E Rawa Beka Meu Vukea E Dua Me Veisau?

Io. Ia na nomu ilesilesi e rawa ni duidui mai na kena o vakasamataka tiko.

Eda a buli vata kei na yalo ni da rawa ni veisau. Na noda tubu cake tiko ki na noda gugumatua vakalou sai inaki ni noda bula oqo. E dua na noda lalawa cecere duadua ni veiqaravi o ya meda vukei ira eso me ra lako mai vei Karisito ka vakayacora na veisau e gadrevi me da lesu tale ki na Nona iserau. Ia ena vuku ni nodra galala ni digidigi, sa vakaiyalayala walega na noda itavi ena nodra vukei mera yaco me va-Karisito vakalevu cake.

Oqo e vitu na lesoni kaukauwa mai vua na iVakabula ena sala meda vukei ira tale eso ena nodra sasaga mera veisau ka yaco mera vakataki Koya vakalevu cake.

Kakua ni Rere mo Sureta Mera Veisau

A sega ni rere na iVakabula me sureti ira eso mera vakanadakuya na bula makawa ka ciqoma na Nona ivakavuvuli. A sureti Pita kei Jemesa me biuta kina na nodrau cakacaka ka “yaco [me rau] gonedau ni tamata” (Marika 1:17). A sureta kina na marama a kunei ni dautagane tiko me “lako, ka kakua tale ni ivalavala ca” (Joni 8:11). A sureta na cauravou vutuniyau me solia yani na nona iyau vakavuravura ka muri Koya (raica na Marika 10:17–22). Sa rawa ni da qaqa ka dauloloma ni da sureti ira eso mera na veisau ka muria na iVakabula.
Nanuma Tiko Ni Sa Nodra na Digidigi Mera Veisau

Na mataqali veisau e veisureti kina na iVakabula e sega ni rawa ni vakasaurarataki. A veivakavulici ka veisureti na iVakabula, ia a sega ni veivakasaurarataki. A “sa lako tani a sa rarawa na lomana” na cauravou vutuniyau (Maciu 19:22). E Kapenaumi, e vuqa vei ira na Nona tisaipeli era a digitaka mera “suka tani,” ka taroga o Koya vei iratou na Tinikarua kevaka eratou sa via lako tani talega (raica na Joni 6:66–67). Eso vei ira na tisaipeli i Joni na Dauveipapitaisotaki era a digitaka mera muria na iVakabula, eso era sega (raica na Joni 1:35–37; 10:40–42). Eda rawa ni sureti ira tale eso me ra vakataki Koya vakalevu cake, ia eda sega ni rawa ni lewa meda veisautaki ira ena vukudra. Ia kevaka era se bera ni digitaka mera veisau, e sega ni dodonu meda sa vakasukasuka—sega talega ni dodonu me da nanuma ni da sa vakadrukai.
Masulaka Nodra iGu na Tamata Mera Veisau Rawa Kina

Ena gauna ni Nona Masu ni Veinanumi, a kerea o Jisu vua na Kalou me ratou taqomaki na Nona tisaipeli mai na veika butobuto, me ratou na vakataki Koya vakalevu cake kei na Tamana, ka vakasinaiti ena loloma ni Kalou (raica na Joni 17:11, 21 – 23, 26). Ni sa kila tu ni na gadreva na kaukauwa o Pita ena nona sasaga me tubu ena nona ilesilesi, a qai masulaki koya na iVakabula (raica na Luke 22:32). Na noda masulaki ira na tamata ena rawa me vakayaco-veisau (raica na Jemesa 5:16).
Vakavulici Ira Mera Vakararavi ki na Nona Kaukauwa

Sa mai vua duadua ga na iVakabula eda sa rawa vakaidina kina ni veisau ka tubu cake yani meda gugumatua vakalou sa tu vei keda kece. Sai Koya “na sala, kei na vu-ni-dina, kei na vu-ni-bula, sa sega ni torovi [Tamana] walega e dua na tamata, ena [Vukuna] ga” (Joni 14:6). Ena Nona kaukauwa ga sa yaco “me vu ni nodra kaukauwa na veika malumalumu” (Ica 12:27). Ena nona vakabauta na Nona kaukauwa veisorovaki a rawa kina vei Alama Lailai me veisau rawa (raica na Alama 36:16–23). Eda rawa ni vakavulici ira na tamata me ra vakararavi vua na iVakabula me rawa talega me nodra na Nona kaukauwa veivakasavasavataki ki na nodra bula.
Qaravi Ira ni Sa Rawa Mera Tamata-Yaco

Na loloma kei na veiciqomi e rawa ni matataka vakaukauwa na veisau qaqa. Na yalewa ena ikeli-wai a bula vata tiko kei na tagane e sega ni watina. O ira na tisaipeli Jisu era “a kurabui ni rau sa veivosaki kei na yalewa” (Joni 4:27), ia a kauwai vakalevu cake o Jisu me baleta na ituvaki e rawa ni yacova. A vakavulici koya ka solia vua na madigi me veisau, ka vakayacora sara. (Raica na Joni 4:4–42.)

Ni da raici ira na tamata ena kedra ituvaki ka sega ni raica na ituvaki era na laki yacova, eda rawa ni vakaluluqataki ira. Ia, sa rawa meda veivosoti ka guilecava na cala sa oti. Eda rawa ni vakabauta ni ira na tani e rawa ni veisau. Eda rawa ni raibaleta na malumalumu ka dusia na ivakarau vinaka era sega beka ni rawa ni raica tiko vakai ira. “Sa tu na itavi me da raici ira na tamata yadua sega ena kedra ituvaki ia na kedra ituvaki mera na yacova.”¹
Laiva Mera Lako ena Nodra Gauna Ga Vakai Ira

Na veisau e taura na gauna. Sa dodonu me da na “vosota tikoga me yacova ni [da] sa vinaka sara” (Vunau kei na Veiyalayalati 67: 13). O Jisu a vosoti ira na tamata ka tomana tikoga na nona veivakavulici vakakina vei ira era saqati Koya, ka vakadinadinataka tiko na Nona ilesilesi sa solia Vua na Tamana ka sauma na nodra vakatataro (raica na Maciu 12:1–13; Joni 7:28–29). Sa rawa meda vosoti ira na tamata ka vakayaloqaqataki ira me ra dau vosoti ira vakai ira.
Kakua ni Vakasukasuka Kevaka Era Lesu Tale ki na Nodra iVakarau Makawa

Ni sa mate na Karisito, o Pita sara mada ga kei na so vei iratou na iApositolo era a lesu tale ki na bula era sa kila vinaka tu (raica na Joni 21:3). A veivakananumi na Karisito vei Pita ni dodonu me na “vakani ira na [Nona] na sipi” (raica na Joni 21:15–17), ka sa lesu o Pita ki na cakacaka ni lotu. E rawa ni dau rawarawa me da lesu tale ki na sala makawa. Eda rawa ni tomana na veitokoni vata kei na malumu ni veivakayaloqaqataki kei na veisureti veivakauqeti meda tomana tikoga me da muria na iVakabula ka saga meda vakataki koya vakalevu cake.

Vakatara Vei Ira na Tamata me ra Tubu Cake

E talanoataka oqo o Elder Jeffrey R. Holland ena Kuoramu ni iApositolo Le Tinikarua me baleta noda vakatara vei ira na tamata mera tubu cake: “A tukuni vei au me baleta e dua na cauravou a sotava tu ena vuqa na yabaki na nona dau veiwalitaki vakaca ena nona koronivuli. A malumalumu tu o koya ena vica na ka, ka rawarawa sara vei ira na nona icaba mera dau vakasewasewani koya. E muri a toso sara yani na nona bula. A qai laki lewena sara na mataivalu ka sotava eso na gauna qaqa e kea ka vuli vinaka ka sa gole tani mai na nona bula makawa. Mai na veika kece, me vaka era cakava e vuqa ena mataivalu, a kunea na totoka kei na lagilagi ni Lotu ka daulotu sara ka bula marau kina.

“Ia, ni oti e vica na yabaki, a lesu tale ki na tauni ni nona gauna ni itabagone. E vuqa vei ira era a itaba vata era sa toki yani ia e sega ni o ira taucoko. E matata, ena nona lesu mai ena qaqa ka sa tamata sucuvou, na mataqali itovo ni vakasama makawa e liu se tikoga e kea, waraka tiko na nona lesu mai. Kivei ira na tamata ena nona tauni e tiko kina, o koya se ‘o koya tiko-tiko-ga’ e liu …

“Vakalalai tiko na sasaga Lailai ni tamata oqo me biuta na veika sa oti ka qumia na icocovi sa solia vua na Kalou sa mai vakalailaitaki sobu me yacova ni sa mate me vaka na nona a bula voli vaka-itabagone. … Sa ca sara, sa ka rarawa talega me mai vakavoliti tu maivei … ira era nanuma ni nona gauna sa oti e taleitaki vakalevu cake mai na nona veisiga ni mataka. Era sa rawata kina mera kovea tani na ka e ququmi tiko kina sa qumi koya tiko kina na Karisito. A qai mate ena rarawa, dina ga mai na nona veicala lalai talega. …

“Me veivutuni na tamata. Mera tubu na tamata. Vakabauta ni sa rawa vei ira na tamata mera veisau ka torocake. ”²

© 2019 by Intellectual Reserve, Inc. All rights reserved. Tabaki e Amerika. Vakadonui me vaka-Valagi: 6/18. Vakadonui me vakadewataki: 6/18. iVakadewa ni Ministering Principles, August 2019. Fijian. 15769 858