Ng Sebechek el Ngoseuir a Kmo Ngtechang el Mengodech?

Choi. Eng di a ngerchelem a sebechel kuk ngodech er a ikel momdasu.

Kid a ulebeob el sebeched el mengodech. A ulekeruled el kirel sel kmal chedaol ultekelled a ngii a moktek er a klengar kid. A ta er a moktek er a odengeled a ngosuterir a rebebil el mo er a Kristo e bo lolodech a klengar tir me bol sebechir lemuut el mo er a rengedel. Eng di ngultuil er a mimokl lomelilt er tir, e sel ngercheled lolngeseu er tir el mo uaia Kristo a sebechel meterob.

AIkakid a kleuid el mesisiich losisechakl el Osobel a milskid el kirel a kmo ng mekera dengesuterir a rebebil el mo mengodech e lorael mo uai Ngii.

Lak ko Medakt el Siotai er a Rechad el mo Mengodech

A Osobel a dimlak el medakt el siotai er a rebebil el mo mechei a mechut el teletael e bo lolab Osischeklel. Ngii a mle siotai er a Petrus me a Jakobus el mo mechere ureor e “bo loumenged er a rechad” (Markus 1:17). Ng dirrek el mle siotai er ngike el redil rirebet er a laokreng el kmo “morael, e lak mluut el ruebet er a klengit” (Johanes 8:11). Ng dirrek el mle siotai er ngike el merau el ngeasek el chad el mo mechei a iilteet me a kloklel a beluulechad e bo loltirakl er Ngii (mesa Markus 10:17–22). Kid meng dirrek el sebeched el mo diak demedakt e mo oba beltikereng e siotai er a rebebil el mo mengodech e mo oltirakl er a Osobel.
Modengei el kmo Ng Tir a Melilt el Mengodech

Sel teletael er a omelodech longerchir ngii Osobel a diak lokiu orrimel. A Osobel a di ulisechakl e siotai, Ng dimlak lorrimel. Ngike el merau el ngeasek el chad a “mirrael loumekikngit el reng” (Mateus 19:22). Sera le ngara Capernaum, eng betok er a rultirakl er Ngii a millilt el mo “cheroid,” er ngii me nguleker tirkel Teruich me a terung el kmo te locha dirrek el mo cheroid er ngii (mesa Johanes 6:66–67). A rebebil er a rultirakl er a Johanes el techolb a millilt el mo oltirakl er a Osobel, e a rebebil a dimlak (mesa Johanes 1:35–37; 10:40–42). Ng sebeched el di siotai er a rechad el mo uai Ngii, eng di diak el sebeched lorrimel er tir el mengodech. E a lsekum eng dirkak bol sorir melodech a klengar tir, eng diak el kired el kimer—malechub e bo domelchesiu el kmo ng dikea el sebeched.
Moluluuch el Kirir me bol Sebechir el Mengodech

A Jesus er a loldars a Nglunguchel, e ngulengit er a Dios me tirkel loltirakl er Ngii bol mucheliu er a mekngit, e bol uai Ngii me a Chedam, e bol mui er a beltikereng er a Dios (mesa Johanes 17:11, 21–23, 26). E mle medengei el kmo a Petrus ousbech olisiich el kirel a ngerchelel me a urerel, me a Osobel a milluluuch el kirel (mesa Lukas 22:32). A nglunguched el kirir a rebebil a kmal ngarngii a relii (mesa Jakobus 5:16).
Mosischekelterir el mo Ultuil er a Klisichel

Ng kmal di okiu Osobel e kid a sebeched el meral mengodech e mukeroul el mo er sel ngii a chedaol ultekelled el kid a ulebeob el kirel. Ngii a “rael, e klemerang, e klengar meng diak a chad el mo er a Chedam, a lak lokiu [Ngii]” (Johanes 14:6). Ng klisichel sel ngii a “remuul a mekekerei el tekoi el mo mesisiich” (Ether 12:27). Sel klaumerang er a klisichel a tngakireng er Ngii a ngildechii a Kekerei el Alma (mesa Alma 36:16–23). Kid a sebeched losischekelterir a rebebil el mo ultuil er a Osobel me bol sebechir el dirrek el melchesuar a Klisichel er a klengar tir.
Momes er Tir er sel Ngii a Sebechir el mo er Ngii

A beltikereng me a kengei a sebechel kmal mesisiich el teletael er a omelodech. Ngike el redil el mla er a iido a kiliei lobengkel a sechal el dimlak el kaubuch. A rultirakl er a Jesus a “mlo mechas a rengrir er ngii er a longedecheduch er ngika el redil” (Johanes 4:27), eng di a Jesus a bai melebedebek er sel ngii a sebechel ngika el dil mo er ngii. Ngulisechakl er ngii e milsa techall el mo sebechel mengodech, meng mlo uaisei. (MesaJohanes 4:4–42.)

Sel sekum e kede omes er a klengar er a rechad er chelii e diak domes er sel ngii a bai sebechir el mo er ngii, eng sebechir el diak el mengodech. Ng bai, kired lousubes e obes a mla momerek el tekoi. Ng sebeched el mo oumerang el kmo a rechad a sebechir el mengodech. Ng sebechel mochib osenged er a chelitechetul a chad e bai omes aikel ungil tekoi el tir olab e diak el ues. ”Ngercheled lomes er a rechad el sel ngii a sebechir el mo er ngii el teletael er a klechad.”¹
Bechiteterir me Loruul er sel Ungil Teletelel er Tir

A omelodech ousbech a taem. Ng kired el rokui el “melemolem loba kllouelreng el dimerekmo [bo] demecherrungel” (Doctrine and Covenants 67:13). A Jesus a uleba kllouelreng er a rebebil e millemolem lolisechakl er tirkel lulemtok er Ngii, luluchais er tir er a Ngerchelel el Demal a milsang e ulenger a kerrir (mesa Mateus 12:1–13; Johanes 7:28–29). Ng sebechel mo klou a rengud el kirir a rebebil e dirrek el mengelechel er tir el mo meklou a rengrir.
Lak Ko Mkimer Alskeum e Telmuut er a Smechir er a Ngaramong

Uriul er a kodellel a Kristo, e a Petrus me a rebebil er a Apostol a liluut er a smechir er a ikel tekoi luruul er a ngaramong (mesa Johanes 21:3). A Kristo ulemeklatk er a Petrus el kmo ng kirel “mo omeka [Cheremel] sib” (mesa Johanes 21:15–17), me a Petrus a liluut el mo omechau a urerel me a ngerchelel. Ng kmal beot a deluut er a smeched el mo er a ikel teletael er a ngaramong. Ng sebeched el melemolem el melisiich e mengetikaik er a rechad me te mo melemolem loltirakl er a Osobel e melasm el merael mo uai Ngii.

Besterir a Techall a Rechad el Mukeroul

A Elder Jeffrey R. Holland er a Chelechad er a Teruich me a terung el Apostol a ouchais er tiakid el cheldecheduch el kirel a mesterir a techall a rechad el mukeroul: “Ak rirengesii a tal cheldecheduch el kirel a ngeasek el buik el di mle blechoel blil a ngellakel er a skuul. Ng mla er ngii a chelitechetul, meng mle beot er a rebek el chad lomekakou er ngii. Uriul eng millukl el mo kiei er cheroid. Ng mlo soldau e kmal mle betok a lsuub risei meng ngiluu a skulel e silmecheklii a klengar ngii er a ikel lomeruul luruul er a ngaramong. E sel kmal ngarauchei, el uaia bek lomeruul er a klsoldau, eng miltik er a klebekelel me a klungiolel a Ikelesia e mlo mesisiich el ungil a rengul el chad er ngii.

“E sola, tela el rak ruriul, e ng liluut el mo er sel basio le mlukeroul er ngii er a lekekerei. Betok er tirkel blel telbasech a mla kaitebetobed eng di a rebebil er tir a dirk ke kiei. Meng uaisei, el sera luut el kmal ko er a ungil besul e beches el chad, e sel dimla delalm er a uldesuir a rechad el kirel er a ngaramong, a mlengiil er ngii. Tirkal chad a ulemes er ngii, el dirk ‘osisiu el chad.’ …

“Meng milkekokil sel blakereng me a dechal a rengul ngika el chad el mengeroid er ngii er a mle klengar ngii er a ngarmong e mo bereked er a Dios a mlo diak e ngii a liluut el mo er sel klengar ngii er a ngaramong el mol muut er a kodellel. … Ng mekngit a rengud, el kirel el liluut el mo teloi er tirkel lulemdasu el kmo a klengar ngii er a ngarmong a lmuut lungil er a klengar ngii e rmedal. Te mle mesisiich el mengesuseu er ngii lotebedii er a chimal a Kristo. Meng mlo er a klengitelreng, el kodall el kmal di telitur ngii e merekong . …

“Bechiteterir a rechad me bo louchel a rengrir. Bechiteterir a rechad me lemukeroul. Moumerang el kmo a rechad a sebechir el mengodech e mo ungil.”²