Parau tumu nō te aupurura’a, ’Ātete 2019

E nehenehe ānei au e tauturu i te hō’ē ta’ata ’ia taui ?

’Ē. Tera rā, e mea ta’a ’ē tō ’outou ti’ara’a i te mea tā ’outou e feruri ra.

’Ua hāmanihia tātou ma te ’aravihi nō te taui. Te tupura’a i te rahi nō tō tātou fāito pūai hanahana, ’o te ’ōpuara’a ïa nō tō tātou ’itera’a i te tāhuti nei. Hō’ē o tā tātou mau fā faufa’a roa i roto i te aupurura’a, ’o te tauturura’a ïa vetahi ’ē ’ia haere mai i te Mesia ’e ’ia rave i te mau tauira’a e tītauhia nō te ho’i i mua i tōna aro. Tera rā, nō tō rātou ti’amāra’a, tō tātou ti’ara’a nō te tauturu ia rātou ’ia riro mai te Mesia te huru, ’ua tā’ōti’ahia ïa.

Teie e hitu ha’api’ira’a mana rahi a te Faaora nō ni’a i te mau rāve’a e nāhea tātou i te tauturu ia vetahi ’ē i roto i tā rātou mau tauto’ora’a nō te taui ’e nō te riro mai iāna te huru.

’Eiaha e mata’u i te ani manihini ’ia taui

’Aita te Fa’aora i mata’u i te ani manihini ia vetahi ’ē ’ia vaiiho i te mau peu tāhito i muri e ’ia tauahi i tana mau ha’api’ira’a. ’Ua ani manihini ’oia ia Petero ’e ia Iakobo ’ia fa’aru’e i tā rāua ’ohipa, ’e « ’ia riro ’ei rava’ai ta’ata »(Mareko 1:17). ’Ua ani manihini ’oia i te vahine tei roa’ahia e fa’aturi ra ’ia « haere ’e ’eiaha e hara fa’ahou » (Ioane 8:11). ’Ua ani manihini ’oia i te ta’ata ’āpī tao’a rahi ’ia vaiiho i tōna hina’aro i te mau mea o te ao nei ’e ’ia pe’e mai iāna (hi’o Mareko 10:17–22). E nehenehe ato’a tātou e itoito ’e e here ma te ani manihini ia vetahi ’ē ’ia rave i te mau tauira’a ’e ’ia pe’e i te Fa’aora.
’A ha’amana’o ē nā rātou e mā’iti ’ia taui

’Eiaha te huru tauira’a ’o tā te Fatu e ’ani nei ’ia fa’ahepohia. Tē ha’api’i nei ’e te ani nei te Fa’aora, ’aita rā ’oia e ha’avī nei. « ’Ua haere ’ē atura ma te ’oto » te ta’ata ’āpī tao’a rahi (Mataio 19:22). I Kaperenaumi, e rave rahi o tāna mau pipi tei mā’iti « e ho’i » ’e ’ua ani ’oia i te Tino ’Ahuru Ma Piti ē, e ho’i ato’a nei rātou (hi’o Ioane 6:66–67). Vetahi mau ta’ata ’āpe’e a Ioane Bāpetizo tei mā’iti ’ia pe’e atu i te Fa’aora, vetahi ’aita (hi’o Ioane 1:35–37; 10:40–42). E nehenehe tātou e ’ani manihini ia vetahi ’ē ’ia riro hau atu mai iāna, e’ita rā tātou e nehenehe e rave i te fa’aotira’a ’ia taui ia rātou. ’E mai te mea ’aita ā rātou i mā’iti i te taui, ’eiaha tātou e fa’aru’e—’eiaha ato’a tātou e mana’o ē ’aita tātou i manuia.
’A pure ’ia roa’a ia vetahi ē i te taui

I roto i tāna pure ārai, ’ua ani Iesu i te Atua ē ’ia āraihia tana mau pipi i te ino, ’ia riro hau atu mai iāna ’e te Metua, ’e ’ia fa’a’īhia i te aroha o te Atua (hi’o Ioane 17:11, 21–23, 26). ’E ma te ’ite ē e hina’aro Petero i te pūai i roto i tāna mau tauto’ora’a nō te tupu i te rahi i roto i tōna ti’ara’a, ’ua pure te Fa’aora nōna (hi’o Luka 22:32). E nehenehe tā tātou pure nō vetahi e fa’atupu i te hō’ē ta’a-’ē-ra’a (hi’o Iakobo 5:16).
’A ha’api’i ia rātou ’ia ti’aturi i ni’a i tōna mana

E mea nā roto ana’e i te Fa’aora tātou e nehenehe mau e taui ’e e tupu ai i te fāito pūai hanahana ’o tā tātou pā’āto’a e vai ra. ’O ’oia « te ’ē‘a, e te parau mau, ’e te ora : ’Aore roa e ta’ata e tae i te Metua ra, maori rā ’ei [iāna] » (Ioane 14:6 ’O tōna mana ’o te nehenehe « e fa’ariro i te mau mea paruparu ’ei mea ’eta’eta » (Etera 12:27,). Nā te fa’aro’o i roto i tōna mana tāra’ehara i ti’a ai ia Alama tamaiti ’ia taui (hi’o Alama 36:16–23). E nehenehe tātou e ha’api’i ia vetahi ’ē ’ia ti’aturi i ni’a i te Fa’aora, ’ia ti’a ia rātou ’ia roa’a ato’a i tōna mana tāmā i roto i tō rātou orara’a.
Fa’ariro ia rātou mai tā rātou e nehenehe ’ia riro mai

E nehenehe te here ’e te mana’o fāri’i e riro ’ei mau rāve’a pūai nō te tauira’a. Tē ora ra te vahine o te ’āpo’o pape ’e te hō’ē ta’ata e ’ere i te tāne fa’aipoipo nāna. ’Ua māere te mau pipi a Iesu « ’ua paraparau ’oia i te vahine » (Ioane 4:27), ’ua pe’ape’a rahi rā Iesu nō tā te vahine e nehenehe e riro mai. ’Ua ha’api’i ’oia iāna ’e ’ua hōro’a iāna i te rāve’a nō te taui, ’ua nā reira ’oia. (Hi’o Ioane 4:4–42)

’Ia fa’ariro ana’e tātou ia vetahi ’ē mai tā rātou i riro nā ’eiaha ra mai tā rātou e nehenehe e riro mai, e nehenehe tātou e tāpe’a ia rātou. E mea maita’i a’e, ’ia fa’a’ore tātou i te hara ’e ’ia ha’amo’e i te mau hape tahito. ’Ia ti’aturi tātou ē e nehenehe vetahi e taui. E nehenene tātou e tāu’a ’ore i te mau paruparu ’e ’ia rave mai i te mea maita’i ’o tā rātou paha i ’ore i ’ite i roto ia rātou iho. « Tei ia tātou nei te hōpoi’a ’ia hi’o i te ta’ata ’eiaha mai tā rātou e vai nei, mai tā rātou rā e nehenehe e riro mai ».¹
’A vaiiho ia rātou ’ia haere ma tō rātou iho tere

E taime tō te tauira’a. E ti’a ia tātou pā’āto’a ’ia « tāmau noa i roto i te fa’a’oroma’i e tae noa atu i te taime [tātou] e maitai roa ai » (Te Parau Ha’api’ira’a ’e te mau Parau Fafau 67:13). ’Ua fa’a’oroma’i Iesu ia vetahi ē ’e ’ua tāmau noa i te ha’api’i tae noa atu i te feiā tei pāto’i iāna, te fa’a’itera’a i tōna ti’ara’a tā te Metua i hōro’a iāna ’e te pāhonora’a i tā rātou mau uira’a (hi’o Mataio 12:1–13; Ioane 7:28–29). E nehenehe tātou e fa’a’oroma’i ia vetahi ’e ’ia fa’aitoito ia rātou ’ia fa’a’oroma’i ia rātou iho.
’Eiaha e fa’aru’e mai te mea ’ua topa fa’ahou rātou

I muri a’e i te pohera’a te Mesia, ’ua ho’i fa’ahou ā Petero ’e vetahi o te tahi mau ’āposetōlo i te mea tā rātou i matau (hi’o Ioane 21:3). ’Ua fa’aha’amana’o te Mesia ia Petero ē ’ua tītauhia ’oia ’ia « fa’a’amu i [tāna] mau mamoe» (hi’o Ioane 21:15–17), ’e ’ua ho’i Petero i te fa’aterera’a. E riro e mea ’ōhie roa nō te ho’i fa’ahou mai i te mau huru tahito. E nehenehe tātou e tāmau noa i te pāturu ma te mau fa’aitoitora’a marū ’e te mau anira’a manihini fa’auruhia ’ia tāmau noa i te pe’e i te Fa’aora ’e ’ia tītau i te riro hau atu mai iāna.

Fa’ati’a ia vetahi ’ia tupu i te rahi

’Ua fa’ati’a o Elder Jeffrey R. Holland nō te pupu nō te Tino ’Ahuru ma Piti ’Āposetōlo i teie ’ā’amu nō ni’a i te fa’ati’ara’a ia vetahi ’ia tupu i te rahi : « ’Ua parauhia mai iā’u i te hō’ē taime nō te hō’ē taure’are’a tei riro na e rave rahi matahiti ’ei ta’ata tei fāri’i i te huru parau hauti ’ino i roto i tāna fare ha’api’ira’a. Tē vai nei tōna mau paruparu ’e e mea ’ōhie roa nā tōna mau fāito hoa e hauti iāna. I muri iho i roto i tōna orara’a, ’ua reva ’ē atu ’oia. I te hope’a ’ua tomo atu ’oia i roto i te nu’u ’e ’ua roa’a te tahi mau ’itera’a manuia i reira nō ni’a i te ha’api’ira’a ’e te fa’aāteara’a i tōna parau tāhito. Mai te rahira’a o te mau fa’aehau, ’ua ’itehia iāna te nehenehe ’e te hanahana o te ’Ēkālesia, ’e ’ua riro mai ’ei ta’ata itoito ’e te ’oa’oa i reira.

« I muri iho, e rave rahi matahiti, ’ua ho’i atu ’oia i te ’oire o tōna taure’are’ara’a. ’Ua reva atu vetahi o tōna mau hoa, ’eiaha rā te tā’āto’ara’a. E au ra ē, i tōna ho’ira’a atu ma te manuia ’e te tauira’a rahi, tē vai noa ra ā teie huru tei tupu na e ra’e te tau, ma te tīa’i māite i tōna ho’ira’a mai. Nō te mau ta’ata o tōna ’oire, ’o ’oia noa ā ‘’o mea’ […]

« Ma’a vāhi iti ’e ma’a vāhi iti, ’ua fa’a’iti mai te mau tauto’ora’a a teie ta’ata nō Pauline i te fa’aru’era’a i te mau mea i muri ’e ’ua haru mai i te rē tā te Atua i tu’u i mua iāna ē tae noa atu ’a fa’aru’e fa’ahou ’oia i te reira, ’e ’ua pohe ’oia i roto i te huru orara’a o tōna ’āpīra’a […] E mea pe’ape’a, mea rahi te ’oto nō te mea ’ua ha’ati-fa’ahou-hia ’oia… e te feiā tei mana’o ē, ’e mea au a’e tōna parau tāhito i tōna ’ananahi. ’Ua manuia rātou i te harura’a mai iāna i te mea tā te Mesia i haru mai iāna. ’E ’ua pohe ’oia ma te ’oto, noa atu e mea iti tōna hape…

« Vaiiho i te mau ta’ata ’ia tātarahapa. Vaiiho i te mau ta’ata ’ia tupu i te rahi. ’A ti’aturi ē e nehenehe te mau ta’ata e taui ’e ’ia maita’i atu ā ».²

© 2019 by Intellectual Reserve, Inc. All rights reserved. Nene’ihia i te Fenua Marite. Parau fa’ati’a nō te reo peretāne : 6/18. Parau fa’ati’a nō te ’īritira’a : 6/18. ’Īritira’a nō Ministering Principles, August 2019. Tahitian. 15769 895