Ol Prinsipol blong Wok blong Givhan , Septemba 2019

Olsem Wanem Spirit I Save (mo Bae) I Helpem Yu Givhan

Prishud wok ia blong givhan, oli givim long tugeta man mo woman, wetem raet ia blong kasem revelesen.

ministering

Ol pikja foto oli kam long Getty Images

Singaot ia blong givhan mo givim seves mo tu gat lav olsem Sevya, samtaem i olsem wan jalenj—speseli taem i abaot go mo helpem olgeta we yumi no save gud olgeta. Wetem plante defren wei blong givhan, yumi stap askem se olsem wanem yumi save ol moa gud wei blong go mo helpem olgeta we oli askem yumi blong givhan long olgeta.

Yumi no mas tekem tumas taem from Tabu Spirit i save lidim ol traehad blong yumi we oli tru.

“Ol tabu wok blong givhan oli givim yu tabu raet blong kasem insperesen.” Sista Bonnie H. Cordon, Jeneral Presiden blong Ol Yang Woman i talem. “Yu save lukaotem insperesen ia wetem tras.”¹

Taem yumi lukaot blong givim seves olsem we Sevya i bin mekem, semmak Spirit ia we i lidim Hem i save lidim yumi. Hemia i tru tumas speseli taem yumi stap givim seves we oli askem yumi blong mekem, olsem wok blong givhan, we oli mekem anda long atoriti blong ol prishud ki blong bisop. Hemia sikis tingting blong wok blong givhan wetem Spirit.

?Olsem Wanem Mi Save Gat Spirit Taem Mi Stap Mekem Wok blong Givhan?

• Prea blong Kasem Daereksen. Papa long Heven i wantem yumi blong toktok wetem Hem tru long prea. Prea i no mekem nomo se yumi kam kolosap long Hem, be i mekemsua se ol “blesing we God i rere finis blong givim, be i dipen nomo sapos yumi askem.”² “Taem yumi stap prea mo lukaot blong andastanem ol hat blong olgeta,” Sista Cordon i talem, “Mi testifae se Papa long Heven bae i daerektem yumi mo Spirit blong Hem bae i go wetem yumi.”³

• No Wet blong Kasem wan Tingting. Oltaem yu mas stap rere oltaem. Stap “tekempat fulwan” (Doktrin mo Ol Kavenan 58:27), mo bae yu faenem se ol traehad blong yu bae oli save lidim mo mekem yu kam strong moa. Presiden Dallin. H. Oaks, Fas Kaonsela long Fas Presidensi, i talem, “stap go long fored wetem seves mo wok i wan impoten wei blong yumi blong kasem revelesen.” “Long ol stadi blong mi long Skripja mi faenemaot se plante revelesen we i go long ol pikinini blong God i kam taem oli stap mekem wan muv be i no blongoli stap kwaet long ol haos blong olgeta mo wet long Lod blong i talem long olgeta fas step we oli mas mekem.”⁴

?Olsem wanem nao bae mi Luksave ol toktok blong Spirit long Wok blong Givhan?

• Tekem Advaes blong Momon. Yumi no nid blong wet mo askem kwestin se tingting ia i kam long Spirit o no. From se yumi gat ki blong Momon blong save: Sapos yu gat wan tingting we i talem long yu blong mekem wanem we i raet o blong helpem ol narawan blong biliv long Kraes, yu save save se tingting ia i kam long God (luk long Moronae 7:16).

• Yu no wari long samting ia. “Jes jiam i go insaed long pul mo swim,” Elda Jefferey R. Holland blong Kworom blong Olgeta Twelef Aposol i talem. “Go from olgeta we oli stap long nid. No stap muvmuv mo askem yuwan se bae yu swim long bak i go, o bae yu swim olsem dog. Sapos yumi stap folem ol besik prinsipol we oli bin tijim, mekem samting wetem ol prishud ki, mo lukaotem blong Tabu Spirit i lidim yumi, bae yumi no save mestem rod.”⁵

?Wanem Ol Bes Rod blong Folem wan Tingting we I Kam long Spirit?

• Kwiktaem Sista Susan Bednar (waef blong Elda David A. Bednar blong Kworom Blong Olgeta Twelef Aposol) i wan gudfala eksampol long saed blong folem tingting blong Spirit. Afta prea blong kasem “ol ae long saed blong Spirit blong luk olgeta we oli gat nid,” hem i lukluk raon long kongregesen mo plante taem bae hem i filim wan “filing long saed blong Spirit blong visitim o ringim wan spesel man,” Elda Bednar i talem. “Mo taem Sista Bednar i kasem kaen filing blong Spirit olsem, bae hem i ansa kwiktaem mo obei. Plante taem i olsem se taem hem i talem ‘amen’ long prea, bae hem i toktok long wan yangfala o haggem wan sista o, taem mifala i kasem haos, kwiktaem nomo bae hem i pikimap fon mo ring.”⁶

• Strong tingting Filing blong oli sakemaot yu mo filing blong sem, se yu no naf, o yu no semmak long ol narawan i save blokem yumi blong folem ol tingting blong Spirit blong givhan. “Long plante taem mo wei, yumi evriwan i filim se yumi no naf, yumi no sua, maet yumi filim i no klin inaf,” Elda Gerit W. Gong blong Kworom blong Olgeta Twelef Aposol i talem. “Be yet, long ol fetful traehad blong yumi blong lavem God mo givhan long neiba blong yumi, yumi save filim lav blong God, mo insperesen we yumi nidim insaed long laef blong yumi mo blong olgeta, long niu mo tabu wei.”⁷

  Wan brata i serem olsem wanem hem i no sua blong go mo helpem hasban blong wan woman we i kolosap hem i kilimded hemwan. Long en, hem i askem blong tekem man blong hem i go lanj. “Be taem mi talem: ‘Waef blong yu i traem kilimded hemwan. Hemia i mas hevi tumas long yu. ?Yu wantem tokbaot samting ia ?’ Hem i krae we i no holemtaet hem,” hem i serem “Storian blong mitufala i givim plante kamfot mo developem wan naesfala filing blong kam tugeta mo gat tras kwiktaem nomo.”⁸

© 2019 by Intellectual Reserve, Inc. All rights reserved. Oli printim long YSA. Oli letem long Inglis: 6/18. Oli letem translesen: 6 /18. Translesen blong Ministering Principles, September 2019. Bislama. 15770 852

Ol Not

1. Bonnie H. Cordon, “Stap Kam Wan Man blong Lukaot long Sipsip,” Liahona, Nov. 2018, 76 .

2. Luk long Bible Dictionary, “Prea”

3. Bonnie H. Cordon, “Stap Kam Wan Man blong Lukaot long Sipsip,” 76.

4. Dallin H. Oaks, “In His Own Time, in His Own Way,” Liahona, Ogis 2013, 24.

5. Jeffrey R. Holland, “ Seves Ia blong Man I Stretem Hemwan”,” Liahona, Nov. 2018, 77.

6. Deved A. Bedna, “Quick to Observe,” Liahona, Dis. 2006, 17.

7. Gerrit W. Gong, “Kamp Faea blong Fet we i blong Yumi” Liahona, Nov 2018, 42,

8. Bonnie H. Cordon, “Stap Kam Wan Man blong Lukaot long Sipsip,” 75.

Eksampol blong Sevya

Sevya i bin rere from Ministri blong Hem. “God i anoentem Jisas blong Nasaret wetem Tabu Spirit,” mo afta Kraes i bin go aot mo mekem gud wok” (Ol Ak 10:38). Hem i bin “fulap long Tabu Spirit” mo “Tabu Spirit i bin lidim hem plante taem” (Luk 4:1) I tru se Kraes i bin go aot mo mekem gud wok bifo oli anoentem Hem wetem Tabu Spirit, be kasem Tabu Spirit mo gat raet ia blong kasem insperesen i bin wan impoten pat long Ministri blong Hem—semmak olsem wan impoten pat long yumi.

Invitesen blong Tekem Aksen

Taem yu go aot long wok blong givhan evri dei, prea blong lukaotem mo ansa long ol filing blong Tabu Spirit. !Tingbaot se Papa long Heven bae i blesem yu mo olgeta we yu givhan long olgeta taem yu mekem!