Abasi ndien akabare esin-ifik onyung enyene inem-esit do.

“Edikem, ke ediwak isua ama ekebe, enye afiak edi ke obio uyen esie. Ediwak mbon emana esie ema ekpong obio oro edi ikedighe ofuri owo. Nte ededi, kini enye akafiakde edi,ke amao ekenyene eti nworo-nda ye obufa ukpuhore, akani ekikere emi okodude do okosuk odo-du do, ke ebet edifiiak ndi esie. Eke mbon obio emana esie, enyen ekesuk edi akani ‘owo nsahi emi mmo ekesifiokde.’ …

“Esisit ye esisit ofuri ukeme owo emi man okpong akani ido emi ama ekbe ke edem onyung omum eno emi Abasi okonode enye ama otongo ndinime tutu enye edikpa osuk odo-du ke akani usung emi enyen okodude kini uyen esie. … Enehede odiok, okpon mbom koro enye akafiak okodu ye … mbon emi ekekerede ke ini edem esie ama ofon akan ini iso esie. Mmo ema ebo enye nti nkpo emi Christ ekesinde enye ke idem. Ekem enye edikpake mfuho, emi esisit otode ndudue eke idem esie. …

“Yak mme owo ekabare esit. Yak mme owo ekori. Enim ke mme owo ekeme ndikpuho enyung enam ofon.”²

© 2019 otode Intellectual Reserve, Inc. All rights reserved. Ekeming ke USA. Enyime edikabare ke Ikɔ Mbakara: 6/18. Enyime ndikabare: 6/18. Edikabare eke Ministering Principles, August 2019. Efik. 15769 553