Reirein te Mwakuri n Ibuobuoki, Aokati 2019

I Konaa ni Buoka Temanna ni Bitaki?

Eng. Ma tabem e na riki ni kaokoro nakon are ko iangoia.

Ti bane ni karikaki ma te konabwai ni bitaki. Rikirakera nakon ara konabwai ae mairoun te Atua bon ibukin ara taneiai ae mamate. Teuana man rietaatan ara kouru inanon te mwakuri ni ibuobuoki bon buokaia tabeman n roko nakon Kristo ao ni karaoi bitaki aika riai n oki Nakoina. Ma ibukin inaomataia n rinerine, katabeara ni buokiia n riki n aron Kristo e bon tiatianaki.

Aikai itiua reirei aika a rangi ni korakora mairoun te Tia Kamaiu iaona bwa e kanga ae ti na kona ni buokiia tabeman inanon aia kekeiaki ni bitaki ao n riki n ai Arona.

1. Tai Maaku ni Butimwaea te Bitaki

   Te Tia Kamaiu e aki maaku ni kaoiia tabeman ni katoki bwaai ake a tia ni kakaraoi mai mwaina ao ni butimwaea ni koaua Ana reirei. E butimwaea Betero ao Iakobo ni kitanii aia mwakuri ao “kam na riki ba tan akawa aika konami aomata” (Mareko 1:17). E butimwaea te aine are e kuneaki ni wene ni bure n “ko na nako; tai manga bure” (Ioane 8:11). E butimwaea te rorobuaka n anganako ana bwai nako ao ni Iriiria (taraa Mareko 10:17–22). Ti konaa naba ni kaai n ninikoria ao n tangiriia ngkana ti butimwaiia tabeman ni karaoi taian bitaki ao ni iriira te Tia Kamaiu.

2. Uringnga Bon Aia Rinerine ni Bitaki

   Te aeka ni bitaki are e butimwaia te Tia Kamaiu e aki kona ni kairoro. Te Tia Kamaiu e reirei ao e butimwaai, ma E aki kairoroa temanna. Te rorobuaka ae kaubwai “e nako ma rawawatan nanona” (Mataio 19:22). I Kaberenaum, mwaitia Ana reirei a rineia ni “kekiraki,” ao E titirakiniia Tengaun ma Uoman ao ngkami kam kan nako naba (taraa Ioane 6:66–67). Tabeman taan ririmwin Ioane te Tia Bwabetito a rineia n iriira te Tia Kamaiu, tabeman a aki (taraa Ioane 1:35–37; 10:40–42). Ti kona ni kaoiia tabeman riki n ai Arona, ma ti aki kona ni karaoa te babaire nakon bitakiia. Ao ngkana a tuai n rineia ni kan bitaki, ti riai n aki bwarannano—ke ti riai n namakinna ae ti aki konaa.

3. Tataro ibukin aia Konabwai Tabeman ni Bitaki

   Inanon Ana Tai ni Mwakuri n Tataro Ibukiia, Iesu e bubutia te Atua bwa Ana reirei a na kawakinaki man te buakaka, a na riki n ai Arona ao te Tama, a na kaonaki ma ana tangira te Atua (taraa Ioane 17:11, 21–23, 26). Ao n ataakina bwa Betero e na kainnanoa te korakora inanon ana kekeiaki n rikirake inanon katabeana, te Tia Kamaiu e tataro ibukina (taraa Ruka 22:32). Ara tataro ibukiia tabeman e kona ni karekea te bitaki (taraa Iakobo 5:16).

4. Reireiniia bwa A na Onimakina Mwaakana

   Bon ti rinanon te Tia Kamaiu are ti na kona ni bitaki ni koaua ao man waaki nakon te konabwai ae mairoun te Atua are iai iroura ni kabane. “Boni Ngai te kawai, ao te koaua, ao te maiu: akea ane nako n te Tama, bati i [Rou]” (Ioane 14:6). Bon Mwaakana are e konaa ni “karaoi baika mamaara bwa aonga ni korakora” (Ita 12:27). Bon te onimaki inanon mwaakan Ana mwakuri ni kamaiu are e karekea te anga are e na bitaki iai Aramwa te Ataei (taraa Aramwa 36:16–23). Ti kona n reireiniia tabeman n onimakina te Tia Kamaiu n te aro are ngaiia a konaa ni karekea mwaakana ni kaitiakaki inanon maiuia.

5. Kairiia Raoi bwa a Aonga ni Kona n Riki Nako Iai

   Tangiria ao butimwaea bwa aonga ni kona ni bitaki n ae korakora. Te aine ietan te mwanibwa e maeka ma te mwaane are tiaki buuna. Ana reirei Iesu “ao a mimi ba E taetae ma te aine” (Ioane 4:27), ma Iesu e kaota ana nanoanga ni kan buoka neiei bwa tera are e na kona n riki iai. E reireina neiei ao e anganna ana tai ni bitaki, ike e karaoia neiei. (Taraa Ioane 4:4–42.)

   Ngkana ti buokiia tabeman n aron are a mena iai nakon are a na konaa n riki iai, ti konaa n tauiia rikaaki. Onean mwina, ti kona ni kabwarai buure ao ni mwaninga kaairua ake rimoa. Ti kona ni kakoaua bwa tabeman a konaa ni bitaki. Ti kona n aki noori kabwakaia ao n kinai anuaia aika raraoi are a aki nooria i bon irouiia. ”Ti na karekea te katabeaki n iangoiia n tatabemaniia tiaki n aroia ae ngkai ma n aroia are a na konaa n riki iai.”¹

6. Kanakoia N Oin Mwanekaia

   Te bitaki e kona n anaa te tai. Ti riai ni kabane n “reitinako inanon te taotaonakin nano ni karokoa [ti] a kororaoi” (Reirei ao Berita Aika Tabu 67:13). Iesu e taotaona nanona ma tabeman ao n reitinako n reireiniia riki te koraki ake a totokoia, kakoauan Ana mwakuri are e Anganaki iroun Tamana ao ni kaekai aia titiraki (taraa Mataio12:1–13; Ioane 7:28–29). Ti kona n taotaoni nanora riki ma tabeman ao ni kaungaiia bwa a na bon taotaoni nanoia.

7. Tai Kabwara Nanom Ngkana A Manga Okira Aroia Ni Maeka Are Mai Mwaina

   Imwin maten Kristo, Betero ao tabeman riki mairouia Abotoro a okiri aroia are a tia n tataneiai iai (taraa Ioane 21:3). Kristo e kauringa Betero bwa e riai ni “kakamarakeia [Ana] tiibu” (taraa Ioane 21:15–17), ao Betero e okira te mwakuri. E kona n rangi ni bebete n okiri kawai ake mai mwaina. Ti kona n reitinako ni boutoka ma te kaunganano ae marau ao te kakao ae anainano n reitinako n iriira te Tia Kamaiu ao ni kataia n riki n ai Arona.

Kariaia Tabeman bwa A na Rikirake

Unimwaane Jeffrey R. Holland man te Tengaun ma Uoman n Abotoro e taekina te karaki aei ae taekan aron kariaiakaia tabeman n rikirake: “I tuangaki ngkoa taekan te kairake n ataeinimwaane are inanon ririki aika mwaiti e aki toki ni wawanigareaki n ana reirei. Te ataeinimwaane aio bon te akea arona, ao e rangi ni bwabwainingareaki irouiia raoraona ni kaenaenaaki. Rimwi riki inanon maiuna ao e mwaing nako. E ngae n anne e kaaina te tanga ni buaka ao e rinanon tabeua taneiai aika materaoi ao ni karekean ana reirei ao n aron taekana e a waaki nako ni kitan arona ake rimoa. E a riki ngaia bwa te aomata ae rietata ao man kakawaki, e kunea tamaroan ao mimitongin te Ekaretia ao ni kakaonimaki riki ao ni kukurei inanona.

“Ngkanne, imwiin tabeua te ririki, e okira ana taaun are e ikawairake iai. Angiin ana roro a tia ni mwaing nako ma tiaki ni kabane. N te aro anne, ngke e oki ao ai bon te aomata ae e rangi ni bitaki ao man manga bungiaki kaaua, ti tebo ma arona ni iango are e a tia mena iai mai mwaina e bon tiku naba ikekei, n tataninga okina. Irouiia aomata ake n ana kaawa, e bon tiku naba n aia iango bwa tii te arona ni kamanenaakin arana ae onoti n onean mwiin are bon arana. …

N tokin te tai ana kekeiaki te mwaane aei n aron Bauro are n te Baibara e katikui bwaai ake ngkoa ao n anaa te kanuanga are e a tia te Atua ni kawenea imatana e tabe ni karaurau ni kekerikaaki ni karokoa e mate taekan te kawai are e maeka iai inanon kairakena. … E rangi ni buakaka, e rangi ni kananokawaki bwa e a manga katobibiaki irouia … koraki ake a iangoa arona rimoa bwa e na kakaongora riki nakon ana tai aika a na roko. E reke bwaranakona mairouia bwa ibukina bwa e a tia Kristo ni mwaneia n taua teuaei. Ao e mate n nanokawaki, e ngae n anne e rinanon teutana ana kaairua. …

“Kariaia aomata bwa a na rairinanoia. Kariaia aomata bwa a na rikirake. Kariaia bwa aomata a na kona ni bitaki ao n rikirake.”²

© 2019 by Intellectual Reserve, Inc. All rights reserved. Boretiaki i USA. Kariaiakaki n te Ingiriti: 6/18. Kariaiakaki rairana: 6/18. Rairan te Ministering Principles, August 2019. Kiribati. 15769 859

Bwaai aika a na taraaki

1. Thomas S. Monson, “taraa Others as They May Become,” Riaona, Nob. 2012, 70.

2. Jeffrey R. Holland, “The Best Is Yet to Be,” Riaona, Tian. 2010, 19, 20.

Te Kakao ni Mwakuri

Tera ae ko kona ni karaoia n te wiiki aei ni kaoiia ao n boutokaiia tabeman inanon aia kekeiaki ni bitiia ao n riki n ai aron te Tia Kamaiu?