Matulongak Kadi ti Maysa a Tao nga Agbalbaliw?

Wen. Ngem ti akemmo mabalin a sabali iti impagarupmo.

Naparsuatayo nga addaan iti kabaelan nga agbalbaliw. Ti panagdur-astayo iti nadiosan a potensialtayo ket isu ti panggep ti mortal a padastayo. Maysa kadagiti kangrunaan a panggeptayo a tun-oyen iti ministering ket tulongantayo dagiti dadduma nga umasideg ken ni Cristo ken aramidentayo dagiti panagbalbaliw a kasapulan iti panagsubli iti sidongna. Ngem gapu iti karbenganda a pumili, limitado ti akemtayo iti panangtulong kadakuada nga agbalin nga ad-adda a kas ken ni Cristo.

Dagitoy dagiti 7 a nabileg nga adalen manipud iti Mangisalakan no kasano a makatulongtayo kadagiti dadduma nga agbalin nga ad-adda pay a kas Kenkuana.

Saantayo nga Agbuteng a Mangyawis iti Panagbalbaliw

Saan a nagbuteng ti Mangisalakan a mangawis kadagiti dadduma a mangpanaw kadagiti daan a wagasda ken mangarakup kadagiti pannursurona. Inawisna da Pedro ken Santiago a mangpanaw kadagiti trabahoda ket “agbalin a dumadaklis dagiti tao” (Marcos 1:17). Inawisna ti babai a naduktalan iti pannakiabig tapno “mapan, ket saanen nga agbasol pay” (Juan 8:11). Inawisna ti nabaknang nga agtutubo a lalaki a mangisuko iti panagayatna kadagiti nailubongan a banag ket sumurot Kenkuana (kitaen iti Marcos 10:17–22). Makapagbalintayo nga agpada a natured ken managayat bayat ti panangawistayo kadagiti dadduma nga agaramid kadagiti panagbalbaliw ket sumurot iti Mangisalakan.
Laglagipen a Pilida ti Agbalbaliw

Ti kita ti panagbalbaliw a yaw-awis ti Mangisalakan ket saan a mangpilit. Nagisuro ken nagawis ti Mangisalakan, ngem saan a nangpilit. Ti nabaknang nga agtutubo a lalaki “pimmanaw a silaladingit” (Mateo 19:22). Iti Capernaum, pinili ti adu kadagiti disipulona nga “agsubli,” ket dinamagna kadagiti Sangapulo-ket-dua no pumanawda met (kitaen iti Juan 6:66–67). Dagiti dadduma a pasurot ni Juan Bautista ket pinilida a sinurot ti Mangisalakan, ngem dagiti dadduma ket saan (kitaen iti Juan 1:35–37; 10:40–42). Mabalintayo nga awisen dagiti dadduma tapnu agbalinda nga ad-adda pay a kas Kenkuana, ngem saantayo a mabalin ti agdesision para kadakuada tapno makapagbalbaliwda. Ket no saanda pay a napili ti agbalbaliw, saantayo a maupay—wenno marikna a kasla naabaktayon.
Agkararagtayo para iti Kabaelan ti Dadduma nga Agbalbaliw

Kabayatan ti Mangibabaet a Kararagna, indawat ni Jesus iti Dios a masaluadanto dagiti disipulona manipud iti dakes, agbalinda a kas Kenkuana ken ti Ama, ket mapnodanto iti ayat ti Dios (kitaen iti Juan 17:11, 21-23, 26). Ken ammona nga agkasapulanto ni Pedro iti pigsa kadagiti panagkagumaanna a dumur-as iti akemna, nagkararag ti Mangisalakan para kenkuana (kitaen iti Lucas 22:32). Dagiti kararagtayo para iti dadduma ket makaaramid iti pagdumaan (kitaen iti Santiago 5:16).
Panangsursuro Kadakuada nga Agpannuray iti Bilegna

Babaen laeng ti Mangisalakan a masarakantayo ti pudpudno a panagbalbaliw ken panagdur-as iti nadiosan a potensial nga adda kadatayo. Isu, “ti dalan, ti pudno, ken ti biag: awan ti umay iti Ama, no di magna [Kenkuana]” (Juan 14:6). Kabaelan ti Bilegna nga “aramiden a napigsa dagiti nakapsut a banag” (Ether 12:27). Ti pammati iti Pangsubbot a bilegna ti namagbalin ken ni Alma nga ub-ubing nga agbalbaliw (kitaen iti Alma 36:16–23). Mabalin nga isurotayo dagiti dadduma nga agpannuray iti Mangisalakan tapno maaddaanda met iti panggugor a bilegna kadagiti biagda.
Tratuen Ida a kas iti Mabalin a Pagbalinanda

Ti ayat ken panangawat ket nabileg a mangibagi iti panagbalbaliw. Ti babai nga adda idiay bubon ket nakidendenna iti lalaki a saanna nga asawa. Dagiti disipulo ni Jesus ket “nagsiddaawda ta nakisao isuna iti babai” (Juan 4:27), ngem ad-adda nga impateg ni Jesus maipanggep iti no ania ti pagbalinanna. Sinuruanna ken inikanna ti gundaway nga agbalbaliw nga isu ti inaramidna. (Kitaen iti Juan 4:4–42.)

No tratuentayo ti dadduma asinoda man iti napalabas imbes nga iti kabaelanda a pagbalinan, mapasardengtayo ti ania man a pagbalinanda. Ngem ketdi, mapakawan ken lipatentayo dagiti napalabas a biddut. Mabalin a patientayo a makapagbalbaliw dagiti dadduma. Mabalin a saantayo a kitaen dagiti pagkapsutan ket itudo dagiti napipintas a galad a dida makita iti bagbagida. “Adda responsibilidadtayo a a mangkita iti tunggal tao saan asinoda man ngem ketdi no ania ti kabaelanda a pagbalinan.”¹
Palubosantayo Ida iti Bukodda a Panagaddang

Ti panagbalbaliw ket agkasapulan iti panawen. Masapultayo amin nga “agtuloy a siaanus agingga nga agbalintayo a naan-anay” (Doktrina ken Katulagan 67:13). Naaddaan ni Jesus iti kinaanus kadagiti dadduma ket nagtultuloy a nangisuro uray pay kadagiti simmuppiat Kenkuana, pinaneknekanna ti akemna nga inted Kenkuana babaen ti Amana ket sinungbatanna dagiti saludsodda (kitaen iti Mateo 12:1–13; Juan 7:28–29). Mabalintayo ti agan-anus para iti dadduma ken allukoyentayo ida nga agan-anus para iti bagbagida.
Saanka a Sumuko no Agsublida iti Sigud nga Aramidda

Kalpasan a natay ni Cristo, uray pay ni Pedro ken sumagmamano kadagiti dadduma nga Apostol ket nagsublida iti no ania iti nakairuamanda (kitaen iti Juan 21:3). Impalagip ni Cristo ken ni Pedro a masapul a “pakanen dagiti [Karnerona]” (kitaen iti Juan 21:15–17), ket nagsubli ni Pedro iti panagministrona. Nalaka laeng ti agsubli kadagiti sigud nga aramid. Makapagtultuloytayo nga agsuporta babaen ti nalanay a panagguyugoy ken dagiti naparegta nga awis nga agtultuloy a mangsurot iti Mangisalakan ken panagkagumaan nga agbalin pay a kas Kenkuana.

Panangpalugod kadagiti Dadduma a Dumur-as

Ni Elder Jeffrey R. Holland ti Korum dagiti Sangapulo-ket-Dua nga Apostol insalaysayna daytoy nga estoria maipapan ti panangpalugod kadagiti dadduma a dumur-as: “Adda naminsan nakaibaga kaniak maipanggep iti maysa nga agtutubo a lalaki a dumani kanayon nga isu ti sentro ti amin nga angaw iti pagadalanna. Addaan isuna ti sumagmamano a pagkapsutan, ket nalaka para kadagiti kapatadana nga angawenda isuna. Idi nataenganen immadayo isuna. Pagangayanna nakitipon isuna iti army ket naaddaan iti sumagmamano a naballigian a padas sadiay babaen iti panangalana ti edukasion ken namagbalin a wagas a panangadayona iti napalabasna. Kangrunaan ti amin, kas iti kaaduan iti military, nakitana ti ngayed ken tan-ok ti Simbaan ket nagbalin nga aktibo ken naragsak iti daytoy.

“Kalpasan ti sumagmamano a tawen, nagsubli iti ili a nagubinganna. Kaaduan dagiti kapatadana ket immakardan ngem saan nga isu amin. Nalawag, nga idi nagsubli isunan a naan-anay a nagballigin ket nagbalbaliwen, ti sigud a daan a panagpampanunot idi ket adda pay lang sadiay, agur-uray iti panagsublina. Para kadagiti tattao iti nakayanakanna nga ili, isuna pay laeng daydi sigud a ‘kasdiay-ken-kastoy.’ …

“Ket iti agangay babaen ti kasla panagkagumaan ni Pablo a tallikudan dayta a napalabas ken awatenna ti gunggona nga indatag kenkuana ti Dios ket in-inut a nagpukaw agingga a natay a kas iti sigud a wagas a inna panagbiag idi kinaagtutubona. … Nagdakes unay, naliday unay nga isuna ket napalawlawan manen iti … dagidiay mangipagarup a ti napalabasna ket ad-adda a makaparegta ngem ti masakbayanna. Nabaelanda a nagikkat iti petpetna ti nangpetpetan ni Cristo kenkuana. Ket natay isuna a naliday, uray no babaen ti bassit a nagbiddutanna. …

“Palubosan ti tao nga agbabawi. Palubosan ti tao a dumur-as. Mamatika a ti tao ket agbalbaliw ket sumayaatto.”²

© 2019 by Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/18. Pannakaanamongna a maipatarus: 6/18. Panakaipatarus ti Ministering Principles, August 2019. Ilokano. 15769 864