Mga Prinsipyo sa Ministering, Agosto 2019

Mabuligan Ko Bala ang Isa Ka Tawo nga Magbag-o?

Huo. Pero ang imo tulumanon mahimo nga lain sangsa imo ginahunahuna.

Gintuga kita nga may ikasarang sa pagbag-o. Ang pagtubo padulong sa aton diosnon nga potensyal amo ang katuyuan sang aton kabuhi sa kalibutan. Isa sa aton pinaka-katuyuan sa ministering amo nga buligan ang iban nga magkari kay Cristo kag maghimo sang kinahanglanon nga mga pagbag-o agud makabalik sa Iya presensya. Pero bangod sa ila kahilwayan sa pagpili, ang aton papel sa pagbulig sa ila nga mangin mas pareho pa gid kay Cristo limitado.

Yari ang pito ka mabaskog nga mga leksyon gikan sa Manluluwas kon paano naton buligan ang iban sa ila pagpaninguha nga magbag-o kag mangin mas pareho sa Iya.

Indi Magkahadlok sa Pag-agda sang Pagbag-o

Ang Manluluwas wala nagkahadlok nga mag-agda sang iban nga bayaan ang daan nga mga pangginawi kag magsunod sa Iya mga panudlo. Gin-agda Niya si Pedro kag si Santiago nga bayaan ang ila mga trabaho kag “[mangin] mga mangingisda sang mga tawo” (Marcos 1:17). Gin-agda Niya ang babayi nga nadakpan sa pagpanglahi nga “[mag]lakat, kag kutob karon dili ka na magpakasala” (Juan 8:11). Gin-agda Niya ang manggaranon nga pamatan-on nga buy-an ang iya pagkahilig sa dutan-on nga mga butang kag magsunod sa Iya (tan-awa sa Marcos 10:17–22). Kita man sarang nga mangin alangay nga maisog kag mapinalanggaon samtang aton ginaagda ang iban nga maghimo sang mga pagbag-o kag magsunod sa Manluluwas.
Panumduma nga Ila Pagpili ang Magbag-o

Ang sari sang pagbag-o nga ginaagda sang Manluluwas indi pwede ipilit. Ang Manluluwas nagpanudlo kag nag-agda, pero wala Sia nagpamilit. Ang manggaranon nga pamatan-on “naghalin nga masinulub-on” (Mateo 19:22). Sa Capernaum, madamo sa Iya mga disipulo ang nagpili nga “mag-isol,” kag Iya ginpamangkot ang Dose ka mga Apostoles kon luyag man bala nila maghalin (tan-awa sa Juan 6:66–67). Pila sa mga sumulunod ni Juan Bautista ang nagpili nga magsunod sa Manluluwas, ang iban wala (tan-awa sa Juan 1:35–37; 10:40–42). Sarang naton agdahon ang iban nga mangin mas pareho pa gid sa Iya, pero indi kita ang magdesisyon nga magbag-o para sa ila. Kag kon wala pa nila ginapili nga magbag-o, indi kita dapat mag-pangampo—ukon magbatyag nga napaslawan kita.
Magpangamuyo Para sa Ikasarang sang Iban nga Magbag-o

Sa Iya Nagapatunga nga Pangamuyo, ginpangayo ni Jesus sa Dios nga matipigan ang Iya mga disipulo batok sa malaut, mangin mas kasubong sa Iya kag sa Amay, kag mapuno sang paghigugma sang Dios (tan-awa sa Juan 17:11, 21–23, 26). Kag bangod nahibaluan Niya nga si Pedro magakinahanglan sang kusog sa iya mga pagpaninguha nga magtubo sa iya buluhaton, ang Manluluwas nangamuyo para sa iya (tan-awa sa Lucas 22:32). Ang aton mga pangamuyo para sa iban sarang magtuga sang kinalain (tan-awa sa Santiago 5:16).
Tudloi Sila nga Magsandig sa Iya Gahum

Paagi lang gid sa pagsunod sa Manluluwas nga matuod-tuod gid kita nga magbag-o kag magtubo padulong sa diosnon nga potensyal nga yara sa aton tanan. Sia amo “ang dalan, kag ang kamatuoran, kag ang kabuhi: wala’y nagaabot sa Amay, kundi paagi sa [Iya].” (Juan 14:6 Iya gahum ang may ikasarang nga “himuon ang mahuyang nga mga butang nga mangin mabakod” (Eter 12:27). Ang pagtuo sa Iya nagapasag-uli nga gahum amo ang nagtugot kay Alma nga Lamharon nga magbag-o (tan-awa sa Alma 36:16–23). Mahimo naton tudloan ang iban nga magsandig sa Manluluwas agud nga sila man makaangkon sang Iya nagatinlo nga gahum sa ila mga kabuhi.
Tratuha Sila sa Kon Ano Sila Mangin

Ang pagpalangga kag pagbaton sarang nga mangin mga mabaskog nga pasimuno sang pagbag-o. Ang babayi sa may bubon nagapuyo upod sa lalaki nga indi niya bana. Ang mga disipulo ni Jesus “natingala nga nagapakighambal sia sa babayi” (Juan 4:27), pero mas ginaulikdan ni Jesus kon ano sia [ang babayi] mahimo nga mangin. Gintudloan Niya sia kag ginhatagan sia sang oportunidad nga magbag-o, nga iya ginhimo. (Tan-awa sa Juan 4:4–42.)

Kon tratuhon naton ang iban sa kon nangin ano sila sadto imbes sa kon ano sila sarang nga mangin, mahimo nga mapunggan naton sila. Sa baylo, mahimo kita magpatawad kag kalimtan ang mga sala sang nagliligad. Sarang kita magpati nga sarang sang iban nga magbag-o. Mahimo naton likawan ang mga kahuyang kag talupangdon ang mga positibo nga kinaiya nga basi wala nila makita sa ila kaugalingon. ”May responsibilidad kita nga tulukon sila indi sa kon ano sila karon kundi sa kon -ano sila sarang mangin.”¹
Tugoti Sila nga Maggiho sa Ila nga Tiempo

Ang pagbag-o nagakinahanglan sang tiempo. Kinahanglan naton tanan “magpadayon nga may pagpasensya tubtob nga mangin perpekto [kita]” (Tan-awa sa Doctrine and Covenants 67:13). Nangin pasensyoso si Jesus sa iban kag padayon nga nagtudlo bisan sa ila nga nagakontra sa Iya, nga nagasaksi sa Iya buluhaton nga ginhatag sa Iya sang Iya Amay kag nagasabat sang ila mga pamangkot (tan-awa sa Mateo 12:1–13; Juan 7:28–29). Sarang kita mangin pasensyoso sa iban kag paisugon sila nga magmangin pasensyoso sa ila kaugalingon.
Indi Mag-ampo Bisan Pa Magbalik Sila sa Daan nga Pangginawi

Pagkatapos nga mapatay si Cristo, bisan si Pedro kag ang pila sa iban pa nga Apostoles nagbalik sa kon ano ang naandan nila (tan-awa sa Juan 21:3). Ginpahanumduman ni Cristo si Pedro nga kinahanglan niya nga “pahalbon ang [Iya] mga kordero” (tan-awa sa Juan 21:15–17), kag nagbalik si Pedro sa pagpangalagad. Tama kahapos ang magbalik sa daan nga pangginawi. Mahimo kita magpadayon sa pagsuporta upod ang mainabyanon nga pagpaisog kag inspirado nga mga pagpangagda sa pagpadayon sa pagsunod sa Manluluwas kag sa pagpanikasog nga mangin pareho pa gid sa Iya.

Tugoti ang Iban nga Magtubo

Si Elder Jeffrey R. Holland sang Korum sang Dose ka mga Apostoles nagasaysay sining istorya parte sa pagtugot sa iban nga magtubo: “Ginsugiran ako sadto parte sa isa ka pamatan-on nga sa madamo nga tinuig nangin masami nga topiko sang tagsa ka kaladlawan sa iya eskwelahan. May mga kakulangan sa iya, kag mahapos para sa iya mga kaupdanan nga sunlugon sia. Sang ulihi nagsaylo sia sa malayo. Sang ulihi nagsulod sia sa army kag nakaangkon didto sang madinalag-on nga mga eksperiyensya sa pagbaton sang edukasyon kag sa kabilugan pagpalayo sa iya nagligad. Labi sa tanan, pareho sa nagakatabo sa madamo sa militar, nadiskubrehan niya ang katahum kag kamalahalon sang Simbahan kag nangin aktibo kag malipayon diri.

“Dayon, pagligad sang pila ka tuig, nagbalik sia sa lugar nga iya gindak-an. Kalabanan sa iya mga kaedad nagpadayon na pero indi tanan. Makita nga, sang nagbalik sia nga madinalag-on kag bag-o na nga tawo, ang amo nga pamensaron nga nagluntad sadto yara pa sa gihapon, nga nagahulat sa iya pagbalik. Para sa mga tawo sa iya banwa, sia gihapon si ‘amo sini-kag-amo-sina.’ …

“Sing amat-amat ang mala-Pablo nga pagpaninguha sining tawo nga talikdan ang nagligad kag lab-uton ang padya nga ginbutang sang Dios sa iya atubang amat-amat nga nagtahaw tubtob nga napatay sia nga daw pareho sa kabuhi niya sang huben pa sia. … Kanugon, kasubo nga ginpalibutan sia liwat sang … mga tawo nga naghunahuna nga ang iya nagligad mas makawiwili sangsa iya bwas-damlag. Nagmadinalag-on sila nga agawon sa iya mga kamot ang butang nga ginkaptan ni Cristo para sa iya. Kag napatay sia nga masubo, bisan pa nga indi sia ang balasulon sang tanan. …

“Tugoti ang mga tawo nga maghinulsol. Tugoti ang mga tawo nga magtubo. Magtuo nga ang mga tawo sarang magbag-o kag mangin maayo.”²

© 2019 by Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/18. Petsa sang pagtugot sa paglubad: 6/18. Paglubad sang Ministering Principles, August 2019. Hiligaynon. 15769 861